Luk 22

Yuda naaragana kugobeza Yesu

(Mat 26:1-5; Mar 14:1-2; Yoh 11:45-53)

1 # Kurug 12:1-27. Obugenyi bw'Emigaati Etatumbisiibwe, oburukwetwa Okuhingurwaho, bukaba buli haihi kuhika. 2Baanyakatagara abakuru n'abeegesa b'ebiragiro bakaba nibaserra amagezi ag'okwita Yesu, habwokuba bakaba nibatiina abantu.

Yuda nayeikiriza kugobeza Yesu

(Mat 26:14-16; Mar 14:10-11)

3Nubwo Sitaani yataahiremu Yuda arukwetwa Isikalyota, omu ha ikumi na babiri. 4Yuda akagenda yahanuura n'abanyakatagara abakuru n'abakuru b'abalinzi b'enju ya Ruhanga nkooku araagobeza Yesu abamukwase. 5Baasemererwa, baamuraganiza kumuha sente. 6Nawe yaikiriza kandi yaserra akanya karungi aka araabamukwasizamu, abantu, batakimanyire.

Yesu naategeka Obugenyi obw'okwijuka Okuhingurwaho

(Mat 26:17-25; Mar 14:12-21; Yoh 13:21-30)

7Aho ekiro kikuru ky'Emigaati Etatumbisiibwe kyahika, nikyo eki baatambirahoga omwana gw'entaama ogw'Okuhingurwaho. 8Yesu yatuma Petero na Yohaana ati: “Mugende mututeekanirize Obugenyi bw'Okuhingurwaho, twije tubulye.” 9Baamukaguza bati: “Noogonza tubuteekanirize nkaha?” 10Yabagarukamu ati: “Obu muraaba nimutaaha omu rubuga nimwija kutangaana omusaija ayetwekere ensoha y'amaizi. Mumuhondere okuhika omu nju ei araataahamu. 11Nyineeka mumugambire muti: ‘Omwegesa akutumireho naakaguza ngu: Kiraha ekisiika ky'abagenyi nambere araaliira Obugenyi bw'Okuhingurwaho hamu n'abeegesebwa be?’ 12Araabooleka ekisiika kikooto eky'omu kainaabiri ekirumu byona ebirukwetaagwa. Oku nuho murateekaniza ebintu byona.” 13Bbo baagenda, baasanga byona biri nkooku yabagambiire, baateekaniza Obugenyi bw'Okuhingurwaho.

Nibalya Obugenyi bw'okumalirra

(Mat 26:26-30; Mar 14:22-26; 1 Abakor 11:23-25)

14Esaaha obu yahikire, Yesu yaija ha meeza hamu n'abakwenda be. 15Yabagambira ati: “Nyegombere muno kulya na inywe Obugenyi bunu obw'okwijuka Okuhingurwaho ntakabonabonesiibwe! 16Nimbagambira nti: Tindigaruka kubulya okuhika obu bulihikirizibwa omu bukama bwa Ruhanga.” 17Nubwo yakwata ekikopo, yasiima naagamba ati: “Mukwate kinu munyweho inywena; 18habwokuba nimbagambira nti: Okuruga hati tindigaruka kunywa ha nsande y'ebijuma by'emizaabbibbu okuhikya obukama bwa Ruhanga obu buliija.” 19Yakwata omugaati, yasiima, yagucwamu, yagubaha naagamba ati: “Gunu nugwo mubiri gwange [oguraaheebwayo habwanyu. Kinu mukikolege okunyijukiraho.” 20#Yer 31:31-34.Omu mulingo nugwo gumu obu baamazire kulya, yakwata ekikopo naagamba ati: “Ekikopo kinu nikyo kiragaano ekihyaka eky'esagama yange eraaseeswa habwanyu.”]

Yesu naamanyisa ow'arukwija kumugobeza

21 # Zab 41:9. “Omukono gw'ogu arukungobeza ngunu, guli hanu n'ogwange ha meeza! 22Habwokuba Omwana w'omuntu naagenda kuhikiriza ekyamuteekaniriziibwe, baitu alikibona bambi omuntu ogu arukumugobeza!” 23Aho baatandika kukaguzangana bonka na bonka ngu, nooha omuli bo arukwija kukora eki.

Arukukira obukuru omu bukama bwa Ruhanga

24 # Mat 18:1; Mar 9:34; Luk 9:46. Hakaimuka empaka omu bakwenda ngu, nooha omuli bo arukuteekerezibwa kuba mukuru. 25Yesu yabagambira ati: “Abakama b'Abanyamahanga abantu baabo babalemesa itwale, kandi n'ab'obusobozi beetwa kabumba, 26#Mat 23:11; Mar 9:35.#Mat 20:25-27; Mar 10:42-44.baitu tikiriba kiti omuli inywe; leka omukuru omuli inywe abe nk'arukukira obuto, kandi omwebembezi nk'omuheereza. 27#Yoh 13:12-15.Arukukira obukuru nuwe oha: anyakwikarra ha meeza okulya, nandiki anyakuheereza? Tali ogu anyakwikarra ha meeza? Baitu nyowe ndi hagati yanyu nk'omuheereza.

28“Inywe abatarandugiireho omu mihito yange, 29Isenyowe nkooku yanteekaniriize obukama, na nyowe nukwo ndukububateekaniriza. 30#Mat 19:28.Muraaliira kandi munywere ha meeza omu bukama bwange, kandi mwikarre ha bitebe mucwere emisango enganda ikumi na ibiri eza Isirairi.”

Yesu naamanyisa Petero nkooku arukwija kumwehooga

(Mat 26:31-35; Mar 14:27-31; Yoh 13:36-38)

31Yesu akagamba ati: “Simooni, Simooni, omanye Sitaani aikirizibwe kubasegesa inywena nk'engano. 32Baitu iwe nkakusabira okwikiriza kwawe kuleke kugarukirra; kandi obu olimara kwegarukamu, ogumye bagenzi baawe.” 33Petero yamugarukamu ati: “MUKAMA wange, nyeteekaniize kugenda omu nkomo n'okufa hamu na iwe!” 34Yesu yamugarukamu ati: “Petero ninkugambira nti: Kiro kinu enkoko etakakookere, oraaba onyehoogere emirundi esatu ngu, tommanyire.”

35 # Mat 10:9,10; Mar 6:8,9; Luk 9:3; 10:4. Yesu yabakaguza ati: “Buli obu nabatumire mutaina nsahu za sente n'ez'ebyokulya, mutajwaire n'enkaito, hakabaho ekyababuzireho?” Baagarukamu bati: “Nangwa.” 36Nandiki Yesu ati: “Leero hati, weena anyakwina ensahu ya sente rundi ey'ebyokulya agitwale; kandi ataina empirima, atunde omwegereko gwe, agigule. 37#Is 53:12.Nyowe nimbagambira nti: Ekyahandiikirwe ekirukugamba kiti: ‘Akabalirwa omu basiisi’ nikisemerra kuhikirra hali nyowe; ningira ebyampandiikirweho biri haihi kuhikirra.” 38Abakwenda baamugarukamu bati: “Waitu, hanu twina empirima ibiri!” Nandiki uwe ati: “Ezi nizimara!”

Yesu naayesengereza omu Getesemaani

(Mat 26:36-46; Mar 14:32-42)

39Yesu yaruga omu nju yagenda ha rusozi rw'emiti Oliva, nkooku yakakoraga bwona; abakwenda be baamukuraatira. 40Obu baahikireyo yabagambira ati: “Musabe, mutaikara kutwarwa omu kwohebwa.” 41Uwe yabarugaho yagenda nk'omwanya oguhungurwamu ibaale, yateeza amaju yayesengereza ati: 42“Taata, obu oraaba nookisiima onyiheho amabone ganu. Nabwo kitaba nyowe nkooku ndukugonza, baitu kibe Iwe nkooku orukugonza.” [ 43Nubwo malaika yaruga omwiguru yamubonekera, yamugumya. 44Obu, obusaalizi bwamuhinguraine, yayesengereza muno okukiraho; empita yamurugamu yatonya hansi neesisana entonyezi enkooto ez'esagama.]

45Obu yamazire kusaba, yaimuka, yagaruka hali abakwenda be yabasanga bagwijagiire habw'obujune. 46Yabagambira ati: “Mugwijagiziibwe ki? Mwimuke musabe, mutaikara kutwarwa omu kwohebwa.”

Yesu nibamukwata

(Mat 26:47-56; Mar 14:43-50; Yoh 18:3-11)

47Obu akaba nakyabaza, haija ekitebe, ky'abantu; omusaija arukwetwa Yuda, omu hali ikumi na babiri, abeebembiire. Yairra haihi Yesu kumugwa omu kifuba. 48Baitu Yesu yamukaguza ati: “Yuda, noogobeza Omwana w'omuntu kunu noomugwa omu kifuba?” 49Abo abakaba bali hamu na Yesu obu baarozire ekirukugenda kubaho, baamukaguza bati: “Waitu, tubateme n'empirima?” 50Omu hali bo yatema omwiru w'omukuru w'abanyakatagara, yamucwaho okutu okw'obulyo. 51Baitu Yesu yabatanga ati: “Lekera aho!” Yakwata ha kutu kw'omusaija, yamukiza.

52Nubwo Yesu yakagwize banyakatagara abakuru, n'abakuru n'abalinzi b'enju ya Ruhanga n'abakuru b'abantu abakaba baizire kumukwata ati: “Munyiziire n'empirima n'ebiduuma nk'abaiziire kukwata omunyagi? 53#Luk 19:47; 21:37.Buli kiro naikaraga na inywe omunju ya Ruhanga, mutankwate. Baitu kanu nuko kasumi kanyu, hati omwirima nugwo gurukulema.”

Petero naayehooga Yesu

(Mat 26:57-58,69-75; Mar 14:53-54,66-72; Yoh 18:12-18,25-27)

54Aho baakwata Yesu, baamutwara baamuhikya mba mukuru w'abanyakatagara; Petero yabahondera ali haraho. 55Obu baahembere omurro omu kizigati hagati, baikarra kwota, Petero nawe yabaikarramu.

56Omu ha bazaana n'omukuru w'abanyakatagara obu yamurozire aikaliire ha murro, yamugumyaho amaiso naagamba ati: “Omusaija onu nawe abairege hamu na Yesu!” 57Baitu Petero yayehooga naagamba ati: “Mukazi iwe, ogu tindukumumanya!” 58Obu haahingwireho akanya kake, omuntu ondi yamurora yagamba ati: “Na iwe oli omu hali bo!” Baitu Petero yamugarukamu ati: “Musaija iwe, tindi wabo!” 59Obu haahingwireho omwanya gw'esaaha nk'emu, ondi yamwomereza muno naagamba ati: “Mazimakwo omusaija onu abaire ali hamu nawe; habwokuba nawe Mugaliraaya!” 60Petero yagamba ati: “Musaija iwe, tindukumanya eki orukugamba!” Ahonaaho obu akaba naakyabaza, enkoko yakooka. 61MUKAMA Yesu yahinduka yarolerra Petero. Na Petero nubwo yaijukire ebigambo MUKAMA ebi yamugambiire ati: “Kiro kinu enkoko etakakookere, oraaba onyehoogere kasatu.” 62Petero yaturuka aheeru, yarra muno.

Yesu naasekerezibwa kandi naateerwa enkoba

(Mat 26:67-68; Mar 14:65)

63Abasaija abakaba nibalinda Yesu bakamusekeereza kandi baamuteera enkoba. 64Baamuswekerra ha maiso, nibamukaguza bati: “Toma, nooha akutiire!” 65Kandi baamugambaho ebindi bingi nibamujuma.

Naatongana omu Rukurato rukuru

(Mat 26:59-66; Mar 14:55-64; Yoh 18:19-24)

66Obwire obu bwakiire, abakuru b'abantu, banyakatagara abakuru, n'abeegesa b'ebiragiro bakasorrokana hamu, baaleeta Yesu omu Rukurato rwabo. 67Baamukaguza bati: “Tugambire, niiwe Kristo?” Yabagarukamu ati: “Obu ndaabagambira, timurukwija kunyikiriza; 68noobu ndaabakaguza, timurukwija kungarukamu. 69Baitu okuruga hati, Omwana w'omuntu naija kwikarra ha mukono gw'obulyo ogwa Ruhanga Omusobozi wa byona.” 70Boona nukwo kumukaguza bati: “Mara iwe, oli Mwana wa Ruhanga?” Yabagarukamu ati: “Niinywe mwakigamba.” 71Nandiki bbo bati: “Hati nitukyaserurra ki obwakaiso? Ningira twayehulirra itwenka ebi agambire!”

Currently Selected:

Luk 22: BRR2008

Highlight

Copy