Ebik 7

Orubazo rwa Sitefano

1Mukuru wa banyakatagara akakaguza Sitefano ati: “Ebigambo binu by'amazima?” 2#Kub 12:1.Uwe yamugarukamu ati:

“Bagenzi bange na bataata, mumpuliirize! Ruhanga ow'ekitiinisa akabonekera isenkuru-itwe Abburahamu, obu akaba akyali Mesopotamiya, atakagenzire kwikara Haraani, 3yamugambira ati: ‘Ruga omu nsi y'owanyu n'omu beene banyu, ogende omunsi ei ndikwoleka.’ 4#Kub 11:31; Kub 12:4.Nawe nukwo kuruga omunsi y'Abakalidaaya, yagenda kwikara Haraani. Ise obu yamazire kufa, Ruhanga yamwihayo, yamuleeta omunsi enu ei murumu hati. 5#Kub 12:7; 13:15; 15:18; 17:8.Baitu atamuhemu bugwetwa, nangwa, noobu haakuba h'okuta ekigere; kyonka akaraganiza kumuha ensi, ebe butaka bwe n'abaijukuru be, noobu aliba yabaire ataina mwana omu kasumi ako. 6#Kub 15:13,14.Ruhanga yayongeraho binu ati: Abaijukuru baawe balisuhuukira omu nsi endi mbere abantu balibafoora bairu rubaale kandi balibakora kubi kumara emyaka bikumi bbina. 7#Kurug 3:12.Ruhanga yayongera ati: ‘Ihanga eriribaikaza liti, ndiricwera omusango, nukwo hanyuma barugeyo, bandamize omu kiikaro kinu.’ 8#Kub 17:10-14; Kub 21:2-4; Kub 25:26; Kub 29:31—35:18.Nubwo yamuhaire endagaano y'omugenzo gw'okusarwa. Kandi omutabani we Isaaka obu yazairwe, Abburahamu yamusara ha kiro kya munaana. Isaaka nawe nukwo yasazire Yakobbo; na Yakobbo yasara ati baisenkuruitwe ikumi na babiri.

9 # Kub 37:11; Kub 37:28; Kub 39:2,21. “Baisenkuru itwe abo habw'okukwatirwa Yosefu ihali, baamutunza abantu abaamutwaire Misiri. Baitu Ruhanga yaikara nawe, 10#Kub 41:39-41.yamwiha omu mihito ye, yamuha amagezi agamukonyiire kusiimwa Faraaho, omukama wa Misiri. Faraaho akamufoora mulemi mukuru wa Misiri kandi omuroleerezi w'ekikaali kye kyona. 11#Kub 42:1,2.Hanyuma hakagwa kiihe omunsi Misiri yoona n'eya Kanaani, haabaho omuhito mwingi. Baisenkuru itwe baaburwa ebyokulya. 12Baitu Yakobbo obu yahuliire nkooku Misiri haliyo engano erukutundwa, yatumayo baisenkuruitwe omurundi gw'okubanza. 13#Kub 45:1; Kub 45:16.Kandi ha murundi gwa kabiri, Yosefu yayetondera bakuru be, nukwo Faraaho kumanya oruganda rwe. 14#Kub 45:9,10,17,18; Kub 46:27.Aho Yosefu yatuma bamwetere Yakobbo ise n'ab'oruganda rwe boona, abantu nsanju na bataano. 15#Kub 46:1-7; Kub 49:33.Yakobbo yagenda Misiri, kandi oku nuho yagwire hamu n'abaisenkuruitwe, 16#Kub 23:3-16; 33:19; 50:7-13; Yos 24:32.emitumbi yaabu yatwarwa Sekemu, yaziikwa omu kituuro Abburahamu eki akaba aguzireho batabani ba Hamori owa Sekemu.

17 # Kurug 1:7,8. “Baitu akasumi ak'okuhikiriza endagaano Ruhanga ei yaraganiize Abburahamu obu kairiire haihi, abantu bakakanya baahingurana omunsi Misiri, 18okuhika engoma obu yaliirwe omukama ondi ow'akaba atamanyire Yosefu. 19#Kurug 1:10,11; Kurug 1:22.Ogu yacwera ihanga lyaitu amagezi, yahambiriza baisenkuruitwe kunaga abaana baabo enkerembe, bafe. 20#Kurug 2:2.Omu kasumi ako Musa nubwo yazairwe, ali mwana murungi anyakusiimwa Ruhanga. Akoororwa omunju ya ise kumara ameezi asatu. 21#Kurug 2:3-10.Baitu uwe obu yanagirwe, muhara wa Faraaho yamuzoora, yamutwara, yamworoora nk'omwana we nyabwe. 22Musa akatendekwa amagezi goona ag'Abamisiri, kandi akaba ali w'amaani omu bigambo n'omu bikorwa bye.

23 # Kurug 2:11-15. “Musa obu yahikize emyaka makumi ana ey'obukuru, yaizirwa ekiteekerezo eky'okubungira ab'ihanga lye Abaisirairi. 24Obu yarozire omu hali bo naakorwa kubi, yamurwanirra, yamuhorra enzigu, naateera Omumisiri. 25Akanihira ngu bagenzi be bakengere nkooku nuwe Ruhanga yatumire kubaiha mu bwiru rubaale, baitu bbo batakimanye. 26Ha kiro ekyakurasireho, yasanga babiri mulibo nibarwana, yagonza abaramule abateeranize, nukwo kubagambira ati: ‘Basaija inywe, habwaki nimukorangana kubi, kunu muli iseemu?’ 27Ogu ayabaire naakora kubi mugenzi we yamusindika kuli naagamba ati: ‘Nooha ayakuhaire obusobozi obw'okutulema n'okutucwera emisango? 28Nooyenda kuunyita nkooku waisire Omumisiri ijo?’ 29#Kurug 18:3,4.Musa obu yahuliire eki, yairuka, yasuhuukira omunsi ya Midiyani. Oku nuho yazaaliire abatabani babiri.

30 # Kurug 3:1-10. “Obu haahingwireho emyaka makumi ana, malaika yamubonekera omu ndimi z'omurro, ogukaba nigwakira omu rusaka, omwirungu erinyakuheriire Orusozi Sinai. 31Musa, obu yarozire omurro ogu, yahunirra. Obu yairiire haihi kwetegereza, yahurra iraka lya MUKAMA nirigamba liti: 32‘Ninyowe Ruhanga w'abaswenkuru. Ruhanga wa Abburahamu, Isaaka n'owa Yakobbo.’ Musa yatukumira, yatiina n'okugumyaho amaiso. 33MUKAMA yamugambira ati: ‘Juuramu enkaito zaawe, habwokuba ekiikaro nambere oyemeriire nikyera. 34Mazimakwo ndozire abantu bange abali omu Misiri nkooku barukukorwa kubi, kandi mpuliire okusinda kwabo; nyizire kubaiha mu bwiru bwabo. Hati nu ija, nkutume Misiri.’

35 # Kurug 2:14. “Nahabweki Musa ogu, abantu ou baayangire nibagamba bati: ‘Nooha yakuhaire obusobozi obw'okutulema n'okutucwera emisango?’ Nuwe ogu Ruhanga ou yatumire abe mwebembezi kandi mucunguzi waabo, naabajunisa obusobozi bwa malaika ayamubonekiire omu rusaka. 36#Kurug 7:3; Kurug 14:21; Kubar 14:33.Musa obu yamazire kukora ebihuniriza n'ebyamahano omu Misiri, akabaihayo nabarabya omu Nyanja Erukutukura, n'omu irungu nambere baamazire emyaka makumi ana. 37#Bir 18:15,18.Ogu nuwe Musa ayagambiire Abaisirairi ati: ‘Omu bagenzi banyu Ruhanga naija kubaimukizaamu omurangi ondi, nka nyowe oku yanyimukize.’ 38#Kurug 19:1—20:17; Bir 5:1-33.Musa ogu nuwe akaba aina ekitebe kyona ky'abantu omu irungu, aina na malaika ayabalize nawe ha rusozi Sinai, kandi Musa nuwe ogu ayabalize n'abaisenkuru itwe bwire obu bwona. Nuwe yakwasiibwe ebigambo by'obwomeezi kubituhikyaho.

39“Baisenkuru itwe bakanga kumuhurra, baamucuma kuli; kandi omu mitima yabu bakagonza kugaruka Misiri, 40#Kurug 32:1.baagambira Arooni bati: ‘Tukorre baruhanga ab'okutwebembera; habwokuba Musa ogu ayatwihire omunsi ya Misiri, titurukumanya nkooku abaire.’ 41#Kurug 32:2-6.Nukwo kuheesa ekisisani ky'enyana, baakihongera ekyonzira, baasemerererwa ekintu ki baayekoliire. 42#Amos 5:25-27.Ruhanga akabahwamu, yabaleka baramye ihe ery'enyunyuuzi ez'omu iguru, nkooku kyahandiikirwe omu kitabu ky'abarangi kiti:

‘Inywe ab'omu ruganda rwa Isirairi,

omu irungu mukampongera ebisoro ebinyakwisirwe

n'ebyonzira

kumara emyaka makumi ana.

43Baitu mwarugayo mwayetwekaga eheema ya Moloki

n'enyunyuuzi z'omucwezi Refani,

nibyo ebisisani ebi mwayekoliire kuramya;

nikyo ndibazaahiza mbahinguze Bbabbulooni.’

44 # Kurug 25:9,40. “Baisenkuru itwe bakaba baina Eheema omu irungu erukugumya Ruhanga nkooku yaikaraga nabo, niyo egi Ruhanga ei yaragiire Musa kukora narorra ha kisisani eki yamwolekere. 45#Yos 3:14-17.Eheema egi niyo baisenkuruitwe basigiirwe baisebo, bakagenda nayo okuhika Yoswa obu yagihikize omunsi egi ei baanyagireho abantu Ruhanga aba yabingiremu, baisenkuruitwe nibahikamu bati. Eheema yaikarayo okuhika omu businge bwa Daudi, 46#2 Sam 7:1-16; 1 Byok 17:1-14.Ruhanga ou yagiriire embabazi. Daudi akasaba aikirizibwe kwombekera Ruhanga wa Yakobbo Enju. 47#1 Bakam 6:1-38; 2 Byok 3:1-17.Baitu Solomooni nuwe yamwombekiire Enju egi. 48Kunu Rutakirwa taikara omu maju agombekerwe n'emikono y'abantu, omurangi nkooku yagambire ati:

49 # Is 66:1,2. ‘Iguru nikyo kitebe kyange eky'obukama,

kandi ensi nuko katebe k'ebigere byange.

MUKAMA yayongera yakaguza ati:

Nju ya mulingo ki ei mulinyombekera?

Rundi kiikaro ki eki ndihumurramu?

50Ebintu ebi byona bitakorwe mukono gwange?’

51 # Is 63:10. “Ntahurra inywe, ab'emitima egangaire n'amatu agatarukuhurra nk'ag'Abanyamahanga, butoosa mwangirra Mwoyo Ahikiriire. Baisenkuru inywe nkooku babaire nibakora, na inywe nukwo murukukora. 52Murangi ki baisenkuru inywe ou batarahiiganiize? Bakaita abo abaarangire okwija kw'Omuhikiriire Ogu, ou mwagobiize kandi mwamwita. 53Inywe abaahairwe Ebiragiro bya Ruhanga ebyaleesiirwe bamalaika, mwayanga kubikwata.”

Abayudaaya nibaisa Sitefano amabaale

54Ab'orukurato obu baahuliire ebigambo ebi, baakwatwa ekiniga kingi, baamunenera ensaya. 55Baitu Sitefano, aijwire Mwoyo Ahikiriire, amaiso yagahanga ha lguru, yarora ekitiinisa kya Ruhanga, na Yesu amwemeriire ha mukono gw'obulyo. 56Yagamba ati: “Nindora iguru likingwirwe n'Omwana w'omuntu ayemeriire ha mukono gw'obulyo ogwa Ruhanga.” 57Baitu bbo baatoka muno, baigara amatu gaabo, baamweseesaho. 58Baamusindikiriza aheeru y'orubuga, baamuteeza amabaale. Kandi abakaiso abo ab'ebisuba baanaga ebijwaro byabo ha bigere by'omusigazi arukwetwa Saulo. 59Sitefano, obu bakaba nibamuteeza amabale, yayesengereza ati: “MUKAMA Yesu, twara omwoyo gwange.” 60Yateeza amaju, yayamirra n'iraka likooto ati: “Ai MUKAMA, ekibi kinu otakibajunaana.” Obu yamazire kugamba ebi, yakaba. Kandi Saulo akasiima okwitwa kwa Sitefano.

Currently Selected:

Ebik 7: BRR2008

Highlight

Copy