Mat 15

Enyegesa y'Abaisenkuruitwe

(Mar 7:1-13)

1Abafalisaayo n'abeegesa b'ebiragiro bakaruga Yerusaalemu baija hali Yesu baamukaguza bati: 2“Habwaki abeegesebwa baawe batakuraatira migenzo y'abaisenkuruitwe? Bbo balya batabandize kunaaba omu ngaro.” 3Uwe yabagarukamu ati: “Habwaki na inywe mucwa Ekiragiro kya Ruhanga nimuhondera emigenzo yanyu inywenka? 4#Kurug 20:12; Bir 5:16; Kurug 21:17; Lev 20:9.Ningira Ruhanga akaragira ati: ‘Otiinege sso na nyoko’; kandi ati: ‘Weena araajumaga ise rundi nyina mazimakwo aitwege.’ 5Baitu inywe mugamba muti: ‘Omuntu kakuba agambira ise rundi nyina ati: Eki naakukuhaire, hati nkihongiire Ruhanga; ogu aba aganyirwe Ekiragiro ky'okutiina ise.’ 6Nahabweki habw'okuhondera emigenzo yanyu, nikyo mudibiza Ekiragiro kya Ruhanga. 7Ngobya inywe! Isaaya akahikya obu yabarangireho naagamba ati:

8 # Is 29:13. ‘Abantu banu bantamu ekitiinisa kya ha minwa,

baitu emitima yabu tendoho;

9bandamiza busa, nibeegesa ebyatairweho abantu ngu,

niyo nyegesa ya Ruhanga’.”

Ebisiisa omuntu biruga omu mutima

(Mar 7:14-23)

10Aho Yesu akeeta abantu kumwirra haihi, yabagambira ati: “Mumpurre kandi mwetegereze: 11ekitaaha omu kanwa k'omuntu, tikiri nikyo ekimusiisa; baitu ekiruga omu kanwa, nikyo kimusiisa.” 12Nubwo abeegesebwa baija bamugambira bati: “Omanyire Abafalisaayo nkooku babiihiirwe obu baahuliire orufumo obacweriire?” 13Yesu yagarukamu ati: “Ekimera kyona Isenyowe ow'omu iguru eki atarabyaire, kiriihwa. 14#Luk 6:39.Mubaleke abo, beebembezi abafiire amaiso. Omufu w'amaiso obu ayebembera omufu w'amaiso mugenzi we, bombi bagwa omu kiina.” 15Baitu Petero yamusaba ati: “Otusoborre amakuru g'orufumo runu” 16Yesu yamugarukamu ati: “Obu na inywe timukeetegeriize? 17Timurukumanya ngu, ekintu kyona ekitaaha omu kanwa, kiraba omu nda, kandi kituruka aheeru? 18#Mat 12:34.Baitu ekireetwa omu kanwa kiba kirugire omu mutima; eki nikyo kisiisa omuntu. 19Habwokuba omu mutima nuho haruga ebiteekerezo ebibi, obwisi, obusiihani, orwanju, obusuma, okuhangirra, n'okugeya. 20Ebi nibyo bisiisa omuntu; baitu okulya otanaabire omu ngaro tikisiisa muntu.”

Okwikiriza kw'omukazi omunyaihanga

(Mar 7:24-30)

21Yesu yarugayo, yagenda omunsi ya Taya na Sidooni. 22Omukazi enzaarwa ya Kanaani, akaija naayamirra ati: “MUKAMA wange, Mwijukuru wa Daudi, ongirre embabazi; muhara wange akwasirwe omwoyo mubi, gumuli kubi muno.” 23Baitu Yesu atamugarukemu kantu. Abeegesebwa be baija baamwesengereza bati: “Mubinge, naatutokerra.” 24Yesu yabagarukamu ati: “Nyowe ntatumwe handi kwihaho omu ntaama ezaabuzire ez'omu ruganda rwa Isirairi.” 25Nubwo mukazi yaija yamuteereza amaju, naagamba ati: “MUKAMA wange, nkoonyera.” 26Yesu yagarukamu ati: “Tikirukuhika kwaka abaana ebyokulya okabinagira embwa.” 27Nandiki omukazi ati: “Ego, MUKAMA wange, baitu embwa nazo zirya oburagalika oburuga ha meeza ya mukama wazo.” 28Yesu yamugarukamu ati: “Mukazi iwe, okwikiriza kwawe ka kwingi! Kikukolerwe nkooku orukugonza.” Ahonaaho muhara we yakira.

Yesu naakiza abantu baingi

29Yesu obu yarugire oku, yaraba ha musa gw'enyanja ya Galiraaya. Yatemba omu nsozi, yaikarayo. 30Ebitebe bingi byaija nambere ali, baamuleetera abalema, abazingamire, abafu b'amaiso, abafu b'eminwa n'abandi baingi. Baabahikya omumaiso ge, yabakiza. 31Abantu bakahunirra obu baarozire abafu b'eminwa nibabaza, abazingamire nibakira, abaramaire nibarubata, n'abafu b'amaiso nibarora; baahaisaniza Ruhanga wa Isirairi.

Yesu naaliisa abantu enkumi ina

(Mar 8:1-10)

32Yesu akeeta abeegesebwa be nambere ali yabagambira ati: “Abantu banu nibankwasa embabazi habwokuba baamazire na nyowe hanu ebiro bisatu bataina eki barukulya; tindukwenda kubaraga bakagenda njara, tibaikara kugwa ensazi omu muhanda.” 33Abeegesebwa be baamukaguza bati: “Omwirungu munu turaiha nkaha emigaati eraamara kuliisa abantu abarukwingana aho?” 34Yesu nukwo kubakaguza ati: “Mwinaho emigaati ingaha?” Baamugarukamu bati: “Musanju n'obucu buke.” 35Aho yaragira ekitebe ky'abantu baikarre hansi, 36yakwata emigaati musanju n'encu, obu yamazire kusiima, yabicwamu, yabiha abeegesebwa be, nabo baabigabira abantu. 37Boona baalya, baiguta; nukwo abeegesebwa kusorooza oburagalika obwasigaireho, bwaijuza ebigega musanju. 38Boona abaaliire baahikaga enkumi ina, otabaliiremu abakazi n'abaana. 39Yesu yaraga abantu, yagwerra omu bwato, yagenda omu kicweka kya Magadani.

Currently Selected:

Mat 15: BRR2008

Highlight

Copy