Awos. 13

1Tema Ekapolon neni a Moses, 2“Kitaleu ŋikiyae ŋulusapa neni kaŋ. Isapat daadaŋ ŋini aŋaari akook a Asiraelit, kori ibarasit ŋini kiyae alobaren kus erae ŋini kaŋ.”

Ŋasuban a ŋamugati a ŋuna emam ŋakinyalet

(Awos. 12:14-20)

3Tema nai Moses neni a Ŋisirael, “Totamunito akoloŋit na, akoloŋit ŋina iponiata iyes anakwap a Ijipit, aneni iboiyoto irae ŋipi. Abu Ekapolon ikiyau iyes a nen a apedor keŋ, nyemaikina iyes tonyama amugati adio ŋina eya ŋakinyalet akoloŋit ŋin. 4Nakoloŋit na, elap lo ŋolo enyaritae Abib, irotokinete iyes anakwap a na. 5Ani ikitodoli iyes Ekapolon nakwap a Ŋikanaani, a Ŋiitaiti, a Ŋiamori, a Ŋiipi ka a Ŋiyebusi, nakwap ŋina abu iŋes kikoŋ neni atapapaa kus ainakin iyes, nakwap ŋina elelyaata ŋakile ka ao emaikina iyes totamununuyete akitiya ŋasuban nu elap lo. 6Tonyama ŋamugati ŋuna emam ŋakinyalet ŋirwa ŋikanikaarei, ani edoli akoloŋit ŋina a ŋakanikaarei ŋin, kitiyata ŋasuban neni ke Ekapolon. 7Tonyama ŋamugati ŋuna emam ŋakinyalet ŋirwa ŋikanikaarei; nyemaikina kiŋolikinae amugati adio ŋina eya ŋakinyalet iyakatar iyes. Nyemaikina kiŋolikinae ŋakinyalet ŋadi anakwap kus. 8Emaikina ŋinituŋanan tolimok ikoku keŋ akoloŋit ŋin ebe, ‘Itiyao nu aŋuna abu Ekapolon kitiya neni kaŋ apaki ŋina abunio ayoŋ anakwap a Ijipit.’ 9Emaikina nu totakana aneni kus ikote emacar ŋolo inapete iyes anakan kus ka anakyes kus erae akisiitunet, ikotere nyikimuryakis iyes ŋakiro ŋuna abu Ekapolon kitatam, anerae abu Ekapolon ikiyau iyes a apedori keŋ anakwap a Ijipit. 10Emaikina iyes totamunito akitiya etal lo anapaki a ŋina emaikina kitiyaere a ŋolokaru.

Kitaleunoe ŋikiyae

11“Ani kedau Ekapolon ayaun iyes nakwap a Ŋikanaani, ikiinak iyes akwap ŋin lopite ŋolo adaunia iŋes akikoŋ ainakin atapapaa kus ka iyes, 12emaikina iyes totyakasi aŋuna ke Ekapolon, ŋikiyae daadaŋ ŋulu a ŋibaren kus ŋulu erae ŋimoŋin, emaikina ŋul toruwor ŋulu ke Ekapolon. 13Nai kilokonyutu a ŋamesekin ŋikiyae a ŋisigirya aneni ka Akuj, ani pa kilokonyunete, kiyera emosiriŋ tobila. Kilokonyutu aneni ka Akuj ŋidwe kus ŋulusapa ŋulukiyae daadaŋ. 14Ani momit kikiŋit iyoŋ ikoku kon ebe, ‘Nyo apolou a ŋasuban a nu?’ Toboŋok iyoŋ iŋes ebe, ‘A apedori a ŋina ke Ekapolon, abu iŋes ikiyau isua alo Ijipit, anapitoonut. 15Apaki ŋina eredakinia Parao awoun akimyekin isua tolotoi, abu Ekapolon toar ŋikiyae daadaŋ anakwap a Ijipit, akisyakin alokiyae a ŋituŋa tari lokiyae a ŋibaren. Aŋun, ainakini ayoŋ amuronot ŋina a ŋibaren a ŋulukiyae neni ke Ekapolon. Nai ŋikiyae kaŋ daadaŋ ŋulusapa, emaikina elokonyu aneni ka Akuj.’ 16Emaikina nu totakana aneni kus ikote emacar ŋolo inapete iyes anakan kus ka erae akisiitunet atemar abu Ekapolon ikiyau isua alo Ijipit a apedori keŋ.”

Adis ka arira

(Awos. 40:34-38; Ekim. 9:15-23; 1 Ŋirw. 8:10-11)

17Ani imyekini Parao Ŋisirael toloto, abu Akuj nyisitor ikes lorot ŋolo itori nakwap a Ŋipilistin, tari daŋ ŋina araakar erot ŋolo aapi ŋol; anerae abu Akuj totamak ebe, “Ani kitijikin ŋituŋa lu epedorete akilocokin ŋatameta kec toboŋosi Ijipit.” 18Aŋun, abu Akuj kisitor ikes lorot ŋolo pa acorot ŋolo etorit naloŋisat tomia nanam ŋina Areŋan. Apotu Ŋisirael kitipeut alo Ijipit etiŋito ŋiboro ŋulu ke ejie etenito ejie. 19Ya Moses ŋakoyo a Yosepu alo Ijipit, anerae aris Yosepu kisikoŋ Ŋisirael kitiyata ŋun. Aris ketema neni kec, “ Kire jik, ikiŋarakini iyes Akuj, ido emaikina iyes yaa ŋakoyo kaŋ itipeiyorete anakibois a na.” 20Torotokis Ŋisirael alo Sukos tolomiyasi Esam nalomaret naloŋisat. 21Ani elosete Ŋisirael naparan, eŋarenikinit Ekapolon ikes esibit adis eyai kiŋaren kec itoodikinit ikes nenikitoro. Ani nakwaare, eŋarenikinit Ekapolon ikes esibit arira itoodikinit ikes nenikitoro, ikotere ikes epedorete alosit naparan ka nakwaare. 22Ayai adis naparan, kori arira nakwaare neni ewuakinit Ekapolon iŋarenikinit Ŋisirael.

Currently Selected:

Awos. 13: NIB2008

Highlight

Copy