HECHOS 2

Edojjoshahuapame poeapoa Jesosaja epeejjicuanaja yamidojjohuasijje nequi'yohua

1Majoya aje quijje ojjaña Jesosaja epeejjicuana ejjachichaqui anicapoa oe equi-aijotii Pentecostés pojjajo. Ma pojjajotiiya aje judiocuaa fiesta acapoqui'yapoa.#2.1 Nota: Judiocuaa fiesta eshahuaba'yojji ma yahuajonei Eyacuiñajjiya oja bacuacuana nahuecapoajo acapoqui'yapoa. Ma fiesta 50 cahuime huiso jjayejjequiajo pea fiesta Pentecostés bajjani apea-aicapoqui'yapoa cuaa.* 2Majo aniya aje queashajjaquijjonee poaje shajja-ajjacapoa Jesosaja epeejjicuaa. Beni eyajje queaquemonee jjaqueyaquijebeje jayojja shajja-ajjacapoa. Macuana ejjachichaqui anica equi-aijotiiya jjaqueyaquiñapoa queashajjaquijjonee. 3Majoya ojjaña ma ejjachichaqui anicacuanahuasijje jjanequipanaquiapoa cuaquijijibisoneicuana jayojja oja sapabiajje. 4Eyacuiñajjija Edojjoshahuapame nobiquiapoa ojjaña ma ejjachichaqui anicacuanaja yamiyasijje onijjetii nequi'yohua. Majoya Edojjoshahuapameya peajaajjija esohuijo mimimeecuajicapoa macuanaya o mimijjimanei esohuijo.

5Queahuisonee judiocuana ma peaja meshicuanahuasijje ba'equica'yo anicapoa Jerusalén meshijo fiesta a'yohua poe. Ma peaja meshijo ba'equica'yocuaa Eyacuiñajjija esohui Moisesja tehuecuana shahuabacapoquiatiiapoa oya jayojjatii eba'epoquijji. 6Majoya queahuisocuana epoe nequi jjachichacuajiquicapoa Jesosaja epeejjicuana oja esohuineijo queaja'anee janobajjimanei mimiani shajja-ajjamajje. Macuanaja bajjimanei poa achajja Jesosaja epeejjicuana queaja'a mimiani peajaajjicuanaja esohuijo. 7Jesosaja epeejjicuana peajaajjija esohuijo queaja'a mimiani shajja-ajjamajje jjabaneineiquiapoa cuana ojo. Jama mimime poa cuana ba'a: —¡De, jiquio dejjacuana ecuanaja esohuineijo mimipea-aiani queaja'a Galileacuiñajji pea-ai poani! 8¿Achajjajo acuae oya eseja esohuineijo mimipea-aiani? Queaja'anee mimiani cuana eseyaya shajja-ajjaña. 9E'e, jiquiojo queahuiso yani peajaajjicuana pea-ai. Yani Partia meshijo ba'ecacuana, Media meshijo, Elam meshijo, Mesopotamia meshijo, Judea meshijo, Capadocia meshijo, Ponto meshijo, provincia Asia meshijo ba'ecacuana pea-ai quiojo ani queahuisonee. 10Yani Frigiacuiñajjicuana, Panfiliacuiñajjicuana, Egiptocuiñajjicuana, Libia meshijo ba'ecacuana pea-ai, ma Cirene meshichipinei jaajo. Jiquiojo yani Romacuiñajjicuana pea-ai. 11Queahuisonee jiquiojo ani judionei epojji cuaya. Peacuana ca jiquiojo ani judío jayojja pea-ai epojjijo jjashahuabaquime epocuana. Oya jjabaquiani judío dejjanei jayojja pea-ai. Cretacuiñajjicuana, Arabia meshijo ba'ecacuana pea-ai epoe jiquiacua. Ojjañaa eseyaya Jesosaja epeejjicuana queaja'anee eseja esohuineijo mimipea-aiani shajja-ajjanaje. Eyacuiñajji queaca'aneetii poani esohui queapame huohuicani cuaa shajja-ajjanaje.— Jama mimimeya pocapoa cuana oopana.

12Jamajjeya ojjaña ma pea meshijo ba'equi'yo poecuaa Jesosaja epeejjicuanajo jjabaneineiquiapoa. Jama mimime pocapoa oopanacuana ba'a: —¿Yajja poanijje shai oya peaja esohuijo queaja'a jama mimime poani?—

13Peacuaa ca Jesosaja epeejjicuana niñebacapoa. Soadojocapoa cuaa jama ba'a: —¡De, ehuoocuana pojja'a jja coma!— Jama posoya acapoa cuaa.

Pedrohua esohui queaja'anee huohuicapoa cuana

14Majoya aje Pedro nequisohuapoa pea 11 huisome Eyacuiñajjija babaca dejjacuananijjetii ojee ma ejjachichaqui nequicacuana sohuihuohuijji. Pedrohua jama huohuime acapoa cuana janobajjimanei ba'a: —Judío dejjacuana, ojjaña jiquio Jerusalén meshijo ba'ecacuana pea-ai, shajja-ajjaneicue jiquio jjeya eyaya quiana huohuije esohui. 15Jiquio enijje nequi dejjacuana ehuoo pojjeama jamatiiya miquiaaya oya jama aña ehuoo poso. Jjeya mecajjeahua eshequi a las nueve nequijo ishi-ishica-ajja. 16Jjeya ca jiquiojo enijje nequi dejjacuaa jama acani ma yahuajonei Joelya Eyacuiñajjija esohuihuohuijjiya huohuicapoa jayojjaya. Oya jama poa yahuajonei ba'a:

17“Eyacuiñajji jama poani ba'a:

Emeshimesenei epoeo'oyajji epojjachipineijo

eyaya ecuea Edojjoshahuapame queahuiso dejjacuana quiaje.

Miquianaja bacuaejjacuana, ebacuasecuana pea-ai

ma quijje Eyacuiñajjiya acaje Edojjoshahuapameya queaja'a huohuimeesahuacaje.

Ohuaya dejjacuana shacuima' nequi jjacahuibaquiani jayojja ani

Eyacuiñajjiya queahuiso bameecaje,

dejja etiicuana jjacahuibameequicaje pea-ai

yajja poaje quijje oja queaja'a ebajji.

18Joya ejo chacochacoani dejjacuana eponacuana

eyaya ecuea Edojjoshahuapame quiaje ma pojjajotiiya.

Majoya ohuaya queaja'a esohui huohuicaje ma quijje eyaya ajejo.

19Eyaya oya bameeje eyatahuatahuajo nequi

ma yahuajo ojaya bajjimaneinei poanaje.

Dejjaja ajjima'neineicuana ameeje jiquio meshijotii nequiya.

Dejjaja na' queahuiso, cuaqui jijiqui, huichacha queahuojamoo pea-ai bameeje cuana.

20Eshequi quea-aaponee poaje'yo.

Ba'i pea-ai queacojjahuo'onee poaje ena' jama.

Jamaya poaje Emeshimesenei o poejji epojjachipinei poajo.

O poejjinei epojja queapamenee poaje.

Peacuana ca queametenee poaje.

21Majoya ojjaña joya ja'anei emeshimeseneinijje

mimijecuana o nahue'yojjijo Eyacuiñajjiya nahuecaje'yo”

jama huohuimeya yahuajonei Joelya acapoa cuana.—

22Pedrohua esohui huohuitiicapoa cuana jama ba'a: —Jamajjeya judío dejja poani jjabaquijji quiaa shajja-ajjaneicue jiquio eya huohuije esohui. Miquianajaya eba Jesosa Nazaretcuiñajji dejja poanaje. Oya e'ejojonei Eyacuiñajjija huoojea poa. Jamajojoya aje ohuaya dejjaja ajjima'neineicuana queahuiso acapoquinaje miquianajaya ojjañaja ebajji. 23Eyacuiñajjija ebatii poa yajja miquiaaya Jesosa aje'yo. Miquiaaya oya iñameesahuamajje acui ecuiata'apeejo dejjamasecuana ba'ehuanasohuajeameenaje oya emano'yojji. Yahuajoneitii Eyacuiñajji jamaya jjashahuabaquianiapoa Jesosajo. Yajja quiaa quijje oya aje'yo ojaya ebatii poa. 24Jamatii Eyacuiñajjiya Jesosa shequimeeca'yonaje emano'yo jaa. Oya queaneenee mano'yanijo queaneetii epo'yojji pojjeama Eyacuiñajjiya oya acanaje. Oya emano'yotii ejaajji pojjeama Eyacuiñajjiya acanaje. 25Yahuajonei emeshimese Davidya Jesosajo jama huohuime acapoa ba'a:

“Eyaya Emeshimesenei e huijotii nequi bapoquianajetii.

Oya ecuea ebañeimijijje nequi,

jamajjeya chama' pea e queametenee pomeenequijji.

26Jamajjeya eya queaquijijjijajinee mimiani meteama.

Eya eshe nequi jjashahuabaquipoquijetii Eyacuiñajjijo

ohuaya eya eshe nequimeecapoquianijjejojoya.

27Eyacuiñajji ecue Chii,

miquea eya jiquio meshijo emano'yo jaa ejeana'yojjitii pojjeama poaje.

Miyaya eya babacanaje peacuana sohuihuohuiquijji epojji,

jamajjeya ecue yami miquea eihuijeamee'yojji pojjeama poaje.

28Miyaya eya queaja'anee ba'emeesahuapoquianaje.

Eya queabihuinee nequipoquiani mi enijjetii nequipoquianijojoya”

jamaya Davidya esohui tehuecapoa Jesosajo.—

29Majoya aje Pedrohua huohuitiicapoquiapoa cuana jama ba'a: —Judío enijjejaajjicuana, e'ejojonei eyaya quiana huohuiaña. Bacue, jiquio oja tehue esohui ojaya eyamineijo tehue pojjeama poa. Eseja etiiquiana David ca yahuajonei mano'yapoa. Oya mojeacapoa cuaa. Jjeya jjani o huananobiajji'ya ejaatii eseja meshijo. 30Oya David e'ejojonei Eyacuiñajjija esohuihuohuijji nequiapoa. Ojaya eba poa quijje oe oja osecua emeshimese epojji Eyacuiñajjiya pomeecaje ohua oya e'ejojonei esohui jama huohuicapoajojoya. 31Jamajjeya ma quijje Eyacuiñajjiya acaje Davidya queaja'a bacapoa jamatii oja ecojjaja bajjimajotii. Ohuaya huohuicapoa Eyacuiñajjija huoojea ojjaña nahue'yojji epojji shequije'yo. Oya majotii emano'yotii ejaajji pojjeama poaje huohuicapoa cuana Davidya. Oja yami pea-ai eihui'yojjitii pojjeama poaje. 32E'ejojonei jiquio Jesosa Eyacuiñajjiya shequimeeca'yonaje. Jamaya ecuaaya oya ba'yonaje eshequi'yo nequi. 33Oya shequi'yonaje emano'yo jaa epoqui'yojji Eyacuiñajjija ebañeimijijje eaniñaqui'yojji. Eyacuiñajji Echii-aiya oya Edojjoshahuapame quiacanaje ma ohua esohui acanaje jayojjaya. Jamajojoya aje Jesosaa oja Edojjoshahuapame huoojeacanaje ecuanaque. Maya miquiaaya jjeya baña, shajja-ajjaña pea-ai queaja'a ebajji Jesosaa Edojjoshahuapame huoojeacanaje ecuanaque. 34-35David mano'yajo oja yami ba'esohuaqui'yojjima poa Eyahuasijje. Davidya jama acapoa ba'a:

“Eyacuiñajji ecuea Emeshimeseneinijje jama mimime poanaje ba'a:

Anioquecue ecuea ebañeimijijje.

Ojjañacuana ma mi cajaanei ajji epocuana quijje miyaya huoojeapoquiaje'yo.”

Jamaya Davidya yahuajonei esohui tehuecapoa Jesosajo.—

36Pedrohua ca jama huohuime atiicapoa cuana ba'a: —Ojjaña Israelja osecua judiocuana, shajja-ajjaneicue. E'ejojonei Jesosa, ma miquiaaya me cacajeameenaje emano'yojji acui ecuiata'apeejo Jesosaya, Eyacuiñajjiya oya Emeshimeseneitii epopoquijji pomeecanaje. Oya oja huoojea ojjaña nahue'yojji e'ejojonei poani.—

37Pedrohua jama huohuime acajje ma ejjachichaqui anicacuana queaquijijjiyenonee pocananapoa oja esohuijo. Jama huohuiajjame acapoa cuaa Pedro, onijje Eyacuiñajjija babaca dejjacuana pea-ai ba'a: —Epeejjicuana, ¿yajja acuae ecuana pocajji?—

38Pedrohua saja-acapoa cuana jama ba'a: —Jesosajoneiya quiana oe pea jjashahuabaquime po'yocue. Ojjaña jiquiojo ani oe jjaiñajeanobiameequicue Jesosa Quitoja bajjanijo enaojjohuasijje. Eyacuiñajjiya miquianajaya mimishicuana ojjañatii cuijeacaje'yo, chama'yo acaje. Oja Edojjoshahuapame miquianaya ohuaya quiapea-aicaje. 39Jiquio Eyacuiñajjija esohui ohuaya acapoquijetii. Ohuaya ojaya Edojjoshahuapame quiacaje miquiana Edojjoshahuapame yamijji epojji, miquianaja bacuacuana Edojjoshahuapame yamijji epojji pea-ai. Joya queahueshanee jaacacuana pea-ai ojaya Edojjoshahuapame quiapea-aicaje. Jamajjeya ojjaña cua ohua iyaacajecuana huisotii ojaya epo'yojji quiapea-aicaje.—

40Pedrohua huohuitiicapoa cuana. Jama niñesheame acapoa ba'a: —Dejjamimishicuana quijje queaneeneetii poaje'yo oja mimishijo. ¡A'a jiquio ecua jiquio dejjacuana queaneeneetii poaje'yo quijje jama popea-aijji quiana!—

41Majoya aje ojjaña joya Pedroja esohuijo jjashahuabaquica'yonajecuana jjaiñajeanobiameequicapoa enaojjohuasijje. Ma pojjajotii aje 3.000 huisomecuana jjashahuabaquica'yapoa Jesosajo o nahue'yojji epojjijo. Jjapeequicapoa cuana pea Jesosaja nahue'yocuananijje ojee.

Ebionei Jesosaja epeejjicuana queapame ojee jjapeequipoquiapoa

42Jamajjeya ojjaña Jesosaja epeejjicuaa shajja-ajjaneicapoquiapoa ma Eyacuiñajjija babacacuaa huohuicapoquinaje esohuiya. Ojee mimicapoquiapoa Eyacuiñajjinijje. Oja aquianacuana nahuejjima acapoa cuaa pea quiajji. Bobi pea-ai ojee ijjiacapoa cuaa jjachichaquimajje. 43Jesosaja babaca dejjacuaa dejjaja ajjima'neineicuana queahuiso acapoquiapoa. Jamajojoya aje queahuisocuana jjabaneineiquiapoa ojo oja babacacuaa jama acaje bamajje. 44Ojjaña ma Jesosajo jjashahuabaqui'yapoacuana oya jjashahuabaquime pea-ai ba'ecapoquiapoa. Oja aquianacuana, bobicuana pea-ai quiacapoquicapoa cuaa onijje ba'eca Jesosaja epeejjicuana asahuajji. 45Oja meshicuana, equicuana pea-ai quiacapoa oja epeejjicuaa bejjo sosejje pea onijje Jesosaja epeejjicuana asahuajji oja aquiana, bobicuana chama' bamajje. 46Ojjaña pojjajo jjachichaquicapoquiapoa cuana Eyacuiñajjija equi-aiquibohuasijje. Pea onijje Jesosaja epeejjicuanaja equijo ijjiaijjiacapoquiapoa Jesosaja epeejjicuana oopana ojee queabihuinee ejjapeequipoquijji. 47Eyacuiñajji bihuiacapoquiapoa cuaa. Onijjejaajjicuaa Jesosaja epeejjicuana queapame poani bacapoquiapoa. Ojjaña pojjajo Eyacuiñajjiya jjashahuabameequica'yapoa cuana Jesosaja nahue'yo epojjijo. Jamajjeya queahuisonee pocapoquiapoa cuana Jesosaja epeejji epojji.

Currently Selected:

HECHOS 2: ESE

Highlight

Copy