HECHOS 3

Dejja jeoajjatii cuaya jeomeecapoa Pedrohua

1Majoya aje oe pojjajo Pedro, Juan pea-ai sinecuanei a las tres poquiapoa Eyacuiñajjija equi-aiyasijje. Manei eshequi nequijoya judiocuana mimicapoquiapoa Eyacuiñajjinijje. 2Eyacuiñajjija equi-aiquibojotiiya aje dejja jeoajjatii cuaya aniapoa. Ojjaña pojjajo oya dojocanequiapoa oja epeejjicuaa esecuejjani Queabame bajjani nequiyasijje ememeanijji cua nobiquije cuanajo. 3Majoya Pedro, Juan pea-ai nobiquije Eyacuiñajjija equi-aiquibohuasijje bamajje jeoajja cuaya dejja memeaniapoa oque. 4Pedro oya oque memeje bamajje jama poa onijje ba'a: —Ecuana bacue.—

5Majoya dejja jeoajja Pedro baneimajje ohua bejjo equiacaje poso jjashahuabaquiapoa. 6Pedrohua oya jama huohuime acapoa ba'a: —Ecuea chama'nei eso'dojjo, oro pea-ai mi quiajji. Jiquio ecue yani ca mi ca oe quiaje. Jamajjeya Jesosaja bajjanijo eyaya miya huohuiaña nequisohuacue, jeocue.— 7Pedrohua oya jama amajje oja ebañei emejje jjequisohuacapoa. Oya ohua jjequisohuacajeahua jjajeojjica'aquinanapoa, jjaquiboca'aquinanapoa pea-ai. 8Majoya aje dejja jeoajja ba'esohuananaquiapoa epi enequijji. Nequisohuamajje oya jeojeonequiapoa. Majoya oya nobiquiapoa Pedronijje, Juannijje pea-ai Eyacuiñajjija equi-aiquibohuasijje. Oya oja ejeojjijonei jeojeonobiquiapoa. Queabihuinee ba'esohuaquiba'esohuaqui popoquiapoa. Jamajjeya ohuaya queabihuineeya Eyacuiñajji bihuiacapoa. 9-10Majoya aje ma ejjachichaqui anicacuana o jeojeoje, ohua Eyacuiñajji bihuiacaje pea-ai bamajje queabihui pocapoa cuana ojo. Jjabaneineiquiapoa cuana ojo oya dejja jeoajjatii cuaya jeojeoqui bamajje. Oya yahuajo macuanaja ebanei poa oyaya Eyacuiñajjija equi-ai esecuejjani Queapame bajjanipejjejo ani memeaninaje.

Pedrohua esohui huohuicapoa cuana Eyacuiñajjija equi-ai shajjaquibojo nequiya

11Ma dejja oja jeomee poquinequiapoa Pedronijje, Juannijje pea-ai. Queahuisocuana ojo jjabaneineiquiapoa. Jamajjeya cuajicuajicapoa cuana ma jeoajja cuaya dejja Pedronijje, Juannijje nequiyasijje o baneineiya. Ma dejja nequiapoa o jeomeejji epocuananijjetii Salomonja equi-ai shajjaquibojo. 12Queahuisoneecuana poecuajije bamajje Pedro jama poa ba'a: —Israelitacuana, ¿apiojji acuae quiaa ecuana baneineiaña so'o? ¿A'a jiquio dejja ecuaanei jeomeenaje poso aña ecuananei queaca'aneeyajjejojoya? ¿A'a ecuananei queapame poanijo oya jeomeenaje poso aña? ¡Chojja, majo pojjeama! 13Abrahamja Eyacuiñajjiya, Isaacja, Jacobja, pea esejaya etiiquiana pea-aija Eyacuiñajjiya Jesosa oenei queapameneetii queaca'aneetii poani bacanitii, ma miquiaaya iñameesahuanajeya dejja etiicuanaja emanomee'yojji. Pilatohua oya ehuoojeacuaya'yojji nisho a-ajjacanaje. Jamatii miquiaaya Jesosa huoojeacuayamee'yojjima anaje. 14Oya Jesosa emejeyo nequi miquianajaya huohuiajjajjima poanaje o pichojea'yojjijo. Oya queapamenee nequinaje mimishima'neitii. Miquiaaya caca oe pea quecua'yojji epo dejjajo Pilato huohuiajjanaje oja o poquimee'yojjijo. 15Jamaya miquiaaya jiquio ese eshe pomeejji poani dejja manomee'yonaje. Eyacuiñajjiya caca oe quijjepishana oya shequimeeca'yonaje. Ecuana jiquio o shequi'yonaje bajji epoya nequi. 16Jesosa queaca'aneeyajjejojoya dejja jeoajjatii cuaya, jiquio miquiaaya bañatii dejja, jeomeecanaje. Ecuana Jesosajo jjashahuabaqui'yani, jamajojoya Eyacuiñajjiya oya jjajeojjica'aquimeecanaje Jesosaja bajjanijo. Bacue quiaa ojjañaa, jjeya oya jeojeoqui queapame.

17—Enijjejaajji epeejjicuana, miquiaaya, jiquio mi huohuijji etii poanicuaa pea-aiya Jesosa acui ecuiata'apeejo manomee'yonaje. Jamaya quiaa oya amee'yonaje Eyacuiñajjiya oya e'ejojonei huoojeacanaje bajjimajotiiya. 18Eyacuiñajjiya oya jamaya ameeca'yonaje ma ecua yahuajonei oja esohuihuohuijji poacuaa huohuicapoa jamaya. Quito oja huoojea ese nahue'yojji epojji manomeecaje'yo huohuicapoa cuaa. 19Jamajjeya quiana oe pea jjashahuabaquime po'yocue Jesosajo. Jjanahuemeequi'yocue ojo miquianaja mimishicuana ojaya ecuijea'yojji. Majoya Eyacuiñajjiya quiana queabihui ba'emeecapoquije. 20Majoya quijje Eyacuiñajjiya Jesosa huoojeacaje o'oya ojjañajaajjicuana queaja'a huoojeapoquiajjitii epojji. Yahuajonei Eyacuiñajjiya Jesosa babacacapoa jiquio meshiyasijje ehuoojeajji ojjaña miquiana nahue'yojji epojji. 21Eyacuiñajjiya yahuajonei oja sohuihuohuijji poa dejjacuana yajja ohuaya acaje quijje huohuimeesahuacapoa. Eyacuiñajjija ojjaña oja esohuicuana ajeyojjima so'o. Jamajojoya aje ca jjeya Jesosa Eyajotii nequije so'o. 22Eseja etiiquiaa Moisesya Jesosajo jama huohuime apea-aicapoa ba'a: “Emeshimeseneiya, miquianaja Eyacuiñajjiya oe dejja esohuihuohuijji epojji jiquio ecua eya jama pea-ai epojji nequimeecaje miquiananijjejaajjinei dejja. Jamajojoya aje quiaa oya shajja-ajjaneicue ojjaña cua ohua huohuicaje esohui huisotii. 23Ojjaña joya Eyacuiñajjija esohuihuohuijji poani dejjajo jjashajja-ajjaquisapo-ajja poajecuana ca Eyacuiñajjiya queahueshatii nequimeecaje'yo oja epeejjicuanajo. Chama'yotii poaje cuana.” Jamaya Moisesya acapoa.

24—Ojjaña Eyacuiñajjija esohuihuohuijji poa dejjacuaa ma Eyacuiñajjiya quijje acaje huohuicapoquiapoa oya esohuitiiya. Samuel bajjani dejjaa pea-ai huohuicapoa ma esohuitiiya, oyaya. 25Eyacuiñajjija esohuicuana ma quijje ohuaya acapoquijetii yahuajonei huohuicapoquiapoa cuaa oja esohuiya. Ma yahuajonei Eyacuiñajjiya eseja etiiquiana huohuicoocapoa, oya esohuitiiya miquianaja pea-aiya popoquije. Yahuajonei ohuaya Abraham bajjani dejja acoocapoa jama ba'a: “Ojjañajaajjicuana jiquio meshijo ba'ecacuana eyaya queapamenee apoquiaje joya quijje cuayajejo miquianaja osecuajoya.” 26Eyacuiñajjiya ma ojo chacochacopoquiapoa dejja shequimee'yomajje ebionei miquianaque huoojeacanaje miquiana queapame pomeeya. Jamajjeya ohuaya miquianaja mimishicuana pajeameesahuacaje.— Jama huohuimeya acapoa cuana Pedrohua.

Currently Selected:

HECHOS 3: ESE

Highlight

Copy