Mat. 11
11
Ŋikasyomak ŋulu apote aneni a Yoana ke Ekebatisan
(Luk. 7:18-35)
1Ani kedau Yesu akitatam ŋikeekasyomak ŋulutomon ka ŋiarei, tonyou a nen, tolot akitatam ka alimonokin alotaunio a ŋulu aya diyete nen.
2Ani iirari Yoana Ekebatisan ŋolo ayai mabus ŋakiro ŋuna etiyae Kristo, kiyakiya ŋikeekasyomak neni a Yesu. 3Kiŋita ikes Yesu temasi, “Erae iyoŋ itemokino ibu, kori itemokino isua edareutu ece?”
4Toboŋok Yesu ikes tema, “Toloto tolimokisi Yoana ŋuna ipupete ka ŋuna iteete. 5Ekyenyununuyete ŋimudukanotin, erotonokinete ŋikaŋwalak, esegununuyete ŋulu irumit atapon, iiranarete ŋikiŋimanotin, eyarununuyete ŋikatwak, nabo elimonokinio Ŋakiro ŋuna Ajokak neni a ŋikulyak. 6Erereŋ nooi ituŋanan ŋini nyejamakini anupit keŋ aŋuna kaŋ.”
7Ani erotokinete ŋikasyomak a Yoana, togeu Yesu alimonokin ŋasepico ŋakiro a Yoana tema, “Ŋina ilositotor iyes neni a Yoana apaki ŋina ayakar iŋes naloŋisat, nyo iitanito iyes akiŋolikin? Eoot ŋolo iloiloi ekuwuam a? 8Nyo ilosito iyes akiŋolikin? Ekile ŋolo anapit ŋilowi ŋulu aninikak ŋulu emilimilete a? Toyenete atemar ŋituŋa ŋulu enapito koŋina, iboiyete ikes alorerya a ŋikapolok. 9Nyo nai kire ilosito iyes akiŋolikin? Ekadwaran a? Ee robo; akalimokini ayoŋ iyes atemar, iŋolikis iyes ituŋanan ŋini iloit nooi tari ekadwaran. 10Yoana iŋes ebala Akuj alokitaabo ebe, ‘Toanyu, eyakiyari ayoŋ ekaakiyakia kiŋaren kon, kitemok erot kon.’ 11Akalimokini ayoŋ iyes kire atemar, alotuŋa a daadaŋ a ŋulu idounitoe ŋinapei koloŋ, emam ŋini epol akilo Yoana Ekebatisan. Nai ŋini edit akilo daadaŋ a Napukan a ŋina anakuj, epol akilo Yoana. 12Ameun alorwa a Yoana ke Ekebatisan akitodol tokona, eryamunit Apukan ka Akuj ŋican ŋulu apolok; nabo eŋirikinito ŋikadedeŋak alemar iŋes ka agogoŋu. 13Anerae apotu ŋikadwarak daadaŋ ka ŋikisila todwara akitodol neni a Yoana 14ka ani kicamito akinup ŋakiro ŋuna adwarito ikes, Yoana iŋes Eliya ŋolo itemokino bu. 15Iŋes ŋini eya ŋaki ŋuna kiiraret, kiira.
16“Nai, nyo esikwaania ayoŋ ŋituŋa ŋulu a ŋirwa a lu? Ikote ikes ŋidwe ŋulu iboiyete alomaket. Enyarae epeiwae kec ŋuluce 17temasi, ‘Ikipotu isua okutakisi arupepe ŋina kimomworet, nai nyimomworikis iyes; aponi isua kikalounoe aŋuna ka atwanare, nai nyiluuroto iyes.’ 18Abu Yoana bu eroneene ka pa emasi ŋagwe, nai temasi ŋituŋa, ‘Ikamunit ekipye iŋes.’ 19Abu Lokoku a Ituŋanan, imuji ka emasi, ebasi ŋituŋa, ‘Kiŋolikisi ekadakan ka ekameran, ekone a ŋikerirak ocur ka ŋikasecak!’ Nai aosou ŋina ka Akuj itoodiunitae erae ŋina a kire aloticisyo keŋ.”
Ŋituŋa a ŋitaunio a ŋulu pa anupito Yesu
(Luk. 10:13-15)
20Kisyak Yesu akisibura ŋituŋa alotaunio a ŋulu aris sek iŋes kitiyaa ŋakujuwuanisya keŋ ŋuna alalak, anerae apotu ikes nyekiwa ŋasecisya kec. 21“Ekaŋ iyoŋ Korasin! Ekaŋ iyoŋ Betesaida! Anerae kerae koloŋ kitiyatetei ŋakujuwuanisya ŋuna etiyakin aneni kus alo Tiro ka Sidon, kekiito ikes koloŋ sek, tonapa ŋilowi ŋulu koris, ido kiwosakinos ekuron, kitoodiuniata atemar akiwua ikes ŋasecisya. 22Nai akalimokini ayoŋ iyes kire atemar, isyoni Akuj nooi ŋituŋa ŋulu a Tiro ka ŋulu a Sidon Akoloŋit ŋina ka atubokino akilo iyes. 23Ani bo iyoŋ Kaperenaum! Icamit iyoŋ akitopolooro kon todol nakuj a? Ikilemaryo iyoŋ anakwap, ikimasar nakibois ŋina a ŋikatwak! Anerae kerae koloŋ kitiyatetei ŋakujuwuanisya ŋuna etiyakin neni kus, keriŋa Sodoma eyai tari tokona! 24Nai akalimokini ayoŋ iyes kire atemar, isyoni Akuj nooi ŋituŋa ŋulu a Sodoma, Akoloŋit ŋina ka atubokino akilo iyes.”
Potu neni kaŋ iyes ŋulu ikiupit
(Luk. 10:21-22)
25Apaki ŋin, kirwor Yesu tema, “Alakara ayoŋ neni kon Papa, Ekapolon ŋolo anakuj ka nakwap, anerae ibu iyoŋ kiwua ŋakiro ŋun aneni a ŋikaosok ka ŋipiiryanotin, nai kisileereu neni a ŋidwe a ŋulu cicik. 26Ee, Papa, itiyak iyoŋ ŋun daadaŋ ikwaŋina icamitor iyoŋ elope.
27“Akainaki ayoŋ Papa kaŋ ŋiboro daadaŋ. Emam ituŋanan eyeni atemar Lokoku iŋes ŋae, mati Papa, nabo emam ŋini eyeni atemar Papa iŋes ŋae, mati Lokoku ka ŋulu daadaŋ ecamit Lokoku akitoodikin Papa keŋ neni kec.
28“Potu neni kaŋ iyes daadaŋ ŋulu ikiupit aloticisyo kus ka aŋuna ka akiwokit ŋigogoso; ekesieŋuni ayoŋ iyes. 29Tolemasi ayokot kaŋ tonapa ka kisisyata aneni kaŋ; anerae apatana ka eyapara ayoŋ alotau, ido iryamunete akieŋun ŋina a ŋitai kus. 30Anerae epatana akinap ayokot kaŋ ka eook egogos kaŋ.”
Currently Selected:
Mat. 11: NIB2008
Highlight
Share
Copy
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.
