Mat. 3
3
Alimonokin a Yoana ke Ekebatisan
(Mar. 1:1-8; Luk. 3:1-18; Yoa. 1:19-28)
1Alorwa a ŋul, bu Yoana Ekebatisan tolimonok analoŋisat a ŋina a Yudaya 2ebala, “Kibelekinos anasecisya kus, anerae aapuu Apukan ŋina anakuj!” 3Anerae iŋes erworitor ekadwaran Isaya ebala,
“Iworoe etoil a ituŋanan a ice analoŋisat ebala,
‘Kitemonokisi erot ŋolo ke Ekapolon;
kisidiiryata ŋirotin keŋ!’”
4Anapit Yoana elou ŋolo etiyaunitae a ŋajul a ŋuna ke ekaal, tonapite arokoba anacir keŋ, kimuji emaase ka ao analoŋisat. 5Toloto ŋituŋa ŋulu alo Yerusalem, Yudaya, ŋulu ka akwap a ŋina a Yorodan neni keŋ, 6ido kibatisa Yoana ikes anaŋolol alo Yorodan kedaut alimonor ŋasecisya kec.
7Ani iŋolikini Yoana Ŋiparisayon ka Ŋisadukayon ŋulu alalak eponito neni keŋ akibatisao, tolimok ikes tema, “Iyes ŋulu iroko ŋulu ikote ŋapomia, ŋae ikilimokini iyes atemar ipedorete abucar ananyunyura a ŋina ebunit a ŋina ka Akuj? 8Kitiyata ŋiticisyo ŋulu itoodiunete atemar ikiwa iyes kire ŋasecisya kus. 9Nyitamete alotai kus atemar, ‘Erae Aburaam papa kosi.’ Akalimokini ayoŋ iyes atemar, epedori Akuj akilocokin ŋamoru nu toruworos ŋidwe ŋulu ka Aburaam! 10Edikino aep iteli ŋikito anataagor; ekitoe daadaŋ ŋolo nyeraii ŋaraito ŋuna ajokak, itelunio tocakakinae nakim.
11“Kire ekebatisae ayoŋ iyes a ŋakipi a ŋuna ka akiki, nai ŋolo ebunit alokaku kaŋ, epol iŋes akilo ayoŋ, nyitemokino ayoŋ akikod tari ŋamuk keŋ. Iŋes ikibatisae iyes a Etau a ŋolo Asegan ka akim. 12Eyakar iŋes nakan keŋ erite ikotere epyetarya ŋikeemomwa ejok analos, tocunak lodulae keŋ, kicunyak nai ŋatunyeny anakim a ŋina nyeduŋe.”
Akibatisao a Yesu
(Mar. 1:9-11; Luk. 3:21-22)
13Bu Yesu alo Galileya tari Yorodan akibatisao aneni a Yoana. 14Adikino Yoana ewouni aŋuna abaakar, “Arae ayoŋ etemokino kibatisa iyoŋ, nai ibu iyoŋ neni kaŋ!”
15Nai toboŋok Yesu iŋes tema, “Kimyek kitiyakin ikona tokona. Anerae erae epite lo iŋes ikisiyookinio iwon ŋuna ecamit Akuj daadaŋ.” Kimyek nai iŋes kitiyakin.
16Ani kedaun Yesu akibatis, todoku iŋes anakipi tosodi toŋaari nakuj, kiŋolik iŋes Etau ŋolo ka Akuj ebuni alokidiama ikoni akuri, todo neni keŋ. 17Kiirarae etoil anakuj ebala, “Erae lo Lokoku kaŋ ŋolo minat, alelyani ayoŋ nooi aŋuna keŋ.”
Currently Selected:
Mat. 3: NIB2008
Highlight
Share
Copy
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.
