Luk 18

Oruganikyo rw'omufaakati n'omucwi w'emisango

1Nubwo Yesu yabaganikiize oruganikyo runu okubeegesa nkooku basemeriire kusaba batarukuhwa masiko. 2Yagamba ati: “Omu rubuga orumu hakaba harumu omucwi w'emisango ow'akaba atatiinire Ruhanga noobu kwakuba okufaaho abantu. 3Kandi omu rubuga oru hakaba harumu omufaakati ayaikaraga naija hali uwe naamusaba ati: ‘Ndamura n'omunyanzigwa wange.’ 4Omucwi w'emisango akamara omwanya akyayangire kumuramura; baitu hanyuma yayeteekerereza wenka ati: ‘Noobu ndaaba ntarukutiina Ruhanga rundi kufaaho abantu, 5baitu habw'omufaakati onu kuntalibaniza muno, kammuramule n'omunyanzigwa we. Hatali eki naija kunjwahya habw'okwikara nagaruka!’”

6MUKAMA Yesu nukwo kubagambira ati: “Mwetegereze omucwi w'emisango atali mwinganiza eki agambire. 7#Sir 35:19.Lero si, Ruhanga taliramura kurungi abantu be aba yakomeremu abamutaagira nyamusana n'ekiro? Alibaikazaho kubakoonyera? 8Nimbagambira nti: Alibaramura bwango. Baitu Omwana w'omuntu obu aliija, alisanga okwikiriza kukyali omunsi?”

Oruganikyo rw'Omufalisaayo n'omusoroza w'omusoro

9Yesu yagaruka kuganikiza abantu abaayemanyaga kuba bahikiriire, kandi nibagaya abandi, yagamba ati: 10“Abasaija babiri bakagenda omunju ya Ruhanga kusaba; omu akaba ali Mufalisaayo, ondi musorooza w'omusoro. 11Omufalisaayo yayemerra yasaba omu mutima gwe ati: ‘Ai Ruhanga, ninkusiima, habwokuba tindi nk'abantu abandi: abahoogozi, abateesigwa, abasiihani, noobwakubaire nk'omusorooza w'omusoro onu. 12Buli wiiki nsiiba emirundi ebiri, kandi mpa kimu kya ikumi ha bintu byona ebi ntunga.’ 13#Man 1:8.Baitu omusorooza w'omusoro akeemerra haraho, atarukugonza n'okuraramira haiguru, yayeteerateera ha kifuba naagamba ati: ‘Ai Ruhanga, onganyire nyowe omusiisi!’ 14#Mat 23:12; Luk 14:11.Nimbagambira nti: Omusaija onu akagaruka owe aganyirwe okukira oli; habwokuba weena anyakwenyumiza, alibundaazibwa; kandi anyakwebundaaza, alinyumizibwa.”

Yesu naatangirra abaana abato

(Mat 19:13-15; Mar 10:13-16)

15Abantu bakaleetera Yesu abaana enkerembe abakwateho; baitu abeegesebwa obu baarozire eki baabacoomera. 16Nubwo Yesu yabeeta naagamba ati: “Muleke abaana baije nambere ndi, mutabatanga; habwokuba abali nk'abo, obukama bwa Ruhanga bwabu. 17Mananukwo nimbagambira nti: Weena atarukwikiriza obukama bwa Ruhanga nk'omwana muto, talibutaahamu.”

Ekikaguzo ky'omusaija omuguuda

(Mat 19:16-30; Mar 10:17-31)

18Omulemi omu akamukaguza ati: “Mwegesa omurungi, nkole ki okugweterwa obwomeezi obutahwaho?” 19Yesu yamugarukamu ati: “Noonyetera ki omurungi? Tiharoho murungi n'omu kwihaho Ruhanga wenka. 20#Kurug 20:14; Bir 5:18; Kurug 20:13; Bir 5:17; Kurug 20:15; Bir 5:19; Kurug 20:16; Bir 5:20; Kurug 20:12; Bir 5:16.Ebiragiro obimanyire: ‘Otalisiihana, otaliita, otaliiba, otalihangirra, otiinege sso na nyoko.’”

21Omusaija yaragukamu ati: “Ebi byona nkabikwata okuruga omu buto bwange.” 22Yesu obu yahuliire eki, yamugambira ati: “Nookyaburwaho kimu kyonka. Tunda byona ebi oinabyo ogabire abaseege, oije ompondere; nubwo olitunga itungo omwiguru.” 23Baitu omusaija obu yahuliire eki yagwerwa, habwokuba akaba ali muguuda muno.

24Yesu obu yarozire nkooku agweriirwe, yagamba ati: “Ka nikiremeera abaguuda kutaaha omu bukama bwa Ruhanga! 25Nikirahuka engamiya kuraba omu nyindo y'enkinzo kukira omuguuda kutaaha omu bukama bwa Ruhanga.” 26Abantu abaakihuliire nukwo kumukaguza bati: “Mara nooha asobora kujunwa?” 27Yesu yagarukamu ati: “Abantu eki batasobora, Ruhanga akisobora.”

28Nubwo Petero yagambire ati: “Dora itwe, tukasiga byona twakuhondera.” 29Nandiki Yesu ati: “Mali mali nimbagambira nti: Busaho muntu n'omu ayasigire enju ye, rundi mukazi we, rundi bagenzi be habw'obukama bwa Ruhanga, 30ow'ataliheebwa bingi okukiraho omu kasumi kanu, kandi omu biro ebirukwija alitunga obwomeezi obutahwaho.”

Yesu naaranga okufa kwe omurundi gwa kasatu

(Mat 20:17-19; Mar 10:32-34)

31Yesu akatwara ikumi na babiri ha rubaju yabagambira ati: “Hati nu, nitugenda Yerusaalemu, kandi byona ebyahandiikirwe abarangi ha Mwana w'omuntu nibiija kuhikira. 32Aliheebwayo hali Abanyamahanga, balimusekeereza, balimukora kubi, kandi balimucwera ebicwanta. 33Balimuteera enkoba, kandi balimwita; baitu obu halihinguraho ebiro bisatu alihumbuuka.” 34Abeegesebwa bateetegereze na kimu ha bigambo binu, habwokuba amakuru gaabyo gakaba gabawsrekerwe, kandi batakenge Yesu eki yabalizeeho.

Yesu naakiza omufu w'amaiso owa Yeriko

(Mat 20:29-34; Mar 10:46-52)

35Obu akaba nairirra orubuga Yeriko, Yesu yasanga omufu w'amaiso aikaliire ha muhanda rubaju naasabiiriza. 36Obu yahuliire ekitebe kingi ky'abantu nikihingura, yakaguza ekinyakuroho. 37Baamugambira bati: “Yesu owa Nazareeti nuwe arukuhingura.” 38Omufu w'amaiso nukwo kwamirra ati: “Yesu, mwijukuru wa Daudi, ongirre embabazi!” 39Abantu abakaba beebembiire baamucoomera aculeere. Baitu uwe yatokera kimu ati: “Mwijukuru wa Daudi, ongirre embabazi!” 40Yesu yayemerra, yaragira bamumuleetere. Obu yahikire haihi, Yesu yamukaguza ati: 41“Noogonza nkukorre ki?” Yamagarukamu ati: “Mukama wange, ningonza ndole!” 42Yesu yamugambira ati: “Rora! Okwikiriza kwawe nukwo kwakukiza.” 43Ahonaaho amaiso ge gaiguka, yahondera Yesu naahaisaniza Ruhanga. Abantu boona obu baarozire eki baakugiza Ruhanga.

Currently Selected:

Luk 18: BRR2008

Highlight

Copy