Kub 13
13
Abburamu na Looti nibaahukana
1Aho Abburamu yaruga Misiri, uwe na mukazi we na byona ebi akaba ayinabyo, na Looti yagenda na uwe, bahika Negebu.
2Abburamu akaba atungire ente, efeeza, na zaabbu bingi muno. 3Yaruga Negebu yayongera orugendo rwe, yahika Beseri, omunsi Ai. 4Omu kiikaro ha yabandize kwombeka itambiro, kandi nuho yayesengereriize MUKAMA. 5Looti ogu ayagenzire n'Abburamu, na uwe akaba anyina amagana ag'entaama n'embuzi, n'amahyo g'ente, n'eheema nyingi. 6Nahabweki, ensi ekaba etarukubamara bombi kwikara hamu; habwokuba amatungo gaabo, gakaba gali maingi muno, batarukusobora kwikara hamu. 7Kandi abaliisa ab'ente ez'Abburamu n'ab'eza Looti, baikaraga n'empaka. Omu kasumi ako, Abanyakanaani n'Abaperezi nubo bakaba bali omunsi egi.
8Abburamu nukwo kugamba Looti ati: “Tikiri kirungi nyowe na iwe kwikara n'empaka, kandi tikiri kirungi abahuma bange n'abawe kwikara n'empaka, kandi kunu tuli b'oruganda rumu. 9Ensi yoona enyakukuli omumaiso torukugirora? Twahukane, obu oraagenda ha bumoso, nyowe ndaagenda ha bulyo, rundi iwe obu oraakwata ha bulyo, nyowe ndaakwata ha bumoso.” 10#Kub 2:10.Looti yaimukya amaiso, yarora ekyeya ekya Yorudaani nkooku kyaitirirwaga kurungi amaizi hoona hoona nkooku kikaba kiri, MUKAMA atakahwerekeriize Sodomu na Gomora, nikisisana orugonjo rwa MUKAMA, nikisisana ensi ya Misiri, kutwara ha bukiizi bwa Zohara, 11Aho Looti yayekomera ekyeya kyona ekya Yorudaani, yakwata ogwa Burugaizooba, nukwo baayahukaine bati. 12Abburamu yaikara omunsi Kanaani, kandi Looti yaikara hagati ey'embuga ez'ekyeya, yaihurra eheema ye, yagitwara Sodomu. 13Omu kasumi ako abantu aba Sodomu bakaba bali babi, nibasiisira muno MUKAMA.
Ruhanga naaraganiza kuha Abburamu ensi erukwera
14Looti obu yamazire kwahukana n'Abburamu, MUKAMA yagambira Abburamu ati: “Nambere oli aho, naga amaiso orole obukiizi bw'obumoso, obw'obulyo, Burugaizooba na Bugwaizooba; 15#Ebik 7:5.ensi egi yoona ei orukurora, ndigikuha kandi ndigiha abaijukuru bawe, bagiikalemu ebiro byona. 16Abaijukuru bawe ndibakanyisa baingane ecuucu eya hansi, kakuba omuntu asobora kubara ecuucu eya hansi, buli n'abaijukuru bawe basobora kubabara. 17Imuka orubate orabemu ensi enu, oyetegereze obura n'obugazi bwayo, habwokuba, ndigikuha.” 18Aho Abburamu yaihurra eheema ye, yaija yaikara haihi n'emiti emisisa eya Hebburoni, kandi oku, yayombekerayo MUKAMA itambiro.
Currently Selected:
Kub 13: BRR2008
Highlight
Share
Copy
Want to have your highlights saved across all your devices? Sign up or sign in
Bible in Runyoro/Rutooro Interconfessional Translation © Bible Society of Uganda, 2008.
