Awos. 8

Akisicanet ŋina a ŋaarei: Ŋakidodoka

1Tema nai Ekapolon neni a Moses, “Ape neni a Parao tolimok iŋes atemar ŋakiro ŋuna irworo Ekapolon ikes nu, kimyek ŋituŋa kaŋ toloto, ikotere ilipete neni kaŋ. 2Ani pa kicamak iyoŋ ikes toloto, ekesicani ayoŋ iyoŋ, elelebikini ŋakidodoka nakwap kon daadaŋ. 3Eburusiyarete ŋakidodoka aŋolol; epete tari kai kon ŋina ka apukan, epete tari nagule kon ka lokitaada kon. Epete tari nakais a ŋikapolok a ŋulu ipukatotor iyoŋ ka nakais ŋuna a ŋituŋa kon; epete tari lokenoi ka loboro ŋulu emunaere ŋakirya. 4Ikidokakinete iyoŋ ŋakidodoka ka edokakinete tari neni a ŋituŋa kon ka neni a ŋikapolok a ŋulu ipukatotor iyoŋ.” 5Tema Ekapolon neni a Moses, “Tolimok Aron atemar kikyaa akan keŋ etiŋit ebela keŋ alokidiama ŋaŋololin, ŋakitelesyo ka ŋataparin, ikotere tolomut ŋakidodoka a nen toyakaun nakwap a Ijipit. ” 6Aŋun, abu Aron kikyaa akan keŋ kidiama ŋakipi ŋuna aya nakwap a Ijipit; ido apotu ŋakidodoka tolomut a nen pena nakwap a Ijipit. 7Nai apotu ŋikekukujak daŋ kitiyata ŋakujuwuanisya ŋunapei ŋun aloticisyo kec a ŋulu pa apatana ayenun; kitolomut ŋakidodoka anakwap a Ijipit.

8Abu nai Parao tonyarau Moses ka Aron tema, “Kilipa neni a Ekapolon tolema ŋakidodoka aneni kaŋ ka alotuŋa kaŋ, ido emyekini ayoŋ Ŋisirael toloto kitiyata amuronot neni a Ekapolon.” 9Tema Moses neni a Parao, “Anarimao kon, tolimokinae ayoŋ apaki ŋina emaikina elipya aŋuna kon ka aŋuna a ŋikapolok a ŋulu ipukato ka iyoŋ ta ŋituŋa kon, ikotere elemaryo ŋakidodoka aneni kon ka anakais kus, kidoŋo eya naŋolol Nile bon.” 10Tema Parao, “Moi taparacu.” Tema Moses, “Etiyae ayoŋ ikwapei ilimunio iyoŋ! Aŋuna ka akitaanyun iyoŋ atemar, mam ituŋanan epedoryo akisikwaanikin ka Ekapolon Akuj kosi. 11Erotokinete ŋakidodoka aneni kon ka anakais kus aneni a ŋikapolok a ŋulu ipukatotor iyoŋ ka alotuŋa kon, nai idoŋete eyakasi naŋolol Nile bon.” 12Torotokis nai Moses ka Aron aneni a Parao; kigworonok Moses Ekapolon aŋuna a ŋakidodoka a ŋuna abu Ekapolon yau neni a Parao. 13Abu nai Ekapolon kitiya ŋuna eŋita Moses ka apotu ŋakidodoka totwaka anakais ka anenilapat alokidiŋ ŋakais ta alomanikorin. 14Totukonokis ŋituŋa ŋakidodoka ŋuna apotu kitobosut akwap ŋin tul. 15Nai ani eanyuni Parao atemar eeŋa iŋes alocan a ŋul, abu kitogogoŋ akou keŋ; nyepupok ŋakiro ŋuna erworosi Moses ka Aron ka abu kitiya lopite ŋolo sek alimunitor Ekapolon.

Akisicanet ŋina a ŋauni: Ŋilac

16Tema nai Ekapolon neni a Moses, “Tolimok Aron atemar kikyaa ebela keŋ, toram ŋalup topuruu apuwa, ikotere apuwa ŋin eruwor ŋilac anakwap a Ijipit a daadaŋ.” 17Apotu ata Moses kitiyata ŋun; abu Aron kikyaa akan keŋ etiŋit ebela keŋ, toram ŋalup topuruu apuwa ŋina abu toruwor ŋilac ŋulu apotu pena lotuŋa ka lobaren daŋ toruwor apuwa a akwap a Ijipit a daadaŋ ŋilac bon. 18Kikatakis ŋikekukujak a Ijipit aloticisyo kec a ŋulu pa apatana ayenun akitiya akujuwuanut ŋinakitolomunet ŋilac, nai apotu nyepedosi. Apotu ŋilac pena lotuŋa ka lobaren daŋ. 19Temasi ŋikekukujak neni a Parao, “Akuj etiya ŋakiro nu a akan keŋ!” Nai abu Parao torubak itogogoŋit akou keŋ, abu nyepupok ŋakiro ata Moses ka abu kitiya lopite ŋolo sek alimunitor Ekapolon.

Akisicanet ŋina a ŋaomwon: Ŋicuc

20Tema nai Ekapolon neni a Moses, “Tonyou moi taparacu eriŋa ataparacu kitoodiyar neni a Parao apaki ŋina elomarya iŋes kiŋa nakipi a aŋolol Nile, tolimok iŋes atemar ŋakiro ŋuna irworo Ekapolon ikes nu, kimyek ŋituŋa kaŋ toloto, ikotere ilipete neni kaŋ. 21Ani pa kicamak iyoŋ ikes toloto, eyakuuni ayoŋ ŋicuc ŋulu alalak nooi neni kon, neni a ŋikapolok a ŋulu ipukato ka iyoŋ, lotuŋa kon, ka nakais kus; ilelebun ŋicuc ŋulu alalak nooi nakais a Ŋijipitian ka akwap kec daadaŋ neni iboiyoto ikes. 22Nai akoloŋit ŋin, nyepete ŋicuc ŋul nakwap a Gosen, neni iboiyoto ŋituŋa kaŋ, ŋun nai ikitoodikinete iyoŋ atemar ayoŋ Ekapolon ayakar apedor anakwap. 23Eketaanyikini ayoŋ iyoŋ atyeketait ŋina eyai kidiŋ ŋituŋa kaŋ ka ŋulu kon. Etakanuni akujuwuanut ŋin moi taparacu.” 24Abu Ekapolon kitiya ŋun, toyakaun ŋicuc ŋulu alalak nooi kai a Parao ka nakais a ŋikapolok a ŋulu epukatotor iŋes, tomunaut ŋicuc akwap a Ijipit daadaŋ.

25Tonyarau nai Parao Moses ka Aron tema “Apesi inakisi amuronot neni ka Akuj kus. Kitiyata ŋun anakwap anapei a na.” 26Nai abu Moses tema neni a Parao, “Nyemaikina isua akitiya ŋun; anerae ŋamuronisya ŋuna einanakinio isua neni a Ekapolon Akuj kosi, erae ibore ŋini nyitalakarit Ŋijipitian. Ani kelemun isua ŋamuronisya ŋun, inakinae neni ke Ekapolon Akuj kosi iteete Ŋijipitian ikicakete isua Ŋijipitian a ŋamoru. 27Emaikina isua kisyakinae alosit kosi ŋina a ŋirwa a ŋiuni analoŋisat, ido oinakisi ŋamuronisya neni a Ekapolon Akuj kosi ikwapei ikicikakinitere isua.” 28Aŋun, abu Parao tema, “Ekemyekini ayoŋ iyes toloto inakis ŋamuronisya neni a Ekapolon Akuj kus analoŋisat, erae ca pa kiloto iyes neni elwana nooi. Kilipakinae ayoŋ.” 29Tema nai Moses, “Arotokin ayoŋ aneni kon bon, elipi ayoŋ neni a Ekapolon, ikotere ŋicuc torotokis moi taparacu aneni a Parao, aneni a ŋikapolok a ŋulu ipukatotor iŋes ka alotuŋa keŋ. Nai emaikina iyoŋ Parao nyilyokon, towou akimyekin Ŋisirael toloto ainakin ŋamuronisya neni a Ekapolon.”

30Aŋun, abu Moses toloma kiŋa aneni ayai Parao, ido kilip neni a Ekapolon. 31Abu nai Ekapolon kitiya lopite ŋolo eŋitar Moses: Tolema ŋicuc aneni a Parao, aneni a ŋikapolok a ŋulu epukatotor Parao ka alotuŋa a Parao; mam epei daŋ abu kidoŋ. 32Nai abu Parao apaki daŋ ŋin kitogogoŋ akou keŋ, nyecamak Ŋisirael toloto.

Currently Selected:

Awos. 8: NIB2008

Highlight

Copy