LUCAS 16

Dejja aquianajaahuanajji queasapaja'a queamimishi poa

1Majoya aje Jesosaa o shajja-ajjajji poanicuana huohuicapoa pea esohui ebameesahuajji jama ba'a: —Oe dejja quea-aquianahuisonee nequiya pea dejja oja aquianajaahuanajji epojji nequimeecanaje. Majoya quijje peacuana dejja quea-aquianahuisoneenijje miminaje. Jama mimime poanaje ba'a: “Jiquio dejja mique aquianajaahuanajji poani miquea aquianacuanajo queapame pojjeama chacochacoani. Miquea aquianacuana queapame pojjeama jaahuanacani” jamaya acanaje cuaa. 2Jamajjeya dejja quea-aquianahuisonee poaniya oja aquianajaahuanajji dejja iyaameemajje jama huohuime oya acanaje ba'a: “¿Yajjajje shai dejjacuana mijo jama mimime poani enijje ba'a?: Ohuaya mique aquianacuana queapame pojjeama jaahuanaña. Jamajjeya ecuea aquianacuana ache huiso ani ebajji, cuentacuana pea-ai tehuecue ojjañatii. Majoya miya mique tehue e quia'yomajje ecuea aquianajaahuanajji popajeaje'yo.” 3Majoya aje dejja oja aquianajaahuanajji poani jjashahuabaquinaje jama ba'a: “¿Yajja acuae jjeya eya poca'yojji e chacomeejji dejjaa eya chacopajeameeca'yajje? Eya ca'a-ama poani meshi chacopoquiajji epo'yojji, queabicho peacuanaja bobijo, bejjojo pea-ai ememepoqui'yojji. 4¡E'e de, ecuea eba yajja eya poaje! Eya jjeya quea-epeejjihuiso pocajji. Majoya eya oja equiyasijje ja'acajjequije cuaa jamatii dejja quea-aquianahuisoneeya eya chacopajeameeca'yonaje” jamaya jjashahuabaquinaje. 5Jamajjeya ohuaya ojjaña ma cuentajji poanicuana o chacomeejji dejjajo oe iyaa acapoqui'yonaje onijje emimi'yojji. Ebionei oja iyaa dejja huohuiajjaca'yonaje jama ba'a: “¿Ache huiso miquea cuenta enequi e chacomeejji poani dejjajo?” 6Oya saja-acanaje jama ba'a: “Ecuea cuenta enequi olivo esei 100 turriles queacuata sosejje.” Majoya oya huohuicanaje jama ba'a: “Ma-aje jiquio papeni miquea cuenta tehuejji. Jiquio papenijo jjeyahuanei tehueo'oyacue miquea cuenta iyehuiso jjeya nequi'yo, 50 turriles olivo esei sosejje, 100 pojjeama'yo.” 7Majoya pea dejja cuentajji huohuiajjapea-aica'yonaje jama ba'a: “¿Ache huiso miquea cuenta enequi e chacomeejji poani dejjajo?” Oya saja-acanaje jama ba'a: “Ecuea cuenta enequi 100 arrobas anosoai sosejje.” Majoya oya huohuicanaje jama ba'a: “Ma-aje jiquio papeni miquea cuenta tehuejji. Jiquiojo jjeyahuanei tehueo'oyacue miquea cuenta iyehuiso jjeya nequi'yo, 80 arrobas anosoai sosejje, 100 pojjeama'yo.” 8Majoya eaquianamese dejja oja aquianajaahuanajji poani dejja jama poani oja cuentajo shajja-ajjamajje oya queasapaja'a poani jjashahuabaquinaje. Ohuaya ojjaña cuentajjicuana ojaya epeejji pomeecanaje cuenta iyehuiso tehuemee'yomajje. Eyacuiñajjima' jayojjacuana jiquio meshijo ba'eca ojayanei echacojji yajjijo queasapaja'a poani. Eyacuiñajjija epeejjicuana ca jama pojjeama. Oya queasapaja'apishana poani Eyacuiñajjija echacojji yajji.— Jama huohuimeya acapoa Jesosaa.

9Majoya Jesosaa huohuitiicapoa cuana jama ba'a: —Jamajjeya eyaya quiana niñesheaña jama ba'a: Jiquio meshijo ani aquianacuanajo peacuana ba'emeesahuacue miquea epeejjicuana queahuiso epojji. Majoya miquea aquianacuana jiquio meshijo ani oe po'yajo mi ba'etiitii'yojji meshiyasijje anije miquea epeejjicuana mi ja'ajjequi'yojji.

10—Dejja joya queaja'anee chacochacoani peajo oja aquianacuanajaahuanajji poani jamatii oepojjinei ani. Quijje pea-ai oya jayojja queaja'anee chacochacopoquije ojo oja aquianacuana queahuiso poajo. Pea dejja joya queaquehua peajo chacochacoani oja aquianacuanajaahuanajji poani jamatii oepojjinei ani, oya jayojja queaquehua chacochacopoquije ojo oja aquianacuana queahuiso poajo. 11Jamajjeya miquiana queaquehua chacochacopoquiani jiquio meshijo anitii aquianacuanajo ma quijjepishana oe poaje'yo aquianacuanajo, ¿a'a Eyacuiñajjiya miquiana quiacaje ma queapameneenee ojo echacochacojji ma oe po'yoajjaneinei aquiana? ¡Chojja de! 12Jamajjeya miquiana queaquehua chacochacopoquiajo Eyacuiñajjija quia aquianacuanajo, ¿a'a Eyacuiñajjiya quiana quiacaje pea aquiana queapameneenee miqueanei echacochacojji? ¡Chojja de!

13—Bacue, oe dejja beca o chacomeejji poanijo oya pojjajotii chacochacoca-ajja. Ojaya oe o chacomeejji dejja queabotinee poaje, pea ca botiama poaje. Oe dejjajo chacochaconeije ojaya esohui jayojjaya, peajo ca chacochacoajja poaje. Jamajjeya Eyacuiñajjijo, bejjo queahuiso yajjijo pea-ai ojee chacochacoca-ajja.— Jama huohuimeya acapoa Jesosaa.

14Fariseo dejjacuaa queabejjojeajjejojo Jesosa soadojocapoa oja esohui shajja-ajjamajje. 15Majoya Jesosaa huohuicapoa cuana jama ba'a: —Miquiana jjabameequiani queapame jayojja peacuanaja cojjaneijo, Eyacuiñajjija ca miquianaja ejjashahuabaquijji queamimishi poani ebaneinei. Joya miquiaaya queapamenee bapoquiaña ebiajjejjetii, Eyacuiñajjija ca coma botiamaneinei poani.—

Jesosaa huohuicapoa Moisesja esohui etehuecuanajo, Eyacuiñajjiya ojjaña huoojeacapoquianitiijo pea-ai

16Jesosaa huohuipea-aicapoa cuana jama ba'a: —Eyacuiñajjija quia esohui Moisesja tehue, ma quijje Eyacuiñajjiya oja esohuihuohuijji poacuana tehuemeecapoquiapoa esohuicuana pea-ai queashequiajahuiso huohuicapoquiapoa cuaa Juan ona iñajeanobiajji dejja poejjimahuajo. Majoya aje Juanya pea esohui queapamenee huohuicoocanaje cuana ma Eyacuiñajjiya ojjañacuana huoojeacapoquianitiijo esohuiya. Yahuajopishana Juanya esohui jama huohuime acanaje, jjeya pea-ai oya esohuiya huohuicani cuaa. Queahuisocuana ma esohui shajja-ajjamajje Eyacuiñajjiya ojjañacuana huoojeacapoquianitii meshi Eyahuasijje poquisaneineipoanaje, jjeya pea-ai. 17Quijje oe pojjajo jiquio meshi, eyatahuatahua pea-ai chama' pomeecaje'yo. Eyacuiñajjija esohui ma ohua Moisés tehuemeecapoa esohuiya, caca oe oe po'yoajjaneinei, che bisoneicuanama' chama' pojjeama poaje'yo. Ojjañatii jaatiitiipoquije.—

Jesosaa huohuicapoa ejjahueiquijjijo

(Mt 19.1-12; Mc 10.1-12)

18Jesosaa huohuipea-aicapoa cuana jama ba'a: —Dejja joya oja huanase hueijji poani majoya pea eponajo jjahuanaqui'yajo Eyacuiñajjiya oya peacojjojji poani bacani. Oya jayojja pea-ai Eyacuiñajjiya dejja peacojjojji poani bacani epona ehuei ani huana'yojji poani.—

Jesosaa huohuicapoa dejja quea-aquianahuisoneejo, dejja aema'neijo pea-ai

19Jesosaa esohui ebameesahuajji huohuipea-aicapoa cuana jama ba'a: —Oe dejja quea-aquianahuisonee nequinaje. Ohuaya daqui queanahuenee, queasiyonee huoshocapoquinaje. Ojjaña pojjajo bobi queahuisonee ijjiacapoquinaje ojee oja epeejjicuananijjeya. 20Pea dejja ca aema'neinei, Lázaro bajjani, queachijihuisonee aninaje pea-ai. Oya dejja quea-aquianahuisoneeja esecuejjanipejjejo anipoquinaje. 21Ma dejja aema'neineiya onaja ijjiasejja bobi, meshiyasijje eoquequi ani ijjia'yosanei acanaje queashoeneeyajjejojo. Majotii o anijo iñahuehuacuana oque poenequinaje o chiji siohua. 22Majoya quijje oe pojjajo dejja aema'neinei mano'yajo, angelcuaa oja dojjoshahua jjequisohuaca'yonaje meshi queapameneenee Eyahuasijje. Oya etiiquiana Abrahamchipineijo aniqui'yonaje queapametii enequipoqui'yojji. Majoya ma dejja quea-aquianahuisoneenee poanaje manopea-ai'yajo, mojeacanaje cuaa. 23Dejja quea-aquianahuisoneenee poanajeja edojjoshahua poqui'yonaje ma emano'yocuana queaneeneetii po'yoqui meshiyasijje. Majo ani jjabajeasohuaquimajje ohuaya queahueshaneenee Lázaro Abrahampejjeneijo eanioque ani bacanaje. 24Majoya oya taaanaje jama ba'a: “Ecue chii, Abraham, ejo queayenonee pocue e queapame asahuajjijo. Che Lázaro eque huoojeacue so'o ena oja emejo bisonei yemeecue ecue yana choenajjajji. Eya queaquiyoneenee, queanabatajaneenee jiquio cuaqui-aijo nequi'yo.” 25Abrahamya ca oya saja-acanaje jama ba'a: “Ecue bacuaejja, miyaya eshe nequiahua queahuisoneenee aquianacuana mi queabihui ba'epoquijji chichapoquianaje. Lázaro eshe nequiahua ca queaneetii queacamajanee anipoquinaje aema'neinei. Jjeya ca oya jiquiojo queabihuinee nequi'yo neeama'yo. Miya caca oe queaneeneetii po'yoqui. 26Ecuana mique poquisapojjijjemo poquimeejjima acame, ¿achejje ejjayejjequijji? Huejja queaquemoneenee jaa, queadoeneenee pea-ai. Miquiana mamijijje ani'yo ecuanaque poemeemeeajja queadoeneenee poanijojoya.”

27—Majoya dejja quea-aquianahuisoneenee poanajeya Abraham huohuiajjaneineicanaje jama ba'a: “Lázaro che huoojeacue ecue huapa pojjeamaque. 28Ecue dohuecuana cinco huisome nequi jocuama. Lazarohua ecue dohuecuana esohui cahuohuicahua jiquiacua e queaneenee po'yoquiyasijje o epoepea-ai'yo poanijje.” 29Abrahamya ca oya saja-acanaje jama ba'a: “Eyacuiñajjija esohui queahuiso etehue jaa ma yahuajonei ohua Moisés tehuemeecapoaya, ma oja esohuihuohuijji poacuana tehuemeecapoquiapoa pea-ai ejaa. Jamajjeya oya ma esohuicuanajo cajjashajja-ajjaquiahua.” 30Dejja quea-aquianahuisoneenee poanajeya oya saja-acanaje jama ba'a: “Ecue chii Abraham, oja esohui etehue oeneitiijo pojjeama oya jjashahuabaquije'yo. Oe dejja emano'yo jaa eshequi'yo nequi bamajje ca ecue dohuecuana pea jjashahuabaquime poaje'yo oja mimishijo ma bamajjeya.” 31Abrahamya ca oya saja-acao'oyanaje jama ba'a: “Mique dohuecuana Eyacuiñajjija esohui Moisesja tehuecuana ejaatiijo mijjashahuabaqui'yomajje, oya jayojja dejja emano'yo eshequi'yo nequi bamajje jjashahuabaqui'yoajja poaje pea-ai.”— Jama huohuimeya acapoa Jesosaa.

Currently Selected:

LUCAS 16: ESE

Highlight

Copy