Mat. 27

Torikoroe Yesu neni a Pilato

(Mar. 15:1; Luk. 23:1-2; Yoa. 18:28-32)

1Ani taparacu eriŋa akwap elilim, apotu ŋisacaradotin ŋulu apolok daadaŋ ka ŋikatukok totukut epite ŋoloaret Yesu. 2Toena ikes iŋes torikosi inakis Pilato ŋolo awuoikinit apukan ŋina a Roma alo Yudaya.

Atwanare a Yuda

(Ŋitic. 1:18-19)

3Ani eanyuni Yuda ŋolo alukinon atemar atubokin Yesu atwanare, toronikis ŋuna kebu iŋes kitiya, tosodi kinyaka ŋisilipae ŋulutomoniuni neni a ŋisacaradotin a ŋulu apolok ka ŋikatukok 4ebala, “Asec ayoŋ aŋuna apwakakinia ekile ŋolo nyesecit atwanare.”

Toboŋokis ikes temasi, “Erae ŋun ŋuna kon. Emam ŋuna ikikamunito isua a nen!”

5Kimasak Yuda ŋisilipae Kai ka Akuj, toloma kiŋa; tolot nariet tomyedakin.

6Kideput ŋisacaradotin ŋulu apolok ŋisilipae ŋul temasi, “Italeo a lokisila yok akiwuakin ŋisilipae lu neni iŋadao ŋulu ka Akai ka Akuj, anerae erae ŋisilipae lu ŋulu a ŋaokot.” 7Tocamut ikes atemar togyelere ŋisilipae ŋul emanikor ŋolo ke ekayan ŋamoti, tonukanakinetei ŋalyalin ŋuna a ŋituŋa a ŋulu nyerae Ŋiyudayan. 8Aŋun, iŋes eriŋa enyaritere emanikor ŋol, “Emanikor a Ŋaokot” tari tokona.

9Kiyookin nai ŋakiro ŋuna koloŋ adwarit ekadwaran Yeremiya ebala, “Tolemut ikes ŋisilipae ŋatomoniuni, ebei keŋ ŋolo atubokinito ŋituŋa a Isirael 10ka inakinae ikes togyeluniata emanikor ŋolo ke ekayan ŋamoti, ikwapei ekecikakinitor Ekapolon ayoŋ.”

Yesu alokiŋaren Pilato

(Mar. 15:2-5; Luk. 23:3-5; Yoa. 18:33-38)

11Towo Yesu alokiŋaren Pilato, a ŋolo abu kiŋit iŋes tema, “Irae iyoŋ erwosit a Ŋiyudayan a?” Toboŋok Yesu tema, “Ilimu iyoŋ.” 12Nai nyeboŋok ŋakiro ŋuna esitakinitotor ŋisacaradotin ŋulu apolok ka ŋikatukok iŋes. 13Tolimok nai Pilato iŋes tema, “Nyipupi iyoŋ ŋakiro ŋuna ikisitakinitere iyoŋ a?” 14Nai nyeboŋok iŋes tari apeikirot. Aŋun, toumok Pilato nooi.

Totubokinae Yesu atwanare

(Mar. 15:6-15; Luk. 23:13-25; Yoa. 18:39-40, 19:1-16)

15Anasuban a daadaŋ a ŋuna a Paska, alacanakini Pilato emabus epei ŋolo acamito ŋituŋa. 16Ayai nai nen ekeworon ŋolo ayai mabus ŋolo anyaritae Baraba.

17Ani kedaut ŋituŋa acunakin, kiŋit Pilato ikes tema, “Ŋae icamito iyes olacak ayoŋ aŋuna kus, Baraba kori Yesu ŋolo enyaritae Kristo?” 18Anerae ayeni iŋes atemar arikunito ikes Yesu neni keŋ aŋuna ka arakaanut kec.

19Ani eriŋa Pilato iboi alokicoloŋ a ŋolo etubonokinere, kiyaku aberu keŋ ŋakiro nu neni keŋ: “Nyiloma nakiro ŋuna ke ekile a ŋol, a ŋolo iyookino! Anerae ekecanito ayoŋ ŋakiro ŋuna bien nakwaare erujat ayoŋ aŋuna keŋ.”

20Apotu ŋisacaradotin ŋulu apolok ka ŋikatukok kitutuko ŋituŋa, tolimokis Pilato tolacak Baraba, ido toarae Yesu. 21Kiŋit nabo Pilato ikes tema, “Ŋae alokidiŋ ŋuluarei lugu icamito iyes ayoŋ olacak aŋuna kus?” Toboŋokis ikes temasi, “Baraba!”

22Kiŋit Pilato ikes tema, “Ekokini nai ayoŋ Yesu ŋolo enyaritae Kristo ai?” Toboŋokis ikes daadaŋ temasi, “Kibubuk iŋes lomusalaba!”

23Kiŋit Pilato ikes tema, “Anironis itiyat iŋes?” Tocelut ikes nooi ebasi, “Kibubukinoe iŋes!”

24Ani eanyuni Pilato atemar, agogoŋioto ŋakiro nooi, aŋuna ageunia aruruma, tolemu ŋakipi kilota ŋakan keŋ alokiŋaren ŋituŋa tema, “Nyekekamunito ayoŋ ŋuna ka atwanare ke ekile a lo! Erae ŋun ŋuna kus!” 25Toboŋokis ikes daadaŋ temasi, “Kimyekisi ŋaokot keŋ pena nakyes kosi ka ŋuna a ŋikosidwe.” 26Tolacak nai Pilato Baraba aŋuna kec, kimyek iŋes Yesu kibuŋae, kipoto nai kibubukinoe lomusalaba.

Tokyenatar ŋisigarya Yesu

(Mar. 15:16-20; Yoa. 19:2-3)

27Yaasi ŋisigarya ŋulu a Pilato Yesu tooma kai ŋina ke ekawuoikiniton ekepukan a Roma anakwap a ŋin, tocunun ŋisigarya daadaŋ kirimokis Yesu kidiŋ. 28Tolaca iŋes, kitanapa elou ŋolo kipurat areŋan. 29Toyeut nai aikit ŋina a ŋikukwa kiwuakis nakou keŋ, kiwuakis akasirimaete daŋ nakan keŋ ŋina aloteten; toryediko nai alokiŋaren keŋ tokyenatar iŋes ebasi, “Maata erwosit a Ŋiyudayan!” 30Kimwaanakis ikes iŋes, tolemasi akasirimaete toramiata iŋes nakou. 31Ani kedaut ikes akyenar iŋes, tolacasi elou ŋolo kipurat areŋan kitanapa ŋilowi keŋ, yaasi iŋes akibubukin lomusalaba.

Kibubukinoe Yesu lomusalaba

(Mar. 15:21-32; Luk. 23:26-43; Yoa. 19:17-27)

32Ani elomarete ikes kiŋa etaun, toryamut ecekile ŋolo abunit alo Kurene, ŋolo anyaritae Simoni, kitiŋakis iŋes akiryoŋ emusalaba a Yesu. 33Ani edolete ikes nakwap ŋina anyaritae Gologota, (akeepolou iŋes atemar akwap ŋina ka akuulu,) 34inakis ikes Yesu epiini ŋolo emorikinitae ka apid; ani iiri iŋes, towou akimat.

35Kibubukis ikes iŋes lomusalaba, tokora ŋikeelowi ilamilamete atedor ŋini eai. 36Kidoŋo ikes neni iboiyete iteete iŋes. 37Egiritae kidiama akeekou ŋakiro ŋuna esitakinere iŋes ikona, “ERAE LOGO YESU ERWOSIT A ŊIYUDAYAN.” 38Ekaku kibubukinoe ŋikokolak ŋice ŋiarei daŋ, epei teten keŋ ka ŋoloce kedyany.

39Kimuŋumuŋa ŋulu etorunete nen ŋakyes kec iyanyete iŋes 40ebasi, “Okoe! Iyoŋ ŋoon ibala ituwori Akai ka Akuj, ido todukok nabo alotooma ŋirwa ŋiuni! Toiun cenite kirae iyoŋ Lokoku ka Akuj! Todoku alomusalaba!”

41Ŋisacaradotin daŋ ŋulu apolok ka ŋiketatamak a Ŋikisila ta ŋikatukok tokyenatar iŋes ebasi, 42“Aiununui iŋes paaran ŋituŋa ŋuluce, nai tokona nyeiun iŋes bon! Nyerae mono iŋes erwosit a Ŋisirael a? Ani kedoku iŋes alomusalaba, ikinupi iwon iŋes. 43Ikinyomit iŋes Akuj, toesikisi toiu Akuj iŋes tokona erae kemina iŋes, anerae ebala, ‘Arae ayoŋ Lokoku ka Akuj.’ ” 44Ŋikokolak daŋ ŋulu ebubukinitoe ka iŋes, kiyanya iŋes alopite a ŋolopei.

Atwanare a Yesu

(Mar. 15:33-41; Luk. 23:44-49; Yoa. 19:28-30)

45Ameun alosaa a ŋolo a ŋikanikapei tari losaa ŋolo a ŋikanikaomwon ŋulu ka apaaran, kiryoniar akwap daadaŋ cuc. 46Ani edoli ŋisaae ŋikanikaomwon, kikalou Yesu nooi tema, “Eli, Eli, lema sabakasani?” Apolou keŋ atemar, “Akuj kaŋ, Akuj kaŋ, kaanukiro ikiesikinia iyoŋ ayoŋ?” 47Ani iirarete ŋituŋa ŋice ŋulu awuasi a nen temasi, “Enyarit iŋes Eliya.” 48Toem atipei epei alokidiŋ kec tolemu ibore ŋini ekwaan ka acaago, kilumok lopiini ŋolo adadaŋ, toenik nakasirimaete inak iŋes kijuju. 49Nai temasi ŋuluce, “Kidareu mono eteutu erae kebuni Eliya aiun iŋes!” 50Kiworou nabo Yesu ke etoil a ŋolo apolon, kiridak nai.

51Tocila anaŋga ŋina eneno alo Kai ka Akuj beret ageun alokidiama tari kwap. Tomaranik akwap tobwaŋabwaŋas ŋamoru. 52Toŋaaros ŋalyalin toyarut ŋawat a ŋikanupak a ŋulu atwakito. 53Torotokis ikes analyalin keyaru Yesu alokatwak, toloto Yerusalem toanyuwasi ŋituŋa ŋulu alalak ikes a nen.

54Ani eanyuni ekapolokiniton a ŋisigarya kaapei ka ŋisigarya keŋ epite ŋolo amaranikinia akwap ka ŋakiro daadaŋ ŋuna etiyasi, tobul ikes nooi temasi, “Kire, kerae iŋes Lokoku ka Akuj!”

55Ayakasi nen ŋaberu ŋuna alalak ŋuna eteete aneni alwanan ŋuna etiyasi. Atupunete ikes iŋes alo Galileya kiŋaranakinete. 56Arae ikes Maria Magadalena ka Maria toto a Yakobo ka Yosepu ta toto a ŋidwe a Sebedeo.

Tonukae akuwan a Yesu

(Mar. 15:42-47; Luk. 23:50-56; Yoa. 19:38-42)

57Ani edoli eboŋ, bu ekile ŋolo abarit ŋolo anyaritae Yosepu ŋolo anakwap a ŋina ka Arimatea. Arae iŋes daŋ ekasyoman a Yesu. 58Tolot iŋes neni a Pilato, kiŋitak ainakino akuwan a Yesu. Tocamak Pilato atemar inakinae iŋes akuwan a Yesu. 59Tolemu Yosepu akuwan, kilogilogak anaŋga ŋina kitete; 60kiperik nalyal ŋina kitete, ŋina sek abokit iŋes nataaba aŋuna keŋ ke elope. Kikokorik amoru ŋina apolon lopuke ka alyal, torotok nai iŋes. 61Eboiyete Maria Magadalena ka Maria ŋinace a epeiwae alyal.

Ŋisigarya ŋulu eteete alyal

62Ani edoli akoloŋit ŋina a Sabato, totukokin ŋisacaradotin ŋulu apolok ka Ŋiparisayon kiŋaren Pilato 63temasi, “Ekapolon, ikitamunit isua ŋuna abu ekalyokonon ŋol kirwor eriŋa eyari abala, ‘Kelunyar ŋirwa ŋiuni, ayaruni.’ 64Aŋun, tolimok ŋiketeok alyal kidara ejok todol ŋirwa ŋiuni, ikotere nyelot ŋikasyomak keŋ akokoiyar akuwan keŋ, ido ekaku tolimokis ŋituŋa atemar eteyarun iŋes alokatwak. Eroniar alyokonu ŋina ke ekaku akilo ŋina sek ke ekiŋaren.” 65Tolimok Pilato ikes tema, “Iyakatar iyes ŋisigarya ŋulu eteok, kiyakiyasi ikes kiteto alyal ejok lopite ŋolo ipedoryata.”

66Toloto nai ikes togolo alyal ejok kimuleleiyasi, kiwuakis ŋisigarya kiteto.

Currently Selected:

Mat. 27: NIB2008

Highlight

Copy