Luk 21

Akahongwa k'omufaakati omunaku

(Mar 12:41-44)

1Yesu akaimukya amaiso yarora abaguuda nibata ebisembo byabo omu lyahurro lya sente omunju ya Ruhanga; 2kandi yarora n'omufaakati omunaku naanagamu sente ibiri ez'itaano. 3Yesu yagamba ati: “Mazima nimbagambira nti: Omufaakati omunaku onu anagiremu nyingi okukira abandi boona. 4Habwokuba abo boona banagiremu ebi basaagiriire; baitu uwe omu bunaku bwe ahaireyo byona ebi ainabyo.”

Yesu naaranga okuhwerekerra we'Enju ya Ruhanga

(Mat 24:1-2; Mar 13:1-2)

5Abantu abamu bakaba nibabazaaho Enju ya Ruhanga nkooku ekaba etonerwe kurungi n'amabaale ag'omuhendo kandi n'ebisembo abantu ebi baahayoga. Nukwo Yesu kubagambira ati: 6“Ebi byona ebi murukurora, akasumi kalihika obu hatalisigara ibaale na limu eriri ha lindi, eritalinagwa hansi.”

Entandiko y'emihito

(Mat 24:3-14; Mar 13:3-13)

7 # 2Esid 4:51—5:19. Nubwo abantu baamukagwize bati: “Mwegesa, binu biribaho di? Kandi karorwaho ki akalyoleka nkooku biri haihi kubaho?” 8Yesu yabagarukamu ati: “Mwerinde nukwo muleke kuhabisibwa; habwokuba baingi baliija omu ibara lyange nibagamba bati: ‘Ninyowe ogu!’ Kandi bati: ‘Akasumi kahikire!’ Baitu mutalibahondera. 9Obu mulihurra obulemu n'epumpu, mutalitiina; ebi by'okubanza kubaho, baitu empero terihika ahonaaho.”

10Yayongera kubagambira ati: “Ihanga liriimukirra erindi, n'obukama bulirwanisa obundi. 11Halibaho emisisa y'amaani, haligwa kiihe omu biikaro ebitali bimu, kandi kagingo eriita baingi; halizooka ebintu ebirukutiinisa n'ebihuniriza eby'amaani ebirukuruga omu iguru.

12“Baitu binu byona bitakabaireho balibakwata, balibahayo kucwerwa emisango omu masorrokaniro, balibata omu nkomo, balibahikya omu maiso g'abakama n'abalemi bakuru nibabatura nyowe. 13Obu nubwo mulitunga omwanya ogw'okumpeera obwakaiso. 14#Luk 12:11,12.Kinu mwikale nimukiijuka: mutalyetegeka eki mulyetonganirra akasumi katakahikire; 15habwokuba ndibaha ebi muligamba hamu n'amagezi abanyanzigwa banyu aga batalisobora kwemera rundi kuhakaniza. 16Muliheebwayo noobu baakubaire abazaire banyu, n'abagenzi banyu, n'ab'oruganda, n'abanywani banyu; abamu omuli inywe balibaita. 17Mulinobwa boona habwange. 18Baitu busaho kasoke na kamu aka ha mitwe yanyu akalibaburaho. 19Omu kugumiisiriza nuho mulijunira obwomeezi bwanyu.”

Yesu naaranga okuhwerekerra kwa Yerusaalemu

(Mat 24:15-21; Mar 13:14-19)

20“Obu mulirora Yerusaalemu rugosirwe amahe, mumanye okuhwerekerra kwarwo nkooku kuli haihi. 21Abaliba bali omu Buyudaaya basingirwe ha nsozi, n'abaliba bali omu rubuga barurugemu, kandi n'abaliba bali omu byaro batalirutaahamu. 22#Hos 9:7.Habwokuba ebi nibyo ebiro by'okuhoora enzigu, nukwo byona Ebyahandiikirwe bihikirizebwe. 23Bambi! Balikibona abakazi abaliba baina enda n'abarukwonkya omu biro ebi! Habwokuba omunsi halibamu emihito nyingi, kandi Ruhanga alikayukira muno abantu abo. 24Abamu baliitwa obwogi bw'empirima, abandi balinyagirwa omu mahanga goona, kandi Yerusaalemu ruliikara nirurubatirirwa Abanyamahanga okuhikya engoma yabo obu erihwaho.”

Okugaruka kw'Omwana w'omuntu

(Mat 24:29-31; Mar 13:24-27)

25 # Is 13:10; Ezek 32:7; Yow 2:31; Kus 6:12,13. “Halibaho oburorwaho omu izooba, omu kwezi, n'omu nyunyuuzi; kandi omu nsi amahanga goona galiba omu bujune, nigatuntura habw'okuhirra kw'enyanja n'ebigonzi byayo. 26Abantu balikabibwa obutiini habw'okuteekereza akabi akarukugwera ensi; nangwa n'eby'amaani eby'omwiguru biritengesebwa. 27#Dan 7:13; Kus 1:7.Nubwo balirora Omwana w'omuntu naizira omu kicu aina obusobozi n'ekitiinisa kingi. 28Ebintu ebi obu biritandika kubaho, mwimukye emitwe yanyu, murole haiguru habwokuba okucungurwa kwanyu kuliba kuli haihi.”

Akasumi aka aliiziramu

(Mat 24:32-35; Mar 13:28-31)

29Yesu yabacwera orufumo runu ati: “Mwegere ha muti omutini na ha miti endi yoona. 30Obu murora etandikire kurokera, mumanya ekyanda nkooku kiri haihi. 31Nukwo na inywe obu mulirora binu nibibaho, mumanye obukama bwa Ruhanga nkooku buli haihi. 32Mananukwo nimbagambira nti: Akasumi kanu tikalihwaho ebi byona bitakabaireho. 33Iguru n'ensi birihwaho, baitu ebigambo byange tibirihwaho.”

Mwikale mweteekaniize

34“Mwerinde! Emitima yanyu etaikara kutwarwa omukoijo n'obutamiizi n'emyetunturo ey'obwomeezi bunu, nukwo ekiro eki kitalibagwera bwango nk'ekiriba. 35Habwokuba ekiro eki kiriizira abantu boona abaikara omunsi. 36Mwikale nimurora obwire bwona, nimusaba obutoosa nukwo mutunge amaani ag'okubatabura ebintu ebi byona ebiribaho n'ag'okubasoboza kwemerra omu maiso g'Omwana w'omuntu.”

37 # Luk 19:47. Nyamusana Yesu yayegesaaga omunju ya Ruhanga, baitu obwire obu bwairaga yagendaga kugonya ha rusozi rw'emiti Oliva. 38Kandi nyenkya kara abantu boona baazindukaga kuhurra ebi arukwegesa omu Nju ya Ruhanga.

Currently Selected:

Luk 21: BRR2008

Highlight

Copy