LUCAS 15

Jesosaa huohuicapoa esohui ebameesahuajji oveja ecuaquishojo

(Mt 18.10-14)

1Queahuiso Roma emeshimeseja yajji bejjo chichapoquiajji dejjacuana, pea dejjamimishicuana pea-ai Jesosaque jjachichaquicapoa oja esohui shajja-ajjasapomajje. 2Jamajjeya fariseo dejjacuaa, Moisesja tehuehuohuijji poani dejjacuaa oya Jesosa niñebacapoa jama ba'a: —Jesosaa dejja mimishicuana onijje animeecani, queapameya ja'acajjequiani, onijje ijjiaijjiani pea-ai.—

3Majoya Jesosaa pea esohui ebameesahuajji huohuicapoa cuana jama ba'a: 4—Oe miquiana jiquiojo 100 huisome ovejajji poaniya majoya oe miquea oveja cuaquishonaje bamajje, ¿yajja aje'yo? ¿A'a acuae miyaya 99 huisome ovejacuana jeananaje so'o ma oenei ecuaquisho oveja sa-ajja'yohua? E'e de, poquije miya o sa-ajja'yohua. 5Miquea oveja ecuaquisho ba'yomajje queabihuineeya oya mique ebe'ojjojo huanasohuamajje yeje'yo equiyasijje. 6Equi bañaqui'yomajje jjachichaquimeeje miquea epeejjicuana, mipejjejo ba'eca pea-ai. Majoya huohuiñaje'yo cuana jama ba'a: “Enijje queabihuinee pocue ecuea oveja ecuaquisho nequi eyaya ye'yonaje.”— 7Jesosaa huohuitiicacuanapoa jama ba'a: —Dejjamimishicuana jiquio ecua ovejacuana jayojja poani. Jamajjeya eyaya quiana huohuiaña, queabihuineenee poani Eyajo nequicacuana oe dejjamimishiya ohua oja mimishi cajaa acaje Eyacuiñajjija epo'yojji bamajje. Queabihuipishana poanicuana ca ma pea 99 dejjacuanajo ma oyaneitii queapame poso ba'epoquiani jjabaquijjicuanajo.—

Jesosaa huohuicapoa esohui ebameesahuajji eponaa eso'dojjo queanahueneenee baca'yonajejo

8Jesosaa huohuipea-aicapoa cuana jama ba'a: —Oe eponaja eso'dojjo queanahueneenee 10 huisome aninaje. Majoya oe eso'dojjo jjajeaquiajo oya queayenotii majo jjashahuabaquipoquije. Ohuaya cuaquijiji dedonanamajje equi jjapashineijje cuiashabacaje oja eso'dojjo queanahueneenee ba'yojji. 9Majoya ojaya eso'dojjo ba'yomajje oja epeejjicuana, opejjejo ba'ecacuana pea-ai iyaacaje ehuohuijji jama ba'a: “Enijje queabihuinee pocue ecuea eso'dojjo queanahueneenee ejjajeaqui ani eyaya ba'yonaje.” 10Jama pea-ai eyaya quiana huohuiaña queabihuineenee poani Eyacuiñajjija angelcuana dejjamimishiya ohua oja mimishi cajaa acaje Eyacuiñajjija epo'yojji bamajje.—

Jesosaa huohuicapoa esohui ebameesahuajji echiimeseya oja bacuaejjaja mimishi pajeaca'yonajejo

11Jesosaa pea esohui ebameesahuajji huohuipea-aicapoa cuana jama ba'a: —Oe dejja bacuaejja beca nequinaje. 12Majoya aje ebacuaejja esho'iya oja chii huohuicanaje jama ba'a: “Ecue chii, jjeyahuanei mo aquianacuana quiacue ma mi mano'yajo quijje ecuea poaje'yo huisotii.” Jamajjeya echiimeseya oja bacuaejja ma quijje ojaya epo'yojji huisotii aquianacuana, meshi pea-ai quiacanaje. 13Majoya aje pea pojjajo ebacuaejja esho'iya ojjaña oja chiija quia pea dejjacuana quiaca'yonaje bejjo sosejje. Ma bejjojoya oya queahuesha poquinaje pea meshiyasijje. Ma pea meshijo nequiya ojaya bejjo ojjaña quiajeajeyocapoquinaje queamimishihuiso eba'epoquijjijo. 14Jamaya ojjaña ojaya bejjo ohuaya quiajeajeyocapoquinaje, chama'yo poanaje. Majoya ma meshijoya bobi chama'nei poanaje. Queahuisoneecuana majo ba'eca bobi chamajo queashoenee pocanaje. Oja ebacuaejja esho'i pea-ai queashoeneenee poanaje. 15Jamajjeya ohuaya ma meshijo nequi dejja huohuiajjacanaje ojo echacochacojji. Majoya oya huoojeacanaje oja cuichicuana nequiyasijje oja cuichicuana cuiñaa. 16Majo queashoeneenee aniya ohuaya cuichicuanaja bobi ijjiasa-acanaje. Jamatii oya majo ani bobi quiajjimaneinei poanaje cuanaja. Oya queacamajanee aninaje. 17Majoya quijje oya queaja'a jjashahuabaqui'yonaje esohuiquipajje jama ba'a: “Ecue chiija equijo bobi queahuisoneenee ani ojjaña pojjajo ojjaña oja equijo ba'ecuanaja ijjiapoquiajji, ojo chacochacopoquianicuanaja pea-ai. Oja bobi ojo chacochacopoquianicuaa ijjiajeyojjima acani. Eya ca quiojotii ani bobiyasijje poaje'yo queashoeneenee pomajje. 18Jamajjeya eya jjeya poquije'yo huacuaya ecue chiija equiyasijje. Eyaya oya añaquije'yo jama ba'a: Ecue chii, eya queamimishi poanaje Eyacuiñajjinijje, minijje pea-ai. 19Eya mique bacuaejja poani jjabaquiajja jjeya queamimishi poanajejjejojoya. Jamajjeya eya jamatii mijo echacochacopoquijji pomee'yocue. Jama huohuime eyaya ecue chii añaquije'yo” jama jjashahuabaquimeya poanaje oya. 20Jamajjeya ma meshi jiña'yomajje oya ejeojjijje poe'yonaje oja chiija equiyasijje.

—Majoya aje echiimeseya oja bacuaejja queahueshanee poeje'yo bacanaje. Oya queamano eshihui'yo poeje'yo bamajje oja chii queayenonee jjashahuabaquinaje ojo. Jamajjeya ohuaya oque cuajicuajinanamajje mapacajjequi'yonaje, shemo tojjocajjequi'yonaje queabihuineeya. 21Majoya ebacuaejjaa oja chii jama acaña'yonaje ba'a: “Ecue chii, eya queamimishi poanaje Eyacuiñajjinijje, minijje pea-ai. Eya mique bacuaejja poani jjabaquiajja jjeya queamimishi poanajejjejojoya.” 22Jamatii oja chiiya ojo chacochacopoquianicuana majo ani huohuicanaje jama ba'a: “Jjeyanei daqui queanahuenee jjequicue o huoshomee'yojji. Emebajji pea-ai queapame jjequicue oja emejo eiyajji. Jeojjishejee pea-ai huoshomeecue. 23¡Macayahuesho'i cua eseinei jjeyahuanei jjequicue ecuia'yojji! ¡Ecue bacuaejja poe'yonajejo se ojee queabihuinee ijjiaijjiaje, quebanei se poaje! 24Jiquio ecue bacuaejja emano'yo jayojja poanaje jjeya oya poe'yonaje, ecuaquisho'yo jayojja oya poanaje, jjeyanei jjaja'aqui'yonaje” jamaya oja chii poa. Jamajjeya queahuisocuana fiesta aa ojee bobi ijjiaa poeyanaje.

25—Echahuamese poe'yajo oja o'i queahuesha aninaje queyasijje poqui. Majoya ohuaya poe'yaniya shajja-ajjacaña'yonaje queahuisocuana fiesta poequi, iñaqueyacani, cuiaqueyacani pea-ai quebanei epojji shajja-ajjacaña'yonaje. 26Jamajjeya ohuaya oe oja chiijo chacochacopoquiani dejja iyaacanaje ehuohuiajjajji ae poequi cuana. 27Ma oja chiijo chacochacopoquiani dejjaa oya huohuicanaje jama ba'a: “Mique chahua jjeya poe'yonaje. Jamajjeya mique chiiya macayahuesho'i esei cuiameeca'yonaje queabihuiya oja bacuaejja mano'yojjima, quea-aja poe'yonajejojoya.” 28Majoya eo'imese queaquenenee poanijjejojo equiyasijje nobiña'yojjimatii poanaje. Jamajjeya oja chiiya esecueyasijje cuayaquimajje oya equiyasijje enobiquimee'yojjinisho huohuiajjaneineicanaje. 29Ebacuaejja etiiya oja chii jama huohuime acanaje ba'a: “Bacue, queashequiajahuiso minijje chacochacopoquinaje, miquea esohuijo jjashajja-ajjaquipoquinaje. Jamatiineinei eya miquea ovejayahuesho'i che oema'nei quiajjimaneinei poanaje ecuea epeejjicuananijje ojee queabihui eijjiajji. 30Jjeya mique bacuaejja pea poe'yonaje. Mique bejjo quiajeajeyocapoquinaje queamimishihuiso eba'epoquijjijo, eponanijje ejaajji sosejje. ¡Jamatii oya queamimishihuiso epo bihuiajjequi'yojji miyaya macayahuesho'i eseinei cuiamee'yonaje!”

31—Majoya echiimeseya oya jama acanaje ba'a: “Ecue bacuaejja, miya queapame enijjetii nequipoquiani. Ojjaña jiquio ecuea aquianacuana miqueanei poani. 32Eseya ca jjeya queabihuinee pocajji bobi ojee ijjiacajji. Mique chahua emano'yo jayojja poanaje oya jjeya poe'yonaje. Oya ecuaquisho'yo jayojja poanaje jjeya oya jjaja'aqui'yonaje.” Jamaya oja chiiya acanaje oja bacuaejja etii.—

Currently Selected:

LUCAS 15: ESE

Highlight

Copy