Mat. 8
8
Kitaŋaleu Yesu ekile ŋolo ka atapon
(Mar. 1:40-45; Luk. 5:12-16)
1Ani edokuni Yesu alomukura, kiwuapakis ŋasepico ŋuna alalak iŋes. 2Bu ekile ŋolo ka atapon, toryedik alokiŋaren keŋ tema, “Ekapolon, ani kicamit iyoŋ, ipedori akitaŋaleun.” 3Torwaa Yesu akan keŋ, totap iŋes tema, “Acamit; toŋaleu!” Atipei toŋaleu ekile ŋol. 4Kicik Yesu iŋes tema, “Nyilimok idiotuŋanan, nai tolot kitoodiyar neni ka esacaradoti, ikisyem iŋes iyoŋ, ido tolemu ainakinet ikwaŋina icikakinitor Moses, ikotere toanyunia ŋinituŋanan atemar isegu iyoŋ.”
Kitaŋaleu Yesu eketiyan ŋolo ke ekapolokiniton ŋasigarya amiat
(Luk. 7:1-10)
5Ani elomari Yesu Kaperenaum, bu ekapolokiniton ŋasigarya amiat kisiryam iŋes, todyek tema, 6“Ekapolon, eperi eketiyan kaŋ alore ka eryeba nooi.” 7Tolimok Yesu iŋes tema, “Abuni ayoŋ akitaŋaleun iŋes.” 8Nai toboŋok ekapolokiniton ŋasigarya tema, “Ekapolon, eketimit ayoŋ abunore iyoŋ kai kaŋ, nai tolimu iyoŋ akirot, eŋaleuni eketiyan kaŋ. 9Ayoŋ daŋ ekepukatae, nabo apolokinit ayoŋ daŋ ŋasigarya; ani katema ayoŋ epei, ‘Ape!’ elosi. Ani katema ece, ‘Bua!’ ebuni. Tari epito kaŋ katema ayoŋ, ‘Kitiya nu!’ itiyae.” 10Ŋolopite eirarya Yesu ŋakiro keŋ, toumok. Tolimok ŋituŋa ŋulu ewuapito iŋes tema, “Akalimokini ayoŋ iyes kire atemar, nyeryamuna ayoŋ anupit ŋina epol ikwa naga tari alo Isirael. 11Akalimokini ayoŋ iyes atemar, epote ŋituŋa ŋulu alalak alo Kide ka ŋice alo To, kiboikinos kimuja ka Aburaam, Isaka ka Yakobo kaapei a Napukan a ŋina anakuj. 12Nai ŋituŋa ŋulu emaikina toya Napukan, ecakakinio ikes nakiryonut, kigworo toryeba ŋikyal a nen.” 13Tolimok Yesu ekapolokiniton ŋasigarya tema, “Ape lore, itiyakin ŋuna inupit iyoŋ neni kon.” Toŋaleu eketiyan ŋolo ke ekapolon a ŋol ŋinapeipaki.
Kitaŋaleu Yesu ŋituŋa ŋulu alalak
(Mar. 1:29-34; Luk. 4:38-41)
14Ani elomari Yesu kai a Petero, toanyua nakamuran a Petero eperi ikamunit elekes nooi. 15Totap Yesu akan keŋ, toesik elekes iŋes; tosodi aberu tonyou, kisyak akisimuj iŋes.
16Ani eboŋ, yaut ŋituŋa neni a Yesu ŋituŋa ŋulu alalak ŋulu ekamunito ŋipyan, ido kirita Yesu ŋipyan ŋul ka akirot a ŋina alimuni iŋes, nabo kitaŋaleu ŋulu adyakasi daadaŋ. 17Etiyae iŋes ŋun, ikotere kiyookinotor ŋuna koloŋ erworo ekadwaran Isaya ebala,
“Abu iŋes ya apalagu yok
ka kiwok ŋidekesyo yok.”
Ŋituŋa ŋulu adikino eruworosi ŋikewuapak a Yesu
(Luk. 9:57-62)
18Ani iŋolikini Yesu ŋasepico a ŋituŋa ŋuna alalak irimokinito iŋes kidiŋ, tolimok ŋikeekasyomak alosit ekekwaye anam. 19Bu eketataman a Ŋikisila neni a Yesu tema, “Eketataman, ekewuapi ayoŋ iyoŋ neni ilosi daadaŋ.” 20Toboŋok Yesu iŋes tema, “Eyakatar ŋikweei ŋaduyon ka eyakatar ŋikyeny ŋakais; nai emam Lokoku a Ituŋanan neni kieŋunet.”
21Tema ekile ece ŋolo arae ekasyoman keŋ ebe, “Ekapolon, kimyekinae mono olot akinuk papa kaŋ.” 22Toboŋok Yesu iŋes tema, “Kiwuapakinae ayoŋ, kimyek ŋikatwak tonuka ŋikatwak kec.”
Kitidipok Yesu ekuwuam ŋolo apolon
(Mar. 4:35-41; Luk. 8:22-25)
23Ani edokari Yesu nataker, kiwuapakis ŋikasyomak keŋ iŋes. 24Ŋinapeipaki, tokut ekuwuam ŋolo apolon ananam, todikino ŋakipi ŋuna emorokokoete erapuwarete ataker. Nai ajotoe Yesu. 25Kiyotosi ŋikasyomak neni keŋ, kitekienyut iŋes temasi, “Ekapolon! Toiunae, edikino ikitwaki.” 26Toboŋok Yesu ikes tema, “Nyo ikibulitor iyes ikona? Abe edit anupit kus!” Tonyou nai Yesu, kikilyak ekuwuam ka ŋakipi, kililiŋ akwap cek. 27Toumokis ŋituŋa daadaŋ temasi, “Anituŋanan ŋini ikoni ne, ŋini epupete tari ekuwuam ka ŋakipi en?”
Kitaŋaleu Yesu ŋikilyok ŋiarei ŋulu ekamunito ŋipyan
(Mar. 5:1-20; Luk. 8:26-39)
28Ani edokari Yesu ekekwaye anam, nakwap ŋina a Ŋigadara, kiryamunos iŋes ka ŋikilyok ŋiarei ŋulu apote analyalin ŋulu ekamunito ŋipyan. Etededeŋito ŋipyan ikes nooi. Aŋun, amam ituŋanan etorenene lorot ŋol. 29Kiworout ŋikilyok ŋul temasi, “Anukiro eya iyoŋ ka isua, Lokoku ka Akuj? Ibunit iyoŋ amunyar isua eriŋa apaki nyedolo a?” 30Aapi a nen esipan ŋolo a ŋipegei ŋolo adaka. 31Kimaimaa ŋipyan Yesu temasi, “Ani kicamit iyoŋ akiritar isua, kiritarae losipan ye ŋolo a ŋipegei.” 32Tolimok Yesu ikes tema, “Apesi!” Tolomut ŋipyan alokilyok a ŋul, tolomasi lopegei. Tosuro esipan a ŋipegei daadaŋ anakope toloma nanam, kitamat, totwaka. 33Toema ŋikeyokok ŋulu a ŋipegei nariet, toloto lotaun tolimosi ŋakiro daadaŋ ŋuna apotu totakanikis lopegei ka lokilyok ŋulu ekamunito ŋipyan. 34Tolot nai etaun daadaŋ akisiryam Yesu. Ani eanyuwarete ikes iŋes, todyeka iŋes arotokin anakwap kec.
Currently Selected:
Mat. 8: NIB2008
Highlight
Share
Copy
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.
