Mat. 26
26
Totukut ŋituŋa akiar Yesu
(Mar. 14:1-2; Luk. 22:1-2; Yoa. 11:45-53)
1Ani irikakini Yesu akitatam ŋakiro ŋun daadaŋ, tolimok ŋikeekasyomak tema, 2“Iyenete iyes atemar edoŋ ŋirwa ŋiarei todol akoloŋit ŋina a ŋasuban a ŋuna a Paska, ŋina ipotorere Lokoku a Ituŋanan kibubukinoe lomusalaba.”
3Apotu nai ŋisacaradotin ŋulu apolok ka ŋikatukok tocunakinos kai a Kaipa a ŋolo apolokinit ŋisacaradotin; 4tocamunos ikes daadaŋ amodiun Yesu, kikamuniata toara. 5Nai temasi ikes, “Nyikikamu iŋes akoloŋit ŋina a Paska, ikotere nyebu aruruma alotuŋa.”
Kiwosakinae Yesu akimyet alo Betania
(Mar. 14:3-9; Yoa. 12:1-8)
6Ani imuji Yesu alo Betania alokai a Simoni a ŋolo sek adyaka atapon, 7bu neni keŋ aberu ŋina aryoŋit amot ŋina ka Alabasta ŋina ayai akimyet ŋina akukunyon ŋina alal egyelit, tobukok akimyet ŋin nakou a Yesu a ŋolo emuji alomesa apaki ŋin. 8Nai ani iŋolikinete ŋikasyomak keŋ ŋun, toŋoa nooi temasi, “Okoe ebalibal! 9Anerae kerae togyelaritetei akimyet ŋin a ŋisiliŋa a ŋulu alalak, kekorakinitae ŋikulyak.”
10Nai aŋuna ayenia Yesu ŋakiro ŋuna erworosi ikes, kiŋit tema, “Nyo icanitotor iyes aberu na? Kire etiya iŋes etic ŋolo ajokan neni kaŋ! 11Anerae irukito iyes ka ŋikulyak jwi jwi, nai nyikiruki iyes ka ayoŋ jwi jwi. 12Abukoki iŋes akimyet ŋina akukunyon na neni kaŋ akitemonokin anukia akuwan kaŋ. 13Akalimokini ayoŋ iyes kire atemar, neni daadaŋ anakwap itatamere Ŋakiro ŋuna Ajokak nu, elimoryo tari ŋuna etiya aberu na, aŋuna ka atamunitor iŋes.”
Tocamu Yuda alukin Yesu
(Mar. 14:10-11; Luk. 22:3-6)
14Akoloŋit ŋinapei ŋin, tolot epei a ŋulutomon ka ŋiarei ŋolo anyaritae Yuda Isikariot neni a ŋisacaradotin a ŋulu apolok; 15kiŋit ikes tema, “Nyo ikiinakinete iyes ayoŋ, erae kepotu ayoŋ iŋes neni kus?” Tocamut ikes akitac iŋes a ŋisilipae a ŋatomoniuni. 16Anyoun apaki ŋin, kiwar Yuda apaki ŋina etemokino torikorere ikes neni a Yesu.
Kimuja Yesu ka ŋikasyomak keŋ akimuj ŋina a Paska
(Mar. 14:12-21; Luk. 22:7-14, 21-23; Yoa. 13:21-30)
17Akoloŋit ŋina ke ekiŋaren ŋina a ŋasuban a ŋamugati aŋuna emam ŋakinyalet, potu ŋikasyomak a Yesu neni keŋ temasi, “Ai icamit iyoŋ isua etemokinioto akimuj ŋina a Paska?”
18Toboŋok Yesu ikes tema, “Toloto lotaun neni a icetuŋanan, tolimokis iŋes ebe, ‘Ebala Eketataman, adol akaapaki, abuni ayoŋ ka ŋikasyomak kaŋ akinumunum ŋasuban ŋuna a Paska alokai kon.’ ”
19Kitiyata ŋikasyomak keŋ ikwaŋina alimokinitor Yesu ikes, ido kitemokis Paska.
20Ani edoli eboŋ, kiboikin Yesu ka ŋikeekasyomak ŋulutomon ka ŋiarei kimuja. 21Ani eriŋa ikes imujete tolimu iŋes tema, “Akalimokini ayoŋ iyes kire atemar, akalukini ayoŋ epei alokidiŋ kus.” 22Tonomosi ikes ŋakiro ŋun ŋitai nooi, kiŋitiŋita iŋes a ŋipeipei ebasi, “Ekapolon, ayoŋ a?”
23Toboŋok Yesu tema, “Iŋes ŋolo ikimori ka ayoŋ anasaani. 24Etwani Lokoku a Ituŋanan ikwaŋina igiritere Nakigireta aŋuna keŋ, nai eroko nooi ŋakiro ŋuna eryamuni ŋolo ipotori Lokoku a Ituŋanan! Kejoikinit koloŋ ekile ŋol nyidoun!”
25Kiŋit Yuda ekalukinon iŋes tema, “Eketataman, ayoŋ a?” Toboŋok Yesu iŋes tema, “Idau iyoŋ alimun.”
Akimuj ŋina ke Ekapolon
(Mar. 14:22-26; Luk. 22:14-20; 1 Ŋikor. 11:23-25)
26Ani eriŋa ikes imujete, tolemu Yesu amugati, ani kedau akilipakin, tonyilinyili, inak ŋikeekasyomak tema, “Kijaasi, kimuja; erae na akaakuwan.” 27Tolemu nabo ekopo, kitalaka Akuj, inak ikes tema, “Tomata iyes daadaŋ, 28anerae erae nugu ŋaokot kaŋ, ŋaokot ŋuna ka Acamunet, ŋuna ebukoritae ikotere ŋulu alalak isyoniyo ŋasecisya. 29Akalimokini ayoŋ iyes atemar, nyamasi nabo ŋuna ke epiini, mati kedol akoloŋit ŋina ikimasya iwon a Napukan a Papa kaŋ.”
30Toeikis nai ikes eete ŋolo kitalakaret Akuj, ido tolomasi kiŋa, toloto lomoru a ŋikito a ŋulu enyaritae Olipa.
Tolimu Yesu atemar epegi Petero atemar ayeni iŋes
(Mar. 14:27-31; Luk. 22:31-34; Yoa. 13:36-38)
31Tolimok Yesu ŋikasyomak keŋ tema, “Lolo nakwaare, ielarosi iyes daadaŋ ikimyekis ayoŋ. Anerae igiritae Nakigireta ebe, ‘Abuni ayoŋ akibuŋa ekeyokon, kielar nai esipan a ŋamesekin.’ 32Nai kedaun akiteyarun ayoŋ, ekeŋarenikini ayoŋ iyes Galileya.”
33Tolimok Petero Yesu ka agogoŋu tema, “Nyekemyekini ayoŋ iyoŋ jik, tari kikimyekis iyoŋ ŋuluce daadaŋ!”
34Tolimok Yesu iŋes tema, “Akalimokini ayoŋ iyoŋ kire atemar, lolo nakwaare eriŋa ekokoroit nyeruuno, ipegi iyoŋ ŋapeget ŋauni atemar ikiyeni ayoŋ.”
35Tolimok Petero iŋes tema, “Nyapegi ayoŋ jik, tari ketemar akaaryo ayoŋ ka iyoŋ!” Apotu ŋulucekasyomak daadaŋ tolimut ŋunapei ŋun.
Kilip Yesu alo Getesemani
(Mar. 14:32-42; Luk. 22:39-46)
36Toloto nai Yesu ka ŋikasyomak keŋ neni anyaritae Getesemani, tolimok ikes a nen tema, “Kiboikinos nege eriŋa ayoŋ alosit ama akilip.” 37Torukosi iŋes ka Petero ka ŋidwe a Sebedeo ŋuluarei. Togeu akibul iŋes ka kiyaloloŋ nooi. 38Tolimok nai ikes tema, “Iyaloloŋi ekaatau nooi esibit eapi atwanare. Kiboikinos nege, tokienyete kaapei ka ayoŋ.”
39Torotok iŋes kiŋaren iwadio, kibusokin kwap kijuuru kilip tema, “Okoe! Papa, ani kepedor, tolema ekopo ŋolo a ŋican lo aneni kaŋ. Meere nai ikwa acamitor ayoŋ, nai ikwaŋina icamitor iyoŋ.”
40Toboŋo nai neni a ŋikasyomak keŋ toryamu ikes ejotoete. Kiŋit nai Yesu Petero tema, “Nyipedorete iyes akikieny ka ayoŋ epeisaa daŋ bon a? 41Tokienyete ka kilipete, ikotere nyilomasi nakitemyet. Ecamit etau, nai epalag akuwan.”
42Toboŋo nabo iŋes akilip tema, “Okoe! Papa, ani pa kitemokino alemar ekopo ŋolo a ŋican lo aneni kaŋ, alemar mati kamat iŋes, kitiyakin ŋuna icamit iyoŋ.” 43Ani eboŋuni iŋes nabo, toryamu ikes eriŋa ejotoete, anerae abu tokuruwo ikes akikieny.
44Toesik nabo Yesu ikes tolot kilip akilipet ŋina a ŋauni, kirwor ŋakiro ŋunapei sek. 45Toboŋu neni a ŋikasyomak keŋ tolimok ikes tema, “Eriŋa iyes ijotoete ka ieŋunito a? Kiŋolikisi, adol esaa ŋolo ipotokinere Lokoku a Ituŋanan nakan a ŋikasecak. 46Tonyoutu, oloto! Kiŋolikisi, adolu ekalukinon kaŋ!”
Akikamuno a Yesu
(Mar. 14:43-50; Luk. 22:47-53; Yoa. 18:3-12)
47Ani eriŋa Yesu irworo, todolu Yuda epei alokidiŋ ŋikasyomak ŋulutomon ka ŋiarei erukito ka ŋituŋa ŋulu atiŋito ŋatumio ka ŋabiroi. Eyakuunitae ikes aneni a ŋisacaradotin a ŋulu apolok ka ŋikatukok. 48Aris sek ekalukinon kelimoki ŋituŋa atemar, “Ŋolo anui ayoŋ, iŋes ŋolo; kikamutu iŋes!”
49Tolot Yuda neni a Yesu atipei tolimok iŋes tema, “Maata Eketataman!” Tonu iŋes. 50Tolimok Yesu iŋes tema, “Ekone, kitiya atipei ŋuna ibunitor iyoŋ!” Potu nai ikes kikamut Yesu ka agogoŋu. 51Tolemu epei a ŋulu arukito ka Yesu atum, kitel akit ŋina ke epito a ŋolo ke esacaradoti a ŋolo apolon totubo. 52Tolimok Yesu iŋes tema, “Kinyakak atum kon nakuraro, anerae ŋulu daadaŋ ejiete ka atum, earyo ka atum. 53Itami iyoŋ atemar nyapedori ayoŋ akiŋit Papa kaŋ kiyaku neni kaŋ atipei ŋajorei a ŋimalaikan ŋuna edeparito ŋatomon ka ŋaarei a? 54Nai ani kikokis neni, iyookinosi ikwaani Ŋakigireta ŋuna igiritae ebe itemokino ŋun totakanut?”
55Apaki ŋin tolimok Yesu ŋituŋa tema, “Kan nyo iponitotor iyes akikamun ayoŋ itiŋito ŋatumio ka ŋabiroi esibit arae ayoŋ ekokolan? A ŋinakoloŋit abu ayoŋ oyakaun Kai ka Akuj etatami, ipotu iyes nyikikamut ayoŋ. 56Nai etiyakinosi nugu daadaŋ kiyookinotor ŋuna igirito ŋikadwarak.”
Toesikis nai ŋikasyomak daadaŋ iŋes kielaros.
Yesu alokiŋaren Atukot a Ŋiyudayan
(Mar. 14:53-65; Luk. 22:54-55, 63-71; Yoa. 18:13-14, 19-24)
57Torikosi ŋituŋa ŋulu ekamunete Yesu iŋes neni a Kaipa a ŋolo arae Esacaradoti ŋolo Apolon nooi, ka neni ka Atukot a ŋiketatamak a Ŋikisila ka neni a ŋikatukok. 58Nai ewuapit Petero Yesu aneni alwana tari tooma ere ŋolo ke Esacaradoti a ŋolo Apolon nooi. Toloma iŋes tooma, kiboikinos kaapei ka ŋisigarya idarit aanyun ŋuna itiyakinosi. 59Kiwara ŋisacaradotin ŋulu apolok ka Atukot daadaŋ erot ŋolo kisudokinet Yesu ŋakiro, ikotere totubokinere iŋes atwanare. 60Nai nyeryamut ikes ŋakiro ŋadi daŋ, ata ŋina alalaata ŋisuudae ŋulu alyokonok. Ekaku, potu ŋiarei kiŋaren 61temasi, “Abala etuŋanan lo ebe, ‘Apedori akituwor Akai ka Akuj, odukok nabo alotooma ŋirwa ŋiuni.’ ” 62Tonyou Esacaradoti ŋolo Apolon nooi, kiŋit Yesu tema, “Emam iyoŋ akirot ŋina iboŋokini a? Anukiro ikisitakinitotor iyoŋ ŋituŋa lu?” 63Nai kililiŋ Yesu cek. Tolimok Esacaradoti ŋolo Apolon nooi iŋes tema, “Ekesikoŋi ayoŋ iyoŋ alokiro ka Akuj a ŋina eyari, tolimokinae isua kirae iyoŋ Kristo Lokoku ka Akuj.” 64Tolimok Yesu iŋes tema, “Idau iyoŋ alimun. Nai akalimokini ayoŋ iyes atemar, kelunyar nu, ianyuwarete Lokoku a Ituŋanan iboi aloteten Akuj ŋina alokidiama nooi ka ebunit alokidiama ŋidouwon ŋulu anakuj.”
65Ŋolopeikiro, tocil Esacaradoti ŋolo Apolon nooi ŋilowi keŋ tema, “Eyany iŋes Akuj! Nyo nabo eriŋa ikiitanitor ŋisuudae ŋice? Iirasi tokona iyes ŋiyany keŋ. 66Ibasi tokona iyes ai?” Toboŋokis ikes temasi, “Itemokino totwan.” 67Kisyakis ikes akimwaanakin iŋes loreet, kibuŋata ŋice ka kibapabapata ŋice iŋes 68ebasi, “Todwar iyoŋ Kristo! Ŋae ikibap iyoŋ?”
Topeg Petero atemar ayeni Yesu
(Mar. 14:66-72; Luk. 22:56-62; Yoa. 18:15-18, 25-27)
69Apaki ŋin, kiboiye Petero alokiŋa aneni alapatan. Bu apeiketiyan neni ayai iŋes tema, “Irukito iyoŋ daŋ ka Yesu ŋolo alo Galileya.”
70Nai topeg iŋes ŋun alokiŋaren kec daadaŋ tema, “Nyayeni ayoŋ ŋuna irworo iyoŋ.” 71Ani eriŋa iŋes elosi nakan ŋina ke epuke, toanyuwa aketiyan ace iŋes, tolimok ŋulu awuasi alodiyete tema, “Arukito ekile logo ka Yesu ŋolo a Nasaret.”
72Topeg nabo iŋes ŋun daŋ, kikoŋ tema, “Nyayeni ayoŋ ekile ŋol!”
73Ani elunyar apaki adio, potu ŋituŋa ŋulu awuasi alodiyete temasi neni a Petero, “Kire jik, irae iyoŋ daŋ epei alokidiŋ kec, anerae itoodiunit epite ŋolo irworor iyoŋ.”
74Togeu nai Petero akilama bon ka akikoŋ ebala, “Nyayeni ayoŋ ekile ŋol!”
Apaki ŋinapei ŋin, toruuni ekokoroit. 75Totamu nai Petero ŋakiro ŋuna alimokinit Yesu iŋes atemar, “Ani eriŋa ekokoroit nyeruuno, ipegi iyoŋ ŋapeget ŋauni atemar ikiyeni ayoŋ.” Toloma iŋes kiŋa, kigwor nooi.
Currently Selected:
Mat. 26: NIB2008
Highlight
Share
Copy
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.
