Lev 21
21
Baanyakatagara kwikara bali abarukwera
1MUKAMA akagambira Musa ati: “Abanyakatagara abaana ba Arooni obagambire oti: Hatalibaho n'omu omuli bo ayesiisa wenka, okuhika ha muntu anyakufiire omu bantu ab'oruganda rwe, 2rundi buli, w'obuzaale bwe obwa haihi muno, nka nyina, ise, omutabani, omuhara mugenzi we, 3rundi munyanya ataraswiire anyakuli ha zigati. 4Nk'omuntu anyakuswire, tasemeriire kwesiisa omu bantu be akeegayisa. 5#Lev 19:27,28; Bir 14:1.Abanyakatagara tibasemeriire kumwa isoke erya ha kasoke eruguru, rundi kwemwa ebitarra, rundi kwesara engondo ha mibiri yabo. 6Babe barukwera hali Ruhanga wabo baleke kugayisa Ruhanga wabo; habwokuba bahongera MUKAMA ebihongwa ebyokiibwe, nibyo byokulya bya Ruhanga wabo, nahabweki, basemeriire kuba abarukwera. 7Bataliswera omukazi malaaya rundi omukazi wena anyakwesisiire, noobwakuba kuswera omukazi anyakwangaine yaruga hali iba; habwokuba nyakatagara ogu naayera hali Ruhanga we. 8Mumulinde aikale naayera, habwokuba nuwe ahongera Ruhanga wanyu ebyokulya, araabaga arukwera hali inywe; habwokuba nyowe MUKAMA anyakubeeza, ninyera. 9Kandi muhara wa nyakatagara wena, kakuba ayehemura wenka habw'okukora obwamalaaya, aba ahemwire ise, omwisiki ogu ayokebwe n'omurro.
10“Mukuru w'Abanyakatagara, omu hali bataahi be, ayaseesiirwe amagita ag'okweza ha mutwe kandi yasoororwa kujwaraga ebyokujwara, taalekege isoke rye kwikara nirihehema rundi kutemura ebyokujwara bye, 11atalihika ha mutumbi gw'omuntu, oku kwesiisa noobu haliba hafiire ise rundi nyina. 12Ataliruga kugenda akaruga Omukiikaro Ekirukwera, kandi atalisiisa Ekiikaro Ekirukwera ekya Ruhanga we; habwokuba akaseeswaho amagita ga Ruhanga we yasoororwa omu bantu: Ninyowe MUKAMA. 13Asemeriire aswere omwisiki atakaswerwahoga. 14Enfaakati, omukazi anyakwahukaine na iba, anyakwehemwire rundi malaaya, abo atalibaswera, baitu aswere omwisiki atakaswerwahoga ow'oruganda rwe, orw'obunyakatagara, 15nukwo aleke kuhemura abaana be omu ruganda rwa ise; Ninyowe MUKAMA anyakumweza.”
16MUKAMA yayongera yagambira Musa ati: 17“Gambira Arooni oti: Hatalibaho n'omu omu baijukuru bawe ab'ebiro byona anyakwina akamogo aliirra haihi kuhongera Ruhanga we ebyokulya. 18Habwokuba, busaho n'omu anyakwina akamogo aliirra haihi, obu aliba ali mufu w'amaiso, mulema rundi anyakugookere ekicweka kyona ekya ha maiso, rundi ekicweka eky'omubiri ekinyakuraihire okukira ekindi, 19rundi anyina ekigere rundi omukono oguramaire, 20rundi ow'ibbango, rundi ekihuruka rundi atarukuhweza kurungi, rundi anyina endwara ey'okweyagura, rundi orukaca, rundi atanyina ngusuuru, 21hatalibaho muntu n'omu omu baijukuru ba Arooni anyakunyina akamogo aliirra haihi kuhongera MUKAMA ebihongwa eby'okwokya, habwokuba n'akamogo, ataliirra haihi kuhongera Ruhanga ebyokulya. 22Naikirizibwa kulya ebyokulya bya Ruhanga eby'omu kiikaro ekirukwera, 23baitu ataliirra haihi enyigamo rundi kuhika ha itambiro, habwokuba aina akamogo, ataliikara kusiisa ebintu byange ebirukwera; ninyowe MUKAMA anyakubeeza.” 24Musa nubwo ebi yabigambira Arooni n'abatabani, n'abantu boona aba Isirairi.
Currently Selected:
Lev 21: BRR2008
Highlight
Share
Copy
Want to have your highlights saved across all your devices? Sign up or sign in
Bible in Runyoro/Rutooro Interconfessional Translation © Bible Society of Uganda, 2008.
