Akisy. 20

Aburaam ka Sara alo Gerar

1Towotok Aburaam alo Mamure, kidir lowae ŋolo a Negeb, tolom Gerar kidiŋ Kades ka Sur. Ani eriŋa iŋes iboi a nen erae egela, 2abu Aburaam tolimu atemar, erae aberu keŋ Sara nakaato keŋ. Ŋun nai abunio Abimelek erwosit ŋolo a Gerar kiyakiyarya ŋituŋa yaut Sara neni keŋ. 3Nai, abu Akuj bu neni ka Abimelek anakiruja nakwaare, tolimok iŋes tema, “Kiira, eapi iyoŋ atwanare aŋuna ka aberu a ŋina iya iyoŋ, anerae erae iŋes aberu ŋina iitit.” 4Apaki ŋin, ariŋa Abimelek nyeloto aanyun aberu ŋin, aŋun, abu iŋes tema, “Okoe Ekapolon, imunyari kire iyoŋ ŋituŋa ŋulu emam aronis itiyato a? 5Meere mono Aburaam abu tema erae aberu na nakaato keŋ a? Iŋes daŋ alope abu tolimu tema, erae iŋes lokaato kaŋ. Abu ayoŋ etiya ŋun ayeni atemar eyookinit ka emam ŋuna aronok ŋuna etiyat ayoŋ.” 6Tolimok Akuj iŋes anakiruja tema, “Ee, ayeni ayoŋ atemar ibu iyoŋ kitiya ŋun iyeni atemar iyookinit ka abu ayoŋ ekeretak iyoŋ nyisec aneni kaŋ. Aŋakiro a ŋun, abu ayoŋ nyakacamak iyoŋ itapi iŋes. 7Kinyaka tokona aberu a ituŋanan, anerae erae ekile aberu a na ekadwaran, ikilipakini iŋes iyoŋ, ido toyar. Nai ani pa kinyaka iyoŋ iŋes, kire jik, itwani iyoŋ; iyoŋ ka ibore kon daadaŋ ŋini eyari.”

8Aŋun, tonyou Abimelek taparacu sek, tonyarau ŋiketiyak keŋ daadaŋ, tolimok ikes ŋakiro ŋun daadaŋ, ido apotu ŋakiro ŋun inakis ŋiketiyak ŋul ekabule. 9Tonyarau Abimelek Aburaam kiŋit tema, “Anukiro nu, ŋuna itiya iyoŋ neni kosi? Alipite aseca ayoŋ aneni kon, ŋolo iyaunia iyoŋ akiilit ŋina apolon neni kaŋ ka nakwap kaŋ? Itiya iyoŋ neni kaŋ ŋuna nyemaikina kitiyakin.” 10Kiŋit nabo Abimelek Aburaam tema, “Anukiro itami iyoŋ apaki ŋin, ŋuna itiyakinia iyoŋ ŋun daadaŋ?” 11Tema Aburaam, “Abu ayoŋ etiya ŋun, anerae atamakinit ayoŋ atemar nyekerito jik ŋituŋa anakibois a na Akuj, ido epedorete ikes akiar ayoŋ aŋuna ka aberu kaŋ; 12meere ŋun bon, erae kire jik iŋes nakaato kaŋ, nakoku a papa kaŋ, nai meere nakoku a toto kaŋ; abu ayoŋ eturuwo iŋes aberu kaŋ. 13Abu ayoŋ olimok iŋes apaki ŋina eketuruworya Akuj ayoŋ ekawoton alokal a papa kaŋ otema, ‘Erae na ajokis ŋina emaikina iyoŋ kitiya neni kaŋ: Akibois daadaŋ ŋina edolio iwon, emaikina iyoŋ tolimok ŋituŋa a akibois a ŋin atemar erae lo lokaato kaŋ.’” 14Tolemu Abimelek ŋamesekin, ŋimoŋin, ŋipi ka ŋapi, inak Aburaam. Kinyakak Aburaam aberu keŋ Sara. 15Tema Abimelek, “Kiŋolik, akwap na daadaŋ ŋina ite iyoŋ, erae ŋina kaŋ, tolom neni ikijoikinit iyoŋ.” 16Tolimok iŋes Sara tema, “Kiira, ainak ayoŋ lokaato kon ŋisilipae aliput; ikotere eyenunete ŋituŋa daadaŋ ŋulu iboiyoto iyoŋ atemar nyisecit iyoŋ. Iteyenunete ŋul ŋituŋa daadaŋ atemar mam ŋuna aronok ŋuna itiyat iyoŋ.” 17Kilip nai Aburaam neni ka Akuj aŋuna ka Abimelek, tolema Akuj ŋilam aneni ka Abimelek ka aneni ka aberu keŋ ta aneni a ŋaberu keŋ a ŋuna pa eitit, togeut akidore, 18anerae aris Ekapolon kitojoŋ Abimelek ka ŋituŋa a ekal keŋ akidore aŋuna a Sara a aberu ka Aburaam.

Currently Selected:

Akisy. 20: NIB2008

Highlight

Copy