Lev 14
14
Okukizibwa kw'abagenge
1MUKAMA akagambira Musa ati: 2#Mat 8:4; Mar 1:44; Luk 5:14; 17:14.“Kinu nikyo kiragiro ekirukukwata ha mugenge ha kiro eki araarangirwaga atakyazirwa. Omugenge atwarwege hali nyakatagara. 3Nyakatagara ararugaga omu rukande amwekebiije, kakuba arora nkooku akizire, 4aragire baleete ebinyonyi bibiri ebyomeezi kandi ebirungi, omuti omukogoto, engoye ezirukugaajuka n'akaganda k'omweza. 5Nyakatagara aragire abantu baite ekimu ha binyonyi biri, bakisarre ha minwa y'ekinaga ekinyakurumu amaizi ag'ekisaaru. 6Nyakatagara atwale ekinyonyi ekinyakusigaireho ekikyali kyomeezi, omuti omukogoto, engoye ezirukugaajuka n'akaganda k'omweza, abiibike omu sagama y'ekinyonyi ekinyakwiitiirwe ha minwa y'ekinaga ekinyakurumu amaizi g'ekisaaru. 7Nyakatagara agimiisire emirundi musanju omuntu arugekwenda kurangirirwa ngu takyazirwa, amurangirre abantu nkooku akiziibwe, ataisule ekinyonyi ekyomeezi kihuurruke kigende omu bwerre. 8Ogu arukwija kutambirwa, ayogye ebyokujwara bye, ayemwerre kimu isoke, ayoge ayere nukwo aleke kuzirwa, obu araamara ebi, nukwo agaruke omu rukande ha yarugire, araale aheeru y'Eheema ye okumara ebiro musanju. 9Ha kiro ekya musanju, ayemwe isoke lyona, ayemwe omuleju n'ebisigi, ayemwe akooya koona akanyakumuli ha mubiri. Hanyuma, ayogye ebyokujwara bye, na uwe wenka ayoge, omukoro ogu nugwo guraamwolekaga nkooku atakyazirwa.
10“Ha kiro ekya munaana, atwale ebyana by'entaama ebihaya bibiri ebitanyina kamogo, n'empaya etanyina kamogo enyakuhikize omwaka gumu, ensaano enyakuniinuukire kurungi ey'ekihongwa eky'ebyokulya erukuhikya kiloguraamu isatu, ezinyakutabwirwemu amagita, g'omuti gwa oliva n'amagita kwonka agarukuhikya kimu kyakasatu ekya lita. 11Nyakatagara arukweza omuntu ogu, amute omumaiso ga MUKAMA, omu mulyango ogw'Eheema ey'okutangatanganiramu hamu n'ebintu ebi. 12Nyakatagara akwate ekimu ha bihaya by'entaama ebibiri, akitambe, kibe kihongwa eky'okuganyiza ebibi, akitambe hamu na kimu kyakasatu ekya lita ey'amagita abiimukyaimukye, bibe bihongwa ebiimukyaimukiriziibwe MUKAMA. 13Entaama egi, agiitire Omukiikaro Ekirukwera, nambere baitira entaama ey'ekihongwa eky'okuganyiza ebibi n'ey'ekihongwa ekinyakwokebwa; habwokuba entaama enyakutambwa habw'okuganyiza ensobi, etwarwa nyakatagara nk'egi enyakuheebwayo habw'okuganyiza ebibi; eba ntaama erukwera mali.
14“Nyakatagara akwate ha sagama ey'ekihongwa ekinyakuganyiza ebibi, agisiige ha nsonga ey'okutu okw'obulyo okw'omuntu arukwija kwezibwa, ha kyara ekisaija eky'omukono ogw'obulyo, na ha kyara ekisaija eky'ekigere eky'obulyo. 15Hanyuma, nyakatagara akwate ha amagita gali, agaseese omu kiganja eky'omukono gwe ogw'emoso, 16aibikemu orukumo rwe orw'omukono ogw'obulyo, agamiise emirundi musanju omumaiso ga MUKAMA. 17Kandi amagita agasigaireho nyakatagara agasiige ha nsonga y'okutu okw'obulyo, okw'ogu arukwija kusemezibwa, ha kyara ekisaija eky'omukono gwe ogw'obulyo, ha kyara ekisaija eky'ekigere kye eky'obulyo, nkooku yamusiigire esagama ey'ekihongwa eky'okuganyiza ekibi. 18Kandi agasigaireho, agaseese ha mutwe gw'ogu arukwija kwezibwa, hanyuma amusabire hali MUKAMA. 19Nyakatagara ahonge ekihongwa eky'okuganyiza ekibi, asabire omuntu ogu arukwija kurangirrwa nkooku atakyazirwa, hanyuma aite entaama ey'ekihongwa eky'okwokya, 20ahongere ha itambiro ekihongwa eky'okwokya hamu n'ekihongwa eky'ebyokulya. Omuntu ogu, nyakatagara amusabire, nukwo arangiirwe nkooku atakyazirwa.
21“Baitu omuntu ogu kakuba abaire ali munaku, atanyina bingi ebi asobora kuhayo, aleete ekyana ky'entaama ekihaya kimu, nikyo kibe kihongwa eky'okwihwaho ekibi, na kiloguraamu emu ey'ensaano enyakuniinuukire etabwirwemu amagita, ebi hamu na kimu kyakasatu ekya lita y'amagita ag'omuti gwa oliva bibe kihongwa ky'ebyokulya. 22Omuntu ogu ayongere aleete, n'enduka ibiri rundi amaiba amato abiri, kyona eki asobora kutunga; erimu hali amaiba ago, niryo libe kihongwa eky'okuganyiza ebibi, erindi libe kihongwa eky'okwokya. 23Ha kiro ekya munaana, ebintu ebi abireetere nyakatagara, nukwo arangirirwe nkooku atakyazirwa ha mulyango ogw'Eheema ey'okutangatanganiramu, omumaiso ga MUKAMA; 24Nyakatagara akwate ekyana ky'entaama eky'okuganyiza ekibi, hamu n'ekibindi ky'amagita, abiimukyaimukye, bibe kihongwa eky'okwimukyaimukya omumaiso ga MUKAMA. 25Kandi aite ekyana ky'entaama eky'ekihongwa eky'okuganyiza ekibi, aiheho esagama, agisiige ha nsonga ey'okutu okw'obulyo okw'ogu arukwija kusemezibwa, na ha kyara ekisaija eky'omukono gwe ogw'obulyo, na hakyara ekisaija eky'ekigere eky'obulyo. 26Akwate amagita, agaseese omu kiganja eky'omukono gwe ogw'emoso; 27agamiise n'orukumo rwe orw'omukono ogw'obulyo, emirundi musanju omumaiso ga MUKAMA; 28akwate ha magita agaanyina omu ngaro, agasiige ha nsonga ey'okutu okw'obulyo okw'ogu arukwija kusemezibwa, ha kyara ekisaija eky'omukono gwe ogw'obulyo, na ha kyara ekisaija eky'ekigere kye eky'obulyo, hali honyini nambere haasesirwe esagama ey'ekihongwa eky'okuganyiza ebibi. 29Kandi amagita agandi nyakatagara agaasiigaize omu ngaro, agaseese ha mutwe gw'ogu arukwija kwezibwa, amusabire omumaiso ga MUKAMA. 30Kandi omuntu ogu aheyo kyona ekyasobora kutunga, enduka rundi amaiba; 31ekimu hali byo, kibe kihongwa eky'okwihwaho ekibi, ekindi kibe kihongwa eky'okwokya, bigendere hamu n'ekihongwa eky'ebyokulya; nukwo nyakatagara asabire omuntu ogu arukwezibwa hali MUKAMA. 32Eki nikyo kiragiro ekyateerirweho omugenge, atarukusobora, kuhayo ebihongwa nk'eby'abandi abarukumukira nukwo ayezibwe.”
Ebirukugambwa ha nju y'omugenge
33MUKAMA yagambira Musa na Arooni ati: 34“Obu mulihika omunsi Kanaani ei ndukwija kubaha ebe yanyu mali nkaleeta endwara ey'ebigenge omunju enyakuli omunsi yanyu egi, 35nyineeka ow'enju egi, agendege agambire nyakatagara ati: ‘Enju yange neesisa nk'enyakutaahirwemu endwara.’ 36Aho nyakatagara aragire, baihe abantu omunju egi, uwe atakagenzire kwetegereza endwara egi, nukwo byona ebinyakuli omunju omu bireke kwetwa bibi; hanyuma nukwo agende arole enju egi. 37Ayetegereze kurungi endwara egi, obu eraaba eri omu bisiika by'enju, enyina amabara aga kijubwa n'agarukunanata, kandi kakuba ezooka ebitaahire muno omunda, 38nubwo nyakatagara aruge omunju egi agikinge, emale ebiro musanju etakakingwirwe. 39Agaruke ha kiro kya musanju arole, kakuba arora endwara emazire ebisiika by'enju yoona, 40obu aragire abantu, amabaale aganyakutaahirwemu endwara bagaihe omu bisiika, baganage aheeru y'orubuga omu kiikaro ekinyakunagwamu ebintu ebirofu kandi aragire 41enju yoona bagiharagate omunda. Byona ebi baharagasire, babinage aheeru y'orubuga omu kiikaro ekinyakuseeswamu ebintu ebirofu; 42nukwo bakwate amabaale agandi, bagagarre omu kiikaro kya gali; aleete: omusenyi ahuhule enju ekorwe buhyaaka.
43“Endwara egi kakuba egaruka omunju omu, bamazire kugiihamu amabaale, bagiharagasire kandi bagigarwireho omusenyi ogundi, 44nabwo nyakatagara agende arole; kakuba asanga endwara emazire enju yoona, buli enju egi etaahirwemu ebigenge eby'akabi; yoona esiisikaire. 45Enju egi aragire bagiseese, amabaale gaayo, embaaho, obudongo, omusenyi gwayo gwona, babiihe omu rubuga, babinage omu kiikaro eky'okunagwamu ebintu ebirofu. 46Kandi ogu anyakutaaha enju egi enyakukingire, araabaga murofu okuhika omu rwiririzi; 47kandi ogu araabyamaga omunju egi ayogyege ebyokujwara bye; n'ogu araaliiramuga ebyokulya, na uwe ayogyege ebyokujwara bye.
48“Baitu nyakatagara kakuba aija akakebera akasanga endwara eteeyongiire muno omunju, okuruga enju obu yakozirwe buhyaaka, aho arangirre ngu; ‘enju enu, hati nungi, habwokuba endwara eyekaba erumu ekizire.’ 49Kandi okusemeza enju egi, akwate ebinyonyi bibiri n'omuti ogw'omukogoto, 50aite ekimu ha binyonyi, akiitire omu kibindi ha ruguru y'amaizi, agarukugera, 51akwate omuti guli ogw'omukogoto engoye ezirukunanata, hamu n'ekinyonyi ekyomeezi, abiibike omu sagama ey'ekinyonyi ekinyakwisirwe, n'omu maizi agarukugera, amiisire enju emirundi musanju. 52Enju nukwo agisemeze ati, naayekonyeza esagama y'ekinyonyi, n'amaizi agarukugera, ekinyonyi ekyomeezi, omuti omukogoto, n'engoye ezirukunanata. 53Ekinyonyi ekyomeezi, akitaisule kiruge omu rubuga, kigende omu kisaka; enju egi nukwo agisabire ati, nukwo esemere.”
54Eki nikyo kiragiro ekyatairweho habw'endwara ey'ebigenge: ey'obuhere, 55ey'ebigenge, eby'omu kyokujwara rundi eby'omunju, 56ey'obuzimba, ey'ebikoko n'ey'ebisaababa; 57okugumya ekintu obu kiraaba kisiisikaire rundi tikisiisikaire. Eki nikyo kiragiro ekyatairweho habw'ebigenge.
Currently Selected:
Lev 14: BRR2008
Highlight
Share
Copy
Want to have your highlights saved across all your devices? Sign up or sign in
Bible in Runyoro/Rutooro Interconfessional Translation © Bible Society of Uganda, 2008.
