Daniel 9
9
Daniel iteda ömöledönö Diosnö aebina wene
1Biya̧ chiwȩyudi̧ma, Darío mikwo̧ Babilonia niji la'aka luwo̧ ö̧jena ajayisaba baledina wene. Jo̧ba Daríoma Asuero mikwo̧ itji̧, medo jojodö tji̧tji̧ tupadanö jojo, ja̧danö Babilonia niji la'aka luwo̧ tjujuninökwe. 2Jo̧ba yöbawö ö̧jena ajayisaba, ötjöma Dios iwene tjiwȩyudina'ye yöta̧lijatö, Isabenö Jo̧ Dios Jeremiasnö iwȩyudobö weinama. Ja̧danö, ja̧ laebi̧ma, Jeremías iwȩyudinobe baikwö:
Jerusalén comunidad pjolö lotjakobe, ja̧danö yemidanöma tjotidökakobe, setenta o̧biya baledibanö
jö̧ba̧lö iwȩyudinobe.
3Jejenö iwȩyudina yöba̧lajo̧, chuluwo̧ Isabenö Jo̧ Diosnö budekwö atebijatö ökwödönö pjaatobö. Ja̧danö cho̧'wo̧ tjo̧achi̧ma Dios öba a'otjö öwawakobetjö̧, chu̧kwa ö̧töchö, kamijido̧ epju̧yunö kalukaa̧do̧ 'dubawö, ökwölaso̧pja̧nö ba̧nö atebijatö, isabenö chömöledö Israel jojodönö o̧'wo̧ tjo̧acho̧sa jö̧ba̧lö. 4Ja̧danö Dios öba a'otjö sulabenö ja̧dina yöbawö lotijatö, baikwö yöba̧lö Diosnö atebijatö:
Chuluwo̧ Dios, isabenö otiwo̧ ja̧danö juluwo̧ja. Ökwöma isabenö yöbawö kwujuninadanö ja̧bo̧ja, ja̧danö isabenö jwaikwöda kabatibökönö ösödo̧ja ökwö weköbi̧ a̧ja̧kwadönöma. 5Chuluwo̧ Dios, ökwöma isabenö otiwanö ja̧köbijayonö, ökwödö Israel jojodöma sulabenö ja̧dajabe. Isabenö jwiinö suli̧ jawa ja̧bö, ökwö weköbi̧ kadatibajabe, ökwö ja̧bö dö̧jobö weköbi̧ma a̧ja̧kwökönö.
6Ökwö yökawi̧ yöbawadöma otiwanö ökwö yökawi̧ kwiminö yötjawinobe inesö la'aka duluwedönöbi, ju'wedö la'aka duluwedönöbi, da'dödönöbi, okobe deinö jojodönöbi, jo̧kwaijayonö yötjawi̧ma sulabenö döpöjödijatö.
7Chuluwo̧ Dios, isabenö ba̧kwȩlö̧jatebö sulabenö ja̧bökönö bakwainö otiwanö ja̧bo̧ja chuluwo̧, jo̧kwaijayonö jejenöma ja̧böködösa ökwödöma, ja̧danö sulabenö ja̧badödobetjö̧ isabenö kwöba a'otjö tabakwö dö̧jobö jo̧be. Okobe deinö ökwödö Judá jojodö jejenö dötabakwobö jo̧be, Jerusalénnö ju̧kwadöbi, okobe deinö Israel jojodö Israel nijinö ju̧kwadöbi, ökwödö jelobetenia ödö dipjelekwachibanö ditebotjö a'dewö loköbinawö̧bi, ökwönö kabatibadödobetjö̧ isabenö kwöba a'otjö dötabakwobö jo̧be.
8Jau chuluwo̧, inesö la'aka duluwedöbi, ju'wedö la'aka duluwedöbi, da'dödöbi okobe deinö kwöba a'otjö dötabakwobö jo̧be, isabenö kwöba a'otjö kwöpöjödi̧ jawa, taba lö̧ji̧ jawa sulabenö ja̧dobetjö̧.
9Jejenö weköbi̧ öpöjödö, weköbökö jawa sulabenö ja̧bö dö̧jjatö, jo̧kwaijayonö, ina ökwödönö lȩlö̧jinö edo̧ja chuluwo̧ Dios, ja̧danö sulabenö ja̧di̧ omukwatökönö ökwödönö ösödö omukwato̧ja. 10Chuluwo̧ Isabenö Jo̧ Dios, ökwöma isabenö otiwanö kwömöayedönö, yökawi̧ yöbawadönö weköbinobe, weköbi̧ otiwanö ökwödönö yötjawobö, jo̧kwaijayonö yötjawi̧ma da̧ja̧kwobö döpöjödijatö, ja̧danö weköbi̧danö ja̧bö dö̧joböma döpöjödijatö.
11Chuluwo̧ Dios, isabenö kwömöayo̧ Moisésnö otiwanö iwȩyudobö weköbinobe, isabenö ja̧köbakwa̧ yökawina wenema, ja̧danö isabenö jweinö yökawijatö, weti̧ kwa̧ja̧kwaduwökötjö̧ma baikwö isabenö lȩtebocha jö̧ba̧lö. Ja̧danö, isabenö okobe deinö ökwödö Israel jojodöma weköbi̧ a̧ja̧kwökönö 'da̧bachibö di̧'yajabe, weköbi̧ da̧ja̧kwobö öpöjödö. Jo̧kwajabetjö̧ damötjö yöbawö kwujuninadanö isabenö ökwödönö lȩkebajabe, lȩtebocha jö̧ba̧lö yöbawö kwujuninadanö. 12Jau chuluwo̧, damötjö ökwödönö yökawijatö, weti̧ a̧ja̧kwökönö kwö̧jaduwitjö̧ma, jwiinö Jerusalénnö ju̧kwadönö lȩtebocha jö̧ba̧lö, jelobe baledi̧tjö bajalekwönönö Jerusalénnö labinö baledobö lȩtebocha jö̧ba̧lö. Duluwedönöbi, okobe deinö jojodönöbi jweinö yökawijatö chuluwo̧, ja̧danö isabenö yökawinadanö labinö lȩkebajabe Jerusalénnö ju̧kwadönö.
13Jau chuluwo̧ Dios, Moisés iwȩyudinadanö jweinö ökwödönö lȩkebajabe, ja̧danö jejenö lȩkebi̧ edö sulabenö domukwati̧ kabatibö, ökwö kwiwene isabenö wene döwaisacho jö̧da̧lajabe, ja̧danö weköbi̧danö ja̧bö dö̧jo jö̧da̧lajabe, ja̧danö ökwönö adebo jö̧da̧lajabe, ökwödö sulabenö ja̧badönö lȩlö̧jinö kwedobö. Jo̧kwaijayonö, jejenö ja̧bökönö, jwaikwöda sulabenö omukwatö dö̧jajabe chuluwo̧.
14Jo̧kwajabetjö̧, jwaikwöda sulabenö ja̧bö dö̧jobetjö̧, ökwödönö lȩkebakwa̧ omukwatö kwujuninobe, ja̧danö da̧ja̧kwökenama isabenö otiwanö lȩkebinobe. Jau chuluwo̧ Isabenö Jo̧ Dios, okobe jwiinö ökwö ja̧köbi̧ma, bakwainö otiwanö ja̧bo̧ja, ja̧danö ökwödöma yökawi̧ a̧ja̧kwöködösa, jo̧kwajabetjö̧ isabenö jweinö otiwanö lȩkebajabe.
15Ökwöma isabenö otiwanö ökwödönö pjabato̧ja chuluwo̧ Dios, ökwöda kwujulunö Egypto nijitjö ladebobö pjakatinobe, ja̧danö jejenö pjabatö okobe deinö kwujulu tjöwaisachibobö kwi̧sebinobe, ja̧ möletjö jamatö baikwö bajalenö okobe deinö kwujulu tjöwaisobe. Ökwöma otiwanö pjabato̧ja chuluwo̧, ja̧danö ökwödöma sulabedösa, suli̧ jawa sulabenö ja̧badösa.
16Chuluwo̧ Dios, Jerusalén comunidadma ökwöda kwitebo comunidad, ja̧danö ökwö kwejuma, Jerusalén mösa'onöda jȩju. Ja̧danö, ökwödö da'dödöbi, ökwödöbi sulabenö ja̧dobetjö̧, okobe deinö tjitebokwena dipjeanö ju̧kwadöma sulabenö tjomukwatobe Jerusalén comunidad, jwiinö Dios öpöjödö lȩebinemi jö̧ba̧lö. Ja̧danö kwömöledö Israel jojodönö sulabenö tjomukwatobe, Dios öpöjödö lȩebawö̧ jö̧ba̧lö. Jo̧kwajabetjö̧ baikwö atebakwö chuluwo̧, isabenö ba̧kwȩlö̧jatebö otiwanö ja̧bo̧ja chuluwo̧, jo̧kwajabetjö̧ Jerusalénnö ju̧kwadönö kwödameakwaja̧ kakatibobö atebakwö, ja̧danö tupakwö lȩbebökönö lȩlöinö kwedobö atebakwö, dipjeanö ju̧kwadöma ökwöda kwitebo Jerusalén comunidad otiwanö tjomukwatakobetjö̧.
17Chuluwo̧ Dios, ötjö kwömöayo̧ atebi̧ kwa̧ja̧kwobö atebakwö, ja̧danö lȩlö̧jinö edö ateba̧li̧ kwa̧ja̧kwobö ateba. Ja̧danö jojodö ökwönö otiwanö tjo̧mukwatakobetjö̧, ökwöda kweju jȩmi comunidad lȩlö̧jinö kwedobö ateba. Jau chuluwo̧, babema ökwö kwejuma jojodö deeju jo̧be, jo̧kwajabetjö̧ ökwöda kweju otiwanö kwedobö atebakwö. 18Chuluwo̧ Dios, atebi̧ kwa̧ja̧kwobö atebakwö, usula demawi̧ kwedobö atebakwö, Dios eju comunidad ötjabobe Jerusalénnö ju̧kwadö usula tjemawi̧ kwedobö atebakwö. Jejenö atebi̧ma otiwanö ja̧badödobetjö̧ otiwanö kwedo jö̧ba̧löma atebökö chuluwo̧, ökwöda isabenö inesö lȩlö̧jinö edo̧köbobetjö̧ lȩlö̧jinö edö pjakatobö atebakwö.
19Chuluwo̧ Dios, ökwödönö kwa̧ja̧kwobö ateba, sulabenö ja̧di̧ omukwatökönö kwösödobö ateba, usula demawi̧ edö pjakatobö atebakwö chuluwo̧ Dios, okwönö otiwanö tjomukwatakobetjö̧. Jau chuluwo̧, Jerusalén comunidadma, Diosda ö̧jemi comunidad ötjabobe, ja̧danö Judá nijinö ju̧kwadönö, Diosda ömöledö jö̧ba̧lö ötjabobe, jo̧kwajabetjö̧ lȩlö̧jinö kwedobö atebakwö, dipjeanö ja̧döma ökwönö sulabenö tjomukwatapji jö̧ba̧lö
Diosnö atebijatö.
Gabriel Danielnö yöbawö ichina wene
20Jobekwö yöba̧lö Diosnö abeböbi, ötjö chusula yöbawö loböbi, chömöledö tjusula yöbawö loböbi Diosnö atebijatö, Isabenö Jo̧ Dios öba a'otjö Dios eju ja̧'o mösa'o comunidad lȩlö̧jinö edö pjaatobö ateba̧lijatö. 21Ja̧danö, jejenö budekwö abebö chö̧jayi, Gabrielma, ajayinö chi̧'wi̧dinö chedinökwe ángelso̧ma juluwanö köbibö chö̧jobekwö ichinobe, yi̧benakwö möletenia Diosnö iyawa tjiyena jenanö. 22Jo̧bama ötjökwö yöba̧lakwawö chöwaisachibobö pjaatinobe, ja̧danö baikwö yöawinobe ötjönö:
—Daniel, öwawatö chichajabe, otiwanö öwawinö kwöwaisachibobö. 23Ajayinö Diosnö lȩlö̧jinö edobö jamatö akebenama, Diosma iteda yöawi̧ ökwönö weatö, ja̧danö ökwönö yöbawö chichajabe. Jau Daniel, Dios jwiinö ösödökweja, ja̧danö ökwönö yötawobö weajabe. Jo̧kwajabetjö̧ Dios ökwönö yöawi̧ a̧ja̧kwi, ja̧danö Dios i̧sebina jawa kwöwaisachibobö labebö lobö yötawocha—
jö̧ba̧lö yöawinobe Gabrielma.
Gabriel Danielnö tupakwö baledakwa̧ yöawina wene
24Baikwö yöawinobe Gabrielma Danielnö:
—Diosma omukwatö ujunajabe, kwömöledö Israel jojodönö tjö̧jibinö pjaatakwa̧ abönö, ina cuatrociento noventa o̧biya tjöbaledobö jo̧be jö̧ba̧lö. Ja̧danö, Dios badedö ujunina möle badekwachenama, tjusulatjö tjö̧jibinö pjaatakobe. Sulabenö ja̧tji̧ katjatibobö ja̧akobe, ja̧danö tjusula söbebö loakobe, okobe jwiinö suli̧ söbebö loakobe. Ja̧danö ja̧ mölema Diosda yöbawö weakobe, bakwainö otiwanö ba̧kwȩlö̧jatebö yöbawö weakobe. Ja̧ mölema Dios yöawi̧ yöbawo̧ Jeremías iwȩyudinadanö badekwachakobe, ja̧danö ökwö kwi̧'wi̧dinö kwedinadanö badekwachakobe, ja̧danö Jerusalénnö jȩju Dios ejuma, yemidanö isabenö Dios eju baibanö dichö loakobe.
25Baikwö kwöwaisobö jo̧be Daniel, la'aka luwo̧ma yemidanö Jerusalén comunidad tjotidobö weakobe, ja̧danö ja̧ weaja̧ ikena, cuarenta y nueve o̧biya baledakobe, otidö katjatenanö baibanö. Jerusalén comunidadnö yemidanö mana tjotidakobe, ja̧danö comunidad söpödö sobö ojwe tjönakobe, tjöpöjojodö ichibö tjujuluwapji jö̧ba̧lö. Jejenö otidajadö, cuatrociento treinta cuatro o̧biya baledibanö comunidad söbebö lotjökakobe, jo̧kwaijayonö söbebö lötjököjayonö, ina nöinö wene baledakobe. Ja̧danö ja̧ cuarenta y nueve o̧biakwö, cuatrociento treinta y cuatro o̧biakwö baledibajenama, la'aka luwo̧ Dios weakwo̧ jö̧a̧linökwema ichibakobe.
26Ja̧danö, ja̧ cuatrociento treinta y cuatro o̧biya baledibajenama, Dios weakwo̧ jö̧a̧linökwenö kwabö lotjakobe, sulabenö ja̧ököjayonö kwabö lotjakobe. Ja̧danö, jemi ikenama tupakwö ichakwo̧ sulabo̧ la'aka luwo̧ ömöledöma ichö Jerusalén comunidad söbebö lotjakobe, ja̧danö Dios ejubi söbebö lotjakobe. Ja̧ baledakwa̧ma, ojwe okwatö okobe jwiinö söbebö loi̧danö baledakobe, jwiinö Jerusalén comunidadbi, Dios ejubi söbebö lotjakobe. Dios omukwatö ujuninadanö, ja̧ cuatrociento treinta y cuatro o̧biya baledaja̧ ikena, kwakwabakwadö tjichakobe, ja̧danö kwakwabakwawö tjö̧jakobe, Jerusalénma jojodö deobe baibenanö kabatö.
27Jemi ikenama tupakwö ichakwo̧ inesö la'aka luwo̧ma ba̧jekwadö jojodökwö isabenö ja̧tja̧kwa̧ yöbawö tjujunakobe, jelemutjö döbalataja o̧biya baledibanö bejenö otiwanö ja̧dakwedösa jö̧ba̧lö. Ja̧danö, ajayinöma otiwanö ja̧akobe, ja̧danö jojodö otiwanö Diosnö tjiyobö weakobe, yöbawö ujunaja̧danö. Jo̧kwaijayonö ja'ö, wa̧pötakwa o̧biya ja'ö baledibajenama, sulabenö ja̧akobe. Diosnö iyawa katjatibobö weakobe, Diosnö kwabö juwö iyawabi, ju'wi Diosnö iyawabi. Ja̧danö Dios ejutjö bajalesa'onö, inesö suli̧ jawa o̧'wo̧ jawa jojodö tjösödobö ujunakobe. Ja̧danö o̧'wo̧ jawama jenada ja̧kobe, bajalianö Dios lȩtebocha jö̧ba̧lö yöbawö ujuninadanö sulabenö junajo̧nö lȩbebö loenanö kabatö—
jö̧ba̧lö yöawinobe Dios weökwe ángel Gabrielma, Daniel ömöledö Israel jojodönö baledakwa̧ma.
Currently Selected:
Daniel 9: WPC
Highlight
Share
Copy
Want to have your highlights saved across all your devices? Sign up or sign in
©2021, All Rights Reserved
