Mat. 22
22
Akitadapet ŋina a ŋasuban a ŋuna ke ekiitanu
(Luk. 14:15-24)
1Kirwor nabo Yesu lotuŋa a ŋakitadapeta tema, 2“Ikoni Apukan ŋina anakuj ne; ayai erwosit ŋolo abu kitemonok ŋasuban ŋuna ke ekiitanu alokoku keŋ. 3Kiyakiya ŋipi keŋ anyarare ŋituŋa ŋulu anyaritae nasuban, nai apotu ŋituŋa ŋul towout aponare. 4Kiyakiya nabo ŋipi keŋ ŋice, alimokin ŋulu anyaritae nasuban atemar, ‘Etemok ayoŋ akimuj, aarit ŋimoŋin ka ŋitak ŋulu atumak, etemokin ŋiboro daadaŋ; potu nasuban!’ 5Nai apotu ŋituŋa ŋul nyemitakis, toloto akitiya ŋikeceticisyo; tolot epei lomanikor keŋ, ŋoloce tolot lodukan keŋ. 6Kikamut ŋuluce ŋipi, kibuŋata ka tobolyatar. 7Toŋo erwosit nooi, kiyakiya ŋajorei keŋ, tomunyasi ŋikaarak ŋul ka kicunya etaun kec. 8Tonyarau iŋes ŋipi keŋ tolimok tema, ‘Etemokin ŋasuban, nai ŋituŋa ŋulu anyaritae, nyitemokino ikes epote ne. 9Toloto tokona lorotin tonyaraut nasuban ŋituŋa daadaŋ ŋulu iryamunete iyes.’ 10Toloto nai ŋipi lorotin, tonyaraut ŋituŋa daadaŋ ŋulu aryamunete ikes ŋulu aronok kaapei ka ŋulu ajokak; kilelebun ŋipeyok kai ŋina ke ekiitanu.
11“Nai ani elomari erwosit aanyun ŋipeyok, toanyuwa ekile ŋolo pa anapit elou ŋolo ke ekiitanu. 12Kiŋit erwosit iŋes tema, ‘Ekone, ikokini iyoŋ ilomuni nege pa inapit elou ŋolo ke ekiitanu ai?’ Totakin ekile ŋol cek. 13Tolimok erwosit ŋipi keŋ tema, ‘Toena iŋes ŋakan ka ŋakejen, kimasasi kiŋa nakiryonut. Kigwor aina, tokonyanak ŋikyal.’ 14Anerae elalak ŋulu enyaritae, nai ekudyoko ŋulu eseunio.”
Akiŋiset ŋina ka akibuk ocur
(Mar. 12:13-17; Luk. 20:20-26)
15Toloto Ŋiparisayon totukut alokun Yesu anakiro a ŋuna erworo. 16Kiyakiyasi ŋikapolok a Ŋiparisayon ŋikasyomak kec ka ŋituŋa ŋice ŋulu ka atukot a ŋina ke Erode neni a Yesu, tolimokis iŋes temasi, “Eketataman, ikiyeni isua atemar irae iyoŋ ŋolo a kire ka itatami ŋakiro ŋuna a kire ŋuna ka Akuj, nyimisit iyoŋ ŋuna etamete ŋituŋa, anerae nyityakatyakat ŋituŋa. 17Tolimokinae isua ŋuna itami iyoŋ. Ikicamakinito mono Ŋikisila obukosi ocur neni ke ekepukan a Roma kori mam?”
18Nai aŋuna ayenia Yesu akeceronis, tolimok ikes tema, “Iyes ŋikaŋisoswae! Kaanukiro ikilokitotor iyes ayoŋ? 19Kitoodikinae cenite esiliŋ ŋolo tacet ocur.”
Kitoodikis nai ikes Yesu esiliŋ. 20Kiŋit Yesu ikes tema, “Ŋolo a ŋae ereet lo ka ŋakigireta nu?”
21Toboŋokis ikes temasi, “Ŋulu ke ekepukan a Roma.” Tolimok Yesu ikes tema, “Inakisi ekepukan a Roma ŋini erae ikeŋ, inakis Akuj ŋini erae ŋini ka Akuj!”
22Ani iirarete ikes ŋakiro ŋun, toumokis, torotokis, kimyekis Yesu.
Kiŋitae Yesu ŋakiro ŋuna ka ayarun a ŋikatwak
(Mar. 12:18-27; Luk. 20:27-40)
23Akoloŋit ŋinapei, potu neni a Yesu Ŋisadukayon ŋulu abasi emam ayarun, 24temasi, “Eketataman, abala koloŋ Moses, ‘Ani ketwana ekile tomam ŋidwe, itemokino lokaato keŋ kirum aberu, touri ŋidwe ŋulu eruwor ŋulu a lokaato keŋ a ŋolo atwana.’ 25Ayakasi ŋikaitotoi ŋikanikaarei ŋulu aya ne. Kiita ŋolo kiyae, nai abu iŋes totwan nyeryamuna ŋidwe, tosodi kidoŋ aberu keŋ neni a lokaato keŋ. 26Kitiyakinos ŋakiro ŋunapei neni a lokaato keŋ a ŋolo a ŋiarei, ka ŋolo a ŋiuni daŋ, tari neni a ŋolo a ŋikanikaarei. 27Ani ketwaka ikes daadaŋ, totwan aberu daŋ. 28Aŋun, eruwor mono aberu ŋin ŋina a ŋae, ŋina eyaruniata ŋikatwak? Anerae abu iŋes toruwor aberu a ŋikaitotoi a ŋul a daadaŋ?”
29Nai toboŋok Yesu ikes tema, “Idyakarito iyes, anerae nyiyenete ŋuna igiritae Nakigireta kori apedor ŋina ka Akuj.
30“Anerae ŋina eyaruniata ŋikatwak, ikokinete ikes ŋimalaikan ŋulu anakuj, ŋulu nyiitanarete kori nyiitanaryo. 31Nabo ŋuna ka ayarun alokatwak, nyesyoma iyes ŋuna ikilimokini Akuj ebala, 32‘Arae ayoŋ Akuj ŋina ka Aburaam, ka Isaka, ta ŋina a Yakobo’ a? Meere iŋes Akuj a ŋikatwak, nai Akuj a ŋulu eyarete.”
33Ani iirarete ŋasepico a ŋituŋa ŋakiro ŋun, toumokis aŋuna ka akitatam keŋ.
Akiciket ŋina apolon akilo daadaŋ
(Mar. 12:28-34; Luk. 10:25-28)
34Nai ani iirarete Ŋiparisayon atemar esililiŋ Yesu Ŋisadukayon, totukokinos iwapei. 35Abu epei ŋolo arae eketataman a Ŋikisila, toloku Yesu ka akiŋiset 36tema, “Eketataman, anikiciket epol nooi a Lokisila?”
37Toboŋok Yesu iŋes tema, “Tomina Ekapolon Akuj kon ka ekonitau a daadaŋ, ka akonikiyar a daadaŋ ta a ŋakonitameta a daadaŋ. 38Erae ŋin akiciket ŋina epol nooi ka ŋina eŋarenon. 39Ŋina a ŋaarei daŋ, ikwaan ka ŋina ke ekiŋaren, ‘Tomina ekonikidunyet ikwaŋina iminar iyoŋ akonikuwan.’ 40Ŋikisila a Moses daadaŋ ka ŋakitatameta a ŋikadwarak daadaŋ eyakasi nakiciketa ŋuna arei ŋun.”
Ŋae erae Kristo?
(Mar. 12:35-37; Luk. 20:41-44)
41Kiŋit Yesu Ŋiparisayon eriŋa etukokina iwapei 42tema, “Itamete iyes atemar ŋae erae Kristo ka Lokoku a ŋae iŋes?”
Toboŋokis ikes temasi, “Lokoku a Daudi.”
43Kiŋit Yesu ikes tema, “Nyo bo nai itanyaritor Etau ŋolo ka Akuj Daudi iŋes Ekapolon? Ebala Daudi,
44‘Atema Ekapolon neni ke Ekapolon kaŋ,
kiboikin iyoŋ teten kaŋ,
akitodol neni ewuakinia ŋikonimoi kwap ŋakejen kon.’
45Ani kenyarit Daudi iŋes, ‘Ekapolon,’ ikokini nabo iŋes eruwor Lokoku a Daudi ai?”
46Emam ituŋanan ŋini abu toboŋok Yesu adiokirot, anyoun akoloŋit ŋin, emam ituŋanan ŋini abu totitinyik akiŋit iŋes ŋakiro ŋadi.
Currently Selected:
Mat. 22: NIB2008
Highlight
Share
Copy
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.
