Hechos 14

Pablo Bernabé Iconionö tjuju̧kwina wene

1Ikenama Pablo, Bernabé Iconionö ichibajadöma judío jojodö yötjawejunö tebachijadötö. Tebachajadö Dios iwene jweinö yöbawijadötö. Jweinö yötjawiawö̧ jojodöma tjo̧'wo̧ luwo̧nö tjösödinö a̧ja̧kwö, Jesúsma dö̧jibinö pjabato̧, jö̧ba̧lö, ösödö do̧batö emijadötö Jesúsnöma. Ba̧jekwadö, judío jojodöbi judío jojodöböködöbi Pablo, Bernabé yötjawi̧ a̧ja̧kwö Jesúsnö ösödö do̧batö emijadötö, Jesúsma dö̧jibinö pjabato̧, jö̧ba̧lö. 2Jo̧kwaijayonö judío jojodötjö ju'wedöma öpöjödijadötö. Jobadöma tjo̧'wo̧ sulinö edö yöba̧lijadötö judío jojodöböködönö, tjölabinö ja̧bö Jesúsnö ösödadönöma. 3Jejenö tjölabijayonö Pablo, Bernabé juluwanö ȩwa̧jijöködötö. Ina lekwe ju̧kwijadötö jobema. Yebabökönö yöbawiabijadötö Duluwo̧ Jesúsnö. Ja̧danö, yebabökönö, Diosma jojodönö lȩlö̧jino edo̧, jö̧ba̧lö, yöbawijadötö.

Ja̧danö, Diosma iteda ujulu iyijetö Pablonö Bernabénö. Jobadöma Dios ujulunö jojodö edajitjökö jawa i̧sebijadötö. Jejenö ja̧bö jojodönö i̧sebijadötö, Ökwödöma Dios ujulunö otidadösa, jö̧ba̧lö. Ja̧danö, Diosma iteda ujulu iyö i̧sebijetö jojodönö, Bidö yötjawi̧, Dios lȩlö̧jino edo̧, jö̧ba̧lö, yötjawi̧ma, ötjöda, Diosda yötawi̧ jweinö yöbawadö, jö̧ba̧lö. 4Jejenö Pablo, Bernabé yöbawöbi, Dios ujulunö i̧seböbi tji̧sebiawö̧ jobe ju̧kwadötjö ju'wedöma ösödijadötö. Jo̧kwaijayonö ju'wedö jobe ju̧kwadöma öpöjödijadötö Pablonö, Bernabénö, judío jojodötjö öpöjödadö tjomukwati̧danö omukwatö. Ja̧danö, jobe ju̧kwadöma pjeikwena ju̧kwijadötö, Pablonö, Bernabénö ösödadöbi, öpöjödadöbi. 5Ikenama öpöjödadöma judío jojodöbi, judío jojodöböködöbi, jobe la'aka luwedökwö Pablonö, Bernabénö, Inia tjötjinö ja̧do, jö̧ba̧lö, inawiya dikwawo, jö̧ba̧lö, tjo̧'wo̧ sulinö eda̧lö omukwatibijadötö. 6Jejenö tjomukwatijayonö Pabloma, Bernabéma, ju'wedö ja̧ tjomukwati̧ yötjawiawö̧ jelobe döbibajijadötö, Licaonia nijibe. Jobe comunidades, Listra mikwenabi, Derbe mikwenabi, jobe ö'öböbi yöbawiabö kwebachijadötö, 7jobe ju̧kwadönö otiwa jawa wene yöbawö.

Pablonö, Bernabénö jojodö tjösödina wene, tjo̧'wo̧ tjöwana̧lawö̧danö

8Jobe, Listranö bakwo̧, ömasapiya 'wabo̧ma ji̧jetö. Jo̧bama la'akatjöda ömasapiya sulina, la'akatjöda kwebachinö̧kö̧. 9Jo̧bama Pablo yöawobe ba̧nö a̧ja̧kwa̧lijetö. Ja̧danö, Pabloma jo̧banö jweinö edö omukwatijetö, Bitema jweinö omukwato̧, Dios ujulunö otiwanö batibakwo̧sa, jö̧ba̧lö. 10Ikenama Pabloma labinö jwöbijetö jo̧banöma, ¡A̧laibi!, jö̧ba̧lö. Jejenö weökwe ömasapiya 'wabo̧ma omönanö a̧laibö 'yi̧jetö. 11Ikenama jojodöma Pablo ömasapiya 'wabo̧nö otidaja̧ edö labinö ösödö jwötjeba̧lakwawijadötö, idöda tjiwenenö, Liconionö ju̧kwadö tjiwenenö baikwö:

—¡Edaduwi! Bidö du̧ju̧tajama ökwödö do̧'wo̧ döwana̧lawö̧ena. Mölejȩbetjö tjichajena, jojodödanö ichejekwadö— jwötjeba̧lijadötö, Pablo, Bernabé tjo̧'wo̧ tjöwana̧lawö̧ena omukwatö. 12Ja̧danö, jejenö omukwatö yöbawijadötö Bernabénöma:

—Chömöledö, itema ökwödö do̧'wo̧ döwana̧lökwe Zeus, jö̧ba̧lö— yöbawijadötö. Ja̧danö, yöbawijadötö Pablonöma:

—Itema ökwödö do̧'wo̧ döwana̧lökwe Hermes— yöbawijadötö. Jobadöma tjo̧'wo̧ tjöwana̧lökwe Hermes mikwo̧nöma, Yöbawo̧, jö̧ba̧lö, laebobe. Pablobi, yöbawo̧obetjö̧, Bitema do̧'wo̧ döwana̧lökwe Hermes, jö̧ba̧lö, omukwatijadötö.

13Ikenama tjösödökwe Zeusnö ösödadö tjuluwo̧ma ju'wedökwö Pablonö, Bernabénö juwö iyö ösödö 'yi̧jadötö, Zeusnö juwö iyö ösödakwaweju jo̧bekwö. Jejuma comunidad ö'öbö ji̧jetö. Ja̧danö, jobadöma pa̧ka̧yö̧ ömadönö öbibö, o̧bubiyatjö itjawa lawo opjiya do̧ba̧lö 'yi̧jadötö comunidad tjöekwemi apjude jo̧bekwö. 14Ikenama jobadö juwö iyö tji̧'yakwa̧ yötjawi̧ a̧ja̧kwijadötö Pabloma, Bernabéma. A̧ja̧kwö tjo̧'wo̧ tjo̧bekwibijadötö yelösöda, tjökamisi kȩ'ekwö lobö. Kȩ'ekwö lobajadöma jojodö ösödö tji̧'yobekwö 'yi̧jadötö. Ichibö, omönanö jojodö tjö'da̧denö ja̧nö jö̧ba̧lijadötö:

15—Ökwödöma ¿tajawedö jejenö kwösödaduwa ökwödönöma? Ökwödöma woawedösa, ökwödödanö. Kwo̧'wo̧ kwöwana̧laduwawö̧böködösa. Ökwödöma otiwa jawa wene yöbawö dichajabe baima, ökwödönöma yöbawö. Mikwa jwii̧ jawa kwösödaduwi̧ma kabatibö Diosnö kwösödaduwobö yöbawö dichajabe. ¿Wajwiköbaduwiji̧? Diosma 'yabayo̧. Jo̧banöda kwösödaduwo, mikwa jwii̧ jawa kwösödaduwi̧ma kabatibö. Jo̧bama mölejȩbi, mölejȩnö köba̧ladönöbi, ojwe nöödöbi, ojwe okwa ju̧kwadönöbi, böjȩbi, böjȩnö ju̧kwadönöbi otidina. Okobe jwiinö böjȩnö ju̧kwi̧ma Diosda otidijetö—yöbawijetö Pabloma. 16Ina yöbawijetö:

—A̧ja̧kwaduwitjö. Damötjöma Diosma junibijetö israel jojodöböködönöma, jobadö sulabenö tjösödi̧da wainö ja̧bö tjuju̧kwobö. 17Jejenö ujunibinajayonö Diosma iteda pjaati̧ma ba̧kwȩlö̧jatebö i̧sebijetö. Jo̧kwaobetjö̧, israel jojodöböködö, wainö sulabenö ja̧bö ju̧kwadöma Diosnö wajwitjijayonö jo̧ba otiwanö pjaati̧ma edijadötö. Ja̧danö ¿ökwödöja? Babebi Dios otiwanö pjaati̧ma kwedaduwobe. ¿Tajida jo̧ba pjaati̧ma? Biya̧: Ojwiyo o̧bi̧ weobe kwujuninaduwi̧ pokwobö, ju'wi möle kwukwaduwakwa̧ma. Ja̧danö, otiwanö kwö̧jaduwobe, kwakwawa kwanö, Dios pjaati̧ma. Ja̧danö, kwo̧'wo̧duwi ösöwachibanö kwö̧jaduwobö pjaatobe Diosma. Jau, damötjöbi Diosma iteda pjaati̧ma i̧sebinobe. Ja̧danö, babebi i̧sebobe Diosma iteda pjaati̧ma ökwödönöma. Jo̧kwaobetjö̧ jo̧banöda kwösödaduwo, ökwödönömaökö— yöbawijadötö Pablo, Bernabé.

18Jejenö tjöwaisachibobö yötjawijayonö jojodöma tjuu 'diinö do̧batijöködötö, Juwö iyö dösödodönö, jö̧ba̧lö. Jo̧kwaijayonö lekwe yötjawiawö̧ bajaliyanö yöba̧lijadötö, Jau kwatjö̧ma, iyö dösödökena, jö̧ba̧lö.

Pablonö inawiyanö tjikwawina wene

19Ju'wi möle ju'wedö judío jojodöma, Antioquíanö ju̧kwadöbi, Iconionö ju̧kwadöbi Pablo Bernabé tjuju̧kwobekwö 'yi̧jadötö, Listrabe. Jobe ichibö jobadöma tjo̧'wo̧ sulinö eda̧lö yöba̧lijadötö jobe ju̧kwadönöma, Pablonö tjölabobö. Jejenö yötja̧liawö̧ jojodöma jwiinö labijadötö Pablonö. Ja̧danö, labijidöma Pablonö inawiya ikwawijadötö, ö'wöchinö. Ikenama, tjo̧wi̧ ö'wö baibajabe, jö̧ba̧lö, tötöbö lobijadötö Pablonöma comunidad ö'öböbe. 20Ja̧danö, jobadöma, Tjo̧wi̧ ö'wö baibajabe, jö̧ba̧lö, tjomukwatijayonö, ö'wö babibijökötö. Ikenama Jesúsnö ösödadöma Pablonö tötöbö lotjajobe 'ya̧nö, i̧sȩko̧nö tjuju̧kwachakwaibena Pabloma omönanö a̧laibijetö. A̧laibajo̧ ȩwa̧jijetö yadakwöda. Ikenama ju'wi dewachö jobetjö labebö, Pablo, Bernabé Derbebe 'yi̧jadötö.

Pablo, Bernabé Jesúsnö ösödadönö te'ada̧lakwawa jojodönö katjebina wene

21Ja̧danö, Derbenö ja̧nö yöbawiabijadötö otiwa jawa wenema. Yötjawiawö̧ jobe ju̧kwadöma ba̧jekwadö, Jesúsma dö̧jibinö pjabato̧, jö̧ba̧lö, ösödö do̧batö emijadötö Jesúsnöma. Ikenama Pablo, Bernabé yemidanö tjebachajijetö Listranö, ikenama Iconionö, ikena Antioquíanö, Pisidia nijinö Antioquíanö. 22Jobe comunidadkwena 'ya̧nö Jesúsnö ösödadönö pjabatö yöbawijadötö, Kwo̧'wo̧ luwo̧duwi juluwachibanö tupakwö kwi̧'yaduwo, jö̧ba̧lö. Jesúsnö kabatibökönö kwö̧jaduwo. Ja̧danö, jo̧banö omukwatö kwö̧jaduwo, jö̧ba̧lö, pjabatö yöbawijadötö. Jobadönö jö̧ba̧lijadötö:

—Chömöledö ¿wajwiköbaduwiji̧? Ökwödö Jesúsnö ösödadöma, usula demawobö jo̧be. Isabenö ökwödöma usula emawadösa. Ökwödöma Dios webö ö̧jena ja̧nö, do̧'wo̧ ösöwachibanö duju̧kwenanö baibanö, usula emawadösa— jö̧ba̧lijadötö.

23Jobe comunidadkwena ja̧nö Pablo, Bernabé Jesúsnö ösödadötjö ju'wedönö kabebijadötö Jesúsnö ösödadönö te'ada̧lakwawa jojodö batjibanö. Ikenama Pablo, Bernabé, Jesúsnö ösödadönö te'ada̧lakwawa jojodökwö, tju̧kwa kwökönö ö̧tö̧chö, Diosnö abebijadötö, Bidö te'ada̧lakwawa jojodönö otiwanö te'ada̧li, jö̧ba̧lö. 24Ikenama jobetjö labebajadö 'ya̧nö baledijadötö Pisidia nijinö. Pisidia baledajadöma ichibijadötö Panfilianö. 25Ja̧danö, Panfilia niji Perge comunidadnö ichibö jobe ju̧kwadönö yöbawijadötö otiwa jawa wenema. Yöbawö kabatibö jelöma labebijadötö Atalía comunidad tjolabe tji̧'yakwedö. 26Ja̧danö, tjolanö ichibö jobetjö ȩwa̧jijadötö isowinö Antioquíabe, ajayinö tjichinobekwö. Ajayinöma Pablo, Bernabé, Antioquíabetjö labebijadötö, Dios iwene yöbawö. Jobe ju̧kwadöma, Jesúsnö ösödadöma jobetjö webijadötö Pablonö, Bernabénö jelobe yöbawö tji̧'yobö. Ajayinö tji̧'yakwa̧ abönö jobe ju̧kwadöma Diosnö abebijadötö Pablonö, Bernabénö ite'ada̧lobö, ja̧danö, jobadönö pjaatobö yötjawonö. Ida̧ökö Pablo, Bernabé 'yi̧nadöma lekwe möle jelobebi jelobebi 'ya̧nö yöbawö kabatakwawijadötö Dios weinama. 27Ida̧ökö kabatakwawajadöma ȩwa̧jijadötö. Jobe ȩwa̧jadöma jwöbijadötö okobe deinö Jesúsnö ösödadönöma tjuju̧kwobekwö ichö tjoko̧ko̧kwachobö. Ichö ko̧ko̧kwajadönöma yöbawijadötö okobe jwiinö Dios pjaatina, Jesúsnö yötjawonö pjaatina jobadönöma. Baikwö wanedö yöbawijadötö:

—Chömöledö, Diosma apjude po̧ebinobe judío jojodöböködöbi Jesúsnö ösödadöma jweinö tjichibobö Diosnö— wanedö yöbawijadötö. 28Ikenama Pablo, Bernabé, lekwe möle ju̧kwijadötö Antioquíanö Jesúsnö ösödadökwö.

Currently Selected:

Hechos 14: WPC

Highlight

Copy