Mar 14

Nibeekoba kukwata Yesu

(Mat 26:1-5; Luk 22:1-2; Yoh 11:45-53)

1 # Kurug 12:1-27. Hakaba hasigaire ebiro bibiri okuhika ha bugenyi bw'okwijuka Okuhingurwaho n'obw'Emigaati Etatumbisiibwe. Baanyakatagara abakuru n'abeegesa b'ebiragiro bakaba nibaserra amagezi nkooku baraakwata Yesu abantu batamanyire, nukwo bamwite; 2baitu bakagamba bati: “Tutamukwata ha kiro kikuru, tihaikara kubaho epumpu omu bantu.”

Yesu naaseeswaho amagita Betaniya

(Mat 26:6-13; Yoh 12:1-8)

3 # Luk 7:37,38. Yesu obu akaba ali Betaniya, omunju ya Simooni omugenge, aikaliire naalya, hakaija omukazi aina ihembe ly'amagita agarukuboya kurungi ag'omuhendo mwingi, yafundukura ihembe, amagita yagamuseesa ha mutwe. 4Baitu hakabaho abamu abagambirangaine babiihirwe bati: “Amagita ganu gafiire ki? 5Amagita ganu gaakusoboire kuguzibwa habwa edinaali bikumi bisatu, #14:5 Edinaali bikumi bisatu omu kasumi ako zainganaga empeera y'omukozi habw'omwaka gwona. zigabirwa abaseege.” Omukazi ogu baamuhyemera. 6Baitu Yesu yabagambira ati: “Omukazi mumuleke; mumutuntuliize ki? Ankoliire ekintu kirungi. 7#Bir 15:11.Habwokuba abanaku obutoosa mwikara nabo. Obu muraagonzaaga bwona, musobora kubakorra ebirungi; baitu timurukwija kwikara na nyowe butoosa. 8Onu akozire eki asoboire; omubiri gwange agusiigire kara gutakaziikirwe. 9Mazimakwo nimbagambira nti: Hoona hoona omunsi nambere Amakuru Amarungi ganu garaarangirirwaga, omukazi onu eki akozire kiraagambwahoga okumwijuka.”

Yuda naaragaana okugobeza Yesu

(Mat 26:14-16; Luk 22:3-6)

10Nubwo Yuda Isikalyota, omu ha ikumi na babiri yagenzire hali banyakatagara abakuru agobeze Yesu abamukwase. 11Obu baakihuliire baasemererwa, baamunihiza kumuha sente. Nawe yaserra akasumi ak'okumubakwasa.

Yesu naategeka obugenyi obw'okwijuka Okuhingurwaho

(Mat 26:17-25; Luk 22:7-14,21-23; Yoh 13:21-30)

12Ha kiro eky'okubanza eky'obugenyi bw'Emigaati Etatumbisiibwe, eki baatambirahoga omwana gw'entaama ogw'okwijuka Okuhingurwaho, abeegesebwa be bakamukaguza bati: “Noogonza tugende tukuteekanirize nkaha, nambere oraliira obugenyi obw'Okuhingurwaho?” 13Nubwo yatuma babiri ha beegesebwa be, nabagambira ati: “Mugende omu rubuga, muraatangaana omusaija ayetwekere ensoha y'amaizi; mumuhondere. 14Nambere araataaha hoona, mugambire nyineeka muti: ‘Omwegesa naakukaguza ati: Ekisiika kyange eky'abagenyi kiraha nambere ndaaliira obugenyi obw'Okuhingurwaho hamu n'abeegesebwa bange?’ 15Uwe araabooleka ekisiika kikooto omu kainaabiri ekiteekaniziibwe, kirumu byona ebirukwetaagwa; oku nuho mututeekanirize.” 16Abeegesebwa baimukya, baataaha omu rubuga, baasanga byona biri nkooku yabagambiire; baateekaniza obugenyi obw'okwijuka Okuhingurwaho.

Yesu naaranga araamugobeza

17Omu rwiririzi Yesu akaija hamu na ikumi na babiri. 18#Zab 41:9.Obu bakaba bali ha meeza nibalya, yagamba ati: “Mazimakwo nimbagambira nti: Omu omuli inywe naija kungobeza, kandi nuwe ogu arukulya na nyowe.” 19Bbo baabanza kusaalirwa n'okumukaguza omu omu bati: “Ninyowe?” 20Yabagarukamu ati: “Nuwe omu omuli inywe ikumi na babiri arukukoza na nyowe omu bbakuli. 21Habwokuba Omwana w'omuntu naagenda nkooku kyamuhandiikirweho, baitu alikibona omuntu ogu arukugobeza Omwana w'omuntu! Kyakubaire kirungi omuntu ogu kakuba atarazairwe.”

Nibalya obugenyi obw'okumalirra

(Mat 26:26-30; Luk 22:14-20; 1 Abakor 11:23-25)

22Obu bakaba nibalya, Yesu yakwata omugaati yasiima, yagucwamu, kandi yaguha abeegesebwa be naagamba ati: “Mukwate, mulye, gunu nugwo mubiri gwange.” 23Kandi yakwata ekikopo, obu yamazire kusiima, yakibaha; boona baanywaho. 24#Kurug 24:8; Yer 31:31-34.Yabagambira ati: “Enu niyo sagama yange ey'ekiragaano ekihyaka, eraaseeswa habwa baingi. 25Mazimakwo nimbagambira nti: Tindigaruka kunywa ha nsande ey'ebijuma by'emizaabbibbu okuhika ha kiro eki, obu ndiginywa na inywe eri mpyaka omu bukama bwa Ruhanga.”

Yesu naamanyisa Petero nkooku arukwija kumwehooga

(Mat 26:31-35; Luk 22:31-34; Yoh 13:36-38)

26Obu baamazire kuzina ekizina baaturuka, baagenda ha rusozi rw'emiti Oliva. 27#Zek 13:7.Nubwo Yesu yabagambiire ati: “Inywena nimwija kumpemukaho; habwokuba kikahandiikwa kiti: ‘Nditeera omuliisa, entaama zirarange.’ 28#Mat 28:16.Kyonka obu ndimara kuhumburwa, ndibabanza okuhika Galiraaya.” 29Baitu Petero yahaya naagamba ati: “Abandi boona noobu baraakuhemukaho, baitu nyowe ninkifuuhya!” 30Nandiki Yesu ati: “Mazima ninkugambira nti: Kiro kinu kyonyini, enkoko etakakookere kabiri, oraaba onyehoogere emirundi esatu.” 31Baitu Petero yayongera kukigumiza kimu ati: “Noobu ndaaba ndi w'okufa na iwe, baitu tindukwija kukwehooga.” Kandi abandi boona nukwo baagambire bati.

Yesu naayesengereza omu Getesemaane

(Mat 26:36-46; Luk 22:39-46)

32Bakahika omu kiikaro ekirukwetwa Getesemaane. Yesu yagambira abeegesebwa be ati: “Mwikarre hanu, nyowe kangende nsabe.” 33Yatwara Petero, Yakobbo, na Yohaana; yabanza kusaalirwa muno n'okutuntura. 34Nubwo yabagambiire ati: “Omutima gwange gwina obujune bwingi, buraaliire kunyita. Mwikale hanu nimurora.” 35Yagendaho kake omu maiso, yajuumara hansi, yayesengereza ngu, obu kiraaba nikisoboka, esaaha egi emuhinguleho. 36Yagamba ati: “Abba”, amakuru ngu, Taata. “Ebintu byona noobisobora; onyiheho amabone ganu; nabwo kitaba nyowe nkooku ndukugonza, baitu kibe Iwe nkooku orukugonza.” 37Yagaruka yabasanga bagwijagiire, yakaguza Petero ati: “Simooni ogwijagiire? Tosoboire kurora esaaha emu? 38Murole kandi musabe, nukwo muleke kwohebwa; omutima nigugonza mali, baitu omubiri muceke.” 39Yagarukayo yayesengereza naagamba ebigambo bimu na biri. 40Baitu obu yagarukire, nabwo yabasanga bagwijagiire, habwokuba amaiso gaabo gakaba nigakamba. Kandi bbo baaburwa eki baramugarukamu. 41Yagaruka omurundi gwa kasatu, yabagambira ati: “Na hati mukyagwijagiire, muhumwire? Kihoire; esaaha ehikire; Omwana w'omuntu aheebweyo omu mikono y'abasiisi. 42Mwimuke tugende; arukungobeza ngugwo, airiire haihi.”

Yesu nibamukwata

(Mat 26:47-56; Luk 22:47-53; Yoh 18:3-12)

43Ahonaaho obu akaba naakyabaza, Yuda, omu hali ikumi na babiri, yaija n'ekitebe ky'abantu baina empirima n'ebiduuma, batumirwe baanyakatagara abakuru, abeegesa b'ebiragiro n'abakuru b'abantu. 44Ogu ayagobiize Yesu akaba abahaire akarorwaho naagamba ati: “Ou ndaagwa omu kifuba, buli nuwe ogu; mumukwate, mumutwale nimumulindira kimu ataikara kucwa.” 45Yuda obu yaizire, ahonaaho yamwirra haihi, yamuramukya ati: “Mwegesa!” Yamugwa omu kifuba. 46Bali baamugwera, baamukwata. 47Kandi omu hali abo abakaba beemeriire aho, yasomorayo empirima ye, yatema omwiru w'omukuru w'abanyakatagara, yamucwaho okutu. 48Yesu yabakaguza ati: “Mwizire kunkwata n'empirima n'ebiduuma nk'abaiziriire kukwata omunyagi? 49#Luk 19:47; 21:37.Buli kiro naikaraga na inywe ninyegesa omu Nju ya Ruhanga, ka mutarankwasire. Baitu leka Ebyahandiikirwe bihikirizibwe.” 50Abeegesebwa boona baamusigaho, bairuka.

51Omusigazi omu yamuhondera ajwaire esuuka erukwera yonka; nawe bamukwata; 52baitu uwe yabasigira esuuka egi, yairuka ali busa.

Yesu ali omumaiso g'Omukuru w'abanyakatagara

(Mat 26:57-68; Luk 22:54-55,63-71; Yoh 18:13-14,19-24)

53Baatwara Yesu hali mukuru w'abanyakatagara. Abanyakatagara abakuru, abakuru b'abantu, n'abeegesa b'ebiragiro bakeesoroolezaayo. 54Kandi Petero akaba amuhondiire haraho, okuhika obu baataahire omu kizigati kya mukuru w'abanyakatagara; yaikarra n'abalinzi nayota omurro. 55Baanyakatagara abakuru n'orukurato rwona baaserra obwakaiso hali Yesu nukwo bamwite; baitu batabuzoole. 56Baingi bakaleeta obwakaiso bw'ebisuba hali uwe, baitu obwakaiso bwabo butaikirranize. 57Abamu bakeemerra nibamuhangirra bati: 58#Yoh 2:19.“Tukamuhurra naagamba ati: ‘Ndiseesa Enju ya Ruhanga enu eyayombekerwe emikono y'abantu.’ ” 59Noobu baraaba baagambire bati, baitu obwakaiso bwabo butaikirranize. 60Mukuru w'abanyakatagara yayemerra hagati, yakaguza Yesu ati: “Toina kyona eki orukugarukamu? Banu kiki eki barukukurumiriza?” 61Baitu uwe yaculeera, tiyagarukamu kantu. Mukuru w'abanyakatagara yagaruka yamukaguza ati: “Niiwe Kristo, Omwana w'Ogu Anyakuhaisanizibwa?” 62#Dan 7:13.Nandiki Yesu ati: “Ninyowe; kandi muligaruka kurora Omwana w'omuntu aikaliire ha mukono gw'obulyo ogw'Ow'Obusobozi bwona, naizira omu bicu by'omu iguru.” 63Nubwo Mukuru w'abanyakatagara yataagwire omwenagiro gwe naagamba ati: “Nitukyayetaagira ki abakaiso? 64#Lev 24:16.Mumwehuliriire nkooku ajumire Ruhanga. Inywe nimucwamu muta?” Boona baamucwera omusango ngu, asemeriire okufa. 65Abamu baatandika kumucwera ebicwanta, n'okumuswekerra ha maiso, n'okumuteera empi nibagamba bati: “Toma, nooha akutiire!” Abaserikale abalinzi nabo baamutangiriza empi.

Petero naayehooga Yesu

(Mat 26:69-75; Luk 22:56-62; Yoh 18:15-18,25-27)

66Petero obu akaba ali ifo omu kizigati, omu ha bazaana b'omukuru w'abanyakatagara yaija. 67Obu yarozire Petero naayota, yamugumyaho amaiso yagamba ati: “Na iwe obairege hamu na Yesu Omunazareeti.” 68Baitu uwe yayehooga naagamba ati: “Eki orukugamba tindukukimanya kandi tindukukyetegereza.” Yagenda yayemerra ha kiti ky'irembo, kandi enkoko yakooka. 69Omuzaana ogu yayongera kumutaho eriiso, yagaruka kugambira abakaba beemeriireho ati: “Omusaija onu nuwe omu hali bo.” 70Baitu Petero yagaruka yayehooga. Obu haahingwireho akaanya kake, abakaba beemeriire aho baagaruka baagambira Petero bati: “Mazimakwo na iwe oli omu hali bo, habwokuba oli Mugaliraaya.” 71Baitu uwe yatandika kwekyena n'okurahira ati: “Omuntu ogu ou murukubazaaho, timmumanyire.” 72Ahonaaho enkoko yakooka omurundi gwa kabiri. Nubwo Petero yaijukire Yesu eki yamugambiire ati: “Enkoko etakakookere kabiri, oraaba onyehoogere kasatu.” Obu yaijukire eki, yasaalirwa muno, yarra.

Currently Selected:

Mar 14: BRR2008

Highlight

Copy