Mat. 10

Toseu Yesu Ŋikiyakia ŋulutomon ka ŋiarei

(Mar. 3:13-19; Luk. 6:12-16)

1Tonyarau Yesu ŋikasyomak keŋ ŋulutomon ka ŋiarei, inak ikes apedor daadaŋ ŋina kiritanaret ŋipyan ka ŋina kitaŋaleununuyet ŋituŋa alodekesyo a daadaŋ ta alemar apalagu daadaŋ.

2Ŋirorwa a Ŋikiyakia a ŋulutomon ka ŋiarei ikes lu, ŋolo esyaunan Simoni, ŋolo anyaritae Petero ka Anderia lokaato keŋ; Yakobo lokoku a Sebedeo, ka Yoana lokaato keŋ; 3Pilipo ka Batolomayo; Tomas ka Matayo ŋolo arae ekeriran ocur; Yakobo lokoku ka Alipayo ka Tadeo; 4Simoni ŋolo arae Eseletoit ka Yuda Isikariot ŋolo alukini Yesu.

Etic a ŋulutomon ka ŋiarei

(Mar. 6:7-13; Luk. 9:1-6)

5Kiyakiya Yesu ŋulutomon ka ŋiarei ŋul, kicik ikes tema, “Nyilot nakwapin a ŋituŋa a ŋulu nyerae Ŋiyudayan, kori lotaun edio ŋolo a Ŋisamaritayon; 6nai akilo, toloto lotuŋa ŋulu a Isirael ŋulu ikote ŋamesekin ŋuna eolito. 7Toloto kitatama ikes ibasi, ‘Aapuu Apukan ŋina anakuj!’ 8Kitaŋaleutu ŋikadyakak, kiteyarutu ŋikatwak, kitesegutu ŋulu ka atapon ka kiritanasi ŋipyan; ipotu iyes toryamut koŋin, aŋun, kipotosi iyes daŋ koŋin. 9Ani irotokinete nyilidakis egolid, ŋisiliŋa kori ŋaboolae locileta a ŋanaŋgae kus. 10Nyitiŋa ecwee analosit kus kori elou ece, ŋamuk kori ebela. Anerae itemokino eketiyan toryamu akimuj keŋ.

11“Ani idolete iyes lotaun kori lore a ituŋanan, tolomasi kiwarut ituŋanan ŋini ikijauni iyes kiboiyoto ka iŋes, tari ŋina irotokinioto iyes a nen. 12Ani ilomarete iyes tooma akai, kimalata ŋituŋa ŋulu ka akai a ŋin. 13Ani kikijaut iyes ŋituŋa alokai a ŋin, itemokino togatakis ikes ekisil kus. Nai ani pa kikijaut ikes iyes, nyigatakis ikes ekisil kus. 14Ani kemam ituŋanan ŋini ikijauni kori ŋini iirari ŋakiro kus, totwakisi apuwa ŋina a ŋakejen kus nen, apaki ŋina irotokinioto iyes alokai a ŋin kori alotaun a ŋol. 15Akalimokini ayoŋ iyes kire atemar, Akoloŋit ŋina ka atubokino erimakinio ŋituŋa ŋulu a Sodoma ka ŋulu a Gomora akilo ŋulu ke etaun a ŋol.

Akisicanet ŋina eryamunete Ŋikiyakia

(Mar. 13:9-13; Luk. 21:12-17)

16“Topupokisi, ekeyakiyarit ayoŋ iyes ikwa ŋamesekin alokidiŋ ŋipeei. Topiiryaka ikwa ŋimuno ka kiyapara alopitesyo kus ikwa ŋakuryo. 17Tocoikinito ŋituŋa, anerae eya ŋulu ikikamunete iyes itorikosi loikiikoe ka ikibuŋata alosinagogae kec. 18Ikirikoryo iyes kiŋaren ŋikepukak ka ŋirwosi aŋuna kaŋ, ikotere toruworos iyes ŋisuudae kaŋ alokiŋaren kec ka alokiŋaren ŋituŋa ŋulu nyerae Ŋiyudayan. 19Ani ikipotorete ikes iyes akisitakin, nyiyaloloŋo aŋuna ilosete iyes akirwor kori epite ŋolo limunet, anerae ikiinakinio iyes ŋakiro ŋuna itemokino tolimut apaki ŋin. 20Anerae meere iyes irworosi, nai Etau ŋolo a Papa kus iŋes irworo aneni kus.

21“Ipotori lokaato lokaato keŋ toarae; papa daŋ ipotori ikoku keŋ; elukinete ŋidwe ŋikauruunak kec ka ipotorete ikes toarae. 22Ikitoroniyarete ŋituŋa iyes aŋuna ke ekiro kaŋ, nai ŋini etitinyikini akitodol nasalunet, eiunio. 23Ani ikitidiŋete ikes iyes alotaun ke epei, toema lotaun ece. Akalimokini ayoŋ iyes kire atemar, nyirikakinete iyes ekusitic alotaunio a ŋulu a Isirael, eriŋa nyebuno Lokoku a Ituŋanan.

24“Nyepol ekasyoman alokiŋaren ekeeketataman, eketiyan daŋ nyepol alokiŋaren ekeekapolon. 25Itemokino ekasyoman kikoni eketataman keŋ ka eketiyan kikoni ekapolon keŋ. Ani kenyaritae ekapolon ŋolo ka akai atemar Belesebul, enyarao ŋituŋa ŋulu ka akai a ŋin a ŋirorwa a ŋulu aronok nooi.

Ŋini erae tokerae

(Luk. 12:2-7)

26“Aŋun, nyikera ikes, anerae emam ibore ŋini erapitae ŋini nyisileereunio ka emam ŋini imunonitae ŋini nyeanyunio. 27Ŋakiro ŋuna akalimokini ayoŋ iyes anakiryonut, tolimosi anakica, nabo ŋuna iirasi iyes iŋaiŋaunitae, kikeutu alokiŋa. 28Nyikera ŋulu earete akuwan, nai nyepedorito akiar etau; nai tokera ŋolo epedori akiar akuwan ka etau, tocakak tooma nakim ŋina nyeduŋe. 29Nyegyelyo atadiidi ŋiarei a ikaput a? Emam tari ipei alokidiŋ kec ŋini ecakakin kwap pa eyeni Papa kus. 30Nai tari ŋitim daadaŋ anakyes kus imaritae. 31Aŋun, Nyikuryaketa; epol etyae kus akilo ŋolo a ŋikyeny a ŋulu alalak!

Alimor ka akiŋer Kristo

(Luk. 12:8-9)

32“Aŋun, ituŋanan daadaŋ ŋini elimori atemar akayeni ayoŋ alokiŋaren ŋituŋa, alimori ayoŋ daŋ atemar ayeni iŋes alokiŋaren Papa kaŋ ŋolo eyai nakuj. 33Nai ŋini epegi atemar akayeni ayoŋ alokiŋaren ŋituŋa, apegi ayoŋ daŋ atemar ayeni iŋes alokiŋaren Papa kaŋ ŋolo eyai nakuj.

Meere ekisil ayaunit ayoŋ, nai ejiye

(Luk. 12:51-53, 14:26-27)

34“Nyitamete atemar abunit ayoŋ ayaun ekisil nakwap. Meere ekisil ayaunit ayoŋ, nai ejiye. 35Anerae abunit ayoŋ akitidiŋakin esapat ka papa keŋ, apese ka toto keŋ, ateran ka tata keŋ; 36eruworosi ŋimoi a ituŋanan ŋituŋa ŋulupei alokal keŋ.

37“Ituŋanan ŋini emina papa keŋ kori toto keŋ akilo ayoŋ, nyitemokino aruwor ekewuapan kaŋ; ŋini emina lokoku keŋ kori nakoku keŋ akilo ayoŋ, nyitemokino aruwor ekewuapan kaŋ; 38ka ŋini nyeryoŋi emusalaba keŋ ekewuapak ayoŋ, nyitemokino aruwor ekewuapan kaŋ. 39Ituŋanan ŋini ecamit aiun akiyar keŋ, itotwaniyari; nai ŋini itotwaniyari akiyar keŋ aŋuna kaŋ, eiuni.

Eropit a ŋulu ecamunete Yesu

(Mar. 9:41)

40“Ituŋanan ŋini ikijauni iyes, ekejau ayoŋ, nabo ŋini ekejauni ayoŋ, ejau iŋes ŋini ekeyakuunit ayoŋ. 41Ituŋanan ŋini ijauni ekadwaran aŋuna eraakar ekadwaran, eryamuni iŋes daŋ eropit ŋolo ke ekadwaran ka ŋini ijauni ituŋanan ŋini iyookino aŋuna eraakar ŋini iyookino, eryamuni iŋes daŋ eropit ŋolo a ituŋanan a ŋini iyookino. 42Nabo ituŋanan daadaŋ ŋini itamasi ipei alokidiŋ ŋulu cicik lu, tari epeikopo ŋolo a ŋakipi a ŋuna alilimok, aŋuna eraakar ekewuapan kaŋ, eryamuni kire eropit keŋ.”

Currently Selected:

Mat. 10: NIB2008

Highlight

Copy