Daniel 8

Daniel yemidanö i̧'wi̧didanö edina wene

1Jejenö chi̧'wi̧dinö chedaja̧ ikena, Babilonia niji la'aka luwo̧ Belsasar ina la'aka luwo̧ ö̧bayi, ida̧ökö wa̧pötakwa o̧biya luwo̧ ö̧benama, yemidanö chi̧'wi̧didanö chedijatö.

2Ja̧ chi̧'wi̧didanö chedinama, baikwö yötawa: Chi̧'wi̧dinö Elam niji la'aka comunidad Susa comunidad chö̧jijatö, ja̧danö Ulai mikwödö ojwe ö'öbö chö̧jijatö. 3Ja̧danö, jobe ja̧nö möakwö chedijatö, ja̧danö obejaso̧ nöbo̧nö chedijatö, ojwe ö'öbö jo̧nö. Jo̧ba obejaso̧ma, i'yeka dökalataja ujuna̧linobe, nöakama, jo̧kwaijayonö bakwakama jelekatjö bajalekwönönö ödöaka ji̧nobe. Ja̧kama jeleka laebaja̧ ikena laebijayonö, ajayi laebaja̧katjö bajalekwönönö ödöaka baibanö laebinobe.

4Jo̧ba obejaso̧nö chedijatö, ja̧wo̧ meajobekwöbi, jakwölakwöbi, jakwölakwöbi, mebibö ö'öakwawobe, ja̧danö okobe deinö tebonö ju̧kwadönö ujuluwinobe, ja̧danö bakwo̧bi ujulutjö tjö̧jibinö pjaatobö jwiinobe. Okobe jwiinö jo̧ba ösödi̧ma ösödi̧danö ja̧inobe, ja̧danö jwiinö juluwo̧ baibinobe.

5Ja̧danö, ja̧ chedaja̧ ina omukwa̧lö chö̧jayi ju'wibi chedijatö, bakwo̧ chiwoso̧ jawo̧ meajobekwötjö ichobe chedijatö. Jo̧bama ödötjö juluwanö ichinobe, ja̧danö jwiinö juluwanö ichobetjö̧, niji wamenö köobedanö ichinobe. Jo̧ba chiwoso̧ma, öbajalebiya 'da̧de i'yeka bakwaka nöaka ujuna̧linobe. 6Jo̧ba chiwoso̧ma obejaso̧ dökalataja juna̧lo̧ ojwe ö'öbö jo̧ ö̧jobekwö ichinobe, ja̧danö obejaso̧nö dameakwö ölabinobe chiwoso̧ma, ja̧danö ö̧jobekwö labinö ö'öbakwawö meibinobe obejaso̧nö.

7Jo̧ba chiwoso̧ labinö ichobekwö chedijatö, ja̧danö obejaso̧ dökalataja juna̧lo̧nö mebibö töinobe, ja̧danö obejaso̧ uusaka dökalataja pabebö loinobe. Ja̧danö jejenö uusaka pabebö loajökwe, obejaso̧ chiwoso̧nö ölakwabikwawobö ujulu jwiinobe, ja̧danö chiwoso̧ma jo̧banö nijakwö ikwö loinobe, ja̧danö ja̧tö loinobe. Bakwo̧bi obejaso̧nö ö̧jibinö pjaatobö juluwo̧bi deinobe, isabenö juluwo̧ ö̧jinobe chiwoso̧ma.

8Ja̧danö ajayitjö bajalekwönönö jwiinö juluwo̧ baibinobe chiwoso̧ma, jo̧kwaijayonö juluwo̧ ö̧jemi ja'ötjö, i'yeka nöaka ujuna̧lakama paibinobe. Ja̧danö ajayinö jaka jinemi, ö'wejemu jawaökiya ökiyawi̧ laebinobe, jawo̧ laebobekwö bakwakabi, jakwölakwö bakwakabi, jawo̧ meajobekwö bakwakabi, jakwölakwö bakwakabi.

9Ja̧danö ö'wejemu jawaökiya ajayinö ji̧jayonö, bakwakatjö jeleka ja'yuwakabi laebinobe, ja̧danö nöamachibanö nöinö laebinobe jakwölakwöbi, ja̧wo̧ laebobekwöbi, inesö otiwobe Israel niji jo̧bekwöbi. 10Ja̧danö jwiinö juluwinobe ja̧kama, mölejȩbe la̧jadökwö ölakwabikwawenanö kabatö, ja̧danö mölejȩbe la̧jadökwö ölakwabikwawö, jobadötjö ju'wedönö mölejȩbetjö töbebö loinobekwö chedijatö, nijinö metjenanö baibanö, ja̧danö mebajadönö ja̧tö loinobe.

11Ja̧kama juluwo̧sa̧ jö̧ba̧lö omukwatinobe, mölejȩbe ju̧kwadö ángelesdö la'aka tjuluwo̧ Diosdanöjo̧sa jö̧ba̧lö omukwatinobe. Ja̧danö, jejenö omukwatö, möletenia Diosnö iyawa katjatibobö weinobe, ja̧danö Diosnö iyawemi sulamachibanö ja̧inobe.

12Ja̧danö Dios ömöledö Israel jojodö sulabenö ja̧tjobetjö̧, ja̧ka tjösödinobe, ja̧danö sulabenö ja̧bö, ja̧ka iyawa tjiyinobe. Ja̧danö ja̧kama isabenö wenesa'ye, Dios weina wene wȩyukwa'ye nijinö ikwö loinobe. Okobe jwiinö ja̧ka ja̧o jö̧a̧lima, ösödi̧danö ja̧inobe, ja̧danö bakwo̧bi tjöeba̧lobö jwiinobe.

13Ja̧danö ángelesdö yötja̧lakwawobe cha̧ja̧kwijatö, bakwo̧ jelo̧nö abebö a̧ja̧kwinobe:

—Bite Diosnö tjiyobö webö̧kö̧ma, Dios wei̧ öpöjödö ölakwabikwawö jo̧ma, Diosnö iyawemi sulamachibanö ja̧bo̧ma, ¿dokwa lekwe ujuluwakwa̧da? ¿dokwa lekwe möletenia Diosnö iyawa iyökönö tjö̧jakwa̧da? Ja̧danö, ¿dokwa lekwe Dios ejubi, Dios ömöayedönöbi ujuluwakwa̧da?—

jö̧ba̧lö abebö a̧ja̧kwobekwö cha̧ja̧kwijatö.

14Abebö a̧ja̧kwökwe, jelo̧ ángelma atadinobe:

—Mil ciento cincuenta möle baledibanö jejenö ja̧kobe. Ja̧ mil ciento cincuenta mölebiyama, yȩayitenia Diosnö iyawabi, yi̧benatenia Diosnö iyawabi tjiyobö jwiakobe. Jemi ikenama, mil ciento cincuenta möle baledibajenama, yemidanö Dios eju otiwachibanö dichö lotjakobe—

jö̧ba̧lö atadinobe.

Dios weökwe ángel Gabriel mikwo̧ Daniel edina labebö loina wene

15Jejenö chi̧'wi̧dinö edajo̧, ötjö Danielma ja̧ laebi̧ chöwaisobö chomukwatijatö, chedaja̧ma dakwö jö̧ba̧lö chedaja̧jö jö̧ba̧lö. Ja̧danö jejenö chomukwatemi, bakwo̧ chöba a'o öwawachö ö̧jinobe, jojodanö ichejekwo̧ma. 16Ja̧danö ojwe Ulai mikwödö bakwachödötjö jojo iwene ökwöobe cha̧ja̧kwijatö:

—Gabriel, bite Daniel öwaisachibobö edaja̧ labebö lobö yöbawinö—

jö̧ba̧lö cha̧ja̧kwijatö.

17Ja̧danö chö̧jobekwö yöne ichibinobe, ja̧danö ichenama, yetaibijatö̧, ja̧danö yebabinö chöba nijakwö chöbamatijatö. Jo̧kwaijayonö yöne ichibö, Gabrielma ötjönö yöa̧linobe:

—Jojo, kwöwaisobö jo̧be, kwedaja̧ jawama, 'dö̧ibaji̧ möle baledakwa̧ jawa kwedajabe— jö̧ba̧lö.

18Ötjönö Gabriel mikwo̧ ángel yöa̧lenama, 'dö̧tachibijatö, chöba nijakwö bamatö. Jo̧kwaijayonö, ötjönö mabö a̧lapedinobe. 19Ja̧danö, a̧lapedajo̧, ötjönö yöawinobe baikwö:

—Ökwönö labebö lobö yötawobö chichajabe, Dios böjȩ jojodönö ödameakwobetjö̧ baledakwa̧ jawama. Biya̧ baledakwa̧ma, 'dö̧ibaji̧ möle böjȩ 'dö̧ibakwa̧ abönö baledakobe.

20Ja̧danö, obejaso̧ kwedajökwema, i'yeka dökalataja juna̧lo̧nöma baikwö labebö lobö yötawakwö: Ja̧ dökalataja badekwachi̧ma Media niji la'aka luwo̧nöbi, Persia niji la'aka luwo̧nöbi badekwachobe. 21Ja̧danö chiwoso̧ kwedajökwema, Grecia la'aka luwo̧nö badekwachobe. Ja̧danö, öbajalebiya 'da̧desaka nöaka i'yekama, Grecia la'aka luwo̧ ajayi luwo̧nö badekwachobe.

22Ja̧danö nöaka paibaja̧ ikena ö'wejemu jawa'yekiya laebi̧ badekwachi̧ma, baikwö yötawa: Ajayi la'aka luwo̧ woaja̧ ikena, yöbawö ö̧jinemi 'da̧'yö tjujunakobe, ö'wejemubedö la'aka luwedö tjitebokwena yöbawö wetjobö. Ja̧danö, jobadöbi tjujuluwijayonö, ajayi luwo̧ ujuluwaja̧danöma tjujuluwökakwedö.

23Ja̧danö, jobadö yöbawö webö tjö̧benama jojodöma jwiinö sulabenö ja̧bö tjö̧jakobe, ja̧danö Dios jobadönö lȩebobö ja̧kobe. Jo̧kwaijayonö, yöbawö wetji̧ 'dö̧ibakwa̧ abönö, la'aka luwo̧ bakwo̧ itebotjö jelo̧ öbamatakobe, la'aka luwo̧ baibanö. Jo̧bama juluwo̧sa jö̧ba̧lö omukwatakobe, ja̧danö jwiinö labo̧ ö̧jakobe, ja̧danö omöna yöba̧lo̧ ö̧jakobe.

24Jo̧bama isabenö jwiinö juluwo̧ baibakobe, jo̧kwaijayonö iteda ujulunömaökö. Jo̧bama nöinö söbebö loakobe, ja̧danö ujuluma nöinö nöamachibakobe, ja̧danö iteda ösödi̧danö ja̧bö ö̧jakobe. Ba̧jekwadö juluwadönö söbebö loakobe, ja̧danö Dios ömöledö Israel jojodötjö ju'wedönöbi söbebö loakobe.

25Jo̧bama waisanö omukwatö, ba̧jekwadönö omöna yöa̧lakobe, ja̧danö jejenö, ujulu nöamachibanö ja̧akobe, ja̧danö isabenö ju'wedötjö bajalekwönönö juluwo̧sa jö̧ba̧lö omukwatakobe. Jojodö tjo̧'wo̧ söba̧lö, bitekwö wene jwibadösa jö̧ba̧lö tjö̧jemi ja'ötjö, juluwanö jobadönö söbebö loakobe. Ja̧danö, jojodönö ujuluwi̧danö, inesö la'aka luwo̧ Dios ujulutjö ö̧jibobö isakwakobe, Diosdanö juluwo̧sa jö̧ba̧lö. Jo̧kwaijayonö, Diosma jo̧banö söbebö loakobe, ja̧danö jejenö söbebö loenama, böjȩ jojodö jo̧banö kwabö lotjökakobe, Diosda jo̧banö söbebö loakobe.

26Ja̧danö, yȩayiteniabi, yi̧benateniabi Diosnö iyawa iyökönö tjö̧jakwa̧ma, ja̧bi isabenö baledakobe, ja̧danö labebö lobö yötawa ökwö Danielnö. Jo̧kwaijayonö ina jwiinö lekwa ja̧ baledakwa̧ma, jo̧kwajabetjö̧ ökwönö labebö lobö yötawijayonö, ja̧ jawama ina ju'wedönö kwi̧seboko, tupakwö jawa—

jö̧ba̧lö yöawinobe Gabrielma Danielnö

27Jemi ikenama ötjö Danielma jwiinö chime'dawachibijatö, ja̧danö ju'wi mölekwena chö'wöchijatö. Jemi ikenama, a̧laibö la'aka luwo̧ wei̧ yemidanö otidö chö̧jijatö. Jo̧kwaijayonö, yemidanö otidö chö̧jijayonö, chedina jawa omukwatö cho̧'wo̧ tjo̧bekwö chö̧jijatö, ja̧ baledakwa̧ma, diya̧jö jö̧ba̧lö.

Currently Selected:

Daniel 8: WPC

Highlight

Copy