Génesis 23

Sara Wojina jawa

1Sarama, ciento veintisiete a̧yo juju ö'wö babibijotö, 2Canaán niji Hebrón comunidadtjö. Abrahamma ö'wö babibajajunö eda̧lö jobujunö tjödajejunö tebachijetö. Tebachajo̧ wojiökwe o̧'wo̧ tjo̧bekwö lekwe ö'wö babibajajunö eda̧lö budekwabijetö Abrahamma, chilekwowe, jö̧ba̧lö.

3Ikenama ilekwonö budekwabinö ba̧jo̧ma a̧laibö ö'wö babibajajunö tjödajejutjö labebijetö. Labebö yemida jojodö, Hettjö tupadanö jojodö tjö̧jobekwö yöalakwawobö 'yi̧jetö. Ichibö jö̧ba̧lijetö jobadönöma:

4—Ötjöma jelobetjö ichina ökwödökwö jo̧sa. Ja̧danö atebaduwakwö: Mikwanö kwiyaduwotjö niji, chilekwonö chödo— abebijetö Abrahamma. 5Jejenö aebawö̧ Hettjö tupadanö jojodöma:

6—Duluwo̧ a̧ja̧kwi, ökwönö, juluwo̧ la'aka luwo̧, jö̧ba̧lö, otiwanö dedökweja. Bemi, i̧lȩdo̧ jemitjö̧ o̧penönö otiwemi kwödojö kwilekwonöma. Ökwödötjö bakwo̧bi dea, i̧lȩdo̧ chiyökö jo̧banö, jö̧ba̧lo̧ma— atadijadötö. 7-8Jejenö tjatadiökwe Abraham a̧laibö öba bȩbachibö nijakwö uunö jö̧ba̧lijetö jobe ju̧kwadönö, Hettjö tupadanö jojodönö:

—Chilekwonö bada lödawa kwedaduwemi otiwitjö̧ma akebaduwo Efrónnö, Zohár itji̧nö, 9Macpela niji i̧lȩdo̧ iyotjö. Jo̧ba ö̧jemi ö'öbö i̧lȩdijuma jo̧be. Belöda ökwödö kweda̧laduwonö okobe jwiinö mikwawi̧ma chimidonöcha—jö̧ba̧lijetö Abrahamma.

10Ja̧danö Efrón, Hettjö tupadanö jojoma jobe a̧ja̧kwa̧lö bi̧jetö, ömöledökwö. Jo̧bama okobe deinö jobe ja̧dö, comunidad teachakwawemi tebachadöbi tjeda̧lonö jö̧ba̧lijetö Abrahamnöma:

11—Chuluwo̧ a̧ja̧kwitjö. Mikwa jwiinö chiyakwö chu̧kwa nijibi, i̧lȩdo̧bi. Bena ja̧nö, chömöledö tjeda̧lonö yöta̧la, Chiyakwö, jö̧ba̧lö kwilekwonö kwödobö— jö̧ba̧lijetö.

12Abrahamma jobe ju̧kwadö tjöba a'onö öba bȩbachibijetö nijakwö uunö. 13Ikenama Efrónnö jö̧ba̧lijetö, okobe deinö tja̧ja̧kwa̧lonö:

—A̧ja̧kwitjö. Midöda chemobö jö̧ta̧la nijima. Ötjö chimidi̧ma emi jobeda chödo chilekwonö— jö̧ba̧lijetö.

14Jejenö jö̧a̧liökwe Efrónma atadijetö:

15—Chuluwo̧, ja̧ nijima cuatrocientos plata jawa ö̧pi̧bi̧ya mikwawobe. Ja̧ mikwawi̧ma ökwödödajayedönöma ja'yubeda. Ja̧ma iyitjö, jenada kwilekwonö kwödo— jö̧ba̧lijetö.

16Jejenö jö̧a̧lökwe:

—Jao kwatjö̧ma otiwa— jö̧ba̧lijetö Abrahamma. Ikenama plata jawa ö̧pi̧bi̧yama nönö ba̧jadijetö, tea iyadö nönö tjöba̧jadi̧danö. Efrón okobe deinö tjeda̧lonö mikwawi̧ yöa̧laja̧danö nönö ba̧ja̧dijetö Abrahamma. 17Jejenö nönö iyö Abrahamma midö emijetö Efrón ö̧jemi Macpela niji. Ja̧ nijima Mamretjöma ja̧wo̧ laebobekwö ji̧jetö. Nijibi, i̧lȩdijubi okobe jwiinö towibiyabi, ö'öbö ichibenanö kabatö emijetö. 18Jo̧kwaobetjö̧ okobe deinö Hettjö tupadanö jojodö, jena ja̧nö eda̧ladöma waisijadötö ja̧ nijima, Abraham u̧kwa niji baibajabe, jö̧ba̧lö.

19Ikenama Abrahamma lödijetö ilekwonö Saranö ja̧ i̧lȩdo̧ okwa, Canaán nijinö. 20Jejenö Abrahamma midö emijetö Hettjö tupadanö jojodö tjitjebotjöma nijibi, i̧lȩdijubi iteda ömöledö tjowobiyakiju lödawemi baibanö.

Currently Selected:

Génesis 23: WPC

Highlight

Copy