Marcos 5

Gerasa jojo o̧'wo̧ luwo̧nö sulabedö tjö̧jökwenö Jesús a'dewö loina wene

1Ikenama Jesúsma o̧pesobu badeibö pebibö öba̧ja̧di̧ waisachadökwö ichibijetö, gadareno jojodö tjitebonö. 2Jesúsma, isowitjö meibena bakwo̧, o̧'wo̧ luwo̧nö sulabedö tjö̧jökwema te'ada̧lijetö, wobinadönö tjödinelö i̧lȩdo̧elö ichajo̧. 3Ja'yubeda jo̧ba ö̧jina yöta̧la. Jo̧bama i̧lȩdo̧nö, wobiakiju ba̧jena ji̧abina. Jojodöma, jo̧banö yö̧bebö tjödo jö̧tja̧lijayonö juluwo̧obetjö̧ 'dii̧ jawanö yö̧ekwabi yö̧bebö tjödökenanö ichejekwijetö. 4Ba̧kwȩlö̧jatebö 'dii̧ jawanö ömamijunöbi ömasapiyanöbi yö̧beba̧lö tjödijayonö juluwiabijetö, yelösöda. Ömamijunö yö̧ekwabi 'döbekwa̧lö lobiabijetö. Ja̧danö, ömasapiyanö yö̧ekwabi kwabö lobiabijetö. Jo̧bama jwiinö ujuluwobetjö̧ bakwo̧bi deijetö jo̧banö ödöyöto jö̧ba̧lo̧ma. 5Ja̧danö, jo̧bama yelösöda sulabenö ji̧abijetö. Ba̧kwȩlö̧jatebö, mölebi yö̧tebi mö'ösa'obebi i̧lȩdo̧bebi labinö kwebachibö jwöbeba̧lijetö. Ja̧danö, itedada inawanö 'do'dobakwawö kwebachiabijetö.

6Ja̧danö, jo̧bama Jesúsnö ödö ö̧jobe edinö, omönanö ö̧jobekwö ö'öbakwawö, Jesús öba a'o u̧yu̧ju̧ki̧junö bamatijetö, nijakwö bȩbachibö. 7-8Ikenama Jesúsma jö̧ba̧lijetö, o̧'wo̧ luwo̧nö sulabo̧ jo̧nö webö:

—O̧'wo̧ luwo̧nö sulabo̧, ökwönö weta. ¡Bitetjö labebaji!— webijetö. Jejenö weökwe o̧'wo̧ luwo̧nö sulabo̧ jo̧ma labinö jwöbeba̧lö jö̧ba̧lijetö, jojo aatjö:

—Jesús, Inesö La'aka Luwo̧ Dios Itji̧ ¿dakwö ja̧köbobö kwichaja̧da ötjönöma? Jweinö yöba̧li, Dios öba a'otjö, ötjönöma sulabenö niinö ja̧köbököma. Dios iminö atebatjö, sulabenö inia tjötinö ja̧bökönuwi ötjönöma— jwöbeba̧lö abebijetö o̧'wo̧ luwo̧nö sulabo̧ jo̧ma Jesúsnöma.

9Jejenö aebökwe, Jesúsma abebö a̧ja̧kwijetö:

—Ökwöma ¿dakwö kwimikwa?— abebö a̧ja̧kwökwe, jo̧bama atadijetö:

—¿Ötjöka? Ötjöma Ba̧jekwadö mikwo̧sa. Ökwödö, bite o̧'wo̧ luwo̧nö sulabedö ja̧döma ba̧jekwadö dö̧jobetjö̧ jejenö ötjabiwö̧sa, Ba̧jekwadö, jö̧ba̧lö— atadijetö.

10Ikenama jo̧ba o̧'wo̧ luwo̧ sulabo̧ma o̧'wo̧ tjo̧bekwibö abebijetö Jesúsnö:

—Jelobe webö lobökönuwi ökwödönö, ödöma—jö̧ba̧lö, abebijetö.

11Ja̧danö, jobe Jesús ö̧jemi pjeanö, mö'ösa'onö ja̧nö, ba̧jekwadö ku̧si̧dö kwijadötö. 12Ja̧danö, o̧'wo̧ luwo̧nö sulabedö ja̧döma, ku̧si̧dönö edö Jesúsnö abebijadötö:

—Edi. Jobadö ku̧si̧dönö tedachibo webi— abebijadötö. 13Jejenö atjebökwe atjebi̧danö webijetö Jesúsma. O̧'wo̧ luwo̧nö sulabedö ja̧döma jojotjö latjebajobö webijetö. Weiawö̧ jojotjö labekwibijadötö. Ikenama, jojotjö labekwibö tebachibijadötö jobadö ku̧si̧dönö. Jobadöma dos mil jenanö ba̧jekwijadötö, ku̧si̧döma. Ikenama ku̧si̧dö, sulabedö tjö̧jawö̧ma, okobe deinö mö'ösa'obetjö yutubajö juluwanö ö'öbakwawö o̧pesobunö tjoduwakwawibö jödönö o̧bawö wobijadötö.

Jesús o̧'wo̧ luwo̧nö sulabedö tjö̧jökwenö yöawina wene: —Kwömöledönö yökawo Dios ökwönö lȩlö̧jino pjaatina— jö̧ba̧lö

14Ikenama ku̧si̧dönö te'ada̧lakwawa jojodöma, ja̧ baledobe edajadö juluwanö 'yi̧jadötö comunidadbebi ju'wi o̧diju jobebi jojodönö yöbawö. Jobadö yötjawi̧ a̧ja̧kwö jojodöma, ¡Dedajo! jö̧ba̧lö, Jesús ö̧jobekwö 'yi̧jadötö. 15Ichibö o̧'wo̧ luwo̧nö sulabedö tjö̧ökwenö tjedemi otiwanö ö̧bobe edijadötö. Kamijido̧ otiwanö 'dubawajo̧, o̧'wo̧ jwiö̧kö̧nö ichejekwo̧ ö̧bobe edijadötö. Jo̧banö eda̧lö yebabinö yöba̧lakwawijadötö, ¡Ayö! ¿Dakwö otiwanö baibajökwejö? jö̧ba̧lö.

16Ikenama jo̧banö baledaja̧ edajadöma yöbawijadötö o̧'wo̧ luwo̧nö sulabedönö labebö loajökwenö baledaja̧bi, ku̧si̧dönö baledaja̧bi. 17Jojodöma ja̧ baledaja̧ yötjawi̧ tja̧ja̧kwajabetjö̧, Jesúsnö 'ya̧wibö webö lobijadötö tjitebotjö. 18Jejenö webö lotjökwe Jesúsma isowinö a̧jibijetö, ȩwa̧jobö. Isowinö a̧jibena o̧'wo̧ luwo̧nö sulabedö tjö̧jökwenö labebö loajökwema ichibö, Jesúskwö nöinö ȩwa̧jotö jö̧ba̧lö abebijetö Jesúsnö, öbibö ȩwa̧jobö. 19Jejenö aebijayonö öbibijökötö Jesúsma, jo̧ba itekwö ȩwa̧jobö. Jo̧banöma jö̧ba̧lijetö:

—A̧ja̧kwitjö. Kwömöledö tjuju̧kwobe da̧ji okobe deinö yökawo Duluwo̧ Dios otiwanö, lȩlö̧jino edö otidaja̧ ökwönö— webijetö. 20Jejenö weökwe, jo̧bama ȩwa̧jijetö. Ȩwa̧jö yöbawö 'yi̧jetö okobe jwiinö jojodö tjuju̧kwobe, diez comunidadesnö. Jobe yöbawijetö Jesús jwiinö otiwanö pjaataja̧ itenöda. Okobe deinö jo̧ba yöawi̧ a̧ja̧kwajadöma, ¡Ayö! ¿Dakwö otiwanö baibanö otidinökwejö? jö̧ba̧lö, omukwatijadötö.

Jesús otidö pjaatina wene, Jairo itjijunöbi, bakwuju Jesús ökamijido̧ mabujunöbi

21Ikenama Jesúsma öba̧ja̧di̧ waisachadökwö isowinö a̧jibajo̧ ȩwa̧jö pebibijetö o̧pesobu bakwachödöbe. Jödö lamatö Jesúsma isowitjö meibö o̧pesobu ö'öbönö ö̧jobekwö ba̧jekwadö ichö ko̧ko̧kwijadötö. 22Ikenama bakwo̧, Jairo mikwo̧, judío jojodö ba̧nö tja̧ja̧kwa̧leju la'aka luwo̧ma, Jesús ö̧jobekwö 'ya̧wibijetö. Ichibö, Jesúsnö edö, öba a'o u̧yu̧ju̧ki̧junö bamatijetö nijakwö bȩbachibö. 23Jesúsnö abebijetö:

—Chuluwo̧, ötjö chitjijuma jwiinö jö'wöchobe. Ida̧ökö ö'wö bajibakobe. Lȩlö̧jino edö pjabatitjö. Chejube ichi jobujunö maköbo jö'wöchi̧ jwiamachibobe 'yajibajinö— abebijetö.

24Jejenö aebökwe itekwöda 'yi̧jetö ejube. Ju'wedöbi ba̧jekwadö, ajayi ichajadöma, ökömanö 'yi̧jadötö. 'Ya̧nö isayunö bakobe 'diinö tjisawijadötö Jesúsnöma. 25Ja̧danö tji̧'yobe jelujubi 'yi̧jotö. Ja'yubeda yöta̧la, jobuju jö̧jinama. Jobujuma iwo suli̧ waekwabinö ö'wöchö ji̧abijotö, jökwösobu nöinö meobe. Lekwe o̧biya a̧li̧nösamutjö döbölatajanö ö'wöchijotö. 26Ja̧danö, ba̧jekwadö dö̧tö̧lö̧döma lekwe otidijadötö jobujunöma. Lekwe tjotidobetjö̧ jobujuma usula emawijotö yelösöda. Tjotidijayonö waekwijetö. Ju̧kwa baladabi 'dö̧bekwajijotö ba̧jekwadö dö̧tö̧lö̧dönö weba̧lakwawö. Ja̧danö, dö̧tö̧lö̧döma lekwe tjotidijayonö ajayinö jö'wöchinemi o̧penönö ö'wöchijotö jobujuma.

27Jobujuma, Jesús otidaja̧ yötja̧lakwawi̧ a̧ja̧kwajaju, jobujubi 'yi̧jotö Jesús ökömanö. 'Ya̧nö Jesús oma'akwöchobenö 'ya̧wibö ökamijido̧nö mabijotö, 28bite ökamijido̧nö matitjö̧bi chö̧bibajena, jö̧ba̧lö. 29Ja̧danö, Jesús ökamijido̧nö majemi suli̧ jöwaekwabijama jwiinö baibijetö. Ja̧danö, jökwösobu mei̧ma jwiinö baibijetö. Jobujuma waisachibijotö, Suli̧ chöwaekwabi̧ma söawajabe, jö̧ba̧lö.

30Ja̧danö, Jesúsma jobuju ite ökamijido̧ majaja̧ma edököjayonö waisijetö, Isabenö chujulunö ja̧bö baibajabe, jö̧ba̧lö. Jo̧kwaiökwe, jalachibö abebö a̧ja̧kwijetö jojodönö:

—¿Tida ötjö chökamijido̧nö mabajo̧ma?— 31abebö a̧ja̧kwiawö̧, iteda öba̧ja̧di̧ waisachadöma atadijadötö:

—¿Dakwö döwaisobö ökwö kwökamijido̧nö mabajo̧nöma, ba̧jekwadö isayunö bakobe 'diinö tjisawö di̧'yobema? Kabatökönö jelo̧bi jelujubi ökwönö matjena— atadijadötö.

32Ikenama Jesúsma jojodönö eda̧labijetö iteda ökamijido̧nö mabajujunö edibotö jö̧ba̧lö. 33Suli̧ jöwaekwabi söbawajajuma waisijotö isunöda ja̧aja̧ma. Jo̧kwaobetjö̧ Jesús ö̧jobekwö 'ya̧wibö Jesús öba a'o ju̧yu̧ju̧ki̧junö bamatö nijakwö bȩjachibijotö, yebabinö tjö̧bawö. Ikenama jweinö yöba̧lijotö, jobuju majaja̧ma. 34Jejenö yöja̧lökwe, Jesúsma jö̧ba̧lijetö jobujunöma:

—Chitjiju, otiwanö ötjönö kwo̧'wo̧ kwöwana̧lajabetjö̧, kwö̧bibajabe. Tjo̧wi̧ kwejube da̧ji, kwo̧'wo̧ otiwanö ösödö. Kwö'wöchi̧ma jwiinö baibajabe. Yemidanö ja̧ kwö'wöchi̧ma kwö'wöchökakwujuja—jö̧ba̧lijetö Jesúsma.

35Jesúsma ina jobujunö yöa̧lonö ju'wedöma ichibijadötö judío jojodö ba̧nö tja̧ja̧kwa̧leju la'aka luwo̧ Jairo, tjemu ö'wöchuju jabe'donöma edö. Jobadöma Jaironö yöbawijadötö:

—Ökwö kwitjijuma ida̧ökö ö'wö bajibajabe. Jo̧kwaobetjö̧ bite ba̧ja̧dakwawa jojonöma akeba̧la, ichoböma. 36Ja̧danö, Jesúsma, jobadö yötjawi̧ a̧ja̧kwö jö̧ba̧lijetö Jaironö:

—Jairo, kwo̧'wo̧ tjo̧kekwa. Ötjönöda kwo̧'wo̧ wana̧litjö—jö̧ba̧lijetö. 37Ikenama, Jesúsma okobe deinö jojodönö itekwöda tji̧'yobö öbibökönö, wa̧medukwanöda öbibö 'yi̧jetö, Pedro, Jacobo, Jacobo öjawo̧ Juan mikwadönöda. 38Ikenama Jairo ejunö ichibö, Jesúsma edijetö ba̧jekwadö labinö tjubudekwabobe. 39Jeju tebachibö abebö a̧ja̧kwijetö jobadönö:

—¿Tajawedö kwubudekwabiduwa? Bisu tjemuma ö'wö babibajökuju. Aba̧löda aba̧luju—jö̧ba̧lijetö. 40Jejenö jö̧a̧lawö̧ jobadöma, Itema omöna yöba̧lo̧, wajwibo̧, jö̧ba̧lö, obijadötö. Ikenama Jesúsma, obajadönöma a̧petube a'dewö lobibö, itekwöda ichajadökwöda, tjemu jabe'dokwöda jojo'dokwöda tjemu jö̧bobekwö 'ya̧wibijetö. 41'Ya̧wibajo̧ Jesúsma tjemu jömamunö do̧batö jö̧ba̧lijetö, jobadö tjiwenenö:

—Talitá kumi— jö̧ba̧lijetö. Jejenö jö̧a̧linama, Tjemu ökwönö weta, A̧laibi, jö̧ba̧lö, yöawobe. 42Jejenö jö̧a̧loko jobujuma, a̧li̧nösamutjö dötölataja o̧biya juna̧lujuma, omönanö a̧laibö jamatö kwebachijotö. Jojodöma jejenö otidaja̧ edö:

—¡Ayö! ¿Dakwö otidaja̧jö?— jö̧ba̧lö eda̧lijadötö. 43Ikenama Jesúsma webijetö jobadönöma ju'wedönö yötjawokobö. Ikenama webijetö jukwobö tjiyobö tjemunö.

Currently Selected:

Marcos 5: WPC

Highlight

Copy