Hechos 6

Tju̧kwa iyawedö baibanö 'da̧batö tjujuninawö̧ wene

1Ja̧ mölema, Jesúsnö ösödadöma ba̧jekwijadötö. Jobadötjö judío jojodötjöma griego tjiwene yöba̧ladöbi, hebreo tjiwene yöba̧ladöbi ju̧kwijadötö. Jobadötjö ya̧dö, tji̧lȩkwa̧munö wobekwinadöbi ju̧kwijadötö. Jobadönö bakwöta mölekwena 'da̧batö iyabijadötö tju̧kwama. Griego tjiwene yöba̧ladöma ja̧ tjiyobe edö labijadötö, Ökwödötjö tji̧lȩkwa̧munö wobekinadönöma otiwanö tjiyokobe, jö̧ba̧lö. Ja̧danö, jobadöma jö̧ba̧lijadötö hebreo tjiwene yöba̧ladönö:

—Ökwödötjö tji̧lȩkwa̧munö wobekwinadönöma ju'wedönö otiwanö tjiyi̧danöma tjiyokobe, tju̧kwa kwakwawama— jö̧ba̧lijadötö. 2Jejenö jö̧tja̧liawö̧ Jesús webawedöma a̧li̧nösamutjö du̧ju̧tajanö jojodöma jwöbijadötö okobe deinö Jesúsnö ösödadönö, tjichobö. Ichajadönö jö̧ba̧lijadötö:

—A̧ja̧kwaduwitjö. Ökwödö Dios iwene döba̧ja̧di̧tjö kabatibö iyabikwawa diyaboböma otiwökö— jö̧ba̧lijadötö—. 3Jo̧kwaobetjö̧, chömöledö, ökwödötjö emö junaduwi jelemutjö du̧ju̧tajanö ömadönö, pjaatakwawa jojodönö, ja̧ iyawa webadö batjibinö. Jobadö emö kwujunaduwakwawö̧ma, Otiwanö omukwatö ju̧kwadö, jö̧ba̧lö, jojodö yötja̧lawö̧nöda emö kwujunaduwo. Ja̧danö, jobadö emö kwujunaduwakwawö̧ma waisanö omukwatadönöda kwujunaduwo. Ja̧danö, Dios O̧'wo̧ Luwo̧ öba̧ja̧dawö̧nöda emö kwujunaduwo. Emö kwujunaduwawö̧nö wedakobe jobadöda iyawa wetjobö. 4Ja̧danö, ökwödöma kabatökönö Diosnö abeböda, Dios iwene yöbawöda duju̧kwakwedösa.

5Jejenö jö̧tja̧liawö̧, okobe deinö Jesúsnö ösödadöma a̧ja̧kwö ösödijadötö. Jo̧kwaobetjö̧ emö junijadötö Esteban mikwo̧nö. Jo̧bama Diosnö jwiinö ösödö ji̧abijetö. Dios O̧'wo̧ Luwo̧ iteda o̧'wo̧ luwo̧ okwanö öba̧ja̧di̧ a̧ja̧kwö ji̧abijetö. Ja̧danö, ju'wedö tjeminawö̧ma bidö: Felipe, Prócuro, Nicanor, Timón, Pármenas mikwadö. Jelo̧ma Nicolás, Antioquíanö jo̧. Jo̧ba Nicolásma judiobö̧kö̧jayonö judíoso̧danö ji̧abijetö. 6Ja̧danö, jobadönö emö junajadö Jesús webawedö tjöba a'o tjöjamatobö öbibö 'yi̧jadötö, tjemajawö̧nöma. Ikenama Jesús webawedöma ötjibajawö̧ tjuu wamenö 'bibeba̧lö Diosnö abebijadötö. Jejenö jobadönö jwibadönö tju̧kwa iyawa webadö baibanö junijadötö.

7Ja̧danö, Jesúsnö ösödadöma kabatökönö yöbawiabijadötö Dios iwenema. Jerusalénnö ju̧kwadöma kabatökönö ju'wedö ju'wedöbi Jesúsnö ösödijadötö, Jesúsma dö̧jibinö pjabato̧, jö̧ba̧lö. Ja̧danö, Jesúsnö ösödadö baibanö, ba̧jekwadö babibijadötö. Ba̧jekwadö Diostjö jojodötjö ö'weje pjabatadöbi Jesúsnö ösödadö Dios iwene yötjawobe a̧ja̧kwö do̧batö emijadötö Jesúsnöma.

Estebannö do̧tjatina wene

8Esteban mikwo̧ma Dios pjaatinökwe. Jo̧bama Dios ujulu i̧sebö ji̧abijetö. Ja̧danö, jo̧bama jojodö tjeda̧lonö edajitjökö jawabi i̧sebö ji̧abijetö. 9Ja̧ mölema, Esteban ö̧jena ju'wedö ju̧kwijadötö, judío jojodötjö ju'wedöma. Jobadöma, midö tjeminawö̧ tjö̧jibinö latjebinawö̧, ötjabinawö̧. Jobadöma jeleju, yötjawejunö tebachiabijadötö. Ja̧danö, jobadöma jelobetjö ichinadö, Cirenetjöbi, Alejandríatjöbi, Ciliciatjöbi, Asia nijitjöbi. Jobadöma Esteban Dios ujulu i̧sebiawö̧ öpöjödijadötö Estebannöma. Jo̧kwaobetjö̧ Esteban ö̧jobekwö 'ya̧jadö wene juna̧lijadötö Estebankwö, labinö jwöjwöbakwawö. 10Jejenö jwöjwötjakwawijayonö jobadöma atadakwawa jwiinö ji̧jadötö, Dios O̧'wo̧ Luwo̧ öba̧ja̧da̧lonö Esteban waisanö yöa̧lobetjö̧. 11Jo̧kwaobetjö̧, jobadöma jojodö wajwitjonö ju'wedönö abeba̧lijadötö omöna yöbawö jwötjeba̧lobö Esteban yöawi̧ma. Yötjawobö abeba̧lijadötö, Bite Estebanma Moisésnöbi Diosnöbi sulabenö yöa̧lobe da̧ja̧kwijatö, jö̧ba̧lö. 12Ja̧danö, jejenö omöna yöbawö jwötjeba̧lobe a̧ja̧kwö jojodöma yelösöda labijadötö Estebannöma. Ja̧danö, damöbi, Moisés iwȩyudina ba̧ja̧dadöbi labijadötö, Estebannö jwötjeba̧lobe a̧ja̧kwö. Jo̧kwaobetjö̧ jobadöma Esteban ö̧jobekwö 'yi̧jadötö jo̧banö do̧tjatobö. Ichibö jo̧banö do̧batajadö öbibö e'ewö 'yi̧jadötö judío jojodötjö la'aka luwedö tjö̧jobekwö, jobadö tjöba a'o tjujunobö. 13Ja̧danö, ju'wedönö webijadötö omöna yöbawö jwötjeba̧lobö. Jobadöma omönanö yöbawijadötö:

—Bitema kabatökönö sulabenö obö yöa̧lobe Dios ejubi, Dios weina Moisés iwȩyudinabi—yöbawijadötö. 14Ju'wibi yöbawijadötö:

—Da̧ja̧kwijatö jo̧ba yöawi̧ma. Baikwö yöawijatö: Jesús, Nazarétnö da̧peachinama, Beju, Dios eju, 'dobö lotocha, jö̧ba̧lö, yöawijatö. Ju'wibi yöawi̧ da̧ja̧kwijatö, baikwö: Moisés weina, ökwödö ja̧dobö weinama, Söbebö lotocha, ju'wi weawa balekwa wetobö, jö̧ba̧lö, yöawi̧ da̧ja̧kwijatö— jejenö omöna yöbawijadötö. 15Ikenama jobe la'aka luwedöma Estebannö tjedemi öbama salöijetö, ángel öba salöi̧danö.

Currently Selected:

Hechos 6: WPC

Highlight

Copy