Mat. 4

Kitem Satan Yesu analoŋisat

(Mar. 1:12-13; Luk. 4:1-13)

1Ya nai Etau ŋolo ka Akuj Yesu nalongisat, ikotere itemi Satan iŋes. 2Kiriya Yesu eronit ŋapaarasya ka ŋakuwarisya ŋatomoniomwon, ani ekaku tonyam akoro. 3Bu eketemon neni keŋ tema, “Ani kirae iyoŋ Lokoku ka Akuj, kituluwo ŋamoru nu toruworos akimuj.”

4Toboŋok Yesu iŋes tema, “Igiritae Nakigireta ebe,

‘Nyeyari ituŋanan ka akimuj bon,

nai ka akirot a daadaŋ a ŋina

elomunit anakituk ka Akuj.’ ”

5Ya Satan Yesu Yerusalem, lotaun ŋolo ka Akuj, kitowuo iŋes alobibiru a ŋolo ka Akai ka Akuj, 6tolimok iŋes tema, “Ani kirae iyoŋ Lokoku ka Akuj, kimasar kwap, anerae igiritae Nakigireta ebe,

‘Icikakini Akuj ŋimalaikan keŋ akiyok iyoŋ;

igiritae nabo daŋ atemar,

ikigagaunete iyoŋ a ŋakan kec,

ikotere nyewan amoru tari ŋakejen kon.’ ”

7Toboŋok Yesu iŋes tema, “Igiritae nabo ebe,

‘Nyitem Ekapolon Akuj kon.’ ”

8Ya nabo Satan Yesu lomoru ŋoloti aoyan, kitoodik iŋes ŋibukui daadaŋ ŋulu ka akwap ka ekecebari daadaŋ, 9ido tolimok Satan iŋes tema, “Ani kiryedik iyoŋ alokiŋaren kaŋ ikitopoloo ayoŋ, akajalakini ayoŋ iyoŋ ŋiboro ki daadaŋ.”

10Tosodi toboŋok Yesu iŋes tema, “Satan tolot! Anerae igiritae Nakigireta ebe,

‘Iryediki iyoŋ kitopoloo Ekapolon Akuj kon,

kitiyanak iŋes bon!’ ”

11Torotok nai Satan aneni a Yesu, tosodi potu ŋimalaikan ŋulu ka Akuj kiŋarakis iŋes.

Kisyak Yesu etic keŋ anakwap a ŋina a Galileya

(Mar. 1:14-15; Luk. 4:14-15)

12Ani iirari Yesu atemar kikamar Yoana mabus, tori, tolot Galileya. 13Toesik iŋes Nasaret, tolot akiboi alotaun a ŋolo a Kaperenaum a ŋolo alodiyete anam Galileya, nakwap ŋina a Sebulon ka Naputali. 14Atakanunete ŋun ikotere kiyookinotor ŋuna erworit ekadwaran Isaya ebala,

15“Akwap ŋina a Sebulon ka akwap ŋina a Naputali,

ŋuna iyakasi lorot ŋolo eteni nanam ekekwaye Yorodan,

Galileya, akwap a ŋituŋa a ŋulu nyerae Ŋiyudayan!

16Aanyuwasi ŋituŋa ŋulu eboiyete anakiryonut

akica ŋina apolon,

tari ŋulu eboiyete alotorube a ŋolo ka atwanare,

enuaku akica ikes.”

17Ŋinapei ŋina, kisyak Yesu alimonokin ebala, “Kibelekinos anasecisya kus, anerae aapuu Apukan ŋina anakuj.”

Tonyara Yesu ŋikasyomak ŋulu esyaunak

(Mar. 1:16-20; Luk. 5:1-11)

18Ani itori Yesu diye anam ŋina a Galileya, kiŋolik ŋikaitotoi ŋiarei, Simoni (ŋolo anyaritae Petero) ka lokaato keŋ Anderia, ecakakinete ŋatibae nanam, anerae arae ikes ŋikekamak ŋikolya. 19Tolimok Yesu ikes tema, “Kiwuapakinae ayoŋ, eketuruwori ayoŋ iyes ŋikekamak ŋituŋa.” 20Kimyekis ikes ŋatibae kec atipei, kiwuapakis iŋes.

21Ani erotokini a nen, kiŋolik ŋikaitotoi ŋice ŋiarei, Yakobo ka Yoana, ŋidwe a Sebedeo; arukito ikes ka papa kec anatuba erucete ŋatibae kec. Tonyara Yesu ikes. 22Kimyekis ikes atipei atuba ka papa kec, kiwuapakis Yesu.

Kitatam Yesu ka kitaŋaleununu ŋituŋa

(Luk. 6:17-19)

23Tolot Yesu kirimo Galileya daadaŋ itatami alosinagogae kec ka tolimonokini Ŋakiro ŋuna Ajokak ŋuna ka Apukan ka Akuj, kitaŋaleununuye ŋituŋa alodekesyo a daadaŋ. 24Tokeikin ŋakiro keŋ nakwap a Siria daadaŋ. Yaut ŋituŋa neni keŋ ŋikadyakak daadaŋ ŋulu adyakasi ŋidekesyo ŋulu agelegelya: ŋulu ekamunito ŋipyan, ŋulu erakanarosi ka ŋulu aŋwalak, kitaŋaleu Yesu ikes daadaŋ. 25Kiwuapakis ŋasepico a ŋituŋa ŋuna alalak Yesu, ŋuna aponito alo Galileya, alo Dekapoli, alo Yerusalem, alo Yudaya ka alokekwaye aŋolol Yorodan.

Currently Selected:

Mat. 4: NIB2008

Highlight

Copy