Awos. 14
14
Akidok anam ŋina Areŋan
1Tema nai Ekapolon neni a Moses, 2“Tolimok Ŋisirael toboŋut toloma kiŋaren Piakiros, kidiŋ Migidol ka Anam ŋina Areŋan. Emaikina iyes toloma diyete anam, kiteos ka Baal-Sepon. 3Einakini nen Parao atamakin ebe, ‘Irimirimete Ŋisirael akwap pa eyenete neni lotot; eretak ikes aloŋisat.’ 4Etogogoŋi ayoŋ akou a Parao, ido ikiwuapak iyes, ikotere ayoŋ oryamu apolou anakiloun Parao ka ŋasigarya keŋ daadaŋ ka eyenunete Ŋijipitian atemar arae ayoŋ Ekapolon.” Apotu Ŋisirael kitiyata ŋun. 5Ani elimokinio erwosit a Ijipit atemar kesiwa Ŋisirael, kibelekis iŋes ka ŋulu epukatotor ŋatameta kec, temasi iŋitasi, “Nyo etiyae iwon, ŋini ikisimyek iwon Ŋisirael torotokis anakitiyanakin iwon?” 6Aŋun, abu Parao kisitemok ŋituŋa agaari keŋ ŋina iritae a ŋaŋolei, ido abu torukosi ka ŋasigarya keŋ. 7Tosyaa iŋes ŋagaari ŋamiae ŋakanikapei ŋuna iritae a ŋaŋolei ka ya ŋagaari a Ijipit ŋunace daadaŋ, kitodoka ŋikapolok ŋulu epukatotor iŋes nagaari ŋun daadaŋ. 8Abu Ekapolon kitogogoŋ akou a Parao a erwosit a Ijipit kisiwuap iŋes Ŋisirael ŋulu apotu torotokis anakwap keŋ erae ŋikelounak ŋulu alakara. 9Kiwuapakis Ŋijipitian Ŋisirael, toloto ŋaŋolei ka ŋagaari a Parao daadaŋ, ŋikametok ŋagaari keŋ daŋ ta ŋasigarya keŋ. Toditasi Ŋijipitian Ŋisirael alodiyete Anam ŋina Areŋan aneni alomito, aneni anyaritae Piakiros, alokiŋaren Baal-Sepon.
10Ani eapiyari Parao neni a Ŋisirael, kiŋoliyasi Ŋisirael kaku, kiŋolikis Ŋijipitian eponito neni kec keapuut. Kikalout Ŋisirael nooi neni ke Ekapolon, anerae abu akuryanu min neni kec. 11Kiŋita ikes Moses temasi, “Amam mono neni ikinukio isua alo Ijipit ikiyaunia iyoŋ isua atwanare a ne analoŋisat a? Anukiro nu ŋuna itiya iyoŋ neni kosi, ŋuna ikiyaunia iyoŋ isua alo Ijipit? 12Pa mono ikilimokinitae isua iyoŋ alo Ijipit ebe, ‘Kimyekinae isua make etiyanakisi Ŋijipitian a’? Ajok ro isua akitiyanakin Ŋijipitian akilo atwaniun naloŋisat.” 13Abu nai Moses toboŋok ŋituŋa tema, “Nyikuryaketa. Kicata, iŋolikinete iyes alakuno ŋina ikiinakini iyes Ekapolon nakoloŋit na. Ŋijipitian ŋul ŋulu itete iyes tokona, nyiŋolikinete nabo iyes ikes jik. 14Eji Ekapolon aŋuna kus; emaikina iyes tolemasi akuryanu bon aneni kus.”
15Kiŋit nai Ekapolon Moses tema, “Kaanukiro ikigworonokinio iyoŋ ayoŋ? Tolimok Ŋisirael torubakis elosete kiŋaren. 16Kikyaa akan kon kidiama anam itiŋit ebela kon, ikotere etyakasi ŋakipi ananam kitoro Ŋisirael neni eonit, todokasi yaye anam. 17Etogogoŋi ayoŋ ŋakyes a Ŋijipitian, tolomasi nanam kiwuapakis Ŋisirael. Eketopoloorete ayoŋ Parao ka ŋasigarya keŋ daadaŋ; ŋikametok ŋagaari keŋ ka ŋikametok ŋaŋolei keŋ. 18Eyenunete Ŋijipitian atemar arae ayoŋ Ekapolon apaki ŋina eketopolooryata ayoŋ Parao ka ŋagaari keŋ ta ŋikametok ŋaŋolei keŋ.”
19Abu nai emalaika ka Akuj ŋolo sek eŋarenikinit ajore a Ŋisirael toboŋo kaku ajore. Toboŋo adis daŋ kaku towo alokaku ajore a Ŋisirael, 20alokidiŋ ajore a Ŋijipitian ka ŋina a Ŋisirael, akuwar kya abu adis ŋin yau akiryonut lowae ŋolo a Ŋijipitian ka akica lowae ŋolo a Ŋisirael; apotu ŋajorei ŋun nyeapikin akuwar daadaŋ. 21Kikyaa nai Moses akan keŋ kidiama Nanam, ido abu Ekapolon akuwar ŋin daadaŋ totub ŋakipi ananam, kitoon nen a ekuwuam a ŋolo akutunit alo Kide. 22Tolomasi Ŋisirael Nanam ŋina Areŋan, kitoro neni aonit. Arounito ikes ŋakipi aloteten ka alokedyeny esibit ŋarwatatain. 23Kiwuapakis Ŋijipitian ikes, tolomasi Nanam ŋina Areŋan, tolomasi ŋaŋolei, ŋagaari ka ŋikametok ŋagaari a Parao daadaŋ Nanam. 24Ani eapuuni akiwalar, toripiu Ekapolon kwap anadis ka anarira, kiŋolik ŋasigarya a Ŋijipitian, kisibiler ikes. 25Tomunana ŋakejen a ŋagaari kec, nyitepedo Ŋijipitian amyaar ikes. Temasi nai Ŋijipitian, “Oema aneni a Ŋisirael! Iŋarakinit Ekapolon Ŋisirael akitijiore iwon Ŋijipitian.”
Kitamata ŋakipi Ŋijipitian
26Tema nai Ekapolon neni a Moses, “Kikyaa akan kon kidiama Nanam, ikotere imorikinosi ŋakipi kitamata Ŋijipitian kaapei ka ŋikametok ŋagaari, tosiposi ŋagaari kec alokidiŋ Anam.” 27Aŋun, abu Moses kikyaa akan keŋ kidiama Nanam, ani ereŋuni akide iwalari, kilelyakin ŋakipi lopite ŋolopei sek ayakatar nanam. Ani eemete Ŋijipitian alokidiŋ anam aneni aonit, tomunya Ekapolon Ŋijipitian a Nanam. 28Toboŋokis ŋakipi ayakau lopite ŋolopei sek ayakatar, toburusiyasi ŋagaari ka toara ŋikametok kec kaapei ka ŋasigarya a Parao daadaŋ ŋuna sek ewuapito Ŋisirael alokidiŋ Anam, mam ipei daŋ abu kidoŋ. 29Nai apotu Ŋisirael todoka Anam eonit neni alosyoto ikes ka erounito ikes ŋakipi esibit ŋarwatatain aloteten ka alokedyeny kec.
30Abu Ekapolon toiu Ŋisirael akoloŋit ŋin anakan a Ŋijipitian. Kiŋolikis Ŋisirael Ŋijipitian ileeuyete etwakito alokipetot ka Anam. 31Ani iŋolikinete Ŋisirael apedor ŋina apolon ŋina abu Ekapolon kitoodik Ŋijipitian, apotu Ŋisirael tokera Ekapolon, ido kikinyoma iŋes ka Moses eketiyan keŋ.
Currently Selected:
Awos. 14: NIB2008
Highlight
Share
Copy
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.
