Génesis 40

José faraón ömöayedö, ka̧lela okwa tjödinawö̧ tji̧'wi̧dikwaja̧ labebö loina jawa

1-3Ju'wi möle jeju, José ö̧jejunö, ka̧lela ba̧kwaweju okwa lödijadötö du̧ju̧tajanö, Egipto la'aka luwo̧, faraón ötjabökwe ömöayedönö. Jobadötjö bakwo̧ faraón owa'do̧ iyawa jojo. Jelo̧ma faraón u̧kwa pan otikwa jojo. Jobadöma faraón wei̧ tja̧ja̧kwiökökwe jwiinö labijetö. Jo̧kwaobetjö̧ faraónma webijetö guardia jojodö tjuluwo̧nöma jobadö dujutajanö ka̧lela ba̧kwaweju okwa tjödobö, jo̧ba guardia jojodö tjuluwo̧ otidejunö. Ja̧danö jejunö bi̧jetö Joséma. 4Ja̧danö, guardia tjuluwo̧ma jobadönöma do̧batö lödijetö José ö̧bejunö, Joséda jobadönö eda̧lö ite'ada̧lobö webö. Jo̧kwaobetjö̧ Joséma te'ada̧lijetö jobadönö. Lekwe möle jejunö ba̧jijadötö jobadöma.

5Ja̧danö, ju'wi yö̧te jobadö, owa'do̧ iyawa jojobi, pan otikwa jojobi, ka̧lela ba̧kwaweju okwa ba̧jadöma bakwo̧nökwena 'wi̧dikwijadötö. Bakwo̧nökwena wainö 'wi̧dikwijadötö ja̧ yö̧tema. 6Ja̧danö, Joséma yȩayi jobadö tjöba̧jobekwö 'ya̧nö edemi tjo̧'wo̧ tjo̧bekwö ba̧jijadötö. 7Ja̧danö, tjo̧'wo̧ tjo̧bekwö tjö̧biökwe jobadönö abebö a̧ja̧kwijetö:

—¿Tajawedö o̧'wo̧ tjo̧nö wiluköbaduwa?— abebö a̧ja̧kwawö̧:

8—¡Ayö! Ökwödöma jo̧da yö̧tema, bakwo̧nökwena, wainö di̧'wi̧dikwatö. Waiso̧ma labebo loobö jö̧da̧lijayonö bakwo̧bi dea 'wi̧dikwakwawa labebö loawa waiso̧ma— jö̧tja̧lökwe:

—Diosda 'wi̧dikwakwawa labebö loobö yöa̧lakwawa waiso̧ma. Diosma ötjönö pjaatobetjö̧ kwi̧'wi̧dikwaja̧duwa yöba̧laduwitjö— jö̧ba̧lijetö.

9Jo̧kwaobetjö̧ owa'do̧ iyawa jojoma yöbawijetö iteda i̧'wi̧dikwaja̧ Josénö. Baikwö yöbawijetö:

—Ötjöma chi̧'wi̧dinö chedatö uba sa'ba ötjö chö̧jemi badeibötjö. 10Ja̧ uba sa'ba la'akatjö wa̧pö'bakwa pokwibobekwö. Ja̧ ö'biyatjö o̧bubiya bo̧bibö opiju dei̧ opo wa̧jobekwö. 11Ikenama chuluwo̧ faraón u̧kwa dȩja̧'do̧ bakwamunö do̧batö jelemunö uba sacho 'yutatobekwö dȩja̧'do̧nö. Ikenama jejenö 'yubatajo dȩja̧'do̧ma chuluwo̧ faraónnö chiyobekwö chi̧'wi̧dikwatö— yöbawijetö.

12Jejenö yöawiökwe jö̧ba̧lijetö Joséma jo̧banö:

—Baikwö yötawa, kwi̧'wi̧dikwaja̧ labebo lobö. Ja̧ wa̧pö'bakwama wa̧pötakwa möle ji̧. 13Ja̧danö, wa̧pötakwa möle baibena kwuluwo̧ faraónma ökwönö latjebobö weakobe, ajayi kwotidinadanö kwotidobö. Jo̧kwaobetjö̧, kwuluwo̧ faraón u̧kwa dȩja̧'do̧ owobö kwiyakobe, ajayi owa'do̧ kwiyinadanö. 14Jo̧kwaobetjö̧, I request of you: kwȩwa̧jenama ¡ötjönö kwo̧'wo̧ jwikiboko! Kwuluwo̧ faraónnö yö̧kawo belö labebö lotjo weo ötjönö. 15Yökawonö, chitebotjö naukwibö baikwö ichejebö iyö lotjinökwesa. Ja̧danö, yökawo, Sulabema yelösöda ja̧tököjayonö tjödinobe ka̧lela okwa chö̧boböma—yöbawijetö Joséma, faraón owa'do̧ iyawa jojonöma.

16Ikenama faraón u̧kwa pan otikwa jojoma, José otiwanö dȩja̧'do̧ iyawa jojonö yöawi̧ a̧ja̧kwö iteda i̧'wi̧dikwaja̧ yöbawijetö Josénö:

—Ötjöbi chi̧'wi̧dinö chedatö lu'dupiya wa̧pöpakwanö pan a̧ji̧ chuunö chujunawobekwö. 17Chuunö chujunawatö bajaleaposapa okwa nöinö pan, gayeta, torta a̧ji̧. Ikenama, ja̧patjö pji̧yu̧ ichibakwawibö tju̧kwobekwö. Jejenö chi̧'wi̧dinö chedatö—yöbawijetö.

18Ikenama Joséma jo̧ba i̧'wi̧dikwaja̧ labebö lobö yöbawijetö:

—Baikwö yötawa kwi̧'wi̧dikwaja̧ labebö lobö. Lu'dupiya wa̧pöpakwama wa̧pötakwa möle ji̧. 19Ja̧danö, wa̧pötakwa möle baibena kwuluwo̧ faraónma ökwönöma kwuu bulatö lotjobö weakobe. Ja̧danö, bulatajadö ökwönöma towinö di̧batö tjö̧nobö weakobe. Ikenama pji̧yu̧ ichibö tjukwakobe ökwö kwitebiyama— yöbawijetö Joséma pan otikwa jojonöma.

20Ja̧danö, José yöawaja̧danö baledijetö wa̧pötakwa möle baibena. Ja̧ mölema faraón cumpleaños möleobetjö̧ fiesta nöinö junijadötö, faraón ömöayedö tjukwobö. Ja̧danö, ömöayo̧ owa'do̧ iyawa jojonöbi, ja̧danö ömöayo̧ pan otikwa jojonöbi ka̧lela tjöba̧jelö latjebobö webijetö. Labebö tjichejebobö webijetö, faraón ömöayedö fiesta tjukwobekwö. 21Ja̧danö, owa'do̧ iyawa jojonöma webijetö ajayi otidiainobekwö otidobö. Jejenö weajökwema uluwo̧ owa'do̧ iyijetö. 22Jo̧kwaijayonö pan otikwa jojonöma di̧batö tjö̧nobö webijetö faraónma, José yöawinadanö.

23Jemi ikenama, faraón ömöayo̧ owa'do̧ iyawa jojoma José aebinama, Faraónnö yökawo labebö lotjo weo ötjönö, jö̧ba̧lö, omukwatijökötö. Yelösöda o̧'wo̧ jwibibijetö Josénöma, la'aka luwo̧nö yöbawökönö.

Currently Selected:

Génesis 40: WPC

Highlight

Copy