Yohana 7

UYeesu iiluta ku Yelusalemu ku shiwungo sha fiyumba

1Gaganile kishila ago, uYeesu wáyansa kijendela amajumbi aga Galilaya. Akhandi asigeene kiluta ku Yudeya, kwa kiiva avakhome va Vayahuudi vakhandi visakula kimubuda. 2Uluhaavi lwa shiwungo sha Vayahuudi isha fiyumba,#7:2 Shiwungo sha Vayahuudi isha fiyumba: Yimba iliswi ili mu Maswi aMahensa. lukhandi luvejeelile. 3Baheene avamaame va Yeesu vamujovela vaaja, “Wuukha panu ulute ku Yudeya, avamanyisiwa vaakho vagaaje amabikha gina wiigaha. 4Umuunu nda isakula kimanyikha kwa vaanu, asisenga insengo saakwe kwa wufiho. Nda owe ukwiliile kigaha goona aga, lino yiwonensaaga ku vaanu woona, baheene vakumanye.” 5Avanangʼana vaakwe woope vakhandi viijova ndeeno, kwa kiiva woope vasikhandi vikimuhuviilila uYeesu kiija yu Mukulusaaji. 6Baheene uYeesu wávajovela wáaja, “Uluhaavi lwangu lusinaafishe, leelo omwe mukwiliile kiluta uluhaavi loloona. 7Avaanu ava mu nyi soona isi vasikwiliile kivakhalalila omwe, leelo vikinikhalalila one kwa kiiva nikivabedela kiija, injendo saanave mbi. 8Lutaji yuumwe ku Yelusalemu ku shiwungo isha fiyumba. One nisiiluta, kwa kiiva uluhaavi lwangu lusinaafishe.” 9Umwene uYeesu wáganaga kilogola ago, wásigala mu nyi ya Galilaya.

10Leelo avanangʼana vaakwe pina vaaluta ku Yelusalemu ku shiwungo, woope uYeesu wáaluta, leelo asikhayiwonensiise bahawuvalafu. 11Baheene avakhome va Vayahuudi, vamusakula uYeesu pina vali ku shiwungo. Vavaposa avaanu vaajova, “Ali kwi umuunu yula?” 12Avaanu vinshi ava shipuga shila, vakhandi vipwepelana imola isa Yeesu. Avanji vakhandi viijova kiija, uYeesu muunu munofu, leelo avamonga vakhandi viijova kiija, uyo ikivajanga avaanu. 13Ndeeno, kusiina umuunu yuna akhandi ikimulogola uYeesu bahawuvalafu, kwa kiiva vavatiilaga avakhome va Vayahuudi.

UYeesu ikivamanyisa avaanu mu nanda imbaagule iya kifuunyila

14Mu nsiku isa paakhati naakhati ya shiwungo, uYeesu wáaluta, wáyinjila mu lukeeke lwa nanda imbaagule iya kifuunyila, wáyansa kivamanyisa avaanu. 15Baheene avakhome va Vayahuudi vaswigaga na kiyansa kilogola kijova, “Wuli, umuunu uyu akwiliile kimanya shihwana wuli goona aga, bila kiyimbila?” 16Baheene uYeesu wávajovela wáaja, “Amamanyiso gina nimanyisa gasili gangu, leelo gahumile kwa Nguluvi yuna anifiliishe kunyeenyu. 17Umuunu yoyoona yuna isakula kigaha gina ageene uNguluvi, ameenye kiija amamanyiso aga, gahumile kwa Nguluvi, khanji nisilogola kwa wutawulilwa wangu. 18Umuunu yoyoona yuna ilogola kwa wutawulilwa waakwe, ikiyisakulila uwutupikho waakwe yumwene. Leelo umuunu yuna isakula kimutupikha umuunu yuna amufiliishe, ilogola ga shiyooli, asiideha.”

UKilisito mukhome kishila uMusa

19UYeesu wáyitenekha kilogola wáaja, “Mumeenye kiija uMusa wávapeelaga avambuyeenyu indaji sa Nguluvi. Leelo kusiina umuunu yoyoona mu omwe, yuna ikisiyinatila indaji iso. Lino kwashi mwisakula kinibuda?” 20Ishipuga sha vaanu shamugomosesa shaajova, “Owe una lilungu! Wuli, yu naani yuna isakula kikubuda?” 21UYeesu wávagomosesa wáaja, “Nikhagahile ilibikha limo hela mu lijuva lya Sabaato, woona omwe mwaswigaga.#7:21 Yimba mu litaafili lya Yohana 5:1-15. 22Loleeli, uMusa wávalajisaaga omwe kivayinjisa ijando#7:22 Kivayinjisa ijando: Yimba iliswi Kiyinjila ijando mu Maswi aMahensa. avaswamu veenyu (hata nda avambuye vaveene vina vayansaaga ingʼoma iyi, pina uMusa asinayinse). Omwe muna ngʼoma iya kivayinjisa ijando avaswamu veenyu hata mu lijuva lya Sabaato. 23Nda mwijimba kisiyinatila indaji sa Musa, kivayinjisa ijando avaswamu veenyu mu lijuva lya Sabaato, lino kwashi mukinikhalalila one, kimuponia umuunu mu lijuva lya Sabaato? 24Musikhamuhigaji umuunu kwa gina giwonekha kunja, ila muhigaji umuunu kwa kiyinatila ishiyooli.”

Avaanu viposania viija uYeesu yu Mukulusaaji

25Baheene avaanu vanji ku Yelusalemu vayansa kiposania viijova, “Wuli, umuunu uyu asili yumwene yuna avakhome visakula kimubuda? 26Loleeli lino! Iminsiyaano ilogola bahawuvalafu, leelo aveene vasilogola shoshoona. Wuli, avakhome veesu vangava vihiiva kiija uyo yu Mukulusaaji yuna uNguluvi wátahisaaga kimufilikha?#7:26 Mukulusaaji yuna uNguluvi wátahisaaga kimufilikha: Kwa Shiyunaani yiyandiikhwe Kilisito. Yimba iliswi Kilisito mu Maswi aMahensa. 27Yisikwiliile kwa kiiva uMukulusaaji#7:27 UMukulusaaji: Kwa Shiyunaani yiyandiikhwe Kilisito. pina akhayinsa, kusiina umuunu yuna akhamanya kuna ahumile, leelo ose timeenye kuna ahumile umuunu uyu!”

28UYeesu wávagomosesaaga iliswi ili pina akhandi imanyisa mu lukeeke lwa nanda imbaagule, akhalogwele bahawuvalafu wáaja, “Shiyooli munimeenye one, khanji mukumeenye kuna nihumile. One nisikhayinsile kwa wutawulilwa wangu! Leelo uNguluvi yuna anifiliishe, wa shiyooli. Omwe musimumeenye. 29Leelo one nimumeenye kwa kiiva nihumile kunyaakwe, khanji yumwene yuna anifiliishe kunyeenyu.” 30Baheene avaanu awo vasakula kimukhata, leelo kusiina umuunu yuna akhandi akwiliile kijela kimukhata, kwa kiiva uluhaavi lwakwe lukhandi lusinaafishe.

Avasulukhali vifilikhwa kimukhata uYeesu

31Leelo avaanu vinshi vina vakhandi pala vamuhuviilila uYeesu. Avaanu awo vakhandi viijova kiija, “UMukulusaaji#7:31 UMukulusaaji: Kwa Shiyunaani yiyandiikhwe Kilisito. nda akhayinsa, akhagaha amabikha minshi kishila gina agahile uyu uYeesu?”

32Baaho aVafalisaayo vavapulikha avaanu vipwepelana amaswi ago, ulwa Yeesu. Lino aveene lumo na vatambule avakhome, vavafilikha avasulukhali, kiija vamukhate uYeesu. 33Baheene uYeesu wávajovela avaanu vala wáaja, “Nikhava noomwe kwa luhaavi lufupi hela, baheene nikhawuukha na kitina kwa yula yuna anifiliishe. 34Mukhanisakula leelo musikhanyaaga, khanji musikwiliile kiyinsa kuna nikhava nikwali.”

35Baheene avakhome va Vayahuudi vaposania vaveene vaajova, “Wuli, umuunu uyu iiluta kwi kuna ose tisikwiliile kimwaga? Wuli, isakula kiluta kwa Vayahuudi vina vapalankheene vali mu majumbi ga vina vasili Vayahuudi? Wuli, asiive iiluta kivamanyisa awo? 36Wuli, isakula kitujovela shi kwa maswi gaakwe gina iijova, ‘Mukhanisakula, leelo musikhanyaaga, khanji musikwiliile kiyinsa kuna nikhava nikwali’?”

UYeesu imanyisa ulwa Numbula uMunofu

37Ilisiku lya wudugo ilya shiwungo sha fiyumba, likhandi lisiku likhome. Baaho uYeesu wáyiima mu lukeeke lwa nanda imbaagule iya kifuunyila, wákhoosa ishawuti bahawuvalafu wáaja, “Omwe nda mukhawushiilwe amalenga, yinsi kunyangu mungʼwe.#7:37 Omwe nda mukhawushiilwe amalenga, yinsi kunyangu mungʼwe: Mu lisiku lya shiwungo sha fiyumba, aVayahuudi vakhandi vikimufuunya uNguluvi inoonya, na kiiva nu luuju kiija uNguluvi wávapeelaga avambuyaanave amalenga mu luvanda. Yimba mu litaafili lya Kihuma 17:1-7; Luvaso 20:1-11. UYeesu ikuviilisa kiija, umwene yu shisansa sha malenga aga shiyooli. 38AMayandikhwa aManofu giijova, umuunu yoyoona yuna ikinihuviilila one, akhava ni shisansa sha malenga kwa winshi mandu mu numbula yaakwe.”#7:38 Yimba mu litaafili lya Isaaya 44:3; 55:1; 58:11. 39UYeesu akhandi ilogola ulwa Numbula uMunofu, yuna avaanu woona vina vikimuhuviilila uYeesu, vakhamuposheela. Uluhaavi ulo, uNguluvi akhandi asinamufilishe uNumbula waakwe kuveene, kwa kiiva uNguluvi akhandi ashaanali kiwonensa bahawuvalafu uwutupikho wa Yeesu.

Avaanu vibagunkhana kwa kiiva ya Yeesu

40Avaanu avanji va shipuga shila vaganaga kipulikha injowo iso, vayansa kilogola viijova, “Shiyooli, umuunu uyu mukuwamalago yuna timuheepile kihuma kwa Nguluvi.”#7:40 Yimba mu litaafili lya Luuju lwa Ndaji 18:15-22. 41Avaanu avanji vaajova, “Umuunu uyu yu Mukulusaaji.” Leelo avanji vaajova, “Ndaali, uMukulusaaji yuna uNguluvi wátahisaaga kimufilikha#7:41 UMukulusaaji yuna uNguluvi wátahisaaga kimufilikha: Kwa Shiyunaani yiyandiikhwe Kilisito. asikwiliile kihuma ku nyi ya Galilaya. 42Wuli, aMayandikhwa aManofu gasiijova kiija uMukulusaaji#7:42 UMukulusaaji: Kwa Shiyunaani yiyandiikhwe Kilisito. akhahuma mu shikholo sha mutwa uDawudi?#7:42 Shikholo sha mutwa uDawudi: Yimba iliswi Dawudi mu Maswi aMahensa. Khanji kiija akhasawa ku Betelehemu, ku lijumbi lina uDawudi wásawaagwa?”#7:42 Yimba mu litaafili lya 2 Samweli 7:12; Mikha 5:2. 43Ndeeno, avaanu vabagunkhana kwa kiiva ya Yeesu. 44Avanji visakulaga kimukhata, leelo kusiina umuunu yuna akhandi akwiliile kijela kimukhata.

Avakhome va Vayahuudi vasikimuhuviilila uYeesu

45Kuwudugo avasulukhali vaatina khanji kwa vatambule avakhome na Vafalisaayo, vasamukhata uYeesu. Lino vavaposa vaajova, “Kwashi musamukhata uYeesu na kimuleeta kunyeesu?” 46Avasulukhali vala vavagomosesa vaajova, “Kusiina umuunu uyunji yuna akwiliile kilogola ngaja shina ilogola umuunu yula.” 47Vavaposa vaajova, “Wuli, wávajanga na yuumwe? 48Wuli, akwali umuyimililaaji yoyoona awu uMufalisaayo hata yumo, yuna wámuhuviilila? 49Kusiina, leelo shi shipuga hela sha vaanu vina vasisimeenye indaji sa Musa, vaveene vina vikimuhuviilila. Ava, vayijiilwe.”

50Baheene uNikodeemu, umunyaayumo wa vakhome wa Vafalisaayo, yuna ilisiku limonga paashilo wálutile kwa Yeesu, wávaposa avayine wáaja, 51“Wuli, indaji seesu sitawula kimuhiga umuunu pina tisinaatale kimupuliisa tangusiina na kimanya gina wáagaha?” 52Aveene vamugomosesa uNikodeemu vaajova, “Wuli, na yuuwe uhumile ku Galilaya? Luta uyimbe khanji wunofu aMayandikhwa aManofu, baheene usiimanye kiija kusiina umukuwamalago yuna akwiliile kihuma ku Galilaya.” [53Baheene avaanu woona vaawuya kunyaanave.

Currently Selected:

Yohana 7: Shisangu

Highlight

Copy