1 Byok 19
19
Okusingurwa kw'Abamooni n'Abasiriya
1Ebi obu byahoire, Nahasi omukama w'Abamooni yafa, omutabani Hanuni yajuumura engoma. 2Daudi yagamba ati, “Ndikorra Hanuni mutabani wa Nahasi eby'embabazi, nka ise oku yankoliire eby'embabazi.” Nukwo kumutumaho abakwenda naamumanyisa nkooku asaaliirwe kuhurra nkooku afeerirwe ise. 3Baitu abanyoro Abamooni baakaguza Hanuni bati: “Daudi noobu araaba atumire abantu ab'okukwirukirra, nootekereza naatamu sso ekitiinisa? Nangwa tikiri eki, ekireesire abaheereza be hali iwe, nukwo kutata, okujuumika, n'okwetegereza ensi enu.” 4Hanuni nukwo kukwata abaheereza ba Daudi, yabamwa omuleju, ebijwaro byabo yabisarra hagati nahagati nk'omu nyugunyu, yababinga; baagenda. 5Daudi obu baamugambiire ekigweriire abantu be, yatuma babaitirane, habwokuba, ensoni zikaba ziri z'okubaita. Omukama yabagambira ati: “Mwikalege Yeriko, okuhika emireju yanyu obu erikamera, nubwo mugaruke.”
6Abamooni obu baaboine nkooku beenobeseze Daudi, Hanuni n'Abaamooni baatweka ebisembo by'efeeza rukumi, bapangisa ebigaali n'abatembi b'embaraasi baruge Mesopotamiya, Aramu-Maaka na Zobba. 7Bakapangisa ebigaali emitwaro esatu, n'enkumi ibiri, n'omukama wa Maaka n'ihe rye, baija baateera orukande omu maiso ga Medebba. Abamooni bakasoroozibwa baruga omumbuga zaabo, baagenda ha bulemu. 8Daudi obu yakihuliire yatweka Yowabbu, n'ihe ryona rirumu abasaija ab'amaani. 9Abamooni baaturuka, baasimba enkarra ez'obulemu ha irembo ly'orubuga, kandi abakama abakaba baizire kukonyera, baayemerra bonka omu bwerre.
10Yowabbu obu yaboine obulemu nkooku bumuturukire omumaiso n'enyuma, nukwo kukoma abamu omu basaija Abaisirairi abarukukirra kimu oburungi, yabeemereza omu maiso g'Abasiriya; 11abaasigaireho, ha basaija be, yabakwasa owanyina Abisayi, yabasimbisa enkarra omumaiso g'Abamooni. 12Yagamba ati, “Abasiriya obu kakuba barampingurana bakankiza amaani, nubwo murankonyera; kandi Abamooni obu baraabakiza amaani nyowe mbakonyere. 13Mugume, turwanirre abantu baitu masaija, kandi turwanirre embuga za Ruhanga waitu; MUKAMA akole eki arukugonza.” 14Yowabbu n'abantu aba akaba ainabo, nukwo kwirirra Abasiriya bakwatangane; Abasiriya baamwiruka. 15Abamooni obu baaboine Abasiriya nkooku bairukire, nabo nukwo kwiruka Abisayi owanyina Yowabbu, baataaha omurubuga. Hanyuma Yowabbu yagaruka Yerusaalemu.
16Abasiriya obu baaboine Abaisirairi nkooku babasingwire, nukwo kutuma Abakwenda, baihayo Abasiriya, abakaba bali obuseeri bw'ekisaaru Efurati, beebembirwe Sofaki engabwa y'ihe rya Hadadezeeri. 17Eki Daudi obu yakihuliire, yasorooza Abaisirairi boona, yayambuka Yorudaani, yabahikaho yayemereza amahe ge omumaiso gaabo. Daudi obu yasimbire enkarra arwanise Abasiriya, baarwana na uwe. 18Abaisirairi baabinga Abasiriya; Daudi yaita Abasiriya abasaija kasanju abaarwaniraga ha bigaali, abaserikale ab'ebigere emitwaro ena, Sofaki engabwa y'ihe ryabu, na uwe atatabuke. 19Abaheereza ba Hadadezeeri obu baaboine Abaisirairi nkooku babasingwire, baasaba Daudi obusinge, baafoka batungwa be. Abasiriya nukwo kwangira kimu, kugaruka kukoonyera Abamooni.
Currently Selected:
1 Byok 19: BRR2008
Highlight
Share
Copy
Want to have your highlights saved across all your devices? Sign up or sign in
Bible in Runyoro/Rutooro Interconfessional Translation © Bible Society of Uganda, 2008.
