1 Abakor 11

Abakazi n'abasaija nkooku basemeriire kuramya

1 # 1Kor 4:16; Baf 3:17. Munkuraatire nka nyowe oku nkuraatira Kristo. 2Nimbasiima habwokuba nimunyijuka omu buli kintu kyona, kandi nimukwata ebigambo byange nkooku nabibeegeseze. 3Baitu ninyenda mwetegereze Kristo nkooku ali mutwe gwa buli muntu weena. Omutwe gw'omukazi nuwe iba, kandi omutwe gwa Kristo nuwe Ruhanga. 4Omusaija weena arukusaba rundi arukuranga ebya Ruhanga aswekeriire omutwe gwe, ahemura Kristo. 5Kandi omukazi arukusaba rundi arukuranga ataswekeriire omutwe gwe, nawe ahemura iba-nk'omukazi anyakuramya amwire omutwe gwe, nawe ahemura iba-nk'omukazi anyakuramya amwire omutwe gwe. 6Kakuba omukazi ayanga kweswekerra, haakire asale isoke rye; baitu okusara isoke rundi kulimwa obu kiraaba nikimuhemura, kirungi ayeswekerre.

7 # Kub 1:26,27. Omusaija, uwe tasemeriire kuswekerra omutwe gwe, habwokuba nuwe kisisani kandi kitiinisa kya Ruhanga; baitu omukazi aba kitiinisa kya iba. 8#Kub 2:18-23.(Habwokuba omusaija Ruhanga atamwihe omu mukazi, baitu omukazi nuwe yaihirwe omu musaija. 9Kandi omusaija atahangirwe mukazi, baitu omukazi nuwe yahangiirwe omusaija.) 10Nahabweki omukazi asemeriire kuswekerra omutwe gwe, habw'abamalaika abaroho. 11(Baitu omu ntegeka ya MUKAMA waitu, omukazi taikaraho hataroho musaija; omusaija nawe taikaraho hataroho mukazi. 12Omukazi nkooku yaihirwe omu musaija, omusaija nawe hati azaarwa omukazi; kandi bombi baruga hali Ruhanga.)

13Na inywe mwecweremu inywenka, nikihika omukazi kusaba Ruhanga ateeswekeriire omutwe? 14Obuhangwa bwonka tiburukwoleka okukuza muno isoke nkooku kihemura omusaija? 15Baitu omukazi kulikuza kiba kitiinisa kye. Habwokuba akaheebwa isoke limuswekerre. 16Obu haraaba haroho omuntu arukwenda kuteera empaka, itwe titwina kindi eki tumanyire, noobu haakuba omu bitebe ebindi by'abaikiriza Ruhanga.

Ekiihuro kya MUKAMA

17Hali binu ebi ndukubahabura, tindukubasiima, habwokuba okwesorooza kwanyu tikurugwamu oburungi baitu kurugwamu obubi. 18Eky'okubanza, obu musorrokana nk'ekitebe ky'abaikiriza Ruhanga, mpurra nkooku mwebaganizaamu. Eki na nyowe obundi nkiikiriza. 19Ego okwebaganizaamu kusemeriire kubeho omuli inywe, nukwo ab'a mazima bamanywe. 20Obu mwesorooza, ekiihuro kya MUKAMA tinikyo muba nimulya. 21Habwokuba obu muba nimulya, buli muntu alya ebyokulya bye atalinzire abandi, kandi omu aba naarumwa enjara, ondi atamiire. 22Mahano! Timugira maju ag'okuliiramu n'ag'okunyweramu? Rundi nimugaya ekitebe ky'abaikiriza, nimuswaza muti abataina kantu? Mbagambe ki? Mbasiime? Nangwa, tindukubasiima.

23Habwokuba ebi nahairwe MUKAMA, na nyowe nibyo nabeegeseze nti: MUKAMA Yesu ha kiro eki yagoberiziibweho, akakwata omugaati, 24obu yamazire kusiima, yagucwamu naagamba ati: “Gunu nugwo mubiri gwange oguraaheebwayo habwanyu. Kinu mukikolege okunyijuka.” 25#Kurug 24:8; Yer 31:31-34; Kurug 24:6-8.Omu mulingo nugwo gumu obu baamazire kulya, yakwata ekikopo nagamba ati: “Ekikopo kinu nikyo kiragaano ekihyaka eky'esagama yange. Kinu mukikolege, obu muraakanywaga, munywege nimunyijuka.” 26Bwona obu muraalyaga omugaati gunu mukanywa ha kikopo kinu, muraamanyisaaga okufa kwa MUKAMA okuhika obu aliija.

Atasemeriire aleke kulya ekiihuro kya MUKAMA

27Nahabweki weena araalyaga omugaati gunu, rundi akanywa ha kikopo kya MUKAMA atasemeriire, alisingwa omusango ogw'okusiisa omubiri gwa MUKAMA n'esagama ye. 28Nukwo nu, buli muntu ayerole atakaliire ha mugaati ogu kandi atakanywire ha kikopo eki. 29Habwokuba weena anyakulya kandi akanywa atarukwetegereza mubiri gwa MUKAMA, ayeriira kandi ayenywera wenka omusango. 30Baingi omuli inywe nikyo barukucekera kandi nikyo barukurwarra, kandi abamu bafiire. 31Kakuba twecwera itwenka omusango omu mazima, titwakugucweriirwe MUKAMA. 32Baitu MUKAMA obu atucwera omusango, atufubira; nukwo tuleke kusingwa omusango hamu n'ab'ensi.

33Nahabweki bagenzi bange, obu muraayesoroozaaga kulya, mulindanganege 34omuntu weena obu araabaga naarumwa enjara, alyege omuka ye-okwesorooza kwanyu kutaliikara kurugwamu emisango. Ebindi ndibibamanyisa obu ndiija.

Currently Selected:

1 Abakor 11: BRR2008

Highlight

Copy