Luk 9

Yesu naatuma Ikumi na babiri

(Mat 10:5-15; Mar 6:7-13)

1Yesu akeeta Ikumi na babiri, yabaha amaani n'obusoboozi obw'okubinga emyoyo emibi yoona n'okukiza endwara. 2Yabatuma kurangirra obukama bwa Ruhanga n'okukiza abarwaire. 3Yabagambira ati: “Omu rugendo rwanyu mutatwara kintu kyona, noobu gwakuba omwigo, rundi ensahu, rundi ebyokulya, rundi sente; kandi mutatwara esaati ibiri. 4Enju ei muraataahamuga niyo mwikalemu okuhika obu mulikarugayo. 5#Ebik 13:51.#Luk 10:4-11.Nambere bataabajwahukirre, obu muraaba nimuruga omurubuga oru, muteerateere ecuucu y'omu bigere byanyu, ebege bwakaiso hali bo.” 6Ikumi na babiri baagenda nibaraba omu byaro, nibarangirra Amakuru Amarungi, kandi nibakiza abarwaire hoona hoona.

Okutuntura kwa Herode

(Mat 14:1-12; Mar 6:14-29)

7 # Mat 16:14; Mar 8:28; Luk 9:19. Omu biro ebi, Herode akahurra byona ebikaba nibibaho, kandi yatuntura, habwokuba abamu bakaba nibagamba ngu: Yohaana Omubatiza ahumbuukire! 8Abandi baagambaga ngu: Eriya nuwe agarukire kuboneka; kandi haroho n'abaagambaga ngu: Omu ha barangi aba ira ahumbuukire. 9Nukwo Herode kwekaguza ati: “Yohaana nkamutemaho omutwe; baitu ogu muntu ki ou ndukuhurraho ebigambo binu?” Yayenda kurora Yesu.

Yesu naaliisa abantu enkumi itaano

(Mat 14:13-21; Mar 6:30-44; Yoh 6:1-14)

10Abakwenda obu baagarukire, baasoborra Yesu byona ebi baakozire. Nukwo kubatwara ha rubaju, baagenda omu kiikaro ekirukwetwa Betisaida. 11Baitu ekitebe ky'abantu obu baakimanyire baamuhondera. Uwe yabatangirra, yabeegesa eby'obukama bwa Ruhanga, kandi yakiza n'abo abaka nibenda kukizibwa.

12Izooba obu lyagoroobere, ikumi na babiri baija hali uwe, baamugambira bati: “Ragira abantu bagende omu byaro n'omu maka agali haihi, beeserurre h'okugoonya n'ebyokulya; habwokuba hanu tuli omu irungu.” 13Baitu uwe yabagambira ati: “Inywe mubahe ebyokulya.” Baamugarukamu bati: “Hanu twinaho emigaati etaano yonka n'encu ibiri; rundi buli tugende tugurre abantu banu boona ebyokulya.” 14Habwokuba hakaba haroho abasaija nk'enkumi itaano.

Yesu yagambira abeegesebwa be ati: “Mubaikalize omu bitebe by'abantu makumi ataano-ataano.” 15Nukwo baakozire bati, baabaikaliza boona. 16Aho Yesu yakwata emigaati etaano n'encu ibiri, yararamira haiguru, yasiima, yabicwamu, yabiha abeegesebwa be kubigabira abantu. 17Boona baalya baiguta. Obu baasoroize oburagalika obwasaagireho, bwaijuza ebigega ikumi na bibiri.

Petero naayatura Yesu nkooku ali Kristo

(Mat 16:13-19; Mar 8:27-29)

18Kiro kimu Yesu obu akaba ali wenka naasaba, abeegesebwa be baija nambere ali, nukwo kubakaguza ati: “Abantu bannyeta bata?” 19#Mat 14:1,2; Mar 6:14,15; Luk 9:7,8.Baamugarukamu bati: “Baakweta Yohaana Omubatiza; abandi baagamba ngu: Niiwe Eriya; kandi abandi ngu: Niiwe omu ha barangi aba ira ahumbuukire.” 20#Yoh 6:68,69.Yagaruka yabakaguza ati: “Baitu inywe nimunnyeta muta?” Petero yamugarukamu ati: “Niiwe Kristo owa Ruhanga!”

Yesu naabanza kuranga okubonabonesibwa kwe

(Mat 16:20-28; Mar 8:30—9:1)

21Yesu yabateererra okutakigambiraho muntu n'omu, 22naagamba ati: “Omwana w'omuntu naasemerra kubonabonesibwa muno, n'okwangwa abakuru b'orukurato, n'abanyakatagara abakuru, n'abeegesa b'ebiragiro, n'okwitwa; kandi ahumburwe haahingwireho ebiro bisatu.”

Omulingo gw'okuhondera Kristo

23 # Mat 10:38; Luk 14:27. Yesu yagambira abeegesebwa be ati: “Weena anyakugonza kumpondera, ayehwemu wenka, ahimbe omusaraba gwe buli kiro, ampondere. 24#Mat 10:39; Luk 17:33; Yoh 12:25.Habwokuba weena arukutaatira obwomeezi bwe alibufeerwa; baitu weena anyakuhayo obwomeezi bwe habwange alibujuna. 25Omuntu kuraamugasira ki okulya ensi yoona, baitu akeehwerekereza wenka rundi akafeerwa obwomeezi bwe? 26Weena anyakunkwatirwa ensoni kandi akazikwatirwa ebigambi byange, nawe Omwana w'omuntu alimukwatirwa ensoni abu aliizira omu kitiinisa kye n'omu kitiinisa kya Ise n'eky'abamalaika abahikiire. 27Malimali nimbagambira nti: Haroho abeemeriire hanu abatalihikwaho rufu batakarozire obukama bwa Ruhanga.”

Yesu naahindurwa ali ha rusozi

(Mat 17:1-8; Mar 9:2-8)

28Obu haahingwireho ebiro nka munaana Yesu amazire kugamba ebigambo ebi, yatwara Petero, Yohaana, na Yakobbo, yabatembya ha rusozi kusaba. 29Obu akaba naakyasaba, enzooka y'amaiso ge yahinduka, engoye ze zaayera tiitiiti. 30Ahonaaho haazooka abantu babiri nibabaza nawe, nubo Musa na Eriya 31abaabonekere omu kitiinisa, baabaza nawe ha kufa oku akaba naija kuhikiriza Yerusaalemu 32Petero n'abataahi be bakaba baina oturo twingi, baitu obu baahamantukire baarora ekitiinisa kye n'abasaija babiri abakaba beemeriire nawe. 33Abasaija abo obu bakaba nibakyamurugaho, Petero yagambira Yesu ati: “Mwegesa, kibaire kirungi itwe kusangwa hanu. Katwombeke obusiisira busatu: akamu kaawe, akamu ka Musa, n'akandi k'Eriya.” Obu, akaba atarukumanya eki arukugamba. 34Obu akaba naakyagamba ebi, ekicu kyaija kyabasiikiriza. Obu kyabasiikiriize baatiina. 35#Is 42:1; Mat 3:17; 12:18; Mar 1:11; Luk 3:22.#2Pet 1:17,18.Iraka lyaruga omu kicu nirigamba liti: “Onu nuwe Mwana wange ou nyekomiire, mumuhurre!” 36Iraka obu lyaculiire, baasanga Yesu ali wenka. Binu byona abeegesebwa bakabiculerra, kandi omu biro ebi batagambireho muntu n'omu ekigambo kyona hali ebi baaboine.

Yesu naakiza omwojo ayakwasirwe omwoyo omubi

(Mat 17:14-18; Mar 9:14-27)

37Ekiro ekyakurasireho obu baasirimukire orusozi, abantu baingi bakaitirana Yesu. 38Omusaija ow'akaba ali omu kitebe yatokera haiguru ati: “Mwegesa, ninkwesengereza ondorre mutabani wange, nuwe wenka ou nyina. 39Omwoyo omubi gwikara nigumukwata, ahonaaho ayamuza, gumunaga ensimbo, aleeta ifuro, gumumara amaani, kandi tigumulekera. 40Nkeesengereza abeegesebwa baawe kugubinga, baitu batasobole.” 41Yesu yamugarukamu ati: “Inywe abataina okwikiriza kandi ab'obusinge obuhabire, ndihikya nkaha okwikara na inywe n'okubagumiisiriza? Omwana waawe muleete hanu.” 42Omwojo obu akaba nakyaija, omwoyo omubi gwamuteera hansi, gwamunaga ensimbo. Baitu Yesu yacoomera omwoyo mubi, yakiza omwojo, yamugarurra ise. 43Abantu boona baahunirra habw'obusobozi obwa Ruhanga.

Yesu naabazaaho okufa kwe omurundi ogwa kabiri

(Mat 17:22-23; Mar 9:30-32)

Abantu obu bakaba nibakyahunirirra ebintu byona Yesu ebi yakozire, uwe yagambira abeegesebwa be ati: 44“Ebigambo binu mubiteho omutima; habwokuba Omwana w'omuntu naija kuheebwayo omu mikono y'abantu.” 45Baitu ebigambo ebi bateetegereze amakuru gaabyo. Bikaba bibaserekerwe, nukwo baleke kubyetegereza; kandi bakatiina kubimukaguzaaho.

Arukukira obukuru omu bukama bw'omwiguru

(Mat 18:1-5; Mar 9:33-37)

46 # Luk 22:24. Hakaimukaho empaka omu beegesebwa, nibeekaguza arukukira obukuru omuli bo. 47Baitu Yesu obu yamanyire ebiteekerezo byabo, yakwata omwana muto, yamwemereza ha rubaju rwe, 48#Mat 10:40; Luk 10:16; Yoh 13:20.yabagambira ati: “Weena anyakujwahukirra omwana muto nk'onu habwange, buli ajwahukiriire nyowe; kandi anyakujwahukirra nyowe, buli ajwahukiriire Ogu ayantumiire; habwokuba anyakukira obuto omuli inywe, nuwe mukuru.”

Atarukubahakaniza buli ali habwanyu

(Mar 9:38-40)

49Nubwo Yohaana yamugambiire ati: “Mwegesa, turozire omuntu naabinga emyoyo emibi omu ibara lyawe, twamutanga habwokuba tali w'ekitebe kyaitu.” 50Nukwo Yesu kumugambira ati: “Muleke kumutanga, habwokuba weena atarukubahakaniza, ali habwanyu.”

Abasamaliya nibanga kutangirra Yesu

51Akasumi ka Yesu ak'okutwarwa omwiguru obu kairiire haihi, akamalirra kugenda Yerusaalemu. 52Yatuma abakwenda kumwebembera. Bbo baagenda baataaha omu kyaro ky'Abasamaliya kumuteekaniriza. 53Baitu abantu baayo baayanga kumutangirra, habwokuba akaba naahingura kugenda Yerusaalemu. 54#2 Bakam 1:9-16.Abeegesebwa be Yakobbo na Yohaana obu baarozire kunu baamukaguza bati: “MUKAMA waitu, noogonza turagire omurro guruge omwiguru, gubahwerekereze?” 55Baitu Yesu yabahindukira yabahana ati: [“Timurukumanya omwoyo ogu musemeriire kuba nagwo, habwokuba Omwana w'omuntu ataije kuhwerekereza obwomeezi bw'abantu, baitu okubujuna.”] 56Nubwo bayeyongera kugenda omu kyaro ekindi.

Ebyekwaso by'abaali b'okuhondera Yesu

(Mat 8:19-22)

57Obu bakaba nibakyagenda, baitirana omuntu ayagambiire Yesu ati: “Ndaakuhonderaga hoona nambere oraakagendaga.” 58Yesu yamugarukamu ati: “Eboha ziina ebiina byazo, n'enyonyi ziina ebiju byazo; baitu Omwana w'omuntu taina h'okuta omutwe.”

59Yesu yagambira omuntu ondi ati: “Mpondera.” Baitu uwe yamugarukamu ati: “Mukama wange, kambanze ngende nziike taata.” 60Nandiki Yesu ati: “Leka abakafiiri baziike abafu baabo, baitu iwe genda orangirre obukama bwa Ruhanga.”

61 # 1 Bakam 19:20. N'omuntu ondi yagamba ati: “Mukama wange, nyowe ninyija kukuhondera, baitu kambanze ngende ndage ab'owaitu.” 62Yesu yamugarukamu ati: “Busaho n'omu arukulimisa ekyoma, akarora enyuma, asemeriire obukama bwa Ruhanga.”

Currently Selected:

Luk 9: BRR2008

Highlight

Copy