2 Abakor 8

Okusorooza eby'okukoonyera abaikiriza

1 # Bar 15:26. Bagenzi baitu, nitugonza mumanye emigisa ya Ruhanga eyahairwe ebitebe by'abaikiriza abali Makedoni. 2Obu bakaba nibalengesebwa emihito nyingi, okusemererwa kwabu kukeeyongera, kwabaleetera okugaba muno kandi kunu obunaku bwabu bukaba buhinguraine. 3Kinu ninkigumya: bakagaba nkooku baasoboire n'omutima gumu, n'okukiza baakizaaho. 4Baatusabaga nibatwesengereza tubaikirize nabo bakoonyere abantu ba Ruhanga 5eki bakakikora nkooku tukaba tutarukunihira, habwokuba bakabanza kwekwasa MUKAMA, kandi na itwe baatwekwasa habwa Ruhanga. 6Nikyo twasabiire Tito amalirize omuli inywe omulimo ogu ogw'embabazi, ogu akaba atandikire. 7Hati nkooku muli kurungi mu byona, omu kwikiriza, omu kugamba kamu, omu kumanya, omu kwekamba kwona, n'omu kutugonza, nukwo mwekambire muno okuhikiriza ekikorwa eki eky'embabazi.

8Eki tindukukigamba nk'arukubahambiriza, baitu ningenderra kubooleka obwekambi bw'abandi, nukwo mmanye okugonza kwanyu obu kuraaba kuli kw'amazima. 9Inywe nimumanya embabazi za MUKAMA waitu Yesu Kristo. Noobu araaba yabaire ali muguuda, baitu habwanyu akafooka munaku, nukwo obunaku bwe bubafoole baguuda.

10Kandi omu kikorwa kinu eky'embabazi nimbahabura nti: kirungi mumalirize eki mwatandikire omwaka oguhoire, muleke kumara gakora kwonka baitu mukole n'engonzi. 11Mukatandika kara nimwenda kukoonyera, mweyongere mumalirize n'ebi mutungire. 12Omuntu obu aikiriiza okukoonyera, nikihika ogu okukozesa ebi ainabyo, hatali ebi ataina.

13Tindukugamba ngu, abandi banguhirwe, inywe mulemererwe. 14Baitu habw'obwinganiza: ebyanyu ebi musaagisize omu kasumi kanu, bikoonyere bali; kandi nabo ebi balisaagisa bikoonyere inywe, nukwo habeho okwinganaingana. 15#Kurug 16:18.Nkooku kyahandiikirwe kiti: “Ayasoroize bingi, atasaagise bingi; kandi ayasoroize bike, ataseege.”

Engabwa ezaatumirwe Korinto

16Ruhanga asiimwe ayatairemu Tito omutima ogw'okubatunturra nk'ogwange. 17Akaikiriza kwija, tihali itwe kumusaba kwonka, baitu habw'okwehayo kwe. Uwe wenka akacwamu kwija owanyu. 18Kandi nitumutuma hamu na mugenzi waitu arukumanywa muno omu bitebe byona by'abaikiriza, nukwo arangirreyo Amakuru Amarungi. 19Tikiri eki kyonka, baitu akomerwe ebitebe by'abaikiriza kugendaga na itwe omu mulimo ogu ogw'embabazi. Omulimo ogu turukukora habw'okuhaisa MUKAMA ekitiinisa n'okwoleka omutima omurungi ogu twinagwo.

20Kandi na itwe turagirwa kwerinda, tihaikara kubaho arukutubazaaho kubi habw'ebisembo ebi ebingi ebi turukurolerra. 21#Nfu 3:4.Ningira eki turukugenderra nukwo kukora ebirukusiimwa, hatali omu maiso ga Ruhanga honka, baitu n'omu maiso g'abantu boona.

22Kandi hamu nabo nitutuma mugenzi waitu ondi ou twalengeseze emirundi nyingi, twarora ali mwekambi omu bingi; baitu hati mwekambi kukira nkooku akaba ali, habwokuba naabeesiga muno. 23Mara Tito, nuwe mugenzi wange ou ndukukora nawe okubaheereza; kandi bagenzi baitu abo boona, nubo batumirwe ebitebe by'abaikiriza, kandi nubo bahaisa Kristo ekitiinisa. 24Nahabweki mubooleke ebirukugumya engonzi zanyu kandi mwoleke nkooku turukwenyumiza habwanyu, nukwo ebitebe byona by'abaikiriza bisobole kukimanya.

Currently Selected:

2 Abakor 8: BRR2008

Highlight

Copy