MATEO 10

Jesosaa 12 huisome o shajja-ajjajji poani dejjacuana babacacapoa ona sohuihuohuiquinequijji epojji

(Mc 3.13-19; Lc 6.12-16)

1Jesosaa 12 huisome o shajja-ajjajji poani dejjacuana babacacapoa ona sohuihuohuiquinequijji epojji. Majoya oja babaca dejjacuana queaca'a pomeecapoa eshahuamasecuana onaja eyamijo nequi huoojeacuayajeamee'yojji epojji, pea pea manome epocuana jja-ajameequi'yojji epojji, joya queanee epocuana huaquiamee'yojji epojji pea-ai.

2Mahuisoya oja babacacuana ona sohuihuohuiquinequijji epojji 12 huisome poa ba'a: Ebionei Simón oya bajjanibeca poa Pedro, Andrés, o dohue pea-ai poani, beca Zebedeoja bacuaejja Santiago, Juan pea-ai. 3Pea Felipe, Bartolomé, Tomás, Mateo pea-ai. Oya Mateo Roma emeshimeseja yajji bejjo chichapoquiajji poa. Pea Jesosaja babaca dejjacuana ma bajjani poa ba'a: Santiago Alfeoja bacuaejja, Tadeo pea-ai. 4Pea Simón, Roma dejjacuana botiamanei poa. Pea Judas Iscariote ma quijje Jesosa iñameesahuajji poaje bejjo sosejje. Mahuisoya cuana Jesosaja babaca dejjacuana poa.

Jesosaa oja babaca dejjacuana huoojeacapoa ona sohuihuohuiquiya

(Mc 6.7-13; Lc 9.1-6)

5Majoya aje Jesosaa esohui oja babaca dejjacuana 12 huisome huohuicapoa yajja ojaya acajji oja huoojeajjimahua. Jama acapoa cuana ba'a: —¡A'a quiana ca oe judío pojjeamacuanaja meshiyasijje poquijji! Samaria meshijo ba'ecacuanahuasijje pea-ai, ¡a'a ca oe cuama poquijji! 6Israelcuiñajjicuanayasijjenei ca oe poquicue quiana sohuihuohuiquiya. Jiquio ecua ovejacuana ecuaquisho'yo nequiani jama pea-aiya poanicuana. 7Cuamaya huohuiquicue cuana Eyacuiñajji ojjañacuana huoojeapoquiajjitii poani o poejji epojja poechipiani. 8Joya queamano jaacacuana jja-ajameequi'yocue. Emano'yo jaacuana shequimee'yocue. Leprajo queamanonee poanicuana jjajeameequi'yocue. Joya shahuamase yamijji nequicuana eshahuamase huoojeacuayajeamee'yocue. Miquiana queaca'a ona quea-aja pomee'yojji epojji eyaya pomeeaña jamatii miquianaja eya sosequiajjima. Jamajjeya a'a bejjo huohuiajjajji cuana o quea-aja pomee'yojji sosejje.

9—A'a oe aquiana jjeshejji eso'dojjocuana dojojji poquimajje. 10A'a bobi dojojji ejeojjijje eijjiapoquiajji. Pea daquicuana quijje ehuosho'yojji a'a dojojji. Jeojjishejee pea, ejjaquecuaca'aquijji pea-ai a'a dojojji. Bacue, ojjaña joya chacochacoanicuaaya bobi jjeshecapoquijji cua o poquije meshicuanahuasijje majo ba'ecacuanaja quia. Jama pea-aiya jjeshepoquiaje quiaa.

11—Peaja meshicuana bañaquimajje dejja queaja'a ba'yani majo sa-ajjañaquicue. Majoya o bamajjeya oja equijotii aniñaquisocue majotii ani epoqui'yojji quijje. A'a pea equiyasijje anipojji. 12Oja equiyasijje nobiquiñaquimajje ojjaña majo anicajo esohui queapame añaquicue jama ba'a: “Eyacuiñajjiya quiana queapamenee ca-acahua.” 13Ma equijo anicacuaa miquianaya queapame ja'acajjequiajo, miquianajaya esohui shajja-ajjasapoajo pea-ai esohui acue Eyacuiñajjija queapame o eajjijo. Miquiana shajja-ajjasapo-ajja poajo ca majo anicacuana jama acue ba'a: “Eyacuiñajjija quiana queapame eajji pojjeama.” 14Jamajjeya ma miquiana shajja-ajjasapo-ajjanei poanija equijo ani a'a majotii anineijji, cuayaqui'yocue. Miquianaya queapame ja'ajjequiajjacuanaja meshijo ani jjabaquimajje a'a majotii anineijji. Oja meshijo ani poqui'yomajje miquianaja ejeojjishejeejo ani meshipohui cuia-iyajajeana'yocue macuiñajjicuana jjabaquijji oya shajjama' jayojja poanijo. 15E'ejojonei eyaya quiana huohuiaña. Epojja ojjaña meshijo ba'ecacuanaja oja mimishicuana ja'anei huohui'yojji o queaneenee po'yojji poeajo ojjaña joya shajjama'neitii poanajecuana ma miquianaya poquiajjanaje meshijo ba'ecacuana queaneenee poaje'yo. Jiquio ecua Sodomacuiñajjicuana, Gomorracuiñajjicuana pea-ai quijje queaneenee poaje'yo oja mimishijo jama pojjeama poaje'yo cuana. Queaneeneetii poaje'yo ma miquiana shajja-ajjasapo-ajja poanajecuana.

Queanee pomeecaje cuaa oja esohui huohuicajo

16—Bacue, eyaya quiana huoojeaña. Miquianaya nequije dejja queamaseneenijje jiquio ecua ovejacuana ebiocuiñajji queamasecuaa ijjiasa-acani jama. Jamajjeya quiana oe queasapaja'a pocue ejjajaahuanaquijji jiquio ecua peyo queasapaja'a poani jamaya. Jamatii maseamaa huia' jamaa oya queapame acue. 17Jjajaahuananeiquicue quiana oe dejjamasecuanajo. Ohuaya quiana dojomeecaje etii poanicuanahuasijje napameeya. Judioja equi-ai ejjachichaquijjijo ani cuiasejjajeameecaje quiana jjono ejeapashajjajjaa. 18Ecuea esohui miquiaaya huohuiañajojoya emeshimesecuana nequi cojjaneijo nequimeecaje cuaa miquiana napameejji. Majo nequiya ecuea esohui queaja'a huohuije quiaa emeshimeseja eshajja-ajjajji judío pojjemacuanaja pea-ai. 19Jamajjeya miquianaya dejja etii poanicuanahuasijje dojocajo, a'a queayenotii jjashahuabaquijji ache esohui shai huohuije quiaa o cojjaneijo nequiñaquimajje. Ache esohui ejjanahuequijji huohuime aje quiaa, a'a majotii jjashahuabaquijji. Miquiana o cojjaneijo emimijji nequiajo Edojjoshahuapameya miquiana esohui queaja'a quiacaje etii poanicuananijje emimijji ejjanahuequijji. 20Miquianayanei pojjeama mimije dejja etii poanicuananijje. Edojjoshahuapameya miquianaja Chii-aiya quiacanajeya ca esohui queaja'a huohuimeesahuacaje quiana etii poanicuanaja eshajja-ajjajji.

21—Quijje dejjacuaa oja huapa pojjeamaneicuana oja dohue poaniya dojomeecaje etii poanicuanaja equecuamee'yojji. Peacuaa ca oja bacuaejjanei dojomeecaje etii poanicuanaja equecuamee'yojji. Ebacuacuaa pea-aiya oja chii, oja nae pea-ai quecuajeameecaje'yo. 22Ojjaña meshijo ba'ecacuaa miquianaya botiamanei acaje ejo ecuea epeejji poanijojoya. Ojjaña miquiana joya queaca'atii ba'epoquiani e cajaa ajjima'tii, quijje queahuisocuana queanee queacamaja pomeejji apoa poajo, miquianaya queapame enahue'yotii ba'eje'yo. 23Miquiana oe meshijo nequica dejjamasecuaa queanee pomeecajje quehuapoquicue pea meshiyasijje cuamaya nequiñaquiya. E'ejojonei quiana huohuiaña eya Dejjapojji epo poeje o'oya miquianaja ojjaña Israel meshijo ba'ecuanahuasijjeyee esohui huohuijeyojjimahuajo.

24—Bacue, joya o shajja-ajjajji poanicuana queasapaja'a pojjeama jiquio ecua o sohuihuohuijji poani jama pea-ai pojjeama. O sohuihuohuijji poani ca queasapaja'a. Oya jayojja pea-ai joya peajo chacochacoanicuanaja ebapishana, o chacomeejji poanija caca oe ebaneinei. 25Jamajjeya jiquio ecua o sohuihuohuijji niñebacani cuaa oya jayojja o shajja-ajjajji poanicuana niñebapea-aicaje. Oya jayojja pea-ai jiquio ecua o chacomeejji poani dejja queatai acani cuaa joya ojo chacochacoanicuana queatai apea-aicaje cuaa oya jayojjaya. Bacue, eya niñebacani cuaa jama ba'a: “Jiquio dejja eshahuacuanamese poani. Oya bajjani Beelzebú.” Jamaya eya queatainee acani cuaa. Bacue, eya emiquianamese poanijotii eya jama queatainee acani cuaa, miquianaya queatainee apea-aicaje.—

Jesosaa huohuipea-aicapoa ajeo queamete pocajji

(Lc 12.2-7)

26Jesosaa huohuitiicapoa cuana jama ba'a: —A'a peacuanajo quiana queamete pojji. Ojjañacuanaja mimishi cua oja huanaquehua jaa queaja'a huohuicaje'yo quijje. Cua oja iyaquehua ani pea-ai bacaje'yo cuaa queaja'a quijje. 27Jiquio esohuicuana eyaya miquianayanei huohuiaña so'o peacuanaja shajja-ajjajjima. Jamajjeya quijje ona cojjaneijo nequimajje huohuicue cuana jiquio esohui ojjañatii. Equijamacoo eyajo nequiya pea-ai ja'anei janobajjimanei huohuicue ojjañacuana.— 28Jesosaa huohuipea-aicapoa cuana jama ba'a: —Eyaya quiana pea esohui huohuiaña. A'a queamete pojji miquianaja eyaminei peaja equecua'yojjijo. Miquianajaya edojjoshahua ca equecua'yojjitii pojjeama poaje cuanaja. Jjeya eyaya quiana huohuije ajeo queametenee pocajji. Eyacuiñajjijonei ca quiana ca oe queamete pocajji. Oya oenei queaca'aneetii nequipoquiani dejjacuana manomee'yojji oja edojjoshahua jeajeamee'yojji Cuaqui-aiyasijje. Jamajjeya ojo oeneijo queamete pocajji.

29Bacue, beca eso'dojjojo cinco cuichojji anohui jjeshecani cuaa. Oya anohui sosema' jayojja poani, dejja, epona jama pojjeama. Jamatii Eyacuiñajjija eba ojjaña anohuicuana, oya oe anohui pajeapajea'yoajja. 30Miquianaya ca ojaya ebaneinei joya ecua anohuicuana jama pojjeama. Miquianaja sapajo ehuojjaña ojaya ebanei ache huiso nequi miquianaya ojaya ebaneineijojoya. 31Jamajjeya quiana oe a'a queamete pojji. Miquianaya caca Eyacuiñajjija queanahuenee poani anohuicuana jama pojjeama.—

Jesosaja epeejjicuana bichoamanei pocajji ojo

(Lc 12.8-9)

32Jesosaa huohuitiicapoa cuana jama ba'a: —Ojjaña joya bichoamanei poani emimijji dejjacuana ani cojjaneijo jama ba'a: “Eya ca iña Jesosaja epeejji poani.” Macuanajoya eyaya ecue Chii Eyajo ani bichoama huohuipea-aije jama ba'a: “Oya caca e'ejojonei ecuea epeejji poani.” Jamaya eya poaje ojo. 33Ojjaña joya mimiani dejjacuana ani cojjaneijo jama ba'a: “Eya ca iña Jesosaja epeejji pojjeama.” Macuanajoya ca ecue Chii Eyajo ani cojjaneijo eyaya huohuipea-aije ba'a: “Ecuea ca coma bajjimanei poani, ecuea epeejji pojjeama oya.” Jamaya eya poaje ojo.—

Oya jayojja pea-ai jjashahuabaquime pojjeama poa cuana Jesosajo

(Lc 12.51-53; 14.26-27)

34Jesosaa huohuitiicapoa cuana jama ba'a: —A'a quiana oe ejo jjashahuabaquijji jama ba'a: “Jesosa poeyanaje ojjañajaajjicuana ojee queabei ba'emee'yohua.” Chojja, majo pojjeama eya poeyanaje jiquio meshiyasijje. E epoejojoya ojjaña dejjacuana oya jayojja pea-ai jjashahuabaquime po-ajjajjejojoya ejo. 35Bacue, dejjacuaa oja chiicuana botiamanei acaje ejo, oya ecuea epeejji poanijojoya. Oja bacuasecuaa oja nae botiama acaje ejo. Oja bacuaejjaja huanasecuaa oja anocuana botiama apea-aicaje ejo. 36Jamajjeya oja huapa pojjeamaneicuana botiamanei acaje cuaa ejo, o cuiajji epo jayojjanei bacaje cuana.

37—Ojjaña joya oja chii, oja nae pea-ai queajeanee ajji poanicuana eya ca queajeapishana poani, comaya ca e shajja-ajjajji epojji pojjeama poaje. Oya jayojjaya ojjaña joya oja bacuaejja, oja bacuase pea-ai queajeanee ajji poanicuana eya ca queajeapishana poani, comaya ca e shajja-ajjajji epojji pojjeama poaje. 38Ojjaña joya queanee posapo-ajja poanicuana ejo, jiquio ecua dejja acui ecuiata'apee o manomeecaje'yo meshiyasijje abosapo-ajja poani jayojja, comaya ca e shajja-ajjajji epojji pojjeama poaje. Ojjaña joya eya jayojja pea-ai jjashahuabaquime posapo-ajja cuana ca e shajja-ajjajji epojji pojjeama poaje. 39Ojjaña joya ojayanei eba'ejjijo jjanahuequipoquianicuana comacuanaja eba'ejji peajja bacaje Eyacuiñajjiya. Ojjaña joya jjashahuabaquiajja ejjanahuequi'yojji emano'yojji ejo, Eyacuiñajjiya comacuanaja eba'ejji queapamenee bacaje.—

Eyacuiñajjija quia jjeshecaje cuaa o queapame ba'epoquinaje sosejje

(Mc 9.41)

40Jesosaa huohuitiicapoa cuana jama ba'a: —Ojjaña joya miquiana queapame ja'ajjequijji poanicuana eya pea-ai queapame ja'ajjequijji jayojja poani. Jamajjeya joya e queapame ja'ajjequijji poanicuaa Eyacuiñajji pea-ai e huoojeajji epo queapame pea-ai ja'acajjequiani. 41Ojjaña joya Eyacuiñajjija esohuihuohuijji poani dejjaja esohuijo jjashajja-ajjaquijji poajecuaa jjeshecaje Eyacuiñajjija quia o queapame poanaje sosejje ma ecua o esohuihuohuijji poanicuaa jjeshecaje jama pea-aiya. Ojjaña joya dejja queapame ba'e ja'ajjequijji poanicuaa jjeshecaje Eyacuiñajjija quia o queapame poanaje sosejje ma ecua dejja queapame ba'yaniya jjeshecaje oya jayojja. 42E'ejojonei eyaya quiana huohuiaña. Ojjaña joya enahuoe bisonei canecojo nequi quiajji poaje e shajja-ajjajji poanija eishijji jamatii oya esho'i poani ca'a-ama, comaaya jama quiajji poajeya jjeshecaje Eyacuiñajjija quia o queapame poanaje sosejje.— Jamaya huohuica-aniapoa cuana Jesosaa.

Currently Selected:

MATEO 10: ESE

Highlight

Copy