Akisy. 26

Isaka ka Abimelek

1Apaki ŋin, ayai eron ece nakwap ŋin, meere ŋolo ayai alorwa a ŋulu ka Aburaam. Tonyou Isaka tolot Gerar neni ka Abimelek a erwosit a ŋolo a Ŋipilistin. 2Totakanu Ekapolon neni a Isaka tema, “Nyilot nyitiyaar Ijipit a ne; kiboikin nakwap ŋina eketoodikini ayoŋ iyoŋ. 3Kiboikin nakwap ŋin, ikiruki iwon, ido eketerereŋi ayoŋ iyoŋ, anerae aŋuna kon ka aŋuna a ŋiletok kon, akainakini akwap na daadaŋ, ido esiyookini akikoŋiet kaŋ ŋina abu ekoŋ neni a papa kon Aburaam. 4Etipituni ŋiletok kon tolalata ikwa ŋikacer, ainakini ikes akwap na daadaŋ. Eryamunete ŋituŋa a ŋakwapin a daadaŋ ŋarereŋisyo aloletok kon 5aŋuna abunio Aburaam kiwuap ŋakiro kaŋ ka kiyook ŋuna abu ecikak iŋes ikwapei; ŋakiciketa kaŋ, ŋakiro ŋuna abu otub ka ŋikisila kaŋ.”

6Aŋun, abu Isaka kiboikin Gerar. 7Ani iŋisete ŋikilyok ŋulu ka akwap a ŋin Isaka ŋuna ikamunito akeeberu, toboŋok Isaka ikes tema, “Erae iŋes nakaato kaŋ”; anerae akuryana iŋes alimun ebe, “Erae iŋes aberu kaŋ,” etami ebe, “Kori ca akaarete ayoŋ ŋituŋa ŋulu ka akwap a na aŋuna a Rebeka, anerae atakani Rebeka ibus.” 8Ani kiboi Isaka alo Gerar apaki ŋina aoyan, toripiya erwosit Abimelek ŋolo a Ŋipilistin alodirisa, kiŋolik Rebeka ebolyasi ka lokile keŋ Isaka. 9Tonyarau Abimelek Isaka kiŋit tema, “Ikwa erae iŋes aberu kon a? Kaanukiro ikilimokinitor iyoŋ ayoŋ ebe, ‘Erae iŋes nakaato kaŋ’?” Tolimok Isaka iŋes tema, “Arae aŋuna atamakinitor ayoŋ atemar epedoryo akiyar ayoŋ aŋuna keŋ.” 10Tema Abimelek, “Anukiro nu ŋuna itiya iyoŋ neni kosi? Kepedorit robo ituŋanan ice akirat aberu kon, ido iyau iyoŋ ekaile ŋolo ka asecit neni kosi.” 11Aŋun, abu Abimelek kicik ŋituŋa daadaŋ tema, “Ituŋanan daadaŋ ŋini itiyae ŋakiro ŋuna aronok neni a ekile a lo, kori neni aberu keŋ, itemokino toarae.”

12Kitaki Isaka ŋikinyom nakwap ŋin, ekaru ŋol tolemu akimuj ŋina alalan nooi. Abu Ekapolon kiterereŋ iŋes, 13tobar Isaka, kiyot ebari keŋ iyata iwadio iwadio tari ŋina abarya iŋes nooi. 14Ayakasi iŋes ŋisipanin a ŋamesekin, ŋisipanin a ŋaatuk ta ŋiketiyak. Aŋun, apotu Ŋipilistin kirakar ebari keŋ, kimana iŋes. 15(Apaki ŋin, kepotu Ŋipilistin tonuka ŋakare daadaŋ ŋuna kerae ŋiketiyak a Aburaam a papa a Isaka kebokunete eriŋa Aburaam eyari.) 16Tolimok Abimelek Isaka tema, “Towotok aneni kosi; ibar iyoŋ nooi ikilo isua.”

17Apotu ŋun kitowuotokis Isaka a nen tolomiya nakadipaalat ŋina a Gerar kiboi a nen. 18Towada nabo Isaka ŋakare ŋuna koloŋ kebokuni papa keŋ Aburaam; anerae kepotu Ŋipilistin tonuka ikes ketwana Aburaam. Tolimonok Isaka ŋakare ŋun ŋirorwa ŋulupei koloŋ kelimonokinit papa keŋ. 19Nai ani ebokarete ŋiketiyak a Isaka akadipaalat ŋina aryamuniata akare ŋina ayai eitanit, 20kisiburata ŋikeyokok ŋulu a akwap a ŋina a Gerar ŋikeyokok a Isaka temasi, “Erae ŋakipi nu ŋuna kosi.” Aŋun, abu Isaka tolimok ekiro a akare a ŋin Esek, #26:20 Esek Iŋes atemar neni eburaere anerae apotu iŋes kiburata ka ikes a nen. 21Tobokasi nabo ikes akare ace, kisiburae ikes a ŋina daŋ, tolimok Isaka ekiro a ŋin Sitina #26:21 Sitina Iŋes atemar akimanit. 22Torotok Isaka a nen, toboku akare ace, nyisiburata ikes Isaka a ŋin daŋ aŋun, abu Isaka tolimok ekiro a ŋin Reobos. #26:22 Reobos Iŋes atemar ŋina apolon Tema, “Ikiinak tokona Ekapolon iwon neni kiboiyet, ido ikipituni anakibois a na.”

23Towotok Isaka anakibois a ŋin tolot Beeriseba. 24Nakwaare akoloŋit ŋinapei alomya Isaka nakwap ŋin, totakanu Ekapolon neni a Isaka tema, “Arae ayoŋ Akuj a papa kon Aburaam, nyikuryaniar, anerae ikiruki ayoŋ ka iyoŋ, eketerereŋi ayoŋ iyoŋ ka etalalauni ŋiletok kon nooi aŋuna a eketiyan kaŋ Aburaam.” 25Aŋun, abu Isaka todukok Namuroet nen, kilip neni ke Ekapolon a nen, tosodi kigurok eema keŋ nen. Tosodo ŋiketiyak a Isaka tobokakis akare nakibois ŋin.

26Tolot Abimelek alo Gerar neni a Isaka, torukosi ka Ausas erukitos keŋ ŋolo eŋarakinit iŋes akipuka ejok ta Pikol ekapolon a ŋasigarya keŋ. 27Tema Isaka neni kec, “Kaanukiro iponitotor iyes neni kaŋ, oyeni bo ayoŋ atemar ikiremokino iyes ayoŋ ka ipotu ikiritasi ayoŋ aneni kus?” 28Temasi ikes, “Ikianyu isua kire jik atemar irukito iyoŋ ke Ekapolon; aŋun, ikitemari, ekoŋo iwon ŋinituŋanan neni a ŋinice ka ewuakisi acamunet yok, ŋinituŋanan neni a ŋinice, 29ikotere nyitiya iyoŋ ŋadi ŋuna aronok neni kosi, lopite ŋolopei nyetapya isua iyoŋ ka nyitiya isua ŋadi ŋuna aronok neni kon, nai ŋuna ajokak, ido aponi isua ikitowuotokin iyoŋ emam ŋace. Tokona irae iyoŋ ŋolo ikiterereŋit Ekapolon.” 30Aŋun, abu Isaka kipo ŋasuban aŋuna kec, kimuja ka tomata. 31Tonyout taparacu sek kikoŋ ŋinituŋanan neni a ŋinice; kitenak nai Isaka ikes toloto nakwap kec emam ŋace. 32Akoloŋit ŋin, apotu ŋiketiyak a Isaka tolimokis Isaka ŋakiro a akare a ŋina kepotu ikes tobokut, temasi, “Aryamuni isua ŋakipi!” 33Tolimok Isaka ekiro a akare a ŋin Siba; aŋun, aponi tonyarae ekiro a etaun a ŋolo abu min nen Beeriseba tari tokona.

Ŋaberu ke Esau ŋuna arae Ŋaitaiti

34Ani eruwor ŋikaru ke Esau ŋatomoniomwon, kiit iŋes Yudis nakoku a Beri a ŋolo arae Eititait, ka Basemas nakoku a Elon a ŋolo arae Eititait; 35tomunaasi ŋaterak ŋun akiyar ŋina sek ayakatar Isaka ka Rebeka.

Currently Selected:

Akisy. 26: NIB2008

Highlight

Copy