Mateo 13

Batjo otido̧nö Jesús wanedö yöawina wene

1Iya̧da möle, Jesúsma jejutjö labebö, o̧pesobu ö'öböbe 'ya̧nö öbamatinobe. 2Ikenama, jojodö yelösöda ba̧jekwadö ichibö tjoko̧ko̧kwachibiökwe, jobadö o̧pesobu ö'öbönö tjö̧jonö, Jesúsma isowinö a̧jibö öwamatinobe, jobetjö jojodönö yöawakobetjö̧.

3Jesúsma jojodönö wanedö yöawinobe baikwö:

—Chömöledö, baikwö wanedö yötawa: Bakwo̧ batjo otido̧ma ödebiya ikwö kweachinobe, 4ja̧danö ödebiya ikwenama, ikwaja̧ ödebiyatjö mananö meinobe. Ja̧danö, ja̧ mananö meaja̧dema, pji̧yu̧ma ichibö tjukwinobe. 5Ja̧danö ikwaja̧tjö, inakoena, niji ja'yuwena meinobe. Jobema nijima ja'yuwobetjö̧, ödebiyama juluwanö pokwinobe, 6jo̧kwaijayonö ja̧wo̧ laebenama, ja̧ pokwaja̧ma tubetjö, ja̧danö bö'dia okwanö yutokobetjö̧, juluwanö kököachibinobe pokwaja̧ma. 7Ja̧danö, ikwaja̧tjö sȩa'wonö meinobe, ja̧danö sȩi̧bi pokwobetjö̧, ikwaja̧ ödebiyama otiwanö pokwinokobe, ja̧danö wa̧ji̧ma wa̧jinokobe. 8Jo̧kwaijayonö, niji otiwenabi meinobe ikwaja̧ ödebiyama, ja̧danö jobe meajabema, otiwanö pokwinobe, ja̧danö otiwanö wa̧jinobe. Jelö'yebiyama cien jenanö ödebiya wa̧jinobe, ja̧danö jelö'yebiyama sesenta jenanö ödebiya wa̧jinobe, ja̧danö jelö'yebiyama treinta jenanö ödebiya wa̧jinobe. 9Yötawi̧ma okobe deinö otiwanö tja̧ja̧kwobö jo̧be—

jö̧ba̧lö yöawinobe Jesúsma.

Wanedö yöawakwawa jawa Jesús iteda öba̧ja̧di̧ waisachadönö wanedö yöawina wene

10Jemi ikenama, Jesús öba̧ja̧di̧ waisachadöma Jesús ö̧jobekwö ichö abebö tja̧ja̧kwinobe:

—Jojodönö yökawenama, ¿tajawedö labebö loawa jwiinö sule wanedö yöbawöda yökawobeda?—

jö̧ba̧lö. 11Jejenö atjebökwe, Jesúsma atadinobe:

—Diosma ökwödö chöba̧ja̧di̧ waisachadönö iyinobe, jojodö wajwitji̧ jawa, mölejȩbe jo̧ Dios la'aka luwo̧ ö̧jakwa̧ jawa kwöwaisaduwobö, jo̧kwaijayonö ju'wedö jojodönö jejenö iyinokobetjö̧, wanedö yöbawöda yötawobe jobadönö. 12Jau chömöledö, ida̧ökö waisadönöma, jemi tupakwö tjöwaisobö iyakwo̧ Diosma, nöinö otiwanö tjöwaisakobetjö̧. Jo̧kwaijayonö wajwibadöma tupakwö wajwitjakwedö, ja̧danö ja'yubeda tjöwaisi̧bi 'döebakobe Diosma. 13Jo̧kwajabetjö̧, jobadönö wanedö yötawobe chömöledö, ja̧ti̧ tjedijayonö, otiwanö tjedokobetjö̧, ja̧danö tja̧ja̧kwijayonö, otiwanö tja̧ja̧kwokobetjö̧, ja̧danö okwa jawama do̧tjatokobetjö̧. 14Dios yöawi̧ yöbawina Isaías iwȩyudinama jobadönö badekwachobe chömöledö. Baikwö iwȩyudinobe Isaíasma:

Bidöma isabenö tja̧ja̧kwobe, jo̧kwaijayonö otiwanöma a̧ja̧kwöködö, ja̧danö tjedijayonö, waisachibanöma edöködö, 15tjomukwati̧ma omukwatöködö batjibinobetjö̧, ja̧danö tjölakiyu tumachajawö̧ batjibinobetjö̧, ja̧danö tjöbajale yi̧batadö batjibinobetjö̧. Jejenö baibinökötjö̧ma, otiwanö tjedo jö̧tja̧lena, ja̧danö otiwanö tja̧ja̧kwo jö̧tja̧lena, ja̧danö otiwanö tjomukwato jö̧tja̧lena, ja̧danö sulabenö tjomukwati̧ kabatibö, ötjönö tjösödena, jejenö tjösödi̧tjö jobadö tjö'wöchi̧ otidö lotakobetjö̧,

jö̧ba̧lö laebobe Isaías iwȩyudinama.

16Jo̧kwaijayonö ökwödö chöba̧ja̧di̧ waisachadönöma badekwachokobe Isaías iwȩyudinama chömöledö. Ökwödöma kwo̧'wo̧ ösöwanö ja̧döja, kwöbajalenö otiwanö kwedaduwobetjö̧, ja̧danö kwölakiyunö otiwanö kwa̧ja̧kwaduwobetjö̧. 17Isabenö yötawaduwakwö chömöledö, Dios yöawi̧ yöbawinadö ja̧danö ju'wedö Dios ömöledöma ökwödö kwedaduwobedanö tjedobö nöinö tjösödinobe, ja̧danö ökwödö kwa̧ja̧kwaduwi̧danö tja̧ja̧kwobö nöinö tjösödinobe, jo̧kwaijayonö tjedobö ja̧danö tja̧ja̧kwobö jwiinobe, damötjö debö tji̧'yinobetjö̧—

jö̧ba̧lö yöawinobe.

Batjo otido̧nö wanedö Jesús labebö lobö yöawina wene

18Baikwö labebö lobö yötawaduwakwö batjo otido̧nö wanedö yötawaja̧ma, kwa̧ja̧kwaduwobö:

19—Ödebiya mananö meaja̧ ödebiya badekwachi̧ma, Dios la'aka luwo̧ ö̧jakwa̧ wene tja̧ja̧kwijayonö otiwanö a̧ja̧kwöködönö badekwachobe. Ja̧ wene tja̧ja̧kwenama, inesö sulabo̧ma ichö ja̧ wene jobadötjö 'döebobedanö ichejekwa, tjomajadenö pokwapji jö̧ba̧lö. 20Ja̧danö, inakoena meaja̧ ödebiya badekwachi̧ma, ja̧ wene tjo̧'wo̧ ösöwachibanö a̧ja̧kwadönö badekwachobe. 21Jobadöma ajayinö tjo̧'wo̧ ösöwachibanö tja̧ja̧kwijayonö, okwanö söibokobe a̧ja̧kwadö, ja̧danö lekwema ösödöködö. Wene baibena, ja̧danö usula tjemawenama, juluwanö kabatibadö. 22Ja̧danö, sȩa'wonö meaja̧ ödebiya badekwachi̧ma, Dios la'aka luwo̧ ö̧jakwa̧ wene a̧ja̧kwö tjösödijayonö, böjȩ jawa nöinö omukwatadönö, ja̧danö balada tjemobö isakwadönö badekwachobe. Jobadöma ja̧ jawa nöinö tjomukwatobetjö̧, otiwanöma tjöda̧peachokobe, ja̧danö tjo̧'wo̧ luwo̧ wa̧ji̧ jawama otiwanöma wa̧jokobe. 23Ja̧danö, niji otiwena meaja̧ ödebiya badekwachi̧ma, otiwanö a̧ja̧kwö, okwa jawa do̧batadönö badekwachobe. Jobadöma Dios la'aka luwo̧ ö̧jakwa̧ wene otiwanö a̧ja̧kwö okwa jawa do̧tjatobe, ja̧danö tjo̧'wo̧ luwo̧ wa̧ji̧ jawama isabenö nöinö wa̧jobe. Wanedö yötawa: Ju'wedöma treintanö ödebiya wa̧jawö̧, ju'wedöma sesentanö wa̧jawö̧, ja̧danö ju'wedöma ciennö wa̧jawö̧—

jö̧ba̧lö labebö lobö yöawinobe Jesúsma.

Sula'wokwö, trigo jawakwö pokwi̧ Jesús wanedö yöawina wene

24Jesúsma ju'wi wanedö yöawakwawabi yöawinobe, baikwö:

—Mölejȩbe jo̧ la'aka luwo̧ ö̧jena jawama baikwö wanedö yötawa: Bakwo̧ batjo luwo̧ma, trigosade otiwi̧ ödebiya öbatjonö ikwö ujuninobe. 25Jo̧kwaijayonö, yö̧te okobe deinö tjabonö, jo̧ba öpöjojoma ichö, sula'wosa'ye ödebiyabi ikwö ujuninobe, trigosa'ye 'da̧de pokwobö. Ja̧danö ikwajo̧, ȩwa̧jinobe. 26Batjotjö trigosa'ye pokwenama, ja̧danö jamatö wa̧jenama, sula'wosa'ye jawabi laebinobe. 27Ja̧danö, batjo luwo̧ ömöayedöma jo̧ba ö̧jobekwö ichö abebö tja̧ja̧kwinobe: Duluwo̧, sule otiwadeda ikwö kwujuninobe, ¿jö̧tö? Jo̧kwajabetjö̧ ¿tajawedö sula'wosa'ye pokwobeda? jö̧ba̧lö. 28Atjebökwe: Chöpöjojodötjö bakwo̧ sula'wosade jawa ikwö ujuninobe, jö̧ba̧lö atadinobe. Jejenö atadiawö̧, ömöayedö abebö tja̧ja̧kwinobe: ¿Sula'wo 'yebö lodobö kwösödiji̧? jö̧ba̧lö. 29Atjebökwe, tjuluwo̧ma atadinobe: 'Yebö lobökönaduwi, sula'wo 'yebö loköbaduwitjö̧ma, trigosa'yebi 'yebö loköbaduwapji jö̧ba̧lö. 30Wainö trigosa'yekwö, sula'wosa'yekwö bakobe pokwobö jo̧be, wa̧ji̧ tjemakwa̧ möle baibenanö kabatö. Otidadönö wa̧ji̧ tjemobö wetenama, abönö sula'wosa'ye 'yebö lotjobö wetocha, ja̧danö ko̧ko̧dö, di̧batibö juwö lotjobö wetocha, ja̧danö jejenö sula'wo juwö lobajadö, trigo ödebiya emö, ko̧ko̧dö trigo jawa lödaweju okwa tjödobö wetocha—

jö̧ba̧lö wanedö yöawinobe Jesúsma.

Mostaza ötjabi̧ jawa Jesús wanedö yöawina wene

31Jesúsma ju'wi wanedö yöawakwawabi yöawinobe, baikwö:

—Baikwö wanedö yötawa Dios la'aka luwo̧ ö̧jakwa̧ jawama: Bakwo̧ batjo otido̧ma, mostaza ötjabi̧sade öbatjonö ödinobe. 32Ja̧ mostazasadema ju'wisadetjö nijakwönönö ja'yuwadejayonö, pokwenama jelötjetjö bajalekwönönö nöötje baibötje towi baibanö, ja̧danö pji̧yu̧ma ichö, jowinö tja'do̧ otidadö—

jö̧ba̧lö wanedö yöawinobe Jesúsma.

Ye'yeachi̧ jawa Jesús wanedö yöawina wene

33Jesúsma ju'wi wanedö yöawakwawabi yöawinobe, baikwö:

—Bakwuju pan otidujuma, ja'yubeda ye'yeachi̧ jawakwö, nöinö harina jawasa'bekwö wiwoduju. Ja̧danö, ye'yeachi̧ jawa ja'yubeda jiwiwodijayonö, okobe jwiinö pansa'be ye'yeachobe—

jö̧ba̧lö wanedö yöawinobe.

34Okobe jwiinö ja̧ jawa wanedö yöawakwawa jojodönö yöawinobe Jesúsma, wanedökönöma ja'yubebi yöawinokobe jobadönö. 35Jejenö yöawi̧ma, Dios yöawi̧ yöbawina iwȩyudinadanö badekwachinobe, baikwö laebobe iwȩyudinama:

Jojodönö yötawenama, wanedö yötawocha jobadönö, ja̧danö Dios böjȩ otidinobekwö baikwö bajalenö jojodö la'akatjöda wajwitjina jawa jobadönö yötawocha,

jö̧ba̧lö laebobe.

Sula'wo jawasa'ye wanedö yöawakwawa Jesús labebö lobö yöawina wene

36Jesús jojodö ko̧ko̧kwadönö junibö, o̧do okwa teachenama, Jesús öba̧ja̧di̧ waisachadöma ichö atjebinobe:

—Sula'wosa'ye wanedö yökawaja̧ma, labebö loköbobö jö̧da̧la—

jö̧ba̧lö atjebinobe. 37Jejenö atjebökwe, Jesúsma atadinobe:

—Batjo otido̧ otiwi̧sade ikwo̧nö badekwachi̧ma, ötjö jojo baibanö jeminökwenö badekwachobe. 38Ja̧danö, öbatjo badekwachi̧ma, böjȩ badekwachobe, ja̧danö otiwade ödebiya badekwachi̧ma, webö yöbawo̧ Dios ömöledönö badekwachobe. Ja̧danö, sula'wo jawasa'ye badekwachi̧ma, inesö sulabo̧ Awetja ömöledönö badekwachobe, 39ja̧danö sula'wosa'ye ikwö juno̧nö badekwachi̧ma, Awetjanö badekwachobe. Ja̧danö, batjonö wa̧ji̧ emö tjotidi̧ badekwachi̧ma, 'dö̧ibaji̧ möle jawa badekwachobe, ja̧danö batjonö wa̧ji̧ emö otidadönö badekwachi̧ma, ángelesdönö badekwachobe. 40Jau chömöledö, sula'wo ko̧ko̧dibö ökwölanö tjujuwi̧danö, 'dö̧ibaji̧ möle 41ötjö jojo baibanö jeminökwema chömöayedö ángelesdönö wetocha. Ja̧danö, jobadöma yöbawö wetena jojodötjö okobe deinö jojodö sulabenö ja̧tjobö ja̧badönöbi, okobe deinö ju'wedö sulabenö ja̧badönöbi ko̧ko̧dö, 42ökwöla nöolabe ikwö lotjakobe, jobe ja̧nö budekwabinö, tjo'ye kikisö ja̧bö usula tjemawakobetjö̧. 43Jemi ikenama, Dios ömöledöma tjabe'do yöbawö weenatjö jawo̧ idejati̧danö otiwanö tjidejatakwedö. Yötawi̧ okobe deinö otiwanö tja̧ja̧kwobö jo̧be—

jö̧ba̧lö yöawinobe Jesúsma.

Tupakwö Jesús wanedö yöawina wene

44Tupakwö wanedö yöawinobe Jesúsma:

—Baikwö wanedö yötawa mölejȩbe jo̧ la'aka luwo̧ ö̧jena jawama: Jojoma ka̧putjö inesö mikwawi̧ jawa öbadekwajinobe, ju'wedö ajayinö tojö tjujunina jawama. Jejenö badekwajo̧, yemidanö tojö, o̧'wo̧ ösöwachibanö okobe jwiinö ujuna̧li̧ mikwanö iyö lobajo̧, ja̧ ka̧pu midö eminobe, öbadekwajina jawa, inesö mikwawi̧ jawa ujuna̧lakobetjö̧.

45Ja̧danö, ju'wibi baikwö wanedö yötawa mölejȩbe jo̧ yöbawö weena jawama: Bakwo̧ perla ötjabi̧ nöinö mikwawi̧ jawasane emawa luwo̧ma, inesö otiwane perla isakwobe, emobö. 46Jelenetjö bajalekwönönö inesö otiwane badekwajo̧, okobe jwiinö ujuna̧li̧ mikwanö iyö lobajo̧, ja̧ne midö eminobe, ja̧neda nöinö mikwawi̧ jö̧ba̧lö.

47Ja̧danö, ju'wibi baikwö wanedö yötawa mölejȩbe jo̧ yöbawö weena jawama: Maya jwobö otidadöma o̧pesobutjö maya jwotjinobe, ja̧danö nöinö ba̧i̧ ju'wedötjöbi do̧tjatinobe. 48Ja̧danö, maya su̧'bȩ baibenama, o̧pesobu ö'öbökwö tötjebinobe, ja̧danö o̧pesobu ö'öbönö tjöbamatinobe, ba̧i̧ otiwadönö sulabedötjö böjö tjödobö. Ja̧danö, ba̧i̧ otiwadönö wi̧lȩyu̧ okwa tjaninobe, jo̧kwaijayonö sulabedönö ikwö lotjinobe. 49Jobekwö baledakobe 'dö̧ibaji̧ mölema. Ángelesdöma jojodö otiwadötjö sulabedönö böjö 'da̧batö tjujunakobe, 50ja̧danö böjö 'da̧batö tjujunajawö̧nö ökwöla nöolabe ikwö lotjakobe, jobe budekwabinö tjo'ye kikiso ja̧bö usula tjemakwakobetjö̧—

jö̧ba̧lö yöawinobe Jesúsma.

51Jejenö yöbawajo̧, iteda öba̧ja̧di̧ waisachadönö:

—Ökwödönö yötawaja̧ jawama, ¿otiwanö kwa̧ja̧kwaduwaji̧?—

jö̧ba̧lö, Jesús abebö a̧ja̧kwawö̧:

—Jau—

jö̧ba̧lö tjatadinobe.

52Tupakwö yöawinobe Jesúsma:

—Chömöledö, Moisés iwȩyudina jawa ba̧ja̧dadötjö mölejȩbe jo̧ yöbawö weena jawabi waisachibajadöma, isabenö otiwanö tjöba̧ja̧dakwedö, damötjö tjiwȩyudina jawa nöinö mikwawi̧ jawakwö, 'yayi̧ jawa tja̧ja̧kwaja̧ jawakwö otiwanö tjöba̧ja̧dobetjö̧—

jö̧ba̧lö. 53Ja̧ wanedö yöawakwawa jawa yöbawajo̧, Jesúsma jobetjö laebinobe.

Nazarettjö Jesúsnö tjöpöjödina wene

54Jemi ikenama, Jesúsma yemidanö iteda ajayinö itebobe ȩwa̧jinobe, ja̧danö judío jojodö ba̧nö tja̧ja̧kwa̧leju tebachö, jojodönö yöawinobe. Yöawiawö̧, jojodöma tjöbajale jalaka baibanö yötja̧lakwawinobe:

—Bitema ¿dakwö waisanö yöawobö öwaisachibinajö? ja̧danö, jojodö edajitjökö jawa ¿dakwö ja̧bo̧jö? 55Jo̧bama towi ötebiyatjö otido̧ José itji̧, ¿jö̧tö? Ja̧danö, ojo'doma bemi jojosuju María, ja̧danö ö̧ja̧wo̧döma bemi jojodö Jacobobi, Josébi, Simónbi, Judasbi mikwadö, ¿jö̧tö? 56Ja̧danö, jo̧ba öjawujudö ya̧döbi dö'da̧de ju̧kwadö, ¿jö̧tö? Jo̧kwajabetjö̧, ¿dakwö ba̧ja̧dakwawa luwo̧ baibobö jo̧bama? Sule jo̧kwadabo̧, Jesúsma—

jö̧ba̧lö tjöpöjödinobe Jesúsnö.

57Jejenö tjöpöjödiökwe, Jesúsma jobadönö yöawinobe:

—Okobe deinö jelobetenia jojodöma otiwanö tjomukwatobe Dios yöawi̧ yöbawo̧nö, sule iteda a̧dekwanö itebo jojodöda, ja̧danö yöne ömöledöda jo̧banö otiwanöma omukwatöködö, Dios yöawi̧ yöbawö̧kö̧, jö̧ba̧lö—

yöawinobe Jesúsma. 58Ja̧danö, jobe jojodöma jo̧banö Dios weakwo̧ jö̧a̧linökökwe jö̧ba̧lö tjöpöjödobetjö̧, jobetjö nöinöma i̧sebinokobe jojodö edajitjökö jawama.

Currently Selected:

Mateo 13: WPC

Highlight

Copy