IINDUMISO 33
33
Umbongo kuThixo uMdali noMlondolozi
1Memelelani kuYehova, nina malungisa;
Ibafanele abathe tye indumiso.
2Bulelani kuYehova ngohadi,
Mbetheleni umrhubhe ontambo zilishumi.
3Mvumeleni ingoma entsha,
Nilungise ukubetha ngelokuduma;
4Ngokuba lithe tye ilizwi likaYehova,
Konke akwenzayo kuthembekile.
5Ngumthandi wobulungisa nokusesikweni,
Lizele ihlabathi yinceba kaYehova.
6Lênzeka ngelizwi likaYehova izulu,
Umkhosi walo lonke ngomoya womlomo wakhe.
7Ulobutha njengemfumba amanzi olwandle,
Ulobeka koovimba amanzi enzonzobila.
8Malimoyike uYehova lonke ihlabathi,
Bamhlonele bonke abemi belimiweyo;
9Ngokuba wathetha, kwabakho;
Wawisa umthetho yena, kwema.
10UYehova ulitshitshisile icebo leentlanga;
Uzaléle iingcinga zezizwe.
11Icebo likaYehova limi ngonaphakade,
Iingcinga zentliziyo yakhe kwizizukulwana ngezizukulwana.
12Hayi, uyolo lohlanga oluThixo walo unguYehova;
Lwabantu abanyulileyo, baba lilifa kuye.
13Uqondéle esemazulwini uYehova;
Uyababona bonke oonyana babantu;
14Esendaweni yakhe yokuhlala, wondele
Kubemi bonke behlabathi:
15Ulobumba ngakunye intliziyo yabo,
Uloqonda zonke izenzo zabo.
16Akukho kumkani osindiswa yimpi enkulu;
Igorha àlihlangulwa ngamandla alo amakhulu.
17Liyaxoka ihashe ukuba lingásindisa,
Nangamandla alo amakhulu alinakusiza.
18Yabona, iliso likaYehova likubo abamoyikayo,
Abalindéle inceba yakhe,
19Ukuba awuhlangule ekufeni umphefumlo wabo,
Abagcine ngexesha lendlala.
20Umphefumlo wethu ulindele kuYehova;
Nguye uncedo lwethu, nengweletshetshe yethu.
21Ngokuba iya kuvuya ngaye intliziyo yethu,
Sikholosile nje ngegama lakhe elingcwele.
22Inceba yakho mayibe phezu kwethu, Yehova,
Njengoko sikulindeleyo kuwe.
Currently Selected:
IINDUMISO 33: XHO75
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1975. Used with permission. All rights reserved.
