Kub 14

Abburamu n'atonganirra Looti

1Omu bulemi bw'Amurafeeri omukama wa Sinali, Alyoki omukama wa Erasaali, Kedolahomeri omukama wa Eremu, na Tiidali mukama wa Goimi, 2abakama abo, bakarwanisa Beera omukama wa Sodomu, Biirina omukama wa Gomora, Sinabi omukama w'Adama, Semeeberi omukama wa Zeboyimu, n'omukama wa Beera, (niyo Zohali).

3Abakama abo boona abanyakugambirweho enyuma, bakateeraniza amahe gaabo omu kyeya Sidimi, egi niyo nyanja y'ekisura. 4Bakaba bamazire emyaka ikumi n'ebiri nibalemwa Kedolahomeri, baitu omu mwaka ogwa ikumi n'esatu, baayema. 5Omu mwaka ogwa ikumi n'ena, Kedolahomeri n'abakama abandi abakaba bali na uwe, bakaija baarwanisa Abalefaimu abaikaraga omunsi Save-Kuliyatimu baabasingura, 6Abamooli abakaba bali omu kicweka ekya Seiri, okuhika Eriparani h'erukutaanira n'irungu; 7Aho baakubuutuka, baahika Enimisipate; (niyo Kadesi) baarwanisa ensi yoona ey'Abamaleki, n'ey'Abamooli, abaikaraga Haazazoni-tamara, baazisingura. 8Hanyuma abakama: owa Sodomu, owa Gomora, owa Adama, owa Zeboyimu n'owa Bela, (niyo Zaoli) baaramaga, baatandika kurwanisa 9Kedolahomeri omukama wa Eremu, Tidali omukama wa Goimu, Amuraferi omukama wa Sinali, na Aliko omukama wa Erasa, abakama bbana, baarwanisa bataano, omu kyeya ekya Siidimi. 10Omu kasumi ako, ekyeya ekya Sidimu kikaba kirumu ebiina bingi ebyaihwamuga orweju, abakama: owa Sodomu n'owa Gomora obu bakaba nibairuka n'amahe gaabo, baabigwamu, abamu abaasigaireho, bairuka ha rusozi. 11Abanyanzigwa nukwo kutwara ebintu byona ebya Sodomu na Gomora n'ebyokulya byamwo, baayegendera, 12kandi baanyaga Looti mutabani wa mugenzi wa Abburamu, yaikaraga Sodomu, baanyaga n'ebintu bye baagenda.

13Omuntu omu ayacwire omu bulemu, akaija yagambira Abburamu Omuhebburaayo ayaikaraga haihi n'emiti emisisa ey'omuntu ibara lye Mamule Omwamoli, mugenzi wa Esikoli wa Aneri, banu bakaba beeteraine na Abburamu. 14Abburamu obu yahuliire ngu ow'oruganda rwe anyagirwe, yaramaga hamu n'abasaija be abanyakumanyire kurwana, abaazaaliirwe omuka ye, abarukuhika bikumi bisatu mu ikumi na munaana, baahondera abakama bali abbana, yabasanga Daani. 15Yabaganizaamu ihe rye, yabarwanisa omu bwire bw'ekiro, uwe n'abaheereza be banyaga abamu, abandi baabairukya, baabahikya Hoba, ha bukiizi obw'emoso obw'orubuga Damasiko. 16Aho yagarra Looti ow'oruganda rwe n'ebintu bye, abakazi n'abantu abakaba banyagirwe.

Merikizedeki naaha Abburamu omugisa

17Abburamu obu yagarukire, amazire kusingura Kedolahomeri n'abakama abandi abakaba bali na uwe omukama wa Sodomu yagenda kumwitirana omu kyeya kya Save (nikyo ekyeya eky'omukama) 18#Baheb 7:1-10.Merikizedeki omukama wa Salemu, yaleeta omugaati n'eviini, Merikizedeki ogu, akaba ali nyakatagara wa Ruhanga Rutakirwa. 19Akasabira Abburamu omugisa naagamba ati: “Ruhanga Rutakirwa, omuhangi w'iguru n'ensi, ahe Abburamu omugisa. 20Ruhanga Rutakirwa, anyakukusingwize abanyanzigwa bawe akugizibwe!” Abburamu yaha Merikizedeki ekicweka ekya ikumi ekya byona ebi yanyagire 21Omukama wa Sodomu yagambira Abburamu ati: “Nyowe mpa abantu, baitu iwe, otwale ebintu.” 22Baitu Abburamu yagarukamu omukama wa Sodomu ati: “Ndahiire MUKAMA Ruhanga Rutakirwa, omuhangi w'iguru n'ensi, 23tinsobora kutwara kahuuzo rundi rukoba rw'enkaito, rundi ekintu kyawe ekindi, toikara kugamba oti: ‘Ninyowe natungisize Abburamu.’ 24Tintwale kintu na kimu, kyonka ebiraambalirwa, nibyo ebyokulya ebiriirwe abasigazi, n'omugabo ogw'abantu aba nagenzire na bo, nubo: Aneri, Esikoli na Mamuli batwale omugabo gwaabo.”

Currently Selected:

Kub 14: BRR2008

Highlight

Copy