Mat. 9

Kitaŋaleu Yesu ekile ŋolo alilimiyorito ŋakoyo ka akuwan

(Mar. 2:1-12; Luk. 5:17-26)

1Todokak Yesu ataker, tolot nabo ekekwaye toboŋo lotaun keŋ Kaperenaum. 2Kilepuleput ŋituŋa ŋice ekile ŋolo aŋwalit iperikinitoe naperyet keŋ. Ani eanyuni Yesu atemar anupito ikes nooi, tolimok ekaŋwalan tema, “Lokoku, toen etau! Esyoni ŋasecisya kon.” 3Kirworikinos ŋiketatamak a Ŋikisila ŋice alotai kec temasi, “Iyanyi ekile lo Akuj.” 4Nai ikwapei ayenia Yesu ŋuna atamete ikes, tolimok ikes tema, “Kaanukiro itamyata iyes ŋuna aronok alotai kus? 5Nyo epatana, alimokin ekaŋwalan atemar, ‘Esyoni ŋasecisya kon,’ kori atemar, ‘Tonyou torotok’? 6Nai acamit ayoŋ iyes toyenut atemar eyakar Lokoku a Ituŋanan apedor ŋinakisyoniyet ŋasecisya anakwap.” Tolimok iŋes ekaŋwalan tema, “Tonyou, tolema aperyet kon, tolot lore!” 7Tonyou nai ekile ŋol, tolot lore. 8Ani iŋolikinete ŋasepico a ŋituŋa ŋuna apotu totakanut, tobul ikes, kipuro Akuj aŋuna keinakinia ŋituŋa apedor ŋina etya ŋin.

Tonyarau Yesu Matayo

(Mar. 2:13-17; Luk. 5:27-32)

9Torotok Yesu a nen; ani eriŋa elosi alorot, toanyuwa ekile ŋolo anyaritae Matayo iboi anapis a ŋina atacere ocur. Tolimok Yesu iŋes tema, “Kiwuapakinae ayoŋ.” Tonyou Matayo, kiwuapak Yesu.

10Ani eriŋa Yesu imuji alokai, potu ŋikerirak ocur ka ŋikasecak ŋulu alalak; kiboikinos kimuja kaapei ka Yesu ta ŋikeekasyomak. 11Ŋolopite eŋolikiniata Ŋiparisayon ŋun, kiŋita ŋikasyomak a Yesu temasi, “Kaanukiro imujata ekusiketataman kaapei ka ŋikerirak ocur ta ŋikasecak?” 12Ani iirari Yesu ŋakiro kec, toboŋok tema, “Nyiitanito ŋituŋa ŋulu eŋaleete emuron, nai ŋulu edyakasi. 13Toloto toriputu apolou a Ŋakigireta a ŋuna ebasi, ebala Akuj,

‘Acamit ayoŋ akisyon,

meere amuronot.’

Anerae nyabunit ayoŋ anyaraun ŋulu iyookino, nai ŋikasecak.”

Kitatam Yesu ŋuna ka akikany akimuj

(Mar. 2:18-22; Luk. 5:33-39)

14Potu ŋikasyomak a Yoana ke Ekebatisan neni a Yesu, kiŋita iŋes temasi, “Kaanukiro ikikanyanakinia isua ka Ŋiparisayon, nai nyikanyeneneete ŋikonikasyomak?” 15Toboŋok Yesu ikes tema, “Epedorete mono ŋituŋa ŋulu enyaritae lokiitanu akikany eriŋa ekeitan erukito ka ikes a? Nyepedor ŋun! Nai epote ŋirwa ŋulu elemarere ekeitan aneni kec, togeut ikes nai akikany.

16“Emam ituŋanan ŋini epedori adapakin arac ŋina kitete lolou ŋoloŋorot, anerae kedapaki, ecilar arac ŋina kitete, kiyatakin acilat lolou ŋoloŋorot. 17Kori emam ŋituŋa ŋulu etikakinete ewinyiwiny lotwol ŋulu eŋorotonito, ani ketikakis, ebwaŋabwaŋaari ewinyiwiny ŋitwol ŋul, tosodi tobukor ewinyiwiny daŋ. Nai etikanakinio ewinyiwiny lotwol ŋulu kitet, ikotere nyinyasunosi ikes daadaŋ.”

Nakoku a Yairo ka aberu ŋina atapi elou a Yesu

(Mar. 5:21-43; Luk. 8:40-56)

18Ani eriŋa Yesu irworo neni kec, bu ekapolon ŋolo ke esinagoga epei, toryedik alokiŋaren keŋ tema, “Atwana nakoku kaŋ; bua kare ca kidokok ŋakonikan neni keŋ ikotere toyaru iŋes.” 19Tonyout Yesu ka ŋikeekasyomak totupakis iŋes.

20Ayai nen aberu ŋina aleleete ŋaokot ŋikaru ŋitomon ka ŋiarei. Toŋicun iŋes alokaku, totap abilet ŋina ke elou a Yesu. 21Anerae abala iŋes alotau keŋ, “Katap ca ŋolo erae ekeelou daŋ bon, aŋaleuni.” 22Toboboŋ Yesu kiŋolik iŋes tema, “Nakoku, toen etau! Ikitaŋaleu iyoŋ anupit kon.” Toŋaleu aberu ŋin apaki ŋinapei ŋin.

23Ani edoluni Yesu kai ŋina ke ekapolon a ŋolo ke esinagoga, toryamu iguryakina ŋikaeok ŋulu akusete ŋapilui ka ŋituŋa ŋulu aponito akinuk ikoku. 24Tolimok Yesu ŋituŋa tema, “Toloto, anerae nyetwanit apese, nai ejotoe.” Tokyenatar ŋituŋa iŋes. 25Nai ani kitolomar ŋituŋa kiŋa, toloma Yesu nagule ŋina ka apese, kikam akeekan, tonyou apese. 26Tokeikin ŋakiro ŋun akwap ŋin daadaŋ.

Kitaŋaleu Yesu ŋimudukanotin ŋiarei

27Ani erotokini Yesu a nen, totupakis iŋes ŋikilyok ŋiarei ŋulu amudukaka iworoete ebasi, “Lokoku a Daudi! Kisyoni isua.” 28Ani elomari iŋes kai, potu ŋimudukanotin ŋul neni keŋ; kiŋit Yesu ikes tema, “Inupito iyes atemar apedori ayoŋ akitaŋaleun iyes a?” Toboŋokis ikes temasi, “Ee Ekapolon!” 29Totap nai Yesu ŋakecekonyen tema, “Kitiyakin neni kus ikwaŋina inupitotor.” 30Toŋaleut ŋakecekonyen. Kicik nai Yesu ikes nooi tema, “Nyilimokis idiotuŋanan nu.” 31Nai apotu ikes toloto kielasi ŋakiro ŋuna etiyae Yesu nakwap ŋin daadaŋ.

Kitaŋaleu Yesu ekile ŋolo pa erworo

32Ani erotokinete ŋikilyok ŋul, yaut ŋituŋa neni a Yesu ekile ŋolo pa erworo, anerae ekamunito ŋipyan. 33Ŋinapei eritarere ŋipyan, togeu ekile erwor; toumokis ŋituŋa daadaŋ temasi, “Nyeanyuna ŋinapei koloŋ ŋakiro ŋuna ikote nu alo Isirael!” 34Nai temasi Ŋiparisayon, “Iritanari iŋes ŋipyan, anerae erae ŋolo epolokinit ŋipyan einakinit iŋes apedor ŋina kiritanaret ikes.”

Kisyonioto Yesu ŋituŋa

35Tolot Yesu lotaunio ka lorerya itatami ŋituŋa alosinagogae; tolimonokini ikes Ŋakiro ŋuna Ajokak ŋuna ka Apukan a ŋina anakuj. Kitaŋaleununu ŋituŋa alodekesyo a daadaŋ ka tolema apalagu daadaŋ. 36Ani iŋolikini Yesu ŋasepico, kisyonioto iŋes, anerae eyaloloŋete ikes ka topapanunito ikwa ŋamesekin ŋuna emam ekeyokon. 37Tolimok nai iŋes ŋikasyomak keŋ tema, “Elal akilem, nai ekudyoko ŋikalemak. 38Aŋun, kilipa elope ŋolo ka akilem kiyakiya ŋikalemak ŋulu alalak nakilem keŋ.”

Currently Selected:

Mat. 9: NIB2008

Highlight

Copy