Kub 50

Okuziikwa kwa Yakobbo

1Kandi Yosefu yagwera ise, yarra yamunywegera. 2Yaragira abaheereza be abafumu boomesereze omutumbi gwa ise. Abafumu nukwo baakozire Isirairi, 3bakamara ebiro amakumi ana kukora omulimo ogu, habwokuba kwomesereza nk'oku kutwara ebiro makumi ana. Abamisiri bakamulirirra okumara ebiro nsanju.

4Ebiro eby'okumulirirra obu byahoire, Yosefu yagambira ab'omunju ya Faraaho ati: “Obu muraaba nimunsaalirirwa, mbeesengeriize, mungambirre Faraaho nkooku 5#Kub 47:29-31.isenyowe yandahiize naagamba ati: ‘Ndi haihi kufa, ekituuro eki nayebaiziire omu ibaale, ekinyakuli omunsi Kanaani, nikyo olinziikamu.’ Hati nkwesengeriize, ndeka ngende nziike isenyowe, nukwo ngaruke.” 6Faraaho yagarukamu ati: “Genda oziike Sso nkooku yakurahiize.” 7Yosefu yagenda kuziika ise, n'abaheereza ba Faraaho baagenda na uwe boona, abaakiraga ekitiinisa omuka ye, n'abaakiraga ekitiinisa omunsi Misiri yoona, 8n'abantu ab'omunju ya Yosefu, bagenzi be, ab'eka ya ise, abaana baabo bonka; amagana gaabo ag'entaama n'ag'embuzi, n'ente zaabo, nibyo byasigaire omunsi Goseni. 9Abaagenzire na uwe, abamu bakagenda batembere ebigaali, abandi embaraasi, kikaba kiri kitebe kikooto muno. 10Obu baahikire ha rubuga orunyakuhuulirwaho engano orunyakuli Atadi, nseeri ya Yorudaani, aho baaterraho empamo ez'amaani kandi ezirukusaaliza, Yosefu yalirirra ise okumara ebiro musanju. 11Enzaarwa z'ensi ya Kanaani, obu baarozire abantu nkooku barukulirirra ha rubuga Atadi orunyakuhuulirwaho engano, baagamba bati: “Okufa kwa Isirairi, kusaalize muno Abamisiri.” Ekiikaaro eki, nikyo kyarukiirwe ibara Abberi-Misiraimu, kiri nseeri ya Yorudaani. 12Batabani ba Yakobbo, baamuziika nkooku yabaragiire, 13#Ebik 7:16.habwokuba bakamutwara omunsi Kanaani, baamuziika omu bwingira obw'omu kibanja ekinyakuli Makipera, enyakuroleriire Buturukaizooba bwa Mamule, obwingira Abburahamu obu yaguzire hamu n'ekibanja hali Efuroni Omuhiiti, kiikalege kiri kiikaro eky'okuziikamu. 14Yosefu obu yamazire kuziika ise, yagaruka Misiri na bagenzi be, na boona aba yagenzire na bo kuziika ise.

Yosefu naayongera kugumya bagenzi be

15Bagenzi ba Yosefu, obu baarozire isebo afiire, baagira bati: “Yosefu asobora kutunoba n'okutukora kubi, nkooku itwe twamukozire kubi.” 16Aho nukwo kumutumira kutangana omukwenda nibagamba bati: “Sso, obu akaba atakafiire, akaragira ati: 17‘Mugambire Yosefu muti: Nkwesengeriize, bagenzi bawe obaganyire ensobi yabo n'ekibi kyabo, habw'okuba bakakukora kubi.’ Hati, tukwesengeriize, itwe abairu aba Ruhanga wa Sso, otuganyire ensobi yaitu.” Yosefu yarra, bagenzi be obu baamugambiire ebigambo ebi. 18Baija baajuumara omumaiso ge, baagamba bati: “Hati tuli bairu bawe.” 19Yosefu yabagarukamu ati: “Muleke kutiina, nyowe, ninyowe oha ayaakuhakaniize entegeka ya Ruhanga? 20Inywe mukagenderra kunkora kubi, baitu eki, Ruhanga akagenderra kukiihamu ekirungi, akasiima kibeho, nukwo abantu baingi boomeere nkooku boomiire hati. 21Habweki, muleke kutiina, ninyija kubarolerra kurungi hamu n'abaana baanyu.” Nukwo yabagumyagumize ati, yabagarramu amaani.

Yosefu naafa kandi naaragira ha balimuziika

22Yosefu yaikara Misiri, uwe n'abantu boona ab'eka ya ise, akoomeera emyaka kikumi mu ikumi. 23Akarora abaana ab'Efuraimu, abaijukuru ab'enyakasatu; kandi abaana ba Makiri, mutabani wa Manaase, bakazaarwa, yabalera. 24Yosefu yagambira bagenzibe ati: “Ndi haihi kufa, baitu Ruhanga alibaijuka, abaihe omunsi enu, abatwale omunsi ei yarahiire kuha Abburahamu, Isaaka na Yakobbo.” 25#Kurug 13:19; Yos 24:32; Baheb 11:22.Yosefu yarahiza abaana ba Isirairi naagamba ati: “Ruhanga obu alibaijuka, amagufa gange mugaihe hanu mugatwale.” 26Yosefu yafa, ahikize emyaka kikumi mu ikumi ey'obukuru, baamwomeesereza, omutumbi baaguta omu sanduuko, gwaikara Misiri.

Currently Selected:

Kub 50: BRR2008

Highlight

Copy