Awos. 7

1Tema nai Ekapolon neni a Moses, “Kiira, ekesikokini ayoŋ iyoŋ irworo Akuj aneni a Parao, ido eruwor lokaato kon Aron irwori aŋuna kon ikwa ekadwaran. 2Irwori iyoŋ ŋakiro daadaŋ ŋuna ekecikak ayoŋ iyoŋ, ikotere lokaato kon Aron elimokini Parao kimyek Ŋisirael toloto anakwap a Ijipit. 3Nai eturuwori ayoŋ iŋes ŋolo egogoŋ akou, ido etiyakini ayoŋ ŋakujuwuanisya ka ŋaumonokineta ŋuna alalak nakwap a Ijipit. 4Ani pa kiira Parao ŋakiro kon, atiŋi ayoŋ Ijipit neni aronon, ido oyau Ŋisirael ŋituŋa kaŋ a nen a ŋatukon esibit ajore, tolomut anakwap Ijipit anapedor kaŋ a ŋina apolon, a ŋina esicania Ijipit. 5Eyenunete Ŋijipitian atemar arae ayoŋ Ekapolon apaki ŋina esicania ayoŋ ŋituŋa a Ijipit, ido oyau Ŋisirael a nen anakwap a Ijipit.” 6Aŋun, apotu Moses ka Aron kitiyata ŋuna ecikit Akuj ikes akitiya. 7Arae ŋikaru a Moses ŋatomonikanikauni ka arae ŋikaru ka Aron ŋatomonikanikauni ka ŋiuni apaki ŋina esirworyata ikes Parao.

Ebela ŋolo ka Aron

(Awos. 4:1-5)

8Tema Ekapolon neni a Moses ka Aron, 9“Ani etemari Parao neni kus, ‘Kitiyakisi aumokinet adio,’ emaikina nai iyoŋ Moses tolimok Aron ebe, ‘Tolemu ebela kon kimasak kwap kiŋaren a Parao, ido ilocokin ebela ŋol eruwor emun. ’” 10Aŋun, apotu Moses ka Aron toloto neni a Parao, kitiyata ikwapei ecikitor Ekapolon ikes; abu Aron kimasak ebela keŋ kwap kiŋaren a Parao ka ŋulu apolok anapukan keŋ, ido abu ebela ŋol kilocokin toruwor emun. 11Ekaku a ŋun, abu Parao tonyarau ŋikaosok ka ŋikekukujak, ido apotu ŋikekukujak a Ijipit daŋ kitiyata ŋakujuwuanisya ŋuna pei ŋun aloticisyo kec a ŋulu pa apatana ayenun. 12Abu ŋinituŋanan alotooma kec kimasak ebela keŋ kwap, ido apotu toruworos ŋimuno, nai abu ŋolo ka Aron kiliko ŋulu kec. 13Tari ŋina aponiata ŋakiro kikokis nen, abu Parao kitogogoŋ akou keŋ, nyepupok ŋakiro ata Moses, lopite ŋolo alimokinitor Ekapolon ikes.

Akisicanet ŋina esyaunan: Toruworos ŋakipi ŋaokot

14Abu nai Ekapolon tema neni a Moses, “Etogogoŋ Parao akou keŋ; ewounit akimyekin Ŋisirael toloto. 15Ape neni a Parao moi eriŋa ataparacu, apaki ŋina elomarya iŋes kiŋa nakipi; a aŋolol Nile; emaikina iyoŋ towo alokipetot ka aŋolol Nile kiryamunos ka iŋes nen ka emaikina iyoŋ totiŋ ebela kon ŋolo abu kilocokin toruwor emun. 16Tema iyoŋ neni keŋ, ‘ekeyakuu ayoŋ Ekapolon Akuj a Ŋiburaniyae neni kon alimokin iyoŋ atemar kimyek ŋituŋa kaŋ toloto, ikotere ilipete neni kaŋ analoŋisat nai tari tokona iwou iyoŋ akiirar ŋakiro ŋun.’ 17Ŋakiro ŋuna irworo Ekapolon ikes nu: Iyenuni iyoŋ atemar erae iŋes Ekapolon anakiro a nu; kiŋolik, arami ayoŋ ŋakipi a Nile a ebela alo a ŋolo atiŋit, ido eruwor ŋakipi ŋaokot. 18Etwakete ŋikolya anaŋolol daadaŋ, ido ebosuni aŋolol tul, nyepedorete Ŋijipitian akimat ŋakipi a Nile nabo.” 19Tema Ekapolon neni a Moses, “Tolimok Aron ebe, ‘Ya ebela kon toramya ŋakipi ŋuna eya Ijipit: Ŋakipi a ŋaŋololin, ŋakipi a ŋakitelesyo, ŋakipi a ŋataparin ka ŋuna a ŋakare daadaŋ, ikotere ŋakipi ŋun daadaŋ toruwor ŋaokot. Epete ŋaokot neni eya ŋakipi anakwap a Ijipit daadaŋ, epete tari loboro ŋulu itiyaunitae a ŋakito ka a ŋamoru.’ ”

20Apotu Moses ka Aron kitiyata ŋun lopite ŋolo ecikitor ikes Ekapolon. Abu Aron kikyaa ebela keŋ alokiŋaren Parao ka ŋulu apolok anapukan keŋ, toram ŋakipi a aŋolol Nile, ido apotu ŋakipi daadaŋ anaŋolol toruworos ŋaokot. 21Totwaka ŋikolya anaŋolol. Tobosut ŋakipi anaŋolol tul, todaun Ŋijipitian epite ŋolomaset ŋakipi ŋun. Apotu ŋaokot toyakaun nakwap a Ijipit daadaŋ. 22Nai apotu ŋikekukujak a Ijipit daŋ kitiyata ŋakujuwuanisya ŋunapei ŋun aloticisyo kec a ŋulu pa apatana ayenun. Aŋun, abu Parao kitogogoŋ akou keŋ nyepupok ŋakiro ata Moses, lopite ŋolo alimokinitor Ekapolon ikes. 23Abu Parao toboŋo a nen, tolot kai keŋ, ido abu nyemitak tari ŋakiro ŋun daŋ alotau keŋ. 24Apotu nai Ŋijipitian daadaŋ toboka ŋakare nawaetin a aŋolol Nile aŋuna ka aryamunia ŋakipi ŋunamatan, anerae pa apedorito ikes akimat ŋakipi ŋuna aya naŋolol. 25Apotu ŋirwa ŋikanikaarei tolunyar akisyakin anakoloŋit a ŋina eturuworia Ekapolon ŋakipi a Nile ŋaokot.

Currently Selected:

Awos. 7: NIB2008

Highlight

Copy