Akisy. 21

Akidouno a Isaka

(Ŋibur. 11:11)

1Abu Ekapolon kiterereŋ Sara ikwapei sek eikinitor, ido abu kitiyak neni a Sara ŋuna aris kiik iŋes. 2Topoti Sara, kidou ikoku ŋinisapat, ŋini abu Aburaam toryamu aneni a Sara, toris kemojoŋ. Arae ŋin apaki ŋina sek aris Akuj kelimoki Aburaam. 3Tolimok Aburaam lokoku keŋ ŋolo auruuni Sara ekiro Isaka. 4Ani edolete ŋirwa a Isaka ŋikanikauni, kileŋer Aburaam iŋes ikwapei sek ecikitor Akuj iŋes. 5Arae ŋikaru ka Aburaam amiat apaki ŋina edounere Isaka. 6Tosodi Sara tolimu tema, “Akainaki Akuj ayoŋ alelyanu ka akyena; ido ekyeniyete kaapei ka ayoŋ daadaŋ ŋulu iirarete nu.” 7Kiŋis nabo Sara bon tema, “Kerae mono ŋae elimokinit Aburaam atemar epedori Sara akitanak ŋidwe? Nai tokona, edou ayoŋ ikoku ŋinisapat kemojoŋ Aburaam.”

Kiritarae Agar ka Isimael

(Ŋigal. 4:21-30)

8Topolou ikoku kitapalikinae akinak. Ani akoloŋit ŋina etapalikinere iŋes akinak, kitiya Aburaam ŋasuban ŋuna apolok nooi. 9Apaki ŋin, kiŋolik Sara lokoku ka Aburaam ŋolo auruuni Agar ŋina arae Ajipitanoit ebolyasi ka Isaka lokoku keŋ. 10Tolimok iŋes Aburaam tema, “Kirita apito na ka lokoku keŋ, anerae nyepedori lokoku ka apito akirum ŋiboro kon kaapei ka lokoku kaŋ Isaka.” 11Tonomosi Aburaam ŋakiro ŋun etau aŋuna a lokoku keŋ. 12Nai tema Akuj neni ka Aburaam, “Nyikinomosi etau ŋakiro a edya ka apito; ŋuna daadaŋ ikilimokini iyoŋ Sara, kitiya ikwapei ikilimokinia iŋes iyoŋ, anerae erae neni a Isaka iŋes iryamunia iyoŋ ŋiletok ŋulu ekeik ayoŋ iyoŋ. 13Lokoku ka apito daŋ, eturuwori ayoŋ ŋituŋa keŋ ŋulu ka akwap kec bon, anerae erae iŋes ikoku kon.” 14Tonyou Aburaam taparacu sek, ya ŋamugati ka ŋakipi eya lolou a ibarasit ŋolo aeniunitae erae ecwee a ŋakipi, inak Agar kitanapik loseketa keŋ kaapei ka ikoku, ido kitolot iŋes. Torotok Agar, kirim analoŋisat a ŋina alo Beeriseba.

15Ani edaun ŋakipi ŋuna atiŋit iŋes alolou a ibarasit, tolacak Agar ikoku namoni ace. 16Tolot kiboikin epeiwae ikoku neni alwana iwadio, neni arae ŋimitae amiat, anerae abu iŋes tema, “Nyemaikina ayoŋ eŋolik iridakini ikoku.” Apaki ŋina eboiyo Agar a epeiwae ikoku, kiworou nooi kigwor. 17Kiira Akuj etoil a idya, tonyara emalaika ka Akuj Agar anakuj, tolimok iŋes tema, “Anukiro ikiryebete iyoŋ Agar? Nyikibul, anerae eira Akuj etoil a idya aneni sek iesikinia iyoŋ iŋes. 18Tonyou, ape, todaku idya kiricak iŋes ejok, anerae etolomuni ayoŋ aneni keŋ ŋituŋa ŋulu alalak.” 19Kisiŋolik nai Akuj Agar akare ŋina aya ŋakipi, tolot Agar kilelebik ŋakipi lolou ŋolo sek atiŋitor iŋes ŋakipi, ido inak idya tomat.

20Abu Akuj kiŋarak idya, topolou iŋes, kiboi analoŋisat, toyenik nooi akisitiya ŋikaleŋeleŋe. 21Kiboi iŋes analoŋisat a ŋina a Paran, toryamik toto keŋ iŋes aberu anakwap a ŋina a Ijipit.

Tocamunos Aburaam ka Abimelek

22Apaki ŋin, temasi Abimelek ka Pikol ŋolo arae ekapolon a ŋasigarya keŋ neni ka Aburaam, “Irukito iyoŋ ka Akuj alotooma daadaŋ ŋuna itiyae iyoŋ. 23Kikoŋ tokona a ne neni kaŋ alokiro ka Akuj atemar nyikimodikini iyoŋ ayoŋ, kori ŋidwe kaŋ, kori ŋituŋa kaŋ. Kikoŋ lopite ŋolo ekoŋio ayoŋ neni kon alotooma arimao. Kitiya ŋun neni kaŋ ka nakwap na ŋina idaunia iyoŋ akiboiyo irae egela.” 24Tema Aburaam, “Ekoŋi ayoŋ ŋun.”

25Ani iŋisi Aburaam Abimelek ŋakiro ka akare a ŋina kepotu ŋiketiyak ka Abimelek todemasi iŋes, 26tema Abimelek, “Nyayeni ayoŋ ituŋanan ŋini kebu kitiya ŋun; nabo nyelimokina iyoŋ ayoŋ ŋun, nyiirara daŋ aneni a ice, nai akiirar na.” 27Tolemu Aburaam ŋamesekin ka ŋimoŋin inak Abimelek, tocamunos nai ikes ŋiarei make. 28Kipaka Aburaam alosipan a ŋamesekin ŋakaalei ŋakanikaarei nawae. 29Kiŋit Abimelek Aburaam tema, “Nyo apolou ipakaritor iyoŋ ŋakaalei nu ŋakanikaarei nawae make?” 30Tema Aburaam, “Kijaa ŋakaalei nu ŋakanikaarei anakan kaŋ, ikotere eruwor nu esuuda ebe, abu ayoŋ obok akare na.” 31Aŋun, aponi tolimokinae ekiro ka akibois a ŋin “Akare Beeriseba”, #21:31 Beeriseba A Ŋaburaniyae, Beeriseba iŋes atemar akare ŋina ikoŋere anerae apotu ŋuluarei ŋul kikoŋo a nen. 32Ani kedaut Abimelek ka Aburaam acamun alo Beeriseba, toboŋosi Abimelek ka Pikol ŋolo apolokinit ŋasigarya ka Abimelek, toloto nakwap a Ŋipilistin. 33Todupak Aburaam ekitoe ŋolo ikwaan ka ekwaakwaa Beeriseba, ido tonyara a nen ekiro ŋolo ke Ekapolon, Akuj ŋina a ŋikaru ka ŋikaru. 34Kiboi Aburaam anakwap a Ŋipilistin apaki ŋina aoyan arae ituŋanan ŋinigela.

Currently Selected:

Akisy. 21: NIB2008

Highlight

Copy