MATEO 11
11
Juan ona iñajeanobiajji poaniya dejjacuana Jesosaque huoojeacapoa o huohuiajjaa a'ya oya
1Majoya aje Jesosa oja babaca poani 12 huisome dejjacuana o poquijjijo huohuijeyomajje oya poquiapoa ma meshijo ba'ecacuana sohuihuohuiya. Ma meshiya provincia Galilea bajjani poa.
2Juan ona iñajeanobiajji poanaje dejja ca ejjajeanobiaquijji equijo ejeanobia aniapoa. Majo aniya ohuaya shajja-ajjacapoa Quitojo ma ohua dejjaja ajjima'neineicuana acaquijo. Jamajjeya Juanya o shajja-ajjajji poanicuana huoojeacapoa o huohuiajjaa. 3Juanja huoojea dejjacuaa Jesosa huohuiajjacañaquiapoa jama ba'a: —¿A'a miya ma Eyacuiñajjija esohuihuohuijji poacuaa huohuicapoquiapoaya jiquio poeyanaje? ¿A'a pojja'a mi ma pojjeama, pea ishoacajji pojja'a?—
4Jesosaa saja-acapoa cuana jama ba'a: —Huacuaya quiana poqui'yocue Juan huohuiñaqui'yohua ojjaña jiquio miquiaa baña huisotii eya aña, ojjaña eya huohuiaña jiquio miquiaa shajja-ajjaña huisotii esohui pea-ai. 5Oya huohuiñaqui'yocue eyaya cojjama'cuana queacojjaja'a pomee'yonaje. Jeo'yoajja anicuana eyaya jeomee'yonaje. Lepra epocuana eyaya oja yami jjajeameequi'yonaje. Jjashajja-ajjaquiajja poanajecuana queba eyaya jjashajja-ajjameequi'yonaje. Emano'yo jaacuana shequimee'yonaje. Aema'cuana poani eyaya esohui queapame huohuinaje Eyacuiñajjija huoojea poeyanaje o nahue'yohua. 6Queabihuinee poanicuana joya pea jjashahuabaquime queaquehua po'yoajja ejo e jama poani bamajje.— Jamaya Jesosaa acapoa beca dejja Juan huohuiñaqui'yojji.
7Majoya Juanja huoojea beca dejja poqui'yajo, Jesosaa majo anicacuana huohuicapoa Juanjo jama ba'a: —Miquianaya se-ejjama' meshiyasijje yahuajopishana poquinaje Juan baa. Majoya ¿ache dejja jayojja shai oya poaje jjashahuabaquinaje quiana? ¿A'a oya jiquio ecua siponeao beniya jeahuenacani jama oya poanaje? Oya ca jama pojjeama poanaje, pea jjashahuabaquime pocuaji'yoajja oya.— 8Jesosaa huohuitiicapoa jama ba'a: —¿A'a ohuaya daqui queanahuenee huoshocani baa quiana poquinaje? Chojja. Miquianaja eba joya daqui queanahuenee huoshojji poanicuana caca oe emeshimeseja equijotii aniani. 9Eyaya quiana huohuiajjaje o'oya. ¿Ache dejja jayojja shai oya poaje miquianaya jjashahuabaquinaje? E'e pojja'a miquianaya jjashahuabaquinaje oya Eyacuiñajjija esohuihuohuijji poani. E'e, oya e'ejojonei Eyacuiñajjija esohuihuohuijji queapamenee poani pea-ai. Ohuaya ma ecua yahuajonei Eyacuiñajjija esohuihuohuijji poacuaa esohui huohuicanequiapoa jama pojjeama huohuicanaje. Juanya caca oe pea esohui Eyacuiñajjija huoojea epoejjijo pea-ai huohuicanaje cuana meteamaneiya. 10Yahuajonei Eyacuiñajjija esohuihuohuijji poacuaa esohui Juanjo huohuipea-aicapoa jama ba'a:
“Eyacuiñajji jama poani ba'a:
Mi huoojeajjimahuajo oe dejja huoojeaje mijo huohui epojji ebionei.
Jiquio ecua dejjacuaa ejeojji chacocani epijajinei queapojjenee pea poejji,
jama pea-aiya ohuaya mi poejjijo huohuicaje cuana mijo ejjashahuabaqui'yojji.”
11E'ejojonei eyaya quiana huohuiaña chama'neinei pea dejja jjeya, yahuajonei pea-ai joya ecua Juan ona iñajeanobiajji poani jama pea-ai epojji. Eyacuiñajjiya Juan queapamenee bacani. Ojjaña joya Eyacuiñajjija huoojeajo jjashahuabaqui'yojji poanicuana ma ohua ojjañacuana huoojeacapoquianitii meshi Eyahuasijje epoqui'yojji cuanaya queapamenee Eyacuiñajjiya bacaje jiquio ecua ohua Juan bacani jama pojjeama, oya queapamenee.
12—Juan ona iñajeanobiajji poanaje yahuajopishana poeyanaje esohuihuohuiya. O poeajo, jjeyaneitii pea-ai iyehuiso dejjacuaa Eyacuiñajjija esohui oya ojjañacuana huoojeapoquiajjitii poani esohuiya huohuimeejjima acani, oja esohui chama'yo pomeesa-acani. 13Yahuajonei ojjaña Eyacuiñajjija esohuihuohuijji poacuaa, Moisesya pea-ai, huohuicanequiapoa quijje Eyacuiñajji ojjañacuana huoojeapoquiajjitii queaca'atii nequije. Oya esohuitiiya huohuicapoquiapoa cuaa Juan poeajo. 14Oja tehue Eyacuiñajjija esohui acapoa cuaa yahuajonei ElĂas dejja poeje o'oya. Ma esohuiya Juanya apoa acanaje, oya epoe ElĂas jama epojji. ÂżA'a jiquio esohui e'ejojonei poani baje quiaa? 15Cua shajja-ajjasapoaniya quiaa jiquio esohui shajja-ajjaneicue.
16—Jiquio jjeya eshe ba'ecacuana, ¿ae shai jayojja poani? Eyaya miquiana huohuije. Jiquio eshe ba'ecacuana jiquio ecua esho'iquiana plazajo quebanei po-ani jama. Onijje esho'inijje jama taaame poani ba'a: 17“Ecuaaya dehue mianaje miquiana queabihui pojji, jamatii miquianaya majamajajjima poanaje. Chama' miquiana queabihui pomeejji poanaje. Majoya ecuana queayeno emano'yojo sohuicuayanaje miquiana queayeno pojji, jamatii miquiana pajjima poanaje” jamaya mimiani esho'iquiana. Jiquio jjeya eshe ba'ecacuana joya ecua esho'iquiana poani jama pea-aiya.— 18Majoya Jesosaa fariseocuana, Moisesja tehuehuohuijjicuana huohuipea-aicapoa jama ba'a: —Juan bobi ijjiapojjima' nequinaje so'o Eyacuiñajjinijje emimijji. Uvajjajjana' pea-ai ishijjima acanaje ohuaya. Jamatii miquiaaya oya queapame pojjeama banaje. Oya eshahuamase yamijji poani quiaa anaje. 19Majoya eya Dejjapojji epo poeyanaje. Eyaya pea pea bobicuana queabihuiya ijjiaña. Uvajjajjana' ishiaña. Jamatiijojoya quiana ejo pea-ai queabihui pojjeama poani. Ejo jama poani quiana ba'a: “Oya queabobinee. Oya quea-uvajjajjana'se. Oya jjapeepea-aiquiani dejjamimishicuananijje, Roma emeshimeseja yajji bejjo chichapoquiajji poaninijje pea-ai.” Miquianaya jama jjaniñebaquimeya poani ecuanajo. Ecuanaja echacojji queapame poani bamajje eya, Juan pea-ai Eyacuiñajjiya queajjashahuabaquija'a pomeecani miquianaja bacajji poanaje.—
Ma shajjama' jayojjatii poanajecuana Jesosaa huohuicapoa o queanee pojjijo
(Lc 10.13-15)
20Jesosaa dejjaja ajjima'neinei queahuiso acapoquiapoa pea meshicuanahuasijje. Jamatii ma meshicuanajo ba'ecacuana pea jjashahuabaquime posapo'yoajjanei poa oja mimishijo. Jamajjeya Jesosaa tecueacapoa ma meshicuiñajjicuana jama ba'a: 21—¡E'ejojonei miquianaya Corazincuiñajjicuana, Besaidacuiñajjicuana queaneenee Eyacuiñajjiya pomeecaje'yo miquianaya pea jjashahuabaquime po'yoajjatii poanajejojoya miquianaja mimishijo! Ecuea dejjaja ajjima'neineicuana Tirocuiñajjicuanaja ebajji, Sidoncuiñajjicuanaja ebajji pea-ai ea poanajejojjemo macuiñajjicuana pea jjashahuabaquime poca'yoquiae oja mimishijo. Macuiñajjicuaa daquisha'a o queayeno poani oja mimishijo jjabaquijji huoshocaquiae, cuaquipohui pea-ai oja sapajo iyacaquiae. 22E'ejojonei eyaya quiana huohuiaña, quijje ojjaña meshijo ba'ecacuanaja mimishi ja'anei Eyacuiñajjiya huohuicaje'yo o queaneenee pomee'yojji epojja poeajo miquianaya Corazincuiñajjicuana, Besaidacuiñajjicuana pea-ai Eyacuiñajjiya queaneenee pomeecaje'yo. Ma ecua ohuaya Tirocuiñajjicuana, Sidoncuiñajjicuana queaneepishana pomeecaje'yo jama pojjeama quiana pomeecaje'yo. 23Miquianaya pea-ai Capernaúm meshijo ba'ecacuana queaca'a jjabaquiani Eyahuasijje epoqui'yojji nisho. Chojja de, jama pojjeama quiana poaje'yo. Eyacuiñajjiya miquiana jeajeameecaje'yo Cuaqui-aiyasijje. Eyaya miquianaja meshijo nequiya dejjaja ajjima'neinei anaje jamatii miquiana jjashahuabaqui'yoajjanei poanaje ejo. Yahuajonei ecuea dejjaja ajjima'neineicuana eapea-ai poanajejojjemo Sodoma meshijo nequiya macuiñajjicuana pea jjashahuabaquime po'yoquiae oja mimishijo, oja meshi queapametii anipoquiquiae, jjeya pea-ai. 24Jamajjeya quijje epojja ojjaña meshijo ba'ecacuanaja mimishi ja'anei Eyacuiñajjiya huohuicaje'yo o queaneenee pomee'yojji poeajo Eyacuiñajjiya quiana queaneenee pomeecaje'yo ma ecua ohuaya Sodomacuiñajjicuana queanee pomeecaje'yo jama pojjeama— jama tecueameya acapoa.
Jesosaa iyaacapoa cuana ojaya epeejji epo'yojji
(Lc 10.21-22)
25Majoya aje quijje Jesosa mimiapoa oja Chiinijje jama ba'a: —Ecue Chii eyaya miya bihuiaña. Miya Emeshimesenei poani, ojjaña Eyajo ani meshijo pea-ai miyaya huoojeapoquiañatii. Dejjacuana joya oyaneitii queasapaja'a poani jjabaquiajja cuana, esho'iquiana jama, miyaya comacuanaya bameesahuanaje miquea ejjashahuabaquijjicuana. Joya oyaneitii queasapaja'a jjabaquijjicuana, joya etii poanija huohuimajamajapoanicuana pea-ai comacuanaya miquea bameesahuajjima poanaje. 26Jama pomeesaya miyaya anaje ma dejjacuanaya, ecue Chii.— Jama mimimeya poa Jesosa oja Chiinijje.
27Majoya Jesosaa o shajja-ajjajji poanicuana huohuicapoa jama ba'a: —Ecue Chiiya ojjañatii aquianacuana eya quiacanaje. Chama'neinei dejja e baneineijji poani achajja eya Ebacuaejja nequi. Ecue Chii oeneija caca oe eya ebaneinei. Oya jayojjaya che oema'neicuanaja ecue Chii ebaneinei. Ecuea, Ebacuaejja oeneija caca oe oya ebaneinei. Ecuea epeejjicuaa cua eya bameesa-anaje cuaaya ecue Chii queaja'a bacaje. 28Eque quiana oe poecue ojjaña joya queayenotii jjashahuabaquipoquiani miquianaja eba'ejji queacamajanee poanijo. Eyaya quiana yenoama pomeeje'yo, jomishocameeje pea-ai. 29Miquiaaya jiquio eya huohuiaña esohui shajja-ajjaneicue. Jiquio ecua acuibiquie ana-aiya oja piquisajo huanameecani yugo bajjani o camaja-ama ojee echacochacojji, jama pea-aiya pocue e shajja-ajjajji epojji enijje echacochacojji. Eya ca iña quenequenecuajiajjanei. Eya miquiana chacomeesahuajji queapamenee poani. Majoya quiana eyaya quijje yenoama pomeeje'yo eyamiquipajje. 30Ecuea esohuicuana yugo jama poani miquianaja queacamaja pojjeama ebapoquiajji. Ecuea echacojji pea-ai queacamajanee pojjeama eapoquiajji jjabaquije quiana aquianacuana queabiquie eabojji jama pojjeama oya poani.—
Currently Selected:
MATEO 11: ESE
Highlight
Share
Copy
Want to have your highlights saved across all your devices? Sign up or sign in
Copyright Mision Nuevas Tribus, 2006
