Akisy. 25

Kiit Aburaam Ketura

(1 Ŋakiro a ŋirwa 1:32-33)

1Kiit Aburaam aberu ace, ekeekiro Ketura. 2Touru Ketura Simiran, Yokisan, Medan, Midian, Isibak ka Sua. 3Touru Yokisan Seba ka Dedan. Touru Dedan ŋisapa lu: Asisurim, Letusim ka Leumimim. 4Arae ŋidwe a Midian ŋulusapa lu: Epa, Eper, Anok ka Abida ta Elidaa. Arae ŋul daadaŋ ŋitatae a Ketura. 5Inak Aburaam Isaka ibore daadaŋ ŋini ayakar iŋes. 6Ani eriŋa Aburaam eyari, inak ŋidwe a ŋaberu keŋ a ŋuna pa eitit ŋainakineta, ido kirita ikes aneni a Isaka alokoku keŋ. Toloto ŋul lowae ŋolo alo Kide, nakwap ŋina ayai Kide.

Atwanare ka Aburaam

7Kiboi Aburaam todolo ŋikaru keŋ amiat ka ŋatomonikanikaarei ka ŋikan. 8Ekaku, totwan Aburaam emojoŋit nooi ikoŋikoŋit, ido aponi yae tonukae neni anukitae ŋituŋa keŋ. 9Tonuka ŋidwe keŋ ŋulusapa, Isaka ka Isimael Aburaam naturukan ŋina a Makipela, ŋina ayai nalup a Epiron alokoku a Soar a ŋolo arae Eitait, aya ŋalup ŋun Kide Mamure, 10ikes agyeluni Aburaam aneni a Ŋiitaiti. Nen iŋes aponi tonukakinae Aburaam ka aberu keŋ Sara. 11Ekaku ka atwanare ka Aburaam, kiterereŋ Akuj Isaka lokoku ka Aburaam, kiboi iŋes alo Beerilairoi.

Ŋidwe a Isimael

(1 Ŋakiro a ŋirwa 1:29-31)

12Erae lu ŋidwe a Isimael alokoku ka Aburaam, a ŋolo auruuni Agar ŋina arae Ajipitanoit torae aketiyan a Sara. 13Ŋirorwa kec lu ameun aneni a ŋolo apolon tari ŋolo cici: Nebaiyos, Kedar, Adibeel, Mibisam, 14Misima, Duma, Masa, 15Adad, Teima, Yeitur, Napis ka Kedema. 16Erae ŋul ŋirorwa a ŋidwe a Isimael a ŋirerya ka ŋitela kec, arae ikes ŋirwosi ŋitomon ka ŋiarei alotooma ŋikabilae kec. 17(Kiboi Isimael todolo ŋikaru keŋ amiat ka ŋatomoniuni ka ŋikanikaarei. Ekaku, totwan, ido aponi yae tonukae neni anukitae ŋituŋa keŋ.) 18Alomito ŋikabilae ŋul anyoun alo Apila tari Sur, neni iteosi ka Ijipit torae alowae a ŋolo eyai Asiriya. Nen iŋes kebu Isimael tolom ibakasi ka ŋituŋa keŋ.

Akidouno ka asorokanut ke Esau ka Yakob

(Ŋirom. 9:10-12)

19Ŋakiro a Isaka alokoku ka Aburaam ikes nu: 20Arae ŋikaru a Isaka ŋatomoniomwon apaki ŋina eisya Rebeka nakoku a Besuel, a ŋolo arae Erameanait ŋolo alo Padanaram; arae Rebeka nakaato a Erameanit a ŋolo anyaritae Laban. 21Kilip Isaka neni ke Ekapolon aŋuna pa edoununuyo aberu keŋ; toboŋok Ekapolon akilip keŋ, topoti Rebeka aberu a Isaka. 22Tobolyakis ŋidwe ijukanarosi anakook a Rebeka, tema iŋes, “Ani kikokinete ne, kaanukiro ayarya ayoŋ?” Aŋun, abu iŋes tolot akiŋita ŋun neni ke Ekapolon. 23Tolimok Ekapolon iŋes tema,

“Eyakasi ŋituŋa a ŋakwapin a ŋaarei nakook kon,

ido ŋituŋa a ŋakwapin ŋulu ŋiarei ŋulu idouni iyoŋ, etyakasi,

egogoŋioto ŋituŋa ka akwap a apei akilo ŋinace,

eruwor edya ŋolo apolon eketiyan a ŋolo cici.”

24Ani eapiyari ŋirwa ŋulu ka akidoun keŋ, kileereu erae ŋimuu aya nakook keŋ. 25Tolomu ŋini esyaunan kiŋa erae ŋini areŋ torae ŋinicekum a akuwan a daadaŋ ikwa elou amesek a ŋinacekum, tolimokinae ŋin ekiro Esau. 26Ekaku tolomu lokaato keŋ ikamunit atotinyo a Esau; ŋun alimokinere ekiro keŋ Yakob. #25:26 Yakob A Ŋaburaniyae Yakob iŋes atemar ikamunit atotinyo Arae ŋikaru a Isaka ŋatomonikanikapei apaki ŋina edounere Esau ka Yakob.

27Ani epolounete ŋidyain ŋul, toruwor Esau ŋolo ayeni nooi erika anariet. Nai Yakob arae ituŋanan ŋini eapara, ŋini anait akiboi aloeemae. 28Amina Isaka Esau aŋuna araakar ŋolo aarununui ŋityaŋ; nai amina Rebeka Yakob.

Kitaya Esau Yakob apolou ŋina araakar iŋes ekiyae.

(Ŋibur. 12:16)

29Apeikoloŋit ikulae Yakob ŋapoko, bu Esau anariet eupit. 30Tema neni a Yakob, “Kimyekinae ayoŋ emuj ŋapoko ŋuna areŋak ŋun ŋadi, anerae akaupit ayoŋ nooi.” (ŋun iŋes aponere tonyarae iŋes Edom.) 31Tema Yakob, “Inakinae mono ayoŋ apolou ŋina iraakar iyoŋ ekiyae.” 32Tema Esau, “Eapi ayoŋ atwanare, anijokis eyai ayoŋ aŋuna ka apolou alokal?” 33Tema Yakob, “Kikoŋ mono neni kaŋ.” Aŋun, abu Esau kikoŋ neni a Yakob, ido inak apolou ŋina araakar iŋes ekiyae neni a Yakob. 34Inak nai Yakob Esau amugati ka ŋapoko ŋuna ekulae iŋes ŋuna ke emaret a ŋolo enyaritae ekao. Kimuj Esau ka tomat, tonyou kipasaiya. Apotu ŋun inakis Esau atwaniyar apolou ŋina araakar iŋes ekiyae.

Currently Selected:

Akisy. 25: NIB2008

Highlight

Copy