Ebik 6

Abaheereza musanju ab'okubanza

1Omu biro ebi, abeegesebwa obu baayeyongiire kukanya, Abayudaaya abaabazaaga Orugiriiki baahyemera Abayudaaya abaabazaaga Oruhebburaayo, habwokuba abafaakati baabo bakaba batarukufibwaho omu kugabirwa ebintu okw'obutoosa. 2Nubwo ikumi na babiri baayesire ekitebe ky'abeegesebwa boona, baabagambira bati: “Tikihikire itwe okuleka kurangirra ekigambo kya Ruhanga tukagenda ha kugaba ebyokulya. 3Nahabweki bagenzi baitu, mukome omuli inywe abasaija musanju abarukusiimwa abantu, abaijwire Mwoyo wa Ruhanga n'amagezi, tubakwase omulimo gunu. 4Baitu itwe nitwija kwekambira kusaba n'okwegesa ekigambo kya Ruhanga.” 5Ekihanuuro eki kyasiimwa ekitebe kyona, baakoma Sitefano, omusaija anyakwina okwikiriza kwingi kandi anyakwijwire Mwoyo Ahikiriire, baakoma Filipo na Porokooro, Nikanoori na Timooni, Paamena na Nikola owa Antyokiya ayahindukire yataaha omu diini y'ekiyudaaya. 6Abo baabaleeta omumaiso g'abakwenda, baabasabira, abakwenda baabataho emikono. 7Ekigambo kya Ruhanga kyayeyongera, n'omuhendo gw'abeegesebwa gwakanya muno omu Yerusaalemu, kandi banyakatagara baingi baikiriza kuhondera enyikiriza egi.

Abayudaaya nibakwata Sitefano

8Sitefano, Ruhanga ou yahaire emigisa nyingi n'amaani, akatandika kukora ebihuniriza n'ebyamahano omu bantu. 9Nukwo abantu kwimuka kumuteeza empaka, abamu nibaruga omu isorrokaniro ly'Abaalekiirwe (nkooku lyayetwaga) n'Abakirene n'Aba Alekizanderiya, kandi n'abandi abaarugire Kilikiya na Asiya. 10Bbo batasobole kumusingura habw'amagezi yahairwe hamu n'ebi Mwoyo wa Ruhanga ebi yamugambisize. 11Nukwo kugulirra abantu ab'okumuhangirra bati: “Tukahurra naagamba eby'okujuma Musa na Ruhanga.” 12Obu baamazire kwimukiriza abantu n'abakuru baabo hamu n'abeegesa b'ebiragiro, baamwizira, baamukwata, baamuleeta omu rukurato. 13Baayemereza aho bakaiso b'ebisuba abaagizire bati: “Omusaija onu tayosa kugamba kubi ha kiikaro kinu ekirukwera na ha Biragiro byaitu. 14Tukamuhurra naayegesa ati: Yesu owa Nazareeti alihwerekereza ekiikaro kinu, kandi alihindura engeso Musa ezi yatusigiire.” 15Boona abakaba baikaliire omu rukurato obu bahangire Sitefano amaiso, baarora amaiso ge nigangasana nk'aga malaika.

Currently Selected:

Ebik 6: BRR2008

Highlight

Copy