1 Byok 22
22
Ekibanja eky'Enju ya MUKAMA
1Hanyuma Daudi nubwo yagambire ati: “Hanu nuho haraabaga Enju ya MUKAMA Ruhanga, kandi nuho haraabaga itambiro, Abaisirairi eri baraahongerahoga ebihongwa.”
2Daudi yaragira kusorooza abanyamahanga boona abakaba bali omunsi ya Isirairi, yataho abatemi b'amabaale bateekanize amabaale agabaizirwe ag'okwombeka Enju ya Ruhanga. 3Kandi yaleeta ebyoma bingi eby'okukoramu emisumaali ey'enyigi ez'amalembo, n'ebyoma eby'okubohesa ebintu, oteho n'omulinga omwingi muno ogutasobora kulengwa, 4n'embaaho ez'emiti emikogoto ezitarukubarwa; habwokuba Abasidoni n'Abataya, bakaleetera Daudi emikogoto nyingi muno. 5Habwokuba Daudi akagamba ati: “Solomooni mutabani wange muto, kandi taina eki amanyire kandi Enju ey'okwombekerwa MUKAMA, kigihikiriire ebe y'ekitiinisa kingi muno ekihinguraine, endanganwa kandi ey'ekitiinisa, omunsi zoona; habweki, ninyowe nsemeriire kugiteekaniriza ebintu eby'okugikora.” Daudi obu akaba atakafiire, nukwo kuteekaniza ebintu bingi.
6Hanyuma yayeta mutabani we Solomooni, yamuragira kwombekera MUKAMA Ruhanga wa Isirairi Enju. 7#2 Sam 7:1-16; 1 Byok 17:1-14.Daudi yagambira Solomooni ati, “Mwana wange, nkagonza kwombeka Enju, habw'ekitiinisa kya MUKAMA Ruhanga wange. 8Baitu MUKAMA akangambira ati, ‘okaseesa esagama nyingi, kandi okarwana amalemu maingi; tolinyombekera Enju, habwokuba, okaseesa omunsi esagama nyingi, omumaiso gange. 9Olizaara omwana; omwana ogu, aliba muntu w'obusinge, ndimuha obusinge mmwiheho abanyanzigwa be boona abamwehinguliriize; habwokuba ibara lye alyetwa Solomooni,#22:9 Ibara Solomooni mu Ruhebburrayo limanyisa, obusinge n'okugwagwana kandi omubusinge bwe, ndiha Isirairi obusinge n'ekihuumuro. 10Ogu nuwe alinyombekera Enju. Aliba mwana wange, na nyowe mbe ise, ebiro byona; ndigumyaho ekitebe eky'obukama bwe omu Isirairi;’ 11hati nu mwana wange, MUKAMA abe na iwe, kandi nkooku yakikugambireho akusoboze kwombekera MUKAMA Ruhanga wawe Enju. 12Kyonka, akuhe obwegendereza n'amagezi, obu alikuha kulema Isirairi, nukwo ogireme noogendera ha biragiro bye. 13#Yos 1:6-9.Obu olitaho omutima kukwata ebiragiro n'ebigambo, MUKAMA ebi yaragiire Musa kwegesa Isirairi, nubwo olitunga omugisa. Obe w'amaani kandi ogume. Otatiina kandi otaterebuka, 14nkekamba muno, n'atunga tani z'etalanta ez'ezaabbu emitwaro ikumi akakaikuru kamu, n'efeeza ezirukukira, omulinga n'ebyoma ebitarukubarwa habwokuba, ekatwara ebintu bingi muno; kandi nkaleeta embaaho n'ebyoma, hali ebi nuho oyongere. 15Oina enkuyanja y'abakozi: Abatemi b'amabaale, abagombekesa, abasazi b'embaaho n'abakozi aba buli mulingo abamanyire muno emirimo y'engaro, 16abatarukubarwa, abafundi omu kukoza ezaabbu, efeeza, omulinga n'ebyoma. Imuka otandike omulimo! MUKAMA akukonyere.”
17Daudi, kandi akaragira abeebembezi ba Isirairi boona bakonyere mutabani we Solomooni naagamba ati, 18“MUKAMA Ruhanga wanyu tali na inywe? Tabahaire obusinge orubaju n'orubaju? Habwokuba, abasi b'ensi enu, akabanta omungaro; ensi enu ejeemukire, hati ya MUKAMA kandi y'abantu be. 19Hati nu ebiteekerezo byanyu n'emitima yanyu, mubite ha kuserra MUKAMA Ruhanga wanyu, Mwimuke mwombekere MUKAMA Ruhanga ekiikaro ekirukwera, Esanduuko ey'Endagaano ya MUKAMA, n'ebikwato bya Ruhanga ebirukwera, nukwo biretwe bitaahibwe omunju eyayombekiirwe ibara lya MUKAMA.”
Currently Selected:
1 Byok 22: BRR2008
Highlight
Share
Copy
Want to have your highlights saved across all your devices? Sign up or sign in
Bible in Runyoro/Rutooro Interconfessional Translation © Bible Society of Uganda, 2008.
